Nɔ̀ɓà 24 - Ɓǎsɔ́ɔ̀ Báɓòɔ̀

¹ Ti ɓɛ́ Béɖàùn ɖǎa ma dyí dyuò kà ɓɛ́ Bounɓoɔ̀ mɔ́ ɔ ké ma Éézùɖùɛ̀-nyɔ̀ ɓěɔ̀ mana kɔ̃ poɛɛ, púɛɛ, ɔ se ma Bounɓoɔ̀ dyi dièɛ̌ mu ɖe dyììn ɖé sɛ̀ɛ̀-po-po mú, kà ɔ nyuɛ ma kà nyuɛ kĩ́ín nyɛ. Ké ɔ mùìn ma ɖé gbǎùn-fúɖúáɔ̀ kɔ̃.

² Ké Béɖàùn gmɔ̀ ma Éézùɖùɛ̀-nyɔ̀ ɓěɔ̀ kɔ̃, ké ɔ dyé ma wa ɖé waà jàɖàìn-hwɔ̀ɖɔ̀ɔ̀ mú. Waà xwéɖé-dù ɖò-ɖò ɓěɔ̀ ɓéɖé ma kpoo mú kpáuń. Ké Gèɖèpɔ́ɔ̀ Zùùɔ̀ dyi ma ɔ kɔ̃,

³ ké ɔ ɖú ma kpáá-ɖɛ̀ cɛ̃ kpàǐ ɖe, ké ɔ ɖá, “Ɖɛ nìà kɛ mɔ̀ mɔ̄ Béɖàùn mɔ̀à Bɛ́òɛ̀ dyú-gààɔ̀ kɛɛ wuɖu. Ɔ mɔ̀ mɔ̄ dyéà ɖɛ múin nɔ̀mɔ̀ dyíin nyɛɛ wuɖu.

⁴ Ɔ mɔ̀ mɔ̄ mɔ̀ nyɔ ɓɛ́ ḿ wɔ̃́ Gèɖèpɔ́ɔ̀ wuɖuɔ̀ múin, ké ḿ dyé dyí-tɛ̀mɛ̀ìn-ɖɛ̀ ɓɛ́ Kpé-séín-ɓéɖé-Gèɖèpɔ́ɔ̀ tɛ̀mɛ̀ìn ḿ dyíɛɛ múin, ɓɛ́ ḿ dyi ɓó ɓíɖíi dyi kpá, ɓɛ́ ní dyéɖéɔ̀ dyi ɓáà wáɖáá kɛɛ wuɖu.

⁵ Éézùɖùɛ̀-nyɔ̀ ɓě, ɓě mɔ̀à Jékɔ̀ɛ̀ xwíníín-dyù ɓěɛɛ, ɓěɛ̀ jàɖàìn-hwɔ̀ɖɔ̀ gànáɔ̀ zi dyíin nɔ̀mɔ̀ǔn mìɔ wà!

⁶ Ɔ nì pū kà hwɛ̃-cù ɓě ɓɛ́ wa ɓá dɔ̃̀ǐn múɛɛ nìà kɛ, mɔɔ kà ɓáá-ɖɛ̀ ɓě ɓɛ́ wa ɓá ɓó ní ɖò kpóó-gbìǐɛɛ nìà kɛ, mɔɔ kà ááɖò-cù-gɔ̃̀ ɓě ɓɛ́ Bounɓoɔ̀ mìɔùn ɓá kɛɛ nìà kɛ, mɔɔ kà síɖà-cù-gɔ̃̀ ɓě ɓɛ́ wa mɛ ɓó ní ɓě kpóó-gbìǐɛɛ nìà kɛ.

⁷ Ní ɓáún-ɓáún mu waà ɓóɖóɔ̀ kɔ̃ ɖàɓàìn, ké wa mu waà ɓáá-ɖɛ̀ ɓěɔ̀ ɓóɖó ɓɛ́ ɔ te nɔ̀mɔ̀ dyíin nyɛɛ mú ɓáùn. Waà kã́áɔ̀ mu kpé ɓéɖéìn, ɓɛ́ ɔ ké Ágà dyí zi, ké ɔ kã́á-ɓòɖòɔ̀ mu mú zaìn.

⁸ Gèɖèpɔ́ɔ̀ zà wa ɖé Íjè-ɓòɖòɔ̀ kɔ̃. Wa ɓéɖé gana kà jũ̀ìn nìà kɛ, ké wa mànàìn waà mú-nyɛ́-nyɔ̀ ɓěɔ̀ kpã, ké wa wàìn waà kpá ɓěɔ̀ dyi, ké wa taɓaìn wa sé-kpìì dyi.

⁹ Éézùɖùɛ̀-nyɔ̀ ɓěɔ̀ nì kà ganìǎ ɓɛ́ ɔ ɓéɖé gana kɛɛ nìà kɛ. Ɔ dyi mɔ́uń nìǐn, nyɔ ɖò ní ɖá ɓɛ́ ɔ ké ɔ nyíɔún zào. Nyɔ kã̀ìn séín ɓě mu Éézùɖùɛ̀-nyɔ̀ ɓěɔ̀ mana kɔ̃ poùn wɛ̃ɛ, mana mɛ nì wa mɔ̀ùn kɔ̃. Ké nyɔ kã̀ìn séín ɓě mu Éézùɖùɛ̀-nyɔ̀ ɓěɔ̀ gboòùn wɛ̃ɛ, hwòɛ̌-wùɖù mɛ nì wa mɔ̀ùn kɔ̃.”

¹⁰ Púɛɛ, Béɖà zi ma Béɖàùn dyoɖoún kpáǐn mìɔ, ké ɔ taɓaìn ma kpá xwaún. Ké ɔ cɛ̃ɛ ma Béɖàùn gbo, ké ɔ ɖá, “Ḿ ɖá ma m̀, ɓɛ́ m̀ ké ní mú-nyɛ́-nyɔ̀ ɓěɔ̀ gboò, kɛɛ dyéɛ, m̀ nyuá wa mana-kɔ̃-pòìn-kpà tã cá.

¹¹ Ɔ ná nì jèɛɛ, fṹà, ɓɛ́ m̀ ké m̀ ɓíɖí ɖé kɔ́ìn. Ḿ cɛ̃ɛ ma kà ní muɔ́ má m̀ dya dèìn jɛ́ɛ́ cá kɛ, kɛɛ Bounɓoɔ̀ ɖǎ m̀ dyí kpɔ̃, ɓɛ́ m̀ ké se dya-dè-dè ɖò dyé.”

¹² Hwɛ̀ ké Béɖàùn cɛ̃ɛ ma Béɖà gbo, ké ɔ ɖá, “Má, ḿ cɛ̃ɛ ma nì kíá ɓě ɓɛ́ m̀ ɖoɓo ma kà ɖé ḿ gboɛɛ gbo, ké ḿ ɖá,

¹³ ‘Kɛbì Béɖà mɛ dyíìnɔ̌ má ɔ gbǒɔ̀ séɓàɖà kè góò, ɓɛ́ ɔ kéɔ́ máa ḿ nyíɛɛ, ḿ se Bounɓoɔ̀ wuɖuɔ̀ kɔ̃ péɖéɛ ɓɛ́ìn, ɓɛ́ ḿ ké ɖɛín-ɖɛ̀ mɔɔ ɖɛ gbà ɓɛ́ ní hwòɖǒ mɔ́ɛɛ nyu. Kɛɛ ɖɛ Bounɓoɔ̀ mu ḿ wĩín poùn wɛ̃ɛ ɖòùn mɔ̀ ɖɛ ní mu cɛ̃ìne?’

¹⁴ Ɓó kàǔn wɛ̃ɛ, gmɔ̀ nɔ̄, ḿ nìǎ ní nyɔ ɓěɔ̀ gbo ɖe muɛń. Kɛɛ tò ɖùǔ, ɓɛ́ ḿ ké ɖɛ Éézùɖùɛ̀-nyɔ̀ ɓěɛ̀ mu nì nyɔ ɓěɔ̀ bũ̌ nyuùn ɖé dyúa kɛɛ m̀ gbo cɛ̃.”

Béɖàùn kpáá-ɖɛ̀-cɛ̃-cɛ̃ hwɛ̀ìn-gbɔ

¹⁵ Ké Béɖàùn ɖú ma kpáá-ɖɛ̀ cɛ̃ kpàǐ ɖe, ké ɔ ɖá, “Ɖɛ nìà kɛ mɔ̀ mɔ̄ Béɖàùn mɔ̀à Bɛ́òɛ̀ dyú-gààɔ̀ kɛɛ wuɖu. Ɔ mɔ̀ mɔ̄ dyéà ɖɛ múin nɔ̀mɔ̀ dyíin nyɛɛ wuɖu.

¹⁶ Ɔ mɔ̀ mɔ̄ mɔ̀ nyɔ ɓɛ́ ḿ wɔ̃́ Gèɖèpɔ́ɔ̀ wuɖuɔ̀ múin, ké ḿ dyuò Ɖɛɓíɔ́ɛ̀ fɔ̀nɔ̀-hwòɖǒ-ɖɛ̀ ɓě dyí, ké ḿ dyé dyí-tɛ̀mɛ̀ìn-ɖɛ̀ ɓɛ́ Kpé-séín-ɓéɖé-Gèɖèpɔ́ɔ̀ tɛ̀mɛ̀ìn ḿ dyíɛɛ múin, ɓɛ́ ḿ dyi ɓó ɓíɖíi dyi kpá, ɓɛ́ ní dyéɖé dyi ɓáà wáɖáá kɛɛ wuɖu.

¹⁷ Ḿ gmɔ̀ ɖéé ɖé nya vɛ̃in, ké ḿ dyé Éézùɖùɛ̀-ɓòɖò-dùɔ̀. Kã́á ɖò ɓɛ́ ɔ hwɔìn dɛ̀nɛ̀-dyù fã-fã ɖòɛɛ mu ɖé ɓóɖó-dùɔ̀ mú sɔ̀ùn. Kã́á-nyɔ-wuɖuí-kɔ̃̀-kpè mu ɖé ɓóɖó-dùɔ̀ mú sɔ̀ùn. Ɔ mu Móà-ɓòɖòɔ̀ dyi wàìn, ké ɔ mu Sɛ́fì nììn xwíníín-dyù séín ɓěɔ̀ ɖáɓáùn nyɛ̀nɛ̀ɛ̀.

¹⁸ Ɔ mu Íɖɔ̀ùn-nyɔ̀ ɓě ɓɛ́ wa mɔ̀à ɔ mú-nyɛ́-nyɔ̀ ɓěɔ̀ kɛɛ toún ɖuùn. Ké ɔ mu waà ɓóɖóɔ̀ ɔ kɔ̃̀ɔ̀-ɖɛ̀ mú nyuùn. Éézùɖùɛ̀-nyɔ̀ ɓěɔ̀ mu to-ɖu-nyɔ̀ jǔùn kánáá pū.

¹⁹ Éézùɖùɛ̀-nyɔ̀ ɓěɔ̀ mu wa kɔ̃in síìn. Wa mu nyɔ ɓě sè ɓíɖíiɛɛ ɓó dyi sámáùn nyɛ̀nɛ̀ɛ̀.”

²⁰ Hwɛ̀ ké Béɖàùn dyé ma Àmáɖɛ̀-nyɔ̀ ɓěɔ̀ ɖé ɔ dyí-tɛ̀mɛ̀ìn-ɖɛ̀ɔ̀ mú, ké ɔ ɖú ma kpáá-ɖɛ̀ cɛ̃ kpàǐ ɓá wa jè dyí, ké ɔ ɖá, “Àmáɖɛ̀-ɓòɖòɔ̀ mɔ̀ nyɔ ɓéɖé ma gana mìɔ ké ɔ zi ɓóɖó-dù tɔ̀ɔ̀ ɓěɔ̀ dyíɛ. Kɛɛ ɖé mánáín ní, ɔ mu mú gbɔɔ̀ùn gàná cá.”

²¹ Hwɛ̀ ké Béɖàùn dyé ma Kénɛ̀-nyɔ̀ ɓěɔ̀ ɖé ɔ dyí-tɛ̀mɛ̀ìn-ɖɛ̀ɔ̀ mú, ké ɔ ɖú ma kpáá-ɖɛ̀ cɛ̃ kpàǐ ɓá wa jè dyí, ké ɔ ɖá, “Ɓěɛ̀ cĩ́-naínɔ̀ nì ɓó ke kóɖó-kóɖó. Ɔ nì pū kà naà ɖò dèà ɔ téɖé ɖéé ɖé sɔ́ɔ́-kpò vɛ̀nɛ̀ ɖò dú-hwìɛ̀ kɛ.

²² Kɛɛ wɛ̃́ɛ́ kɛɛ, ɓě mu mú gbɔɔ̀ùn, ti ɓɛ́ Àsíwíɖíà-nyɔ̀ ɓěɔ̀ mu ɓě kpaùn, ɓɛ́ ɓě ké gǐì jǔɛ.”

²³ Ké Béɖàùn kpa ma ɔ kpáá-ɖɛ̀-cɛ̃-cɛ̃ɔ̀ dyúa, ké ɔ ɖá, “Ti ɓɛ́ Gèɖèpɔ́ɔ̀ muà ɓóɖó-dù ɓěɔ̀ mú gbɔɔ̀ùn wɛ̃ɛ, nyɛ́ mu cĩ́ìn keɛ́?

²⁴ To-vɔ̃-nyɔ̀ ɓě mu ɖé Kítììn-ɓòɖòɔ̀ kɔ̃ sɔ̀ùn, ɓɛ́ wa ké méè mú dyììn, ɓɛ́ wa ké Àsíwíɖíà-nyɔ̀ ɓěɔ̀ kè Éɓɛ̀-nyɔ̀ ɓěɔ̀ toún ɖu. Kɛɛ ɖé mánáín ní, wa mɔ̀ùn mu mú gbɔɔ̀ùn gàná cá.”

²⁵ Ti ɓɛ́ Béɖàùn ɖǎ ma wuɖu jaɖaa, púɛɛ, ɔ sɔ̀ ma dyí, ké ɔ mu ma ɔ ɓíɖí ɖe. Ké Béɖà mɔ̀ùn kɔ́ìn ma ɖe.