Nɔ̀ɓà 22 - Ɓǎsɔ́ɔ̀ Báɓòɔ̀

Móà-kã̀ǎɔ̀ ɖá Béɖàùn

¹ Sɔ̀ìn ɓóɛɛ, Éézùɖùɛ̀-nyɔ̀ ɓěɔ̀ kpá ma hwìè kɔ̃ ɖe, ké wa mu, ké wa nyànàìn ma waà jàɖàìn-gbò ɓěɔ̀ dyi ɖé Móà-ɓòɖòɔ̀ bɔɔ-kpàɔ̀ kɔ̃, ɖé Jɔ́nì-nìɔ̀ wĩín, ɖé Jɛ́ɖèkóò-hwɔ̀ɖɔ̀ɔ̀ gbɔ.

² Ɓó tia ɓaɖaa, Béɖà mɔ̀ ma Zípɔ̀ɛ̀ dyú-gàà ɓɛ́ ɔ mɔ̀ ma Móà-ɓòɖòɔ̀ kã́á kɛɛ dyé ma ɖɛ séín ɓě ɓɛ́ Éézùɖùɛ̀-nyɔ̀ ɓěɔ̀ nyu ma kà Ámɔ̀-nyɔ̀ ɓěɔ̀ bũ̌ɛɛ ní.

³ Ké Móà-ɓòɖò gànáɔ̀ fɛ̃̀ìn ma ní mìɔ ɓó Éézùɖùɛ̀-nyɔ̀ ɓěɔ̀ jè, sepóɛɖé wa zi ma dyí vòɛ̌n mìɔ.

⁴ Hwɛ̀ ké Móà-nyɔ̀ ɓěɔ̀ cɛ̃ɛ ma Míɖìàùn-nyɔ̀ ɓěɔ̀ nyɔ vɛ̀nɛ̀ ɓěɔ̀ gbo, ké wa ɖá, “Nyɔ kúɖúú ɓěɛ̀ mu ɓó à dyi sámáùn kà ɓìɖǐ ɖià pìǐ ɖò ɓó da dyiɛ.” Ɔ jèɛɛ, Béɖà mɔ̀à Zípɔ̀ɛ̀ dyú-gàà ɓɛ́ ɔ mɔ̀à Móà-ɓòɖòɔ̀ kã́áɔ̀ kɛɛ

⁵ ɖoɓo ma kíá ɓě ɖé Béɖàùn mɔ̀ ma Bɛ́òɛ̀ dyú-gàà ɓɛ́ ɔ nì ma ɖé ɔ mìɔùn nììn ɓíɖí-ɓòɖòɔ̀ kɔ̃ ɖé Pɛ́fɔ̀-hwɔ̀ɖɔ̀ɔ̀ múɛɛ gbo, ɓɛ́ wa ké ɔ ɖá. Pɛ́fɔ̀-hwɔ̀ɖɔ̀ɔ̀ xwɛ̃́ìn ma Dyùféɖétì-nìɔ̀ wĩín dyi. Ɔ ɖá, “Gmɔ̀ nɔ̄, nyɔ ɖíɛ́ ɓě sɔ̀ ɖé Íjè-ɓòɖòɔ̀ kɔ̃, ké wa ɓáìn ɓóɖó-kpà gànáà kɔ̃in ɓó waà dyí vò jè. Wa cĩ́ dà ɓó ḿ wáún ɓó kàǔn.

⁶ Ɔ jèɛɛ, ní ɓaà m̀ ní, dyi ɓó kàǔn, ɓɛ́ m̀ ké wa gboò ɓó ḿ bìì, kà ɓɛ́ wa ɓéɖéà gana ké wa zià ḿ dyíɛ. Ti ɖòɛ̀ ɓaɖaín, nì gboò-wùɖùɔ̀ muɛ nyuùn ɓɛ́ ḿ ké wa toún ɖu, ɓɛ́ ḿ ké wa ɓóɖóɛ̀ kɔ̃ dyi kúmú. Sepóɛɖé ḿ dyuòɛ̀ kà nyɔ mɔ̀ nyɔ ɓɛ́ m̀ po mana kɔ̃ɛɛ, mana nì ɔ kɔ̃ɛ, ké nyɔ mɔ̀ nyɔ ɓɛ́ m̀ gboòɛɛ, gboò-wùɖù nì ɔ kɔ̃ɛ.”

⁷ Ké Móà-ɓòɖòɔ̀ nyɔ vɛ̀nɛ̀ kè Míɖìàùn-ɓòɖòɔ̀ nyɔ vɛ̀nɛ̀ ɓěɔ̀ ɖú ma sɛ̀ɛ̀-po-nyɔ̀ɔ̀ pɛ́ɛ̀-wìɖìɔ̀ dyí, ké wa mu ma ɖé Béɖàùn gbo, ké wa wáɖá ma Béɖàà cuò-wùɖùɔ̀.

⁸ Ké Béɖàùn cɛ̃ɛ ma wa gbo, ké ɔ ɖá, “Ɓě pɛ̃́ dà, nìí, ní mu Bounɓoɔ̀ dyi dièìn, ké ɖɛ ɔ mu ḿ gbo cɛ̃ìn nyɛɛ, ní muɛ ɓě gbo cɛ̃ìn.” Ɔ jèɛɛ, nyɔ vɛ̀nɛ̀ ɓěɔ̀ pɛ̃́ ma ɓó Béɖàùn gbo.

⁹ Ké Gèɖèpɔ́ɔ̀ dyi ma Béɖàùn gbo, ké ɔ cɛ̃ɛ ma, ké ɔ ɖá, “Dɛ̌ gàa ɓě nìà dà m̀ gboɛɛ sɔ̀ kɛ́?”

¹⁰ Ké Béɖàùn cɛ̃ɛ ma Gèɖèpɔ́ɔ̀ gbo, ké ɔ ɖá, “Béɖà mɔ̀à Zípɔ̀ɛ̀ dyú-gàà ɓɛ́ ɔ mɔ̀à Móà-ɓòɖòɔ̀ kã́á kɛɛ mɔ̀ nyɔ ɖoɓo wa nɔ̄ ḿ gbo. Ɔ cuò wa, ké ɔ ɖá,

¹¹ ‘Gmɔ̀ nɔ̄, nyɔ ɖíɛ́ ɓě sɔ̀ ɖé Íjè-ɓòɖòɔ̀ kɔ̃, ké wa ɓáìn ɓóɖó-kpà gànáà kɔ̃in ɓó waà dyí vò jè. Ɓó kàǔn wɛ̃ɛ, dyi, ɓɛ́ m̀ ké wa gboò ɓó ḿ bìì. Ti ɖòɛ̀ ɓaɖaín, ní mu wa gbo vɔ̃ɔ ɓɛ́ìn, ɓɛ́ ḿ ké wa ɓóɖó nìà kɛ kɔ̃ dyi kúmú.’ ”

¹² Ké Gèɖèpɔ́ɔ̀ cɛ̃ɛ ma Béɖàùn gbo, ké ɔ ɖá, “Mɔ̀ǔn ɖá ɓɛ́ m̀ ké wa kíɖíí sí. Mɔ̀ǔn ɖá ɓɛ́ m̀ ké nyɔ ɓě sɔ̀à ɖé Íjè-ɓòɖòɔ̀ kɔ̃ɛɛ gboò, sepóɛɖé mana nì wa kɔ̃.”

¹³ Ɔ jèɛɛ, Béɖàùn sɔ̀ ma dyí ɓó gànà-kṹún, ké ɔ cɛ̃ɛ ma nyɔ vɛ̀nɛ̀ ɓě sɔ̀ ma kà ɖé Béɖà gboɛɛ gbo, ké ɔ ɖá, “Ɓě mu ɓě ɓíɖí ɖe, sepóɛɖé Bounɓoɔ̀ se wɔ̃́ ɓɛ́ ḿ kè ɓě ké mu.”

¹⁴ Ké nyɔ vɛ̀nɛ̀ ɓěɔ̀ sɔ̀ ma dyí, ké wa mu ma Béɖà gbo ɖe, ké wa ɖá, “Béɖàùn ɖá ɔ se da dyio.”

¹⁵ Púɛɛ, Béɖà ɖoɓo ma nyɔ vɛ̀nɛ̀ ɖíɛ́ ɓě ɓɛ́ wa mɔ̀ùn vò dyí, ké wa kpa ɖɛ ké wa zi nyɔ vɛ̀nɛ̀ kĩ́ín ɓěɔ̀ dyíɛ.

¹⁶ Ké wa dyi ma ɖé Béɖàùn gbo, ké wa ɖá, “Béɖà mɔ̀à Zípɔ̀ɛ̀ dyú-gààɔ̀ kɛɛ ɖá m̀ mɛ mu ɖé ɔ gbo, ké ɖɛ ɖò mɛ ɓɔ́ m̀ ɓɔ́í poɛ.

¹⁷ Sepóɛɖé ɔ mu m̀ dya-dè-dè vɛ̀nɛ̀ nyíìn, ké ɖɛ kã̀ìn séín nì mu ɔ gbo cɛ̃ìn nyɛɛ, ɔ muɛ nyuùn. À ɓaà m̀ ní, dyi, ɓɛ́ m̀ ké ɔ bìì nyɔ ɓěɔ̀ gboò.”

¹⁸ Kɛɛ Béɖàùn zà ma ɖé wuɖu, ké ɔ cɛ̃ɛ ma Béɖàà nyɔ vɛ̀nɛ̀ ɓěɔ̀ gbo, ké ɔ ɖá, “Kɛbì Béɖà mɛ dyíìnɔ̌ má ɔ gbǒɔ̀ séɓàɖà kè góò, ɓɛ́ ɔ kéɔ́ máa ḿ nyíɛɛ, ḿ se Bounɓo mɔ̀à ní Gèɖèpɔ́ɔ̀ kɛɛ wuɖuɔ̀ kɔ̃ péɖéɛ ɓɛ́ìn, ɓɛ́ ḿ ké ɖɛ tííwè mɔɔ ɖɛ vɛ̀nɛ̀ nyu.

¹⁹ Ní ɓaà ɓě ní, ɓě pɛ̃́ dà ɓó máaǔn kà ɓě mǔè ɓěɔ̀ nyuà kɛ, ɓɛ́ ḿ ké Bounɓoɔ̀ wĩín dyi wɔ̃́ ɖe.”

²⁰ Ké Gèɖèpɔ́ɔ̀ dyi ma Béɖàùn gbo ɓó máaún, ké ɔ wùɖù ma Béɖàùn gbo, ké ɔ ɖá, “Gàa ɓěa dyi m̀ ɖáuń dyi ní, nìí, m̀ mɛ sɔ̀ dyí, ɓɛ́ m̀ kè wa ké mu. Kɛɛ ɖɛ ní mu m̀ gbo cɛ̃ìn nyɛɛ ɖòùn mɔ̀ ɖɛ m̀ mɛ nyu.”

²¹ Ké Béɖàùn sɔ̀ ma dyí ɓó gànà-kṹún, ké ɔ po ma ɔ kɔ̃-kò-ɖɛ̀ɔ̀ ɓó ɔ jǎkasìɔ̀ kɔ̃ún, ké ɔ kè Móà-nyɔ̀ vɛ̀nɛ̀ ɓěɔ̀ mu ma.

Béɖàùn kè ɔ jǎkasìɔ̀

²² Kɛɛ Bounɓo Gèɖèpɔ́ɔ̀ kpá ma dyoɖoún mìɔ ɓó ɔ mu jè. Ké ɔ zɛ̃̀ìn ma ínjà ɖò mú, ké ɔ nyànà ma ɓó hwìèɔ̀ dyíin, ɓɛ́ ɔ ké ma ɔ hwìèɔ̀ dyí kã̀ìn. Béɖàùn nì ma jǎkasìɔ̀ kɔ̃ún, ké ɔ gbo-nì-nyɔ̀ ɓěɔ̀ sɔ̃́ nì ma ɓó ɔ gbo.

²³ Ké jǎkasìɔ̀ dyé ma ínjà mɔ̀à Bounɓoɔ̀ kɛɛ ɓó hwìèɔ̀ dyí dyi nyànàà, ké gàsíà zà kpaɖaún ɖò nì ma ɔ xwa. Púɛɛ, jǎkasìɔ̀ zàìn ma dú hwìǐ, ké ɔ pàìn ma ɖé xwáɖá xwíɖíi. Ké Béɖàùn nàmàìn ma jǎkasìɔ̀ ɓà-cù, ɓɛ́ ɔ ké hwìèɔ̀ dyí sí ɖe.

²⁴ Hwɛ̀ ké ínjàɔ̀ mu, ké ɔ nyànà ma ɓó hwìèɔ̀ dɛ̀ nɛ́ìn dyi ɖò dyi ɓó géɖéè-gbǎ sɔ̃́ ɖò pṹa, ké gmɔ nì ma hwìè-pĩ̀à sɔ̃́ɔ̀ kɔ̃.

²⁵ Ké ti ɓɛ́ jǎkasìɔ̀ dyé ma ínjàɔ̀ kɛɛ, ɔ mùìn ma ɖé gmɔɔ̀ dyéɖéín, ké Béɖàùn ɓoɔ̀ nɛ́ìn ma gmɔɔ̀ dyi. Ɔ jèɛɛ, ɔ ɖú ma jǎkasìɔ̀ ɓà-cù nàmàìn kpàǐ ɖe.

²⁶ Ké ínjàɔ̀ mu ma ɖé dyúa, ké ɔ nyànà ma ɓó hwìèɔ̀ dɛ̀ nɛ́ìn dyi ɖò dyi, dɛ̀ ɓɛ́ ɓàɖàìn-naín ɖò se nì fɔɔ, nìí ɓɛ́ nyɔ ké ɖiaún mɔɔ kunuaún mùìn nyɛ.

²⁷ Ti ɓɛ́ jǎkasìɔ̀ dyé ma ínjàɔ̀ kɛɛ, púɛɛ, ɔ pɛ̃́ ma dyi ɖé Béɖàùn xwíɖíi. Ké Béɖàùn kpá ma dyoɖoún mìɔ, ké ɔ nàmàìn ma jǎkasìɔ̀ ɓà-cù ɖe.

²⁸ Hwɛ̀ ké Bounɓoɔ̀ kaà ma jǎkasìɔ̀ wɔ̃ɔ̀, ké ɔ ɖú ma Béɖàùn gbo wùɖù kpàǐ, ké ɔ ɖá, “Ɖɛ́ ḿ nyu m̀ bũ̌, ɓɛ́ m̀ dyiá kà ḿ ɓà-cùɛ̀ nàmàìn-kpà tã nyuɛ́?”

²⁹ Ké Béɖàùn cɛ̃ɛ ma jǎkasìɔ̀ gbo, ké ɔ ɖá, “Ɔ mɔ̀ sepóɛɖé m̀ nì ḿ cáuń jè. Nyɛ́ ɖá ḿ ɓéɖéɔ́ má gàsíà ɖò xwa kɛ́? Ɔ dyiɔ́ ná nìǐn, ní muɔ́ má m̀ ɖáɓáùn.”

³⁰ Ké jǎkasìɔ̀ cɛ̃ɛ ma Béɖàùn gbo, ké ɔ ɖá, “Má, mɔ̄ mɔ̀ nì jǎkasì ɓɛ́ m̀ ɖúó kɔ̃ún kpáuń dyí tee dyɛ̀ìn ɓó zɛ̃̌ɛ̀ kɛe? Ḿ ɖǎ m̀ ɖɛ nì kàà bũ̌ nyu ɖò kĩ́íne?” Ké Béɖàùn ɖá, “Gbàe.”

³¹ Púɛɛ, Bounɓoɔ̀ kaà ma Béɖàùn dyéɖéɔ̀, ké Béɖàùn dyé ma ínjàɔ̀ ɓó hwìèɔ̀ dyíin nyànàà, ké ɔ gàsíà zà kpaɖaúnɔ̀ nì ma ɔ xwa. Hwɛ̀ ké Béɖàùn jìɖǐ ma ɓó ɓíɖíi dyi.

³² Ké ínjàɔ̀ wùɖù ma ɔ gbo, ké ɔ ɖá, “Ɖɛ́ kɔ̃̀ jè m̀ nyuá kà nì jǎkasìɔ̀ ɓà-cù nàmàìn-kpà tã kɛ́? Gmɔ̀ nɔ̄, ḿ dyi, ɓɛ́ ḿ ké nì hwìèɔ̀ dyí kã̀ìn, sepóɛɖé hwìè m̀ nìà kpauń wɛ̃ɛ se dyí sɛ́ɖɛ́ìn ɓó ḿ dyúa.

³³ Ké jǎkasìɔ̀ dyé ḿ jèɛɛ, ɔ nyuà hwìǐ-sɔ̀ìn-kpà tã nìà kɛ̀. Ɔ seɔ́ ná hwìǐ sɔ̀ìn ní, ní muɔ́ má m̀ ɖáɓáùn ɓó kàǔn, ɓɛ́ ɔ ɖòùn kéɔ́ mu.”

³⁴ Hwɛ̀ ké Béɖàùn cɛ̃ɛ ma ínjàɔ̀ gbo, ké ɔ ɖá, “Ḿ ɖǎ nàmàǔn nyu, sepóɛɖé ḿ seɛ dyuò kà mɔ̀ mɔ̀ nyɔ kã̀ìn ní hwìèɔ̀ dyíɛ̀. Ɔ ná nì jèɛɛ, ɔ jǔ ké m̀ se wɔ̃́ ɓɛ́ ḿ ké mu ní, ní mu ɖe kɔ́ìn.”

³⁵ Ké ínjàɔ̀ cɛ̃ɛ ma Béɖàùn gbo, ké ɔ ɖá, “M̀ kè gàa ɓěa mɛ mu, kɛɛ wuɖu ní mu m̀ wĩín poùn wɛ̃ɛ mɔ̀ ɖɛ m̀ mɛ cɛ̃.” Ké Béɖàùn kè nyɔ vɛ̀nɛ̀ ɓě ɓɛ́ Béɖà ɖoɓo ma kà kɛɛ mu ma.

Béɖà kpɔ̃ Béɖàùn hwìǐ

³⁶ Ti ɓɛ́ Béɖà wɔ̃́ɔ ma kà Béɖàùn nì ma dyiɛń nyɛɛ, púɛɛ, ɔ mu ma ɔ hwìǐ ɖé Móà-hwɔ̀ɖɔ̀ ɖò mú. Hwɔɖɔɔ̀ nì ma ɓó Áánɔ̀-nì ɓɛ́ ɔ nìà Móà-ɓòɖòɔ̀ bã̀à dyíɛɛ wĩín.

³⁷ Ké Béɖà cɛ̃ɛ ma Béɖàùn gbo, ké ɔ ɖá, “Má, ḿ ɖoɓo ma kíá ɓě, ɓɛ́ wa ké ma m̀ ɖáe? Ɖɛ́ kɔ̃̀ jè m̀ seà ní ɖá-wùɖùɔ̀ gbo dyiɛ́? Nì hwòɖǒ ɖá ḿ se m̀ dya-dè-dè nyíɛ ɓɛ́ìne?”

³⁸ Ké Béɖàùn cɛ̃ɛ ma Béɖà gbo, ké ɔ ɖá, “Má, ḿ ɖǎ dyie? Ḿ ɖòǔn se kpé ɖò ɓéɖé ɓɛ́ ḿ ké ɖɛ kà kò ɖò cɛ̃, ɔ sèìn wuɖu ɓɛ́ Gèɖèpɔ́ɔ̀ po ḿ wĩín nyɛɛ ɖòùn mɔ̀ ɖɛ ní mu cɛ̃ìn.”

³⁹ Hwɛ̀ ké Béɖàùn kè Béɖà mu ma, ké wa nyini ma ɖé Kíjà-Húzɔ̀-hwɔ̀ɖɔ̀ɔ̀ mú.

⁴⁰ Ké Béɖà zàìn ma ɓìɖǐ kè ɓáɖáá ɓě sáa, ké ɔ nyí ma Béɖàùn kè nyɔ vɛ̀nɛ̀ ɓě nì ma ɓó ɔ gboɛɛ suaɖɛ̀ɔ̀ ɖò.

Kpáá-ɖɛ̀-cɛ̃-cɛ̃ kĩ́ín ɓɛ́ Béɖàùn nyu ma kɛ

⁴¹ Wéɔ̀ nyɔ kɔ ma ɓó dyíɛɛ gànà-kṹún wɛ̃ɛ, Béɖà kpa ma Béɖàùn ɖé Bámɔ̀-Béò mɔ̀ hwɔɖɔ ɖò ɓɛ́ ɔ nì ma ɖé toɖo ɖò dya kɛɛ mú. Ké sɔ̀ìn ɖé hwɔɖɔɔ̀ múɛɛ, Béɖàùn dyé ma Éézùɖùɛ̀-nyɔ̀ kúɖúú ɓěɔ̀ wáká ɖò.