Nɔ̀ɓà 26 - Ɓǎsɔ́ɔ̀ Báɓòɔ̀

Éézùɖùɛ̀-nyɔ̀ ɓěɔ̀ zɛɖɛ-zɛɖɛɔ̀ sɔ̃́ nììn

¹ Ti ɓɛ́ wɛ́ nyìnììn dyíinɔ̀ ɖǎ ma Éézùɖùɛ̀-nyɔ̀ ɓěɔ̀ kɔ̃ sɔ̀ɛɛ, Bounɓoɔ̀ cɛ̃ɛ ma Mózè kè Ɛ̀ɖɛ̀ázà mɔ̀à Eɖóúnɛ̀ dyú-gàà ɓɛ́ ɔ mɔ̀à sáa-zà-nyɔ̀ vɛ̀nɛ̀ɔ̀ kɛɛ gbo, ké ɔ ɖá,

² “Ɓě zɛɖɛ Éézùɖùɛ̀-gàà séín ɓě ɓɛ́ wa nyuá zɔ̃ kpáɖá-nyɔ mɔɔ zi kɔ̃, ké wa ɓɛ́ìn to gbo muɛ kɛ. Ɓě mɛ zɛɖɛ wa dyììn ɖé waà ɓǎà gbǒ-xwíníín ɓěɔ̀ mú.”

³ Ké Mózè kè Ɛ̀ɖɛ̀ázà mɔ̀à sáa-zà-nyɔ̀ vɛ̀nɛ̀ɔ̀ kɛɛ cɛ̃ɛ ma Éézùɖùɛ̀-nyɔ̀ ɓěɔ̀ nyɔ vɛ̀nɛ̀ ɓěɔ̀ gbo ɖé Móà-ɓòɖòɔ̀ bɔɔ-kpàɔ̀ kɔ̃, ɖé Jɔ́nì-nìɔ̀ wĩín, ɖé Jɛ́ɖèkóò-hwɔ̀ɖɔ̀ɔ̀ gbɔ, ké wa ɖá,

⁴ “Ɓě zɛɖɛ Éézùɖùɛ̀-gàà ɓě ɓɛ́ wa nyuá zɔ̃ kpáɖá-nyɔ mɔɔ zi kɔ̃ɛ.” Ké wa nyuɛ ma kà Bounɓoɔ̀ nyuɛ ma kà Mózè gbo cɛ̃ɛ kɛ. Éézùɖùɛ̀-nyɔ̀ ɓě ɓɛ́ wa sɔ̀ ma kà ɖé Íjè-ɓòɖòɔ̀ kɔ̃ɛɛ kɛà kɛ̀.

⁵ Wuɖuɓíín mɔ̀à Éézùɖùɛ̀ɛ̀ nyíɔ́-dyùɔ̀ kɛɛ gbǒ-xwíníín ɓěɔ̀ mɔ̀ Hánɔ̀ nììn gbǒ-xwíníínɔ̀ kè Páɖù nììn gbǒ-xwíníínɔ̀

⁶ kè Hɛ́wɔ̀ɖɔ̀ùn nììn gbǒ-xwíníínɔ̀ ɔ kè Kámì nììn gbǒ-xwíníínɔ̀.

⁷ Kǎà gbǒ-xwíníín séín nì ɖé Wuɖuɓíín nììn xwéɖé-dùɔ̀ múɛɛ nyu jĩ̀ɛ̀. Wa séín poìn dyí mɔ̀ nyɔ-kpò táázĩ̀ìn kpáɖá-nyɔ sɔ̃́ sè tã kè hɔ̃dɛ̀ɖɛ̀ mɛ̀nɛ̌ìn-sɔ̃́ kè kpáɖá-nyɔ ɓaɖa-bùè.

⁸ Páɖù nììn dyú-gàà mɔ̀ Ɛ̀ɖíà.

⁹ Ké Ɛ̀ɖíà nììn dyú-gàà ɓěɔ̀ mɔ̀ Nɛ̀múè kè Dáfàùn ɔ kè Àbíwàɖàùn. Dáfàùn kè Àbíwàɖàùn mɔ̀ nyɔ ɓěɔ̀ nyɔ vɛ̀nɛ̀ ɓě ɓɛ́ wa ɖú ma kà Mózè kè Eɖóún dúi jɛ̀ìn kpàǐ ɖé Kówàɖàà nyɔ kúɖúú ɓěɔ̀ hwìɛ̀ ti ɓɛ́ wa wùɖùìn ma kà Bounɓoɔ̀ ɖeiɛ.

¹⁰ Ké ɓóɖó-kpàɔ̀ ɓáà ma kà wɔ̃, ké ɔ mana ma kà wa kè Kówàɖà, ké wa séín mɛ́ ma kà kɛ̀. Ɔ mɔ̀ ti ɓɛ́ nyɛɔ̀ fɔ̃ ma kà gàa hɔ̃dɛ̀ɖɛ̀ sɔ̃́ kè kpáɖá-nyɔ sɔ̃́ ɓaɖa-bùèɔ̀ kɛ̀. Ké ɖɛ ɓě nìà kɛ mɔ̀ ma kà dyú-náún-pòìn-ɖɛ̀ kɛ̀.

¹¹ Kɛɛ wɛ̃́ɛ́ kɛɛ, Kówàɖàà dyú-gàà ɓěɔ̀ se ma mɛ́.

¹² Símìɔ̀ nììn gbǒ-xwíníín ɓěɔ̀ kɛà kɛ̀: Nɛ̀múè nììn gbǒ-xwíníínɔ̀ kè Jámì nììn gbǒ-xwíníínɔ̀ kè Jákììn nììn gbǒ-xwíníínɔ̀

¹³ kè Zɛ́wàɖà nììn gbǒ-xwíníínɔ̀ ɔ kè Sádyù nììn gbǒ-xwíníínɔ̀.

¹⁴ Kǎà gbǒ-xwíníín séín nì ɖé Símìɔ̀ nììn xwéɖé-dùɔ̀ múɛɛ nyu jĩ̀ɛ̀. Wa séín poìn dyí mɔ̀ nyɔ-kpò táázĩ̀ìn kpáɖá-nyɔ sè sɔ̃́ kè hɔ̃dɛ̀ɖɛ̀ sɔ̃́.

¹⁵ Gáà nììn gbǒ-xwíníín ɓěɔ̀ kɛà kɛ̀: Zɛ́fɔ̀ùn nììn gbǒ-xwíníínɔ̀ kè Hágì nììn gbǒ-xwíníínɔ̀ kè Súnì nììn gbǒ-xwíníínɔ̀

¹⁶ kè Ózìnì nììn gbǒ-xwíníínɔ̀ kè Éwìɖì nììn gbǒ-xwíníínɔ̀

¹⁷ kè Àwóɖóɖì nììn gbǒ-xwíníínɔ̀ ɔ kè Àwéɖéɖì nììn gbǒ-xwíníínɔ̀.

¹⁸ Kǎà gbǒ-xwíníín séín nì ɖé Gáà nììn xwéɖé-dùɔ̀ múɛɛ nyu jĩ̀ɛ̀. Wa séín poìn dyí mɔ̀ nyɔ-kpò táázĩ̀ìn kpáɖá-nyɔ sɔ̃́ kè hɔ̃dɛ̀ɖɛ̀ hm̀m̌.

^19-21 Júɖà nììn gbǒ-xwíníín ɓěɔ̀ kɛà kɛ̀: Séɖà nììn gbǒ-xwíníínɔ̀ kè Pɛ́wɛ̀ɖɛ̀ nììn gbǒ-xwíníínɔ̀ ɔ kè Zɛ́wàɖà nììn gbǒ-xwíníínɔ̀. Ké Pɛ́wɛ̀ɖɛ̀ nììn gbǒ-xwíníín ɓěɔ̀ mɔ̀ Hɛ́wɔ̀ɖɔ̀ùn nììn gbǒ-xwíníínɔ̀ kè Hámù nììn gbǒ-xwíníínɔ̀. Júɖà ɓéɖé ma dyú-gàà sɔ̃́ ɖò ɖe, kɛɛ wa mɛ́ìn ma ɖé Kénà-ɓòɖòɔ̀ kɔ̃. Waà nyɛ́nɛ́ mɔ̀ ma Ɛ́ɛ̀ kè Ónà.

²² Kǎà gbǒ-xwíníín séín nì ɖé Júɖà nììn xwéɖé-dùɔ̀ múɛɛ nyu jĩ̀ɛ̀. Wa séín poìn dyí mɔ̀ nyɔ-kpò táázĩ̀ìn kpáɖá-nyɔ tã ɓaɖa-bùè sè mɛ̀nɛ̌ìn-ɖò kè hɔ̃dɛ̀ɖɛ̀ hm̀m̌.

²³ Ɛ́sàkà nììn gbǒ-xwíníín ɓěɔ̀ kɛà kɛ̀: Tóɖà nììn gbǒ-xwíníínɔ̀ kè Púà nììn gbǒ-xwíníínɔ̀

²⁴ kè Jásù nììn gbǒ-xwíníínɔ̀ ɔ kè Sĩ́wɔ̀nɔ̀ nììn gbǒ-xwíníínɔ̀.

²⁵ Kǎà gbǒ-xwíníín séín nì ɖé Ɛ́sàkà nììn xwéɖé-dùɔ̀ múɛɛ nyu jĩ̀ɛ̀. Wa séín poìn dyí mɔ̀ nyɔ-kpò táázĩ̀ìn kpáɖá-nyɔ tã sè hĩinyɛ kè hɔ̃dɛ̀ɖɛ̀ tã.

²⁶ Zɛ́ɓíúɖɔ̀ùn nììn gbǒ-xwíníín ɓěɔ̀ kɛà kɛ̀: Sɛ́wɛ̀ɖɛ̀ nììn gbǒ-xwíníínɔ̀ kè Éɖɔ̀ùn nììn gbǒ-xwíníínɔ̀ ɔ kè Jáɖèò nììn gbǒ-xwíníínɔ̀.

²⁷ Kǎà gbǒ-xwíníín séín nì ɖé Zɛ́ɓíúɖɔ̀ùn nììn xwéɖé-dùɔ̀ múɛɛ nyu jĩ̀ɛ̀. Wa séín poìn dyí mɔ̀ nyɔ-kpò táázĩ̀ìn kpáɖá-nyɔ tã kè hɔ̃dɛ̀ɖɛ̀ hm̀m̌.

²⁸ Jòséɛ̀ dyú-gàà ɓě mɔ̀à Mànásì kè Ífèɖèìn kɛɛ nììn xwéɖé-dù ɓěɔ̀ kɛà kɛ̀.

²⁹ Mànásìɛ̀ nyúà-dyú mɔ̀ Gíɖèà kɔ̃̀ ɓǎ mɔ̀ ma Mákì kɛɛ nììn gbǒ-xwíníín ɓěɔ̀ kɛà kɛ̀:

³⁰ Jézɛ̀ nììn gbǒ-xwíníínɔ̀ kè Héɖɛ̀kì nììn gbǒ-xwíníínɔ̀

³¹ kè Àsíɖíè nììn gbǒ-xwíníínɔ̀ kè Sɛ́kɛ̃̀ìn nììn gbǒ-xwíníínɔ̀

³² kè Sɛ̀míɖà nììn gbǒ-xwíníínɔ̀ ɔ kè Héfɛ̀ nììn gbǒ-xwíníínɔ̀.

³³ Kɛɛ Zɛ̀ɖàfɛ́hà ɓɛ́ ɔ mɔ̀ ma Héfɛ̀ɛ̀ dyú-gàà kɛɛ mɔ̀ùn se ma gàa-dyù ɖò wóɖóìn, ɔ sèìn màa-dyù saá-saá. Ké Zɛ̀ɖàfɛ́hàà dyú-màà ɓěɔ̀ nyɛ́nɛ́ mɔ̀ Máhàɖà kè Nóà kè Hágàɖà kè Míókà ɔ kè Tízà.

³⁴ Kǎà gbǒ-xwíníín séín nì ɖé Mànásì nììn xwéɖé-dùɔ̀ múɛɛ nyu jĩ̀ɛ̀. Wa séín poìn dyí mɔ̀ nyɔ-kpò táázĩ̀ìn kpáɖá-nyɔ sɔ̃́ ɓaɖa-bùè sè sɔ̃́ kè hɔ̃dɛ̀ɖɛ̀ mɛ̀nɛ̌ìn-sɔ̃́.

³⁵ Ífèɖèìn nììn gbǒ-xwíníín ɓěɔ̀ kɛà kɛ̀: Sùfɛ́ɖà nììn gbǒ-xwíníínɔ̀ kè Bɛ́kɛ̀ nììn gbǒ-xwíníínɔ̀ kè Táhàùn nììn gbǒ-xwíníínɔ̀

³⁶ ɔ kè Éwàɖàùn ɓɛ́ ɔ mɔ̀ ma Sùfɛ́ɖàà kɛɛ nììn gbǒ-xwíníínɔ̀.

³⁷ Kǎà gbǒ-xwíníín séín nì ɖé Ífèɖèìn nììn xwéɖé-dùɔ̀ múɛɛ nyu jĩ̀ɛ̀. Wa séín poìn dyí mɔ̀ nyɔ-kpò táázĩ̀ìn kpáɖá-nyɔ ɓaɖa-bùè sè sɔ̃́ kè hɔ̃dɛ̀ɖɛ̀ hm̀m̌. Kǎà Jòsé nììn dyú-gàà ɓěɔ̀ xwéɖé-dù ɓěɔ̀ gbǒ-xwíníín ɓěɔ̀ jè nyu nìɛ̀.

³⁸ Bɛ̃́címà nììn gbǒ-xwíníín ɓěɔ̀ kɛà kɛ̀: Bɛ́ɖà nììn gbǒ-xwíníínɔ̀ kè Ásíɓèò nììn gbǒ-xwíníínɔ̀ kè Àhíwàɖàùn nììn gbǒ-xwíníínɔ̀

³⁹ kè Súfàùn nììn gbǒ-xwíníínɔ̀ ɔ kè Húfàùn nììn gbǒ-xwíníínɔ̀.

⁴⁰ Ké Bɛ́ɖà nììn gbǒ-xwíníín ɓěɔ̀ mɔ̀ Áɖì nììn gbǒ-xwíníínɔ̀ kè Néémà nììn gbǒ-xwíníínɔ̀.

⁴¹ Kǎà gbǒ-xwíníín séín nì ɖé Bɛ̃́címà nììn xwéɖé-dùɔ̀ múɛɛ nyu jĩ̀ɛ̀. Wa séín poìn dyí mɔ̀ nyɔ-kpò táázĩ̀ìn kpáɖá-nyɔ sɔ̃́ sè hm̀m̌ kè hɔ̃dɛ̀ɖɛ̀ mɛ̀nɛ̌ìn-ɖò.

⁴² Dɛ̃́ìn ɓéɖé ma dyú-gàà dyúáɖò ɓɛ́ ɔ nyu ma gbǒ-xwíníín nyɛ. Ɔ nyɛ́nɛ́ mɔ̀ Súhàùn. Kǎà gbǒ-xwíníín nì ɖé Dɛ̃́ìn nììn xwéɖé-dùɔ̀ múɛɛ nyu jĩ̀ɛ̀.

⁴³ Súhàùn nììn gbǒ-xwíníín-nyɔ̀ ɓěɔ̀ séín poìn dyí mɔ̀ nyɔ-kpò táázĩ̀ìn kpáɖá-nyɔ tã sè hĩinyɛ kè hɔ̃dɛ̀ɖɛ̀ hĩinyɛ.

⁴⁴ Ásè nììn gbǒ-xwíníín ɓěɔ̀ kɛà kɛ̀: Ímànà nììn gbǒ-xwíníínɔ̀ kè Ívì nììn gbǒ-xwíníínɔ̀ ɔ kè Bɛ̀wíɖíà nììn gbǒ-xwíníínɔ̀.

⁴⁵ Ké Bɛ̀wíɖíà nììn gbǒ-xwíníín ɓěɔ̀ mɔ̀ Hɛ́ɓɛ̀ nììn gbǒ-xwíníínɔ̀ kè Mààkíè nììn gbǒ-xwíníínɔ̀.

⁴⁶ Ké Ásèɛ̀ dyú-mààɔ̀ nyɛ́nɛ́ mɔ̀ Sɛ́wàɖà.

⁴⁷ Kǎà gbǒ-xwíníín séín nì ɖé Ásè nììn xwéɖé-dùɔ̀ múɛɛ nyu jĩ̀ɛ̀. Wa séín poìn dyí mɔ̀ nyɔ-kpò táázĩ̀ìn kpáɖá-nyɔ sɔ̃́ ɓaɖa-bùè sè tã kè hɔ̃dɛ̀ɖɛ̀ hĩinyɛ.

⁴⁸ Náfátàɖì nììn gbǒ-xwíníín ɓěɔ̀ kɛà kɛ̀: Jàzéè nììn gbǒ-xwíníínɔ̀ kè Gúnì nììn gbǒ-xwíníínɔ̀

⁴⁹ kè Jézɛ̀ nììn gbǒ-xwíníínɔ̀ ɔ kè Síɖɛ̀ìn nììn gbǒ-xwíníínɔ̀.

⁵⁰ Kǎà gbǒ-xwíníín séín nì ɖé Náfátàɖì nììn xwéɖé-dùɔ̀ múɛɛ nyu jĩ̀ɛ̀. Wa séín poìn dyí mɔ̀ nyɔ-kpò táázĩ̀ìn kpáɖá-nyɔ sɔ̃́ sè hm̀m̌ kè hɔ̃dɛ̀ɖɛ̀ hĩinyɛ.

⁵¹ Éézùɖùɛ̀-nyɔ̀ séín ɓěɔ̀ poìn dyí mɔ̀ nyɔ-kpò táázĩ̀ìn hɔ̃dɛ̀ɖɛ̀ mɛ̀nɛ̌ìn-ɖò sè dyúáɖò kè hɔ̃dɛ̀ɖɛ̀ mɛ̀nɛ̌ìn-sɔ̃́ kè kpáɖá-nyɔ ɓaɖa-bùè.

⁵² Hwɛ̀ ké Bounɓoɔ̀ cɛ̃ɛ ma Mózè gbo ɖe, ké ɔ ɖá,

⁵³ “M̀ mɛ geìn ɓóɖóɔ̀ nyɔ ɓě nìà kɛ múin dyììn ɖé kà waà gbǒ-xwíníín ɖò-ɖò nyu jĩ̀ɛ̀ kɛɛ mú, ɓɛ́ ɔ ké waà kɔ̃̀ɔ̀-ɖɛ̀ jǔ.

⁵⁴ Xwéɖé-dùɔ̀ nyɔ ɓúá dyíɛɛ, m̀ mɛ nyí ɔ pá vɛ̀nɛ̀, ké xwéɖé-dùɔ̀ nyɔ ɓíè dyíɛɛ, m̀ mɛ nyí ɔ pá tííwè. M̀ mɛ nyí xwéɖé-dù ɖò-ɖò ɓěɔ̀ pá dyììn ɖé kà wa nyu jĩ̀ɛ̀ kɛɛ mú.

⁵⁵ Kɛɛ m̀ mɛ geìn wa ɓóɖóɔ̀ múin dyììn ɖé gbo-ɖàɓàìn-ɖɛ̀ nyu-nyu mú. Xwéɖé-dù ɖò-ɖò nììn páɔ̀ mɛ mùìn ɔ ɓǎ nììn xwéɖé-dùɔ̀ nyɛ́nɛ́ín.

⁵⁶ M̀ mɛ geɛ̀n dyììn ɖé gbo-ɖàɓàìn-ɖɛ̀ ɓɛ́ nì mu nyuùn ɓó xwéɖé-dù vɛ̀nɛ̀ ɓěɔ̀ kè xwéɖé-dù dyùwè ɓěɔ̀ pṹa kɛɛ mú.”

⁵⁷ Ɖíìváà nììn gbǒ-xwíníín ɓě ɓɛ́ wa zɛɖɛ ma kà kɛɛ kɛà kɛ̀: Gésɔ̀ùn nììn gbǒ-xwíníínɔ̀ kè Kóhà nììn gbǒ-xwíníínɔ̀ ɔ kè Mɛ̀wáɖáwìɖì nììn gbǒ-xwíníínɔ̀.

⁵⁸ Ké gbǒ-xwíníín ɓěɛ̀ sɔ̀ Gésɔ̀ùn kè Kóhà ɔ kè Mɛ̀wáɖáwìɖì nììn gbǒ-xwíníín ɓěɔ̀ mú. Wa mɔ̀ Ɖínì nììn gbǒ-xwíníínɔ̀ kè Hɛ́bɔ̀nɔ̀ nììn gbǒ-xwíníínɔ̀ kè Máɖì nììn gbǒ-xwíníínɔ̀ kè Músì nììn gbǒ-xwíníínɔ̀ ɔ kè Kówàɖà nììn gbǒ-xwíníínɔ̀. Kóhà wóɖóìn ma Ámànàùn.

⁵⁹ Ámànàùn gmàà nyɛ́nɛ́ mɔ̀ Jòkɛ́ɓɛ̀. Ɔ mɔ̀ Ɖíìváà dyú-màà. Ɖíìváà wóɖóìn ma Jòkɛ́ɓɛ̀ ɖé Íjè-ɓòɖòɔ̀ kɔ̃, hwɛ̀ ké ɔ mɔ̀ùn kè Ámànàùn wóɖóìn ma Eɖóún kè Mózè ɔ kè Méwìɖìàùn.

⁶⁰ Ké Eɖóún wóɖóìn ma Náɖà kè Àbíhùɛ̀ kè Ɛ̀ɖɛ̀ázà ɔ kè Ìfámà.

⁶¹ Kɛɛ Náɖà kè Àbíhùɛ̀ mɛ́ ma ní, sepóɛɖé wa fɔ̃ ma nyɔ́ún-nɔ̀mɔ̀-ɖɛ̀ kɔ̃̀ nyɛ Bounɓoɔ̀ se ma wuɖu kɔ̃ zà kɛɛ jè.

⁶² Ɖíìváà-nyɔ̀ ɓěɔ̀ gàa-dyù ɓě ɓɛ́ wa nyuá ma dɛ̀nɛ̀ dyúáɖò kè zi kɔ̃, ɓɛ́ wa zɛɖɛ ma kɛɛ mɔ̀ ma nyɔ-kpò táázĩ̀ìn kpáɖá-nyɔ sè tã. Wa se ma wa mɔ̀ùn zɛɖɛ kĩ́ín ɖé Éézùɖùɛ̀-nyɔ̀ ɓěɔ̀ hwìɛ̀, sepóɛɖé wa mɔ̀ùn se ma pá ɓěɔ̀ ɖò dyé ɖé Éézùɖùɛ̀-nyɔ̀ ɓěɔ̀ hwìɛ̀, ɓɛ́ ɔ ké waà dyú ɓěɛ̀ dúí-sè-ɖɛ̀ jǔ.

⁶³ Kǎà Éézùɖùɛ̀-nyɔ̀ ɓě ɓɛ́ Mózè kè Ɛ̀ɖɛ̀ázà mɔ̀à sáa-zà-nyɔ̀ vɛ̀nɛ̀ɔ̀ kɛɛ zɛɖɛ ma kà kɛɛ nyu jĩ̀ɛ̀. Wa zɛɖɛ ma nyɔ ɓěɔ̀ ɖé Móà-ɓòɖòɔ̀ bɔɔ-kpàɔ̀ kɔ̃, ɖé Jɔ́nì-nìɔ̀ wĩín, ɖé Jɛ́ɖèkóò-hwɔ̀ɖɔ̀ɔ̀ gbɔ.

⁶⁴ Kɛɛ nyɔ ɓě ɓɛ́ Mózè kè Eɖóún mɔ̀ ma kà sáa-zà-nyɔ̀ vɛ̀nɛ̀ɔ̀ kɛɛ zɛɖɛ ma kà ɖé Sányà Gbǎùn-fúɖúáɔ̀ kɔ̃ɛɛ ɖò se wa hwìɛ̀ nì.

⁶⁵ Sepóɛɖé Bounɓoɔ̀ ɖǎa ma cɛ̃ kĩ́ín ɓá wa jè dyí, ké ɔ ɖá, “Wa séín mu ɖé gbǎùn-fúɖúáɔ̀ kɔ̃ mɛ́ìn.” Ɔ jèɛɛ, waà gàa dyúáɖò dyɛ mɔ̀ùn se ma ɓíɖíi sè, ɔ sèìn Kéɖɛ̀ mɔ̀à Jɛ̀fúnɛ̀ɛ̀ dyú-gààɔ̀ kɛ kè Jasúé mɔ̀à Núùnɛ̀ dyú-gààɔ̀ kɛ.