Nɔ̀ɓà 21 - Ɓǎsɔ́ɔ̀ Báɓòɔ̀

Éézùɖùɛ̀-nyɔ̀ ɓěɔ̀ ɖu Kénà-nyɔ̀ ɓěɔ̀ toún

¹ Ɓó tia ɓaɖaa, Kénà-ɓòɖòɔ̀ kã́á ɓɛ́ ɔ cĩ́ ma ɖé Áwɔ̀ɖɔ̀-hwɔ̀ɖɔ̀ɔ̀ mú ɖé Nɛ́gà-ɓòɖòɔ̀ kɔ̃ɛɛ wɔ̃́ɔ ma kà Éézùɖùɛ̀-nyɔ̀ ɓěɔ̀ nì ma hwìè ɓɛ́ ɔ mu ma ɖé Àfáwìɖììn-hwɔ̀ɖɔ̀ɔ̀ múɛɛ dyàǔn wɛ̃. Púɛɛ, ɔ kpa ma Éézùɖùɛ̀-nyɔ̀ ɓěɔ̀ to kɔ̃, ké ɔ kpɔ̃ ma wa ɖíɛ́ ɓě.

² Ké Éézùɖùɛ̀-nyɔ̀ ɓěɔ̀ ɖììn ma Bounɓoɔ̀ wuɖu dyéɖéín, ké wa ɖá, “Ɔ jǔ ké m̀ dyi nyɔ ɓěɛ̀ à xwaún dyi po ní, à mu waà hwɔɖɔ ɓěɔ̀ wáɖáùn gàná cá.”

³ Ké Bounɓoɔ̀ wɔ̃́ ma Éézùɖùɛ̀-nyɔ̀ ɓěɔ̀ wuɖuɔ̀, ké ɔ po ma Kénà-nyɔ̀ ɓěɔ̀ wa xwaún dyi. Ké wa gbɔɔ̀ ma Kénà-nyɔ̀ ɓěɔ̀ kè waà hwɔɖɔ ɓěɔ̀ mú gàná cá. Ɔ jèɛɛ, wa jǔìn ma páɔ̀ Hɔ́mà-nyɛ̀nɛ̀ kɔ̃̀ xwíníín mɔ̀à mú-gbɔɔ̀-gbɔɔ̀ kɛ.

Bàɖàsǐ-sɛ̀

⁴ Sɔ̀ìn ɓóɛ gboɛɛ, Éézùɖùɛ̀-nyɔ̀ ɓěɔ̀ sɔ̀ ma ɓó Hóɔ̀-tòɖòɔ̀ gbo dyí, ké wa pòìn ma ɖé Dyóó Zĩ-zãɔ̀ wĩín dú, ɓɛ́ wa ké Íɖɔ̀ùn-ɓòɖòɔ̀ ɓàɖàìn. Kɛɛ nyɔ ɓěɔ̀ se ma hwòɖǒ kuɛ ɓɛ́ìn ɖe ɓó hwìèɔ̀ kɔ̃.

⁵ Púɛɛ, wa ɖú ma Gèɖèpɔ́ɔ̀ kè Mózè dúi jɛ̀ìn kpàǐ, ké wa ɖá, “Mózè, ɖɛ́ kɔ̃̀ jè m̀ zàà à ɖé Íjè-ɓòɖòɔ̀ kɔ̃, ɓɛ́ à kéà nɔ̄ gbǎùn-fúɖúáɛ̀ kɔ̃ mɛ́ìn nyɛ́? Dyéɛ, ɖii-ɖɛ̀ ɖò mɔɔ náá-nì ɖò se nì ɓó à bìì, ké ɖii-ɖɛ̀ se kpáná ɖò mú nì nìà kɛ ɖǎ à kɛ̀ìn.”

⁶ Ɔ jèɛɛ, Bounɓoɔ̀ tò ma cɛ̃́-sɛ̀ ɓě ɖé wa hwìɛ̀, ké sɛ ɓěɔ̀ ɖú ma Éézùɖùɛ̀-nyɔ̀ ɓěɔ̀ numu kpàǐ, ké waà nyɔ ɓáún-ɓáún mɛ́ ma.

⁷ Hwɛ̀ ké nyɔ ɓěɔ̀ dyi ma Mózè gbo, ké wa ɖá, “Ɓɔ̌ɔ̀, à ɖǎ nàmàǔn nyu, sepóɛɖé à ɖǎ m̀ kè Bounɓoɔ̀ dúi jɛ̀ìn. Ɓaà à bìì Bounɓoɔ̀, ɓɛ́ ɔ ké à sɛ ɓěɛ̀ hwìɛ̀ zà.” Ké Mózè ɓaà ma nyɔ ɓěɔ̀ bìì.

⁸ Ké Bounɓoɔ̀ cɛ̃ɛ ma Mózè gbo, ké ɔ ɖá, “Nyu ɖɛ kè cɛ̃́-sɛ̀ ɓěɔ̀ hwɔìn nyɛ, ɓɛ́ m̀ kéɛ cu-kpóɖó ɖò dyéɖéín dyi ɓá, ɓɛ́ m̀ kéɛ dyi nyànàìn. Nìí, nyɔ kã̀ìn séín ɓɛ́ sɛ ɓěɔ̀ mu numuùn, ké ɔ mu sɛ nìà cu-kpóɖóɔ̀ dyéɖéín nyɛɛ dya gmɔ̀ùn wɛ̃ɛ, ɔ mu dyi kánáùn.”

⁹ Ɔ jèɛɛ, Mózè nyu ma bàɖàsǐ-sɛ̀ ɖò, ké ɔ ɓáa ma cu-kpóɖó ɖò dyéɖéín dyi. Cɛ̃́-sɛ̀ ɓěɔ̀ ɖò dyi ma nyɔ ɖò numu nyɛ̀nɛ̀ɛ̀ ní, ɔ gmɔ̀ bàɖàsǐ-sɛ̀ɔ̀ dya, ké ɔ káná dyi.

Éézùɖùɛ̀-nyɔ̀ ɓěɔ̀ mu ɖé Móà-ɓòɖòɔ̀ bɔɔ-kpàɔ̀ kɔ̃

¹⁰ Sɔ̀ìn ɓóɛ gboɛɛ, Éézùɖùɛ̀-nyɔ̀ ɓěɔ̀ kpá ma hwìè kɔ̃ ɖe, ké wa mu, ké wa nyànàìn ma waà jàɖàìn-gbò ɓěɔ̀ dyi ɖé Óɓò-pàɔ̀ mú.

¹¹ Ké wa sɔ̀ ma ɖé Óɓò-pàɔ̀ mú, ké wa kpá ma hwìè kɔ̃ ɖe, ké wa mu, ké wa nyànàìn ma waà jàɖàìn-gbò ɓěɔ̀ dyi ɖé Ídyè-Àɓáwìɖììn-pàɔ̀ mú, ɖé gbǎùn-fúɖúá ɓɛ́ ɔ nì ma ɖé Móà-ɓòɖòɔ̀ dyóɖó-xwáɖáún-wóɖóìn-naínɔ̀ kɛɛ kɔ̃.

¹² Ké sɔ̀ìn ɓóɛɛ, wa kpá ma hwìè kɔ̃ ɖe, ké wa mu, ké wa nyànàìn ma waà jàɖàìn-gbò ɓěɔ̀ dyi ɖé Záwɛ̀ɖɛ̀ Bɔɔ-kpàɔ̀ kɔ̃.

¹³ Ti wa sɔ̀ ma ɓó dyíɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Áánɔ̀-nìɔ̀ ɖeín, hwɔ ɖé gbǎùn-fúɖúá ɓɛ́ ɔ nyini ɖé Ámɔ̀-nyɔ̀ ɓěɔ̀ nììn ɓóɖóɔ̀ múɛɛ kɔ̃ dyí. Áánɔ̀-nìɔ̀ mɔ̀ ma Móà-ɓòɖòɔ̀ kè Ámɔ̀-ɓòɖòɔ̀ bã̀à.

¹⁴ Ɔ jèɛɛ, ɖé Bounɓoɔ̀ to-cèè-ɖɛ̀ɔ̀ múɛɛ, wa cɛ̃ ma ɖɛ ɓě ɓá Wáhè-hwɔ̀ɖɔ̀ ɓɛ́ ɔ nì ma ɖé Súfà-gbɛ̌ɛ̀ɔ̀ múɛ kè bɔɔ-kpà ɓěɔ̀ kè Áánɔ̀-nìɔ̀

¹⁵ kè bɔɔ-kpà ɓě ɓɛ́ wa nyini ma ɖé Áà-hwɔ̀ɖɔ̀ɔ̀ mú kè ɖé Móà-ɓòɖòɔ̀ bã̀à dyíɛɛ jè dyíɛ.

¹⁶ Ké wa sɔ̀ ma ɓó Áánɔ̀-nìɔ̀ wĩín, ké wa mùìn ɖé Béè-nì-ɓì kɔ̃̀ wĩín ɓɛ́ Bounɓoɔ̀ wùɖù ma kà Mózè gbo, ɓɛ́ ɔ dyi níiń, “Poìn nyɔ ɓěɔ̀ dyí, ɓɛ́ ḿ ké wa náá-nì nyío” kɛɛ wĩín.

¹⁷ Púɛɛ, Éézùɖùɛ̀-nyɔ̀ ɓěɔ̀ ɖú ma wɛ́ɖɛ́ nìà kɛ ɓeɖe kpàǐ, ké wa ɖá, “Tò ní, ní-ɓì wè. Ɓě ɓèɖèìn ní-ɓìɔ̀ gbo!

¹⁸ Ɔ mɔ̀ ní-ɓì ɓɛ́ nyɔ vɛ̀nɛ̀ ɓěɔ̀ ɓúɖú ma kɛ. Wa kè nyɔ ɓěɔ̀ wuɖuí-kɔ̃̀-nyɔ̀ ɓěɔ̀ ɓúɖúɛ ma. Wa ɓúɖúɛ̀n ma waà nyɔ-wuɖuí-kɔ̃̀ìn-kùì-kpà ɓěɔ̀ kè waà kùì-kpà tɔ̀ɔ̀ ɓěɔ̀ ní.” Ti ɓɛ́ Éézùɖùɛ̀-nyɔ̀ ɓěɔ̀ sɔ̀ ma ɓó gbǎùn-fúɖúáɔ̀ kɔ̃ dyíɛɛ, wa mu ma ɖé Màtánà-hwɔ̀ɖɔ̀ɔ̀ mú.

¹⁹ Ké ti wa sɔ̀ìn ma ɖé Màtánà-hwɔ̀ɖɔ̀ɔ̀ múɛɛ, wa mu ɖé Nàháɖìè-hwɔ̀ɖɔ̀ɔ̀ mú. Ké ti wa sɔ̀ìn ma ɓóɛɛ, wa mu ma ɖé Bámɔ̀-hwɔ̀ɖɔ̀ɔ̀ mú.

²⁰ Ké wa sɔ̀ìn ma ɓó, ké wa mu ma ɖé bɔɔ-kpà nì ma ɖé Móà-ɓòɖòɔ̀ kɔ̃ɛɛ kɔ̃, hwɔ ɖé Pígà-tòɖòɔ̀ xwíɖíi dyí, dɛ̀ ɓɛ́ nyɔ dyi nì ní, nyɔ dyi gbǎùn-fúɖúáɔ̀ kɔ̃in gmɔìn ɓɛ́ìn nyɛ.

Wa ɖu Kã́á Síhɔ̃̀ kè Kã́á Ógì toún

²¹ Sɔ̀ìn ɓóɛ gboɛɛ, Éézùɖùɛ̀-nyɔ̀ ɓěɔ̀ tò ma ɖé Síhɔ̃̀ ɓɛ́ ɔ mɔ̀ ma Ámɔ̀-nyɔ̀ ɓěɔ̀ kã́á kɛɛ gbo wuɖu, ké wa ɖá,

²² “À ɓaà m̀ ní, wɔ̃́ ɓɛ́ à ké nì ɓóɖóɔ̀ mú zĩ̀ìn. À se nì geɖe ɓěɔ̀ ɖò mɔɔ nì géɖéè-gbǎ ɓěɔ̀ ɖò gbo pàǐn mu, mɔɔ ké à se nì ní-ɓì ɓěɔ̀ ɖò mú ní náa mu. Kɛɛ à mu hwìè vɛ̀nɛ̀ɔ̀ xwíníín sèìn tee, ɓɛ́ à ké nì ɓóɖóɔ̀ mu nama hwɛ̀.”

²³ Kɛɛ Síhɔ̃̀ se ma wɔ̃́ ɓɛ́ Éézùɖùɛ̀-nyɔ̀ ɓěɔ̀ ké ma ɔ ɓóɖóɔ̀ mú zĩ̀ìn fɔɔ cá. Ɔ jèɛɛ, ɔ poìn ma ɔ to-vɔ̃-nyɔ̀ séín ɓěɔ̀ dyí, ké wa kpa ma Éézùɖùɛ̀-nyɔ̀ ɓěɔ̀ to kɔ̃ ɖé gbǎùn-fúɖúáɔ̀ kɔ̃. Wa nyini ma ɖé Jáhàzì-hwɔ̀ɖɔ̀ɔ̀ mú, ké wa ɖú ma Éézùɖùɛ̀-nyɔ̀ ɓěɔ̀ gbo vɔ̃ kpàǐ.

²⁴ Kɛɛ Éézùɖùɛ̀-nyɔ̀ ɓěɔ̀ ɖáɓá ma wa gàsíà dyí, ké wa ɖú ma waà ɓóɖóɔ̀ dyí, sɔ̀ìn ɖé Áánɔ̀-nìɔ̀ wĩín ké ma ɖé Jáɓò-nìɔ̀ wĩín nyiniɛ. Ɔ mu tee ké ɔ sèìn Ámànà-nyɔ̀ ɓěɔ̀ ɓóɖóɔ̀ dyí, sepóɛɖé Ámànà-nyɔ̀ ɓěɔ̀ gmɔ̀ ma waà ɓóɖóɔ̀ dyí kóɖó-kóɖó.

²⁵ Ké Éézùɖùɛ̀-nyɔ̀ ɓěɔ̀ ɖú ma Ámɔ̀-nyɔ̀ ɓěɔ̀ hwɔɖɔ séín ɓěɔ̀ dyí, ké wa cĩ́ ma ɖé wa mú. Hwɔɖɔ ɓěɔ̀ ɖò mɔ̀ Hɛ́ɓɔ̀ùn-hwɔ̀ɖɔ̀ɔ̀ kè ɔ nììn hwɔɖɔ-kpàǎ ɓěɔ̀.

²⁶ Hɛ́ɓɔ̀ùn-hwɔ̀ɖɔ̀ɔ̀ mɔ̀ ma hwɔɖɔ kɔ̃̀ mú ɓɛ́ Síhɔ̃̀ mɔ̀à Ámɔ̀-nyɔ̀ ɓěɔ̀ kã́áɔ̀ kɛɛ cĩ́ ma kɛ. Ɔ mɔ̀ nyɔ vɔ̃ó zɔ̃̌ɔ̀ Móà-kã̀ǎɔ̀ gbo, ɓɛ́ ɔ dyi zɔ̃̌ɔ̀ ɔ ɓóɖó séín nyinià ɖé Áánɔ̀-nìɔ̀ wĩín nyɛɛ ɔ xwa zà kɛ.

²⁷ Ɔ jèɛɛ, ɓeɖe-nyɔ̀ ɓěɔ̀ poɛ wɛ́ɖɛ́ín, ké wa ɖá, “Ɓě dyi Hɛ́ɓɔ̀ùn mɔ̀à Kã́á Síhɔ̃̀ ɓíɖí-hwɔ̀ɖɔ̀ɔ̀ kɛɛ po ɖe. À mɔ́ ɓɛ́ à ké hwɔɖɔɔ̀ po-po dyé ɖe.

²⁸ Maa kĩ́ín nyɛɛ, Síhɔ̃̀ɛ̀ sójà ɓěɔ̀ dyi ma Hɛ́ɓɔ̀ùn-hwɔ̀ɖɔ̀ nìà kɛ mú sɔ̀, ké wa dyi ma to gbo muɛń nìǐn, wa nì ma kà nyɛ kpɔ̃ dyí nìà kɛ. Nyɛɔ̀ gbɔɔ̀ ma Áà-hwɔ̀ɖɔ̀ nìà ɖé Móà-ɓòɖòɔ̀ kɔ̃ɛɛ mú, ké ɔ fɔ̃ ɓó toɖo ɓě nìà ɖé Áánɔ̀-nìɔ̀ wĩín nyɛɛ ɓó dyi.

²⁹ Móà-nyɔ̀ ɓě, ɓě jè mɔ̀ ma wìì-ɖɛ̀. Ɓě mɔ̀ nyɔ ɓě mɔ̀à kũùn-kpò-gèɖèpɔ́ɔ̀ mɔ̀à Kɛ́mɔ̀ kɛ ɓiè-nyɔ̀ɛɛ, ɓě ɖǎ ma mú gbɔɔ̀ hwɛ̀. Ɓěɛ̀ gèɖèpɔ́ɔ̀ ɖǎa ma nyu ké ɓěɛ̀ gàa ɓěɔ̀ mɔ̀ǎ ma to-peɖe-nyɔ̀ ɖé ɓóɖó kà kò ɖò kɔ̃. Ké ɓěɛ̀ màa ɓěɔ̀ mɔ̀ǎ ma Ámɔ̀-kã̀ǎ mɔ̀à Síhɔ̃̀ kɛɛ to-gbo-zà-ɖɛ̀.

³⁰ Kɛɛ ɓó kàǔn wɛ̃ɛ, Ámɔ̀-nyɔ̀ ɓěɔ̀ xwíníín-dyù ɓěɔ̀ ɖǎ mú gbɔɔ̀ ɖé Hɛ́ɓɔ̀ùn-hwɔ̀ɖɔ̀ɔ̀ mú, ké ɔ mu tee ké ɔ dyɛ̀ìn Ɖíɓɔ̀ùn-hwɔ̀ɖɔ̀ɔ̀. À gã̀ waà hwɔɖɔ ɓěɔ̀ wáɖáuń dyi tee ké à nyini ɖé Nófà-hwɔ̀ɖɔ̀ɔ̀ kè Mɛ̀ɖéɓà-hwɔ̀ɖɔ̀ɔ̀ mú.”

³¹ Kǎà Éézùɖùɛ̀-nyɔ̀ ɓěɔ̀ nyu ma Ámɔ̀-nyɔ̀ ɓěɔ̀ ɓóɖóɔ̀ dyí ɖúɛ.

³² Ké Mózè ɖoɓo ma nyɔ, ɓɛ́ wa ké ma Jázè-hwɔ̀ɖɔ̀ɔ̀ dyéɖé gboi kpaìn. Ké sɔ̀ìn ɓóɛɛ, wa kpa ma hwɔɖɔɔ̀ kèɛ̀ hwɔɖɔ-kpàǎ ɓěɔ̀ to kɔ̃, ké wa ɖuɛ ma toún. Ké wa kúmú ma Ámɔ̀-nyɔ̀ ɓě nì ma ɖéɛɛ ɖé dyi.

³³ Hwɛ̀ ké Éézùɖùɛ̀-nyɔ̀ ɓěɔ̀ cɛ́ɛ̀ xwa, ké wa mùìn ma ɖé hwìè ɓɛ́ ɔ mu ma ɖé Básàùn-ɓòɖòɔ̀ múɛɛ xwíníín. Ké Ógì ɓɛ́ ɔ mɔ̀ ma Básàùn-kã̀ǎɔ̀ kɛɛ dyà ma wa to kɔ̃. Ɔ kè ɔ sójà séín ɓěɔ̀ dyi, ɓɛ́ wa ké ma Éézùɖùɛ̀-nyɔ̀ ɓěɔ̀ to kɔ̃ po ɖé Ɛ̀dɛ́ɖɛ́ì-hwɔ̀ɖɔ̀ɔ̀ mú.

³⁴ Kɛɛ Bounɓoɔ̀ cɛ̃ɛ ma Mózè gbo, ké ɔ ɖá, “Mɔ̀ǔn ɖá ɓɛ́ m̀ ké fɛ̃̀ìn ɓó ɔ jè, sepóɛɖé ḿ ɖǎ ɔ m̀ xwaún dyi po, dè ɔ nyɔ séín ɓěɔ̀ kè ɔ ɓóɖó gànáɔ̀ kɔ̃. Ké nì mu ɖɛ dyúáɖò ɓɛ́ m̀ nyu ma kà Síhɔ̃̀ mɔ̀à Ámɔ̀-nyɔ̀ ɓěɔ̀ kã́á kɛ bũ̌ɛɛ ɔ bũ̌ nyuùn. Ɔ mɔ̀ nyɔ cĩ́ ma kà ɖé Hɛ́ɓɔ̀ùn-hwɔ̀ɖɔ̀ɔ̀ múɛ̀.”

³⁵ Ɔ jèɛɛ, toɔ̀ kpáìn ma mú, ké wa ɖáɓá ma Ógì kè ɔ dyú-gàà ɓěɔ̀ kè ɔ nyɔ séín ɓěɔ̀, ké nyɔ dyúáɖò dyɛ mɔ̀ùn se ɓíɖíi sè. Hwɛ̀ ké wa ɖú ma ɔ ɓóɖóɔ̀ dyí.