Nɔ̀ɓà 23 - Ɓǎsɔ́ɔ̀ Báɓòɔ̀

¹ Ké Béɖàùn cɛ̃ɛ ma Béɖà gbo, ké ɔ ɖá. “Po dà sáa-kɔ̃-zàìn-gbàà mɛ̀nɛ̌ìn-sɔ̃́ ɓó ḿ bìì, ɓɛ́ m̀ ké ḿ ɓìɖǐ ɓíɔ́ mɛ̀nɛ̌ìn-sɔ̃́ kè ɓáɖáá ɓíɔ́ mɛ̀nɛ̌ìn-sɔ̃́ dyà.”

² Ké Béɖà nyuɛ ma náa kà Béɖàùn cɛ̃ɛ ma kà kɛ. Ké Béɖà kè Béɖàùn zàìn ma ɓìɖǐ ɓíɔ́ dyúáɖò kè ɓáɖáá ɓíɔ́ dyúáɖò sáa ɓó sáa-kɔ̃-zàìn-gbàà ɓěɔ̀ ɖò-ɖò kɔ̃.

³ Hwɛ̀ ké Béɖàùn cɛ̃ɛ ma Béɖà gbo, ké ɔ ɖá, “Nyànà ɓó nì fɔ̃ɔ-sàǎ-zàìn-ɖɛ̀ ɓěɔ̀ wáún dyi, ɓɛ́ ḿ ké dà ɖò mu. Ti ɖòɛ̀ ɓaɖaín, Bounɓoɔ̀ mu dyɛ̀ɛ̀ ḿ hwìǐ dyiìn, ɓɛ́ ḿ kè ɔ ké gmɔ̌ìn. Ké ɖɛ ɔ mu ḿ dyí tɛ̀mɛ̀ìn nyɛɛ, ní muɛ m̀ gbo cɛ̃ìn.” Ké Béɖàùn ɖòùn mu ma ɖé toɖo ɖò dya.

⁴ Ké Gèɖèpɔ́ɔ̀ kè Béɖàùn gmɔ̌ìn ma ɖé. Ké Béɖàùn cɛ̃ɛ ma Gèɖèpɔ́ɔ̀ gbo, ké ɔ ɖá, “Ḿ ɖǎ sáa-kɔ̃-zàìn-gbàà mɛ̀nɛ̌ìn-sɔ̃́ɔ̀ ti dyéìn, ké ḿ ɖǎ ɓìɖǐ ɓíɔ́ ɖò kè ɓáɖáá ɓíɔ́ ɖò ɓó sáa-kɔ̃-zàìn-gbàà ɓěɔ̀ ɖò-ɖò kɔ̃ sáa zàìn.”

⁵ Púɛɛ, Bounɓoɔ̀ po ma Béɖàùn wuɖu ɔ ké cɛ̃ɛ wĩín, ké ɔ ɖá, “Mu ɖé Béɖà gbo ɖe, ɓɛ́ m̀ ké ɔ ɖɛ ɓěɔ̀ gbo cɛ̃.”

⁶ Ké ɔ mu ma Béɖà gbo ɖe, ké ɔ dyɛ̀ìn ma Béɖà kè Móà-ɓòɖòɔ̀ nyɔ vɛ̀nɛ̀ séín ɓěɔ̀ dyi nyànàà ɓó ɔ fɔ̃ɔ-sàǎ-zàìn-ɖɛ̀ ɓěɔ̀ wáún.

⁷ Hwɛ̀ ké Béɖàùn ɖú ma kpáá-ɖɛ̀ cɛ̃ kpàǐ, ké ɔ ɖá, “Béɖà mɔ̀à Móà-kã̀ǎɔ̀ kɛɛ ɖǎ ḿ dyà sɔ̀ìn ɖé Síwíɖíà-ɓòɖòɔ̀ kɔ̃, sɔ̀ìn ɖé toɖo ɓě nìà ɖé dyóɖó-xwáɖáún-wóɖóìn-naínɔ̀ kɛɛ dya. Ɔ cɛ̃ɛ, ké ɔ ɖá, ‘Dyi, ɓɛ́ m̀ ké ḿ bìì Jékɔ̀ɛ̀ xwíníín-dyù ɓěɔ̀ gboò. Dyi, ɓɛ́ m̀ ké Éézùɖùɛ̀-nyɔ̀ ɓěɔ̀ mú-gbɔɔ̀-gbɔɔ̀ kɔ̃ dyà jè cɛ̃.’

⁸ Kɛɛ xwɛ̌ ḿ ɓɛ́ìn nyɔ Gèɖèpɔ́ɔ̀ se gboò-wùɖù kɔ̃ poɛɛ gboòɛ̀ kɛ́? Xwɛ̌ ḿ ɓɛ́ìn nyɔ ɓɛ́ Gèɖèpɔ́ɔ̀ se mú gbɔɔ̀ mɔ́ɛɛ mú-gbɔɔ̀-gbɔɔ̀ kɔ̃ dyà jè cɛ̃ɛ kɛ́?

⁹ Ḿ nì nɔ̄ toɖo ɓěɛ̀ dya, ké ḿ dyé wa. Ḿ nì wa dyéɛń wáɖáá sɔ̀ìn nɔ̄ toɖo ɓěɛ̀ dya. Gmɔ̀ nɔ̄, wa mɔ̀ nyɔ ɓě ɓɛ́ wa ɖòùn cɛ̃ kpáún, ké wa nì cĩ́ɛń nyɛ. Wa se wa mìɔùn ɓóɖó-dù ɓěɔ̀ ɖò ɖáìn.

¹⁰ Jékɔ̀ɛ̀ xwíníín-dyù ɓěɔ̀ vò dyí mìɔ kà púu-púu nìà kɛ. Nyɔ ɖò se Éézùɖùɛ̀-nyɔ̀ ɓěɔ̀ wáká hĩinyɛ nììn dyɛ mɔ̀ùn zɛɖɛɛ ɓɛ́ìn. Ní fɛ̀ɛ̀ɔ̀ sèìn-naín mɛ nì kà Gèɖèpɔ́ɔ̀ nyɔ ɓěɔ̀ fɛ̀ɛ̀ sèìn-naín nyuà nìɛ̀ kɛ. Ḿ mɛ mɛ́ ɖé gìɖìǐ mú kà dyí-sɛ́ɖɛ́ìn-nyɔ̀ ɓěɔ̀ nyuà mɛ́ɛ kɛ.”

¹¹ Ké Béɖà diè ma Béɖàùn dyi, ké ɔ ɖá, “Ɖɛ́ mɔ̀ ɖɛ nì kà m̀ nyuà ḿ bũ̌ɛɛ xwíníín nyɛ́? Dyéɛ, ḿ dyà m̀, ɓɛ́ m̀ kéɔ́ má ní mú-nyɛ́-nyɔ̀ ɓěɔ̀ gboò, kɛɛ m̀ seɛ náa nyu, ké m̀ ɖǎ wa mana kɔ̃ po mìɔ cá.”

¹² Hwɛ̀ ké Béɖàùn jǔ ma ɔ gɔ̃̌, ké ɔ ɖá, “Má, ḿ ɓéɖé ḿ ké mú ma, ɓɛ́ ɖɛ Bounɓoɔ̀ po ḿ wĩín nyɛɛ ɖòùn mɔ̀ ɖɛ ḿ ɓéɖé ḿ ké cɛ̃e?”

Kpáá-ɖɛ̀-cɛ̃-cɛ̃ sɔ̃́ nììn ɓɛ́ Béɖàùn nyu ma kɛ

¹³ Ké Béɖà cɛ̃ɛ ma Béɖàùn gbo ɖe, ké ɔ ɖá, “Ní ɓaà m̀ ní, dyi, ɓɛ́ à ké dà kà kò ɖò mu, dɛ̀ ɓɛ́ m̀ dyi nìǐn, m̀ ké nyɔ ɓěɔ̀ dyéɛ. Nì mu waà wáká ɖò dyéìn pū, kɛɛ m̀ se wa séín dyéɛ mu. M̀ mɛ nì ɓó, ɓɛ́ m̀ ké wa gboò ɓó ḿ bìì.”

¹⁴ Ké ɔ kpa ma Béɖàùn ɖé Zófĩ̀ìn-pàɔ̀ mú, ɖé Pígà-tòɖòɔ̀ dya. Ké ɔ po ma ɖé sáa-kɔ̃-zàìn-gbàà mɛ̀nɛ̌ìn-sɔ̃́, ké ɔ zàìn ma ɓìɖǐ ɓíɔ́ ɖò kè ɓáɖáá ɓíɔ́ ɖò sáa ɓóɛ ɖò-ɖò kɔ̃.

¹⁵ Ké Béɖàùn cɛ̃ɛ ma Béɖà gbo, ké ɔ ɖá, “Nyànà dà nì fɔ̃ɔ-sàǎ-zàìn-ɖɛ̀ ɓěɔ̀ wáún dyi, ɓɛ́ ḿ ké ɖé nya mu, ɓɛ́ ḿ kè Bounɓoɔ̀ ké gmɔ̌ìn.”

¹⁶ Ké Béɖàùn kè Bounɓoɔ̀ gmɔ̌ìn ma, ké Bounɓoɔ̀ po ma ɔ wuɖu ɔ ké cɛ̃ɛ wĩín, ké ɔ ɖá, “Mu ɖé Béɖà gbo ɖe, ɓɛ́ m̀ ké ɔ ɖɛ ɓěɔ̀ gbo cɛ̃.”

¹⁷ Ké ɔ mu ma Béɖà gbo ɖe, ké ɔ dyɛ̀ìn ma Béɖà kè Móà-ɓòɖòɔ̀ nyɔ vɛ̀nɛ̀ séín ɓěɔ̀ dyi nyànàà ɓó ɔ fɔ̃ɔ-sàǎ-zàìn-ɖɛ̀ ɓěɔ̀ wáún. Ké Béɖà diè ma ɔ dyi, ké ɔ ɖá, “Xwɛ̌ Bounɓoɔ̀ ɖá kɛ́?”

¹⁸ Hwɛ̀ ké Béɖàùn ɖú ma kpáá-ɖɛ̀ cɛ̃ kpàǐ ɖe, ké ɔ ɖá, “Béɖà, sɔ̀ dyí, ɓɛ́ m̀ ké ɖùǔ tò. Mɔ̀ mɔ̀à Zípɔ̀ɛ̀ dyú-gààɔ̀ kɛɛ, tò ní wuɖuɔ̀ ɖùǔ gbo.

¹⁹ Gèɖèpɔ́ɔ̀ se nì kà nyɔǔn-dyù nìà kɛ, nìí ɓɛ́ ɔ ké se tɔ́mɔ́, mɔɔ ké ɔ se nì kà nyɔǔn nìà kɛ, nìí ɓɛ́ ɔ ké wuɖu dyí zàìn. Nì hwòɖǒ ɖá ɔ se ɖɛ ɔ cɛ̃à kɛɛ nyuɛ́ mue? Nì hwòɖǒ ɖá ɔ se ɖɛ kɔ̃̀ wuɖu ɔ ɖǎà wĩín zàa nyuɛ́ mue?

²⁰ Gmɔ̀ nɔ̄, Gèɖèpɔ́ɔ̀ ɖǎa ḿ gbo cɛ̃, ɓɛ́ ḿ ké Éézùɖùɛ̀-nyɔ̀ ɓěɔ̀ mana kɔ̃ po. Ɔ ɖǎ wa mana kɔ̃ po, ké ḿ seɛ dyí zàìn ɓɛ́ìn.

²¹ Ḿ dyéɛ kà fũ̀à-fṹá-ɖɛ̀ ɖò se ɖɛ séín nì ɖé Jékɔ̀ɛ̀ xwíníín-dyù ɓěɔ̀ dyúa kɛɛ ɖò mú nìɛ. Ḿ se gǎ-ɖɛ̀ ɖò ɖé Éézùɖùɛ̀-nyɔ̀ ɓěɔ̀ mú dyé. Bounɓo mɔ̀à waà Gèɖèpɔ́ɔ̀ kɛɛ nì ɓó wa gbo. Wa nì zio poɛń kà waà Gèɖèpɔ́ɔ̀ mɔ̀ waà kã́á kɛ.

²² Gèɖèpɔ́ɔ̀ zà wa ɖé Íjè-ɓòɖòɔ̀ kɔ̃. Wa ɓéɖé gana kà jũ̀ìn nìà kɛ.

²³ Nyɔ ɖò se kũùn ɖò mɔɔ hwe-ɖɛ̀ ɖò nyuɛ ɓɛ́ìn, ɓɛ́ ɔ ké Éézùɖùɛ̀-nyɔ̀ ɓěɔ̀ kpɔ̃. Ɓó kàǔn wɛ̃ɛ, nyɔǔn-dyù muɛ cɛ̃ìn ɓá Éézùɖùɛ̀-nyɔ̀ ɓěɔ̀ jè dyí, ɓɛ́ wa ké níiń, ‘Ɓě dyé ɖɛ ɓɛ́ Gèɖèpɔ́ɔ̀ nyu wa bììɛ!’

²⁴ Éézùɖùɛ̀-nyɔ̀ ɓěɔ̀ ɓéɖé gana kà ganìǎ nìà kɛ. Ɔ se fɔ̀ɔ̌ mu, ɔ sèìn ké ɔ fáìn ɖɛ ɔ kpɔ̃à kɛɛ dyi, ké ɔ tàà hwɛ̀ Ɔ se fɔ̀ɔ̌ mu, ké ɔ ná ɖɛ ɓɛ́ ɔ ɖǎà ɖáɓáa nyɔmɔɔ hwɛ̀.”

²⁵ Hwɛ̀ ké Béɖà cɛ̃ɛ ma Béɖàùn gbo, ké ɔ ɖá, “Kà m̀ seà wa gboòɛ̀ mɔ́ fɔɔ cáa, nìí, ɓɔ́ dyɛ wa mana kɔ̃ poɛ fɔɔ cá.”

²⁶ Kɛɛ Béɖàùn zà ma ɖé wuɖu, ké ɔ ɖá, “Má, ḿ cɛ̃ɔ́ máa m̀ gbo kà ɖɛ séín Bounɓoɔ̀ mu ḿ gbo cɛ̃ìn nyɛɛ mɔ̀ ɖɛ ní mu nyuùn wɛ̃e?”

Kpáá-ɖɛ̀-cɛ̃-cɛ̃ tã nììn ɓɛ́ Béɖàùn nyu ma kɛ

²⁷ Hwɛ̀ ké Béɖà cɛ̃ɛ ma Béɖàùn gbo ɖe, ké ɔ ɖá, “Ní ɓaà m̀ ní, dyi, ɓɛ́ ḿ ké m̀ dà kà kò ɖò kpa. Ti ɖòɛ̀ ɓaɖaín, Gèɖèpɔ́ɔ̀ hwòɖǒ mu wɔ̃́ùn, ɓɛ́ m̀ ké ɖé wa ḿ bìì gboò-wùɖù kɔ̃ pòìn.”

²⁸ Ɔ jèɛɛ, Béɖà kpa ma Béɖàùn ɖé Píò-tòɖòɔ̀ dya, dɛ̀ ɓɛ́ nyɔ dyi nìǐn, nyɔ dyi gbǎùn-fúɖúáɔ̀ kɔ̃in gmɔìn nyɛ.

²⁹ Ké Béɖàùn cɛ̃ɛ ma Béɖà gbo, ké ɔ ɖá, “Po dà ḿ bìì sáa-kɔ̃-zàìn-gbàà mɛ̀nɛ̌ìn-sɔ̃́, ɓɛ́ m̀ ké ḿ ɓìɖǐ ɓíɔ́ mɛ̀nɛ̌ìn-sɔ̃́ kè ɓáɖáá ɓíɔ́ mɛ̀nɛ̌ìn-sɔ̃́ dyà.”

³⁰ Ké Béɖà nyuɛ ma náa kà Béɖàùn cɛ̃ɛ ma kà kɛ, ké ɔ zàìn ma ɓìɖǐ ɓíɔ́ dyúáɖò kè ɓáɖáá ɓíɔ́ dyúáɖò sáa ɓó sáa-kɔ̃-zàìn-gbàà ɓěɔ̀ ɖò-ɖò kɔ̃.