Nɔ̀ɓà 25 - Ɓǎsɔ́ɔ̀ Báɓòɔ̀

Éézùɖùɛ̀-nyɔ̀ ɓěɔ̀ nì ɖé Píò-tòɖòɔ̀ gbo

¹ Ɓó tia ɓaɖaa, Éézùɖùɛ̀-nyɔ̀ ɓěɔ̀ nì ma waà jàɖàìn-hwɔ̀ɖɔ̀ɔ̀ mú ɖé Sítììn Bɔɔ-kpàɔ̀ kɔ̃. Púɛɛ, wa kè Móà-ɓòɖòɔ̀ màa ɓěɔ̀ ɖú ma gbàɖàùn po kpàǐ.

² Ké Móà-ɓòɖòɔ̀ màa ɓěɔ̀ ɖá ma Éézùɖùɛ̀-nyɔ̀ ɓěɔ̀, ɓɛ́ wa kè wa ké ɖɛ ɓě ɓɛ́ wa zàìn ma waà kũùn-kpò-gèɖèpɔ́ɔ̀ ɓěɔ̀ gbo sáa kɛɛ ɖi. Ké Éézùɖùɛ̀-nyɔ̀ ɓěɔ̀ ɖi ma waà sáa-zàìn-ɖɛ̀ ɓěɔ̀ ɖò, ké wa taɓa ma dú hwuɖu ɓó waà kũùn-kpò-gèɖèpɔ́ɔ̀ ɓěɔ̀ dyúa.

³ Kǎà Éézùɖùɛ̀-nyɔ̀ ɓěɔ̀ nyu ma wa mìɔùn Béò mɔ̀à Píò-tòɖòɔ̀ gèɖèpɔ́ɔ̀ kɛɛ ɓiè-nyɔ̀ mú zɛ̃̀ìn. Ké Bounɓoɔ̀ kpáìn ma Éézùɖùɛ̀-nyɔ̀ ɓěɔ̀ dyoɖoún mìɔ.

⁴ Ké ɔ cɛ̃ɛ ma Mózè gbo, ké ɔ ɖá, “Kpɔ̃ Éézùɖùɛ̀-dyù ɓěɔ̀ nyɔ vɛ̀nɛ̀ séín ɓě nìà ɖɛ gbà nìà kɛ gbɔ kɔ̃ɛ, ɓɛ́ m̀ ké wa beè ɓó dyóɖóaún sá-sá ɓó ḿ dyúa, nìí ɓɛ́ ní dyoɖo-hwòɖò ku wɔ̃ɔ̀ ké wáɖá ɓá Éézùɖùɛ̀-dyù ɓěɔ̀ jè dyí.”

⁵ Ké Mózè cɛ̃ɛ ma Éézùɖùɛ̀-nyɔ̀ ɓěɔ̀ tɔ̀ɔ̀-ɓìɔ̀ ɓěɔ̀ gbo, ké ɔ ɖá, “Ɓě ɖò-ɖò séín mɛ ɖáɓá gàa nì ɖé ɔ nììn xwéɖé-dùɔ̀ mú, ɓɛ́ ɔ ɖǎ ɔ mìɔùn Béò ɓiè-nyɔ̀ mú nyuɛ.”

⁶ Ɓó ti déínɔ̀ ɓaɖaa, Éézùɖùɛ̀-gàà ɖò dyà ma Míɖìàùn-màà ɖò ɖé ɔ jàɖàìn-gbòɔ̀ mú, ɓó Mózè kè Éézùɖùɛ̀-nyɔ̀ tɔ̀ɔ̀ ɓěɔ̀ dyéɖé waí, ti ɓɛ́ wa nì ma vĩ̌ɛń ɓó Bounɓoɔ̀ jàɖàìn-gbòɔ̀ wĩín nyɛ.

⁷ Ti ɓɛ́ Fíníhà mɔ̀ ma Eɖóún mɔ̀à sáa-zà-nyɔ̀ vɛ̀nɛ̀ɔ̀ kɛɛ nyúà-dyú kɔ̃̀ ɓǎ mɔ̀ Ɛ̀ɖɛ̀ázà kɛɛ dyé ɖɛ nì ma kà kpáuń wɛ̃ɛ, ɔ sɔ̀ ma dyí ɖé nyɔ ɓěɔ̀ hwìɛ̀, ké ɔ ɖú ma ɖí ɖò dyí,

⁸ ké ɔ sí ma Éézùɖùɛ̀-gààɔ̀ kíɖíí ɖé jàɖàìn-gbòɔ̀ mú, ké ɔ sṹ ma ɖíɔ̀ Éézùɖùɛ̀-gààɔ̀ kè màaɔ̀ mú, ké ɖíɔ̀ nama wa nyɔ sɔ̃́ɔ̀ mú. Púɛɛ, wɛ́ nyìnììn dyíin nì ma Éézùɖùɛ̀-nyɔ̀ ɓěɔ̀ ɖáɓáuń wɛ̃ɛ kpá ma ɓɔ́í.

⁹ Kɛɛ nyɔ jĩ̀ kà mɛ́ ma wɛ́ nyìnììn dyíinɔ̀ dyíɛɛ mɔ̀ ma nyɔ-kpò táázĩ̀ìn kpáɖá-nyɔ sè hĩinyɛ.

¹⁰ Ké Bounɓoɔ̀ cɛ̃ɛ ma Mózè gbo, ké ɔ ɖá,

¹¹ “Fíníhà mɔ̀à Eɖóún mɔ̀à sáa-zà-nyɔ̀ vɛ̀nɛ̀ɔ̀ kɛɛ nyúà-dyú kɔ̃̀ ɓǎ mɔ̀à Ɛ̀ɖɛ̀ázà kɛɛ ɖǎ ní dyoɖo-hwòɖòɔ̀ nyu ké ɔ ɖǎ wáɖá ɓá Éézùɖùɛ̀-dyù ɓěɔ̀ jè dyí, sepóɛɖé ɔ kpá ní kɔ̃-dyòɖòǔn ɖé Éézùɖùɛ̀-dyù ɓěɔ̀ hwìɛ̀, ké ɔ nyuɛ ké ḿ se Éézùɖùɛ̀-dyù ɓěɔ̀ séín mú gbɔɔ̀ ɖé ní dyoɖoɔ̀ mú.

¹² Ɔ ná nì jèɛɛ, m̀ mɛ cɛ̃ɛ ɔ gbo kà ḿ kè ɔ nì wuɖu ɓíín poɛń ɓá gìɖìǐ jè dyíɛ.

¹³ Ké ɖɛ nìà kɛ mu nììn ɓó ɔ kè ɔ xwíníín-dyù ɓě gbo. Wa mu sáa-zà-nyɔ̀ jǔùn kánáá pū, sepóɛɖé ɔ kpá mɔ̄ mɔ̀à ɔ Gèɖèpɔ́ɔ̀ kɛɛ kɔ̃-dyòɖò mú, ké ɔ nyu ma Éézùɖùɛ̀-dyù ɓěɔ̀ nàmàǔnɔ̀ kɔ̃in-ɓáìn-ɖɛ̀ ɓó wa bìì.”

¹⁴ Éézùɖùɛ̀-gàà ɓɛ́ ɔ kè Míɖìàùn-mààɔ̀ mɛ́ ma kà ɖɛ gbà nìà kɛ dyíɛɛ nyɛ́nɛ́ mɔ̀ Zĩ́wìɖì. Ɔ mɔ̀ ma gàa ɖò kɔ̃̀ nyɛ́nɛ́ mɔ̀ Sáɖù, ɓɛ́ ɔ mɔ̀ gbǒ-xwíníín ɖòɛ̀ nyɔ vɛ̀nɛ̀ ɖé Símìɔ̀ nììn xwéɖé-dùɔ̀ múɛɛ dyú-gàà.

¹⁵ Ké Míɖìàùn-màà ɓɛ́ ɔ mɛ́ ma kà ɖɛ gbàɔ̀ dyíɛɛ nyɛ́nɛ́ mɔ̀ Kóɓì. Ɔ mɔ̀ gàa ɖò kɔ̃̀ nyɛ́nɛ́ mɔ̀ Zúɔ̀, ɓɛ́ ɔ mɔ̀ ma gbǒ-xwíníín ɖòɛ̀ nyɔ vɛ̀nɛ̀ ɖé Míɖìàùn-ɓòɖòɔ̀ kɔ̃ɛɛ dyú-màà.

¹⁶ Ké Bounɓoɔ̀ cɛ̃ɛ ma Mózè gbo ɖe, ké ɔ ɖá,

¹⁷ “Kpa Míɖìàùn-nyɔ̀ ɓěɔ̀ to kɔ̃, ɓɛ́ m̀ ké wa mú gbɔɔ̀,

¹⁸ sepóɛɖé wa nyu ɓě ɖɛ gbà bũ̌. Wa cá ma ɓě ɖé Píò-tòɖòɔ̀ gbo, ɔ kè dyììn ɖé Míɖìàùn-màà mɔ̀à Kóɓì ɓɛ́ ɔ mɔ̀à Míɖìàùn-nyɔ̀ vɛ̀nɛ̀ ɖòɛ̀ dyú-mààɔ̀ kɛɛ jè mú. Kóɓì mɔ̀ nyɔ ɓɛ́ Fíníhà ɖáɓá ma kà ɓó wé kɔ̃̀ ɓaɖa ḿ tò ma kà Éézùɖùɛ̀-dyù ɓěɔ̀ wɛ́ nyìnììn dyíin kɔ̃ ɓó Béò mɔ̀à Píò-tòɖòɔ̀ gèɖèpɔ́ɔ̀ kɛɛ ɓiè jèɛ.”