Nɔ̀ɓà 20 - Ɓǎsɔ́ɔ̀ Báɓòɔ̀

Ɖɛ kpá ma ɖé Káɖɛ̀-hwɔ̀ɖɔ̀ɔ̀ múɛ

¹ Ti ɓɛ́ Éézùɖùɛ̀-nyɔ̀ ɓěɔ̀ ɖǎ ma Íjè-ɓòɖòɔ̀ kɔ̃ sɔ̀ɛɛ, ɔ zɔ̃ kpáɖá-nyɔ sɔ̃́ nììnɔ̀ dɛ̀nɛ̀ kĩ́ín-kĩ́ínɔ̀ múɛɛ, wa nyini ma ɖé Zĩ́ìn Gbǎùn-fúɖúáɔ̀ kɔ̃, ké wa nyànàìn ma waà jàɖàìn-gbò ɓěɔ̀ ɖé Káɖɛ̀-hwɔ̀ɖɔ̀ɔ̀ mú dyi. Ké Méwìɖìàùn mɛ́ìn ma ɖé, ké wa zà ma ɔ dyóɖóún.

² Ɓó tia ɓaɖaa, náá-nì ɖò se ma ɓó nyɔ kúɖúú ɓěɔ̀ bìì nì. Ké wa poìn ma dyí, ɓɛ́ wa ké ma Mózè kè Eɖóún gbo vɔ̃.

³ Ké wa ɖú ma Mózè dúi jɛ̀ìn kpàǐ, ké wa ɖá, “Ɔ muɔ́ má dyíin nɔ̀mɔ̀ùn ɓɛ́ à kè à ɖíí-gàà ɓěɔ̀ kéɔ́ má mɛ́ ti ɓɛ́ wa mɛ́ ma kà ɓó Bounɓoɔ̀ dyúa kɛ.

⁴ Ɖɛ́ kɔ̃̀ jè m̀ dyàà à mɔ̀à Bounɓoɔ̀ nyɔ ɓěɛ̀ kɛɛ nɔ̄ gbǎùn-fúɖúá nìà kɛ kɔ̃, ɓɛ́ à kè à nyúà-ɖɛ̀ ɓěɔ̀ kéà nɔ̄ mɛ́ìn nyɛ́?

⁵ Ɖɛ́ kɔ̃̀ jè m̀ zà à ɖé Íjè-ɓòɖòɔ̀ kɔ̃, ɓɛ́ m̀ dyià à nɔ̄ dɛ̀ nyìnììn dyíin nìà kɛ dyà kɛ́? Ɓáá-ɖɛ̀ ɖò mɔɔ féè-cù ɖò mɔɔ géɖéè-ɖúú-gbǒ ɖò mɔɔ pɔ́mɛ́gàɖànɛ̀-cù ɖò se nɔ̄ pá nìà kɛ mú nì, hwɛ̀ ḿ po níiń, ní fóɖóún à ké náa.”

⁶ Hwɛ̀ ké Mózè kè Eɖóún sɔ̀ ma ɓó Éézùɖùɛ̀-nyɔ̀ ɓěɔ̀ hwìɛ̀, ké wa mu ma ɓó jàɖàìn-gbò kɔ̃̀ mú ɓɛ́ Bounɓoɔ̀ kè ɔ nyɔ ɓěɔ̀ dyéàìn nyɛɛ wĩín, ké wa taɓa ma dú hwuɖu ɓó Bounɓoɔ̀ dyúa. Ké Bounɓoɔ̀ dĩ́ín-dĩ̀ìnɔ̀ wóɖóìn ma wa dyí.

⁷ Ké Bounɓoɔ̀ cɛ̃ɛ ma Mózè gbo, ké ɔ ɖá,

⁸ “Ɖú kùì-kpà nìà ɓó gma-gbɔ̀ɖɔ̀ɔ̀ dyúa kɛɛ dyí, ɓɛ́ m̀ kè nì ɖíí-gàà Eɖóún ké Éézùɖùɛ̀-dyù séín ɓěɔ̀ dyí poìn, ɓɛ́ m̀ ké sɔ́ɔ́-kpò nìà ɖéɛɛ gbo wùɖù ɓó wa dyéɖé waí, ɓɛ́ sɔ́ɔ́-kpòɔ̀ ké ní tò. Kǎà m̀ mɛ nyu sɔ́ɔ́-kpòɔ̀ ní mú zàà ɓó wa bìì, ɓɛ́ wa kè waà nyúà-ɖɛ̀ ɓěɔ̀ ké ní ná.”

⁹ Ké Mózè ɖú ma kùì-kpà nì ma kà ɓó Bounɓoɔ̀ dyúa kɛɛ dyí kà Bounɓoɔ̀ nyuɛ ma kà ɔ gbo cɛ̃ɛ kɛ.

¹⁰ Ké Mózè kè Eɖóún poìn ma nyɔ séín ɓěɔ̀ dyí ɓó sɔ́ɔ́-kpòɔ̀ dyéɖé zɔ̃̌, ké Mózè ɖá, “Ɓě mɔ̀ Gèɖèpɔ́ɔ̀ gbo-vɔ̃-nyɔ̀ ɓěɛ̀ kɛɛ, ɓě tò ḿ gbo ɖùǔ. À mɛ zà sɔ́ɔ́-kpò nìà kɛ ní mú ɓó ɓě bììe?”

¹¹ Ké Mózè ɖú ma kùì-kpàɔ̀ dyií, ké ɔ nàmàìn ma ɔ sɔ́ɔ́-kpòɔ̀ kpa sɔ̃́, ké ní ɓáún-ɓáún sɔ̀ ma ɖé sɔ́ɔ́-kpòɔ̀ mú, ké nyɔ kúɖúú ɓěɔ̀ kè waà nyúà-ɖɛ̀ ɓěɔ̀ ná ma ní.

¹² Kɛɛ Bounɓoɔ̀ wùɖù ma Mózè kè Eɖóún gbo, ké ɔ ɖá, “Ɓě se ḿ hwòɖǒ kɔ̃ dè gàná cá, ké ɓě se ní dĩ́ín-dĩ̀ìnɔ̀ Éézùɖùɛ̀-dyù ɓěɔ̀ dyí tɛ̀mɛ̀ìn. Ɔ ná nì jèɛɛ, ɓě mɔ̀ nyɔ se nyɔ ɓěɛ̀ ɓóɖó ɓɛ́ ḿ nìà wa nyíɛń nyɛɛ kɔ̃ nyìnìɛ̌n mu.”

¹³ Wa jǔìn ma ní nìà kɛ Mɛ̀wíɖíɓà-nyɛ̀nɛ̀ kɔ̃̀ xwíníín mɔ̀à jɛ-jɛ kɛ, sepóɛɖé ɔ mɔ̀ dɛ̀ ɓɛ́ Éézùɖùɛ̀-nyɔ̀ ɓěɔ̀ jɛ̀ìn ma Bounɓoɔ̀ dúi, ké ɔ tɛ̀mɛ̀ìn ma ɔ dĩ́ín-dĩ̀ìnɔ̀ wa dyíɛ.

Íɖɔ̀ùn-kã̀ǎɔ̀ nɔ́ɔ̀ ɓɛ́ Éézùɖùɛ̀-nyɔ̀ ɓěɔ̀ ké ɔ ɓóɖóɔ̀ mú zĩ̀ìn

¹⁴ Sɔ̀ìn ɓóɛ gboɛɛ, Mózè ɖoɓo ma kíá ɓě sɔ̀ìn ɖé Káɖɛ̀-hwɔ̀ɖɔ̀ɔ̀ mú, ké wa mu ma ɖé Íɖɔ̀ùn-kã̀ǎɔ̀ gbo. Ɔ cuò ma wa, ké ɔ ɖá, “À mɔ̀à nì ɖíí ɓě mɔ̀à Éézùɖùɛ̀-nyɔ̀ ɓěɔ̀ kɛɛ ɖá m̀ dyuò gǎ-ɖɛ̀ séín ɓě ɓɛ́ à ɖǎ dyí dyéɛɛ jè.

¹⁵ M̀ dyuò kà à ɓǎ ɓě mu zɔ̃̌ɔ̀ ɖé Íjè-ɓòɖòɔ̀ kɔ̃, ké à kè wa cĩ́ ɖé ɓó ti tɔ̀mɔ̀ǔn-tɔ̀mɔ̀ǔn xwíníín nyɛ, ké kà Íjè-nyɔ̀ ɓěɔ̀ nyìnììn ma ɖé à kè à ɓǎ ɓěɔ̀ bũ̌in nyɛ.

¹⁶ Ké ti ɓɛ́ à pòìn ma Bounɓoɔ̀ kpéiɛɛ, ɔ wɔ̃́ ma à wuɖuɔ̀, ké ɔ tò ínjà ɖò, ké ɔ zà à ɖé Íjè-ɓòɖòɔ̀ kɔ̃ɛ̀. Ké ɓó kàǔn wɛ̃ɛ, à nì dà Káɖɛ̀-hwɔ̀ɖɔ̀ɔ̀ mú. Ɔ mɔ̀ hwɔɖɔ ɓɛ́ ɔ nì dà nì ɓóɖóɔ̀ wĩín nyɛ.

¹⁷ Ɓó kàǔn wɛ̃ɛ, à ɓaà m̀ ní, wɔ̃́ ɓɛ́ à ké nì ɓóɖóɔ̀ mú zĩ̀ìn. À se nì geɖe ɓěɔ̀ ɖò mɔɔ nì géɖéè-gbǎ ɓěɔ̀ ɖò gbo pàǐn mu, mɔɔ ké à se nì ní-ɓì ɓěɔ̀ ɖò mú ní náa mu. Kɛɛ à mu hwìè vɛ̀nɛ̀ɔ̀ xwíníín sèìn, ké à se dà ɖò pàǐn mu, ɓɛ́ à ké nì ɓóɖóɔ̀ mú nama hwɛ̀.”

¹⁸ Kɛɛ Íɖɔ̀ùn-kã̀ǎɔ̀ ɖoɓo ma Mózè gbo wuɖu, ké ɔ ɖá, “À se wɔ̃́ ɓɛ́ ɓě ké à ɓóɖóɔ̀ mú zĩ̀ìn. Ɓě dyiɛ náa nyu ní, à mu ɓě to kɔ̃ dyàùn.”

¹⁹ Ké Mózè ɖoɓo ma kã́áɔ̀ gbo wuɖu ɖe, ké ɔ ɖá, “À mu hwìè vɛ̀nɛ̀ɔ̀ zĩ̀ìn pū. Ɔ jǔ ké à kè à nyúà-ɖɛ̀ ɓěɔ̀ dyi nì níɔ̀ ɖò ná ní, nìí, à muɛ jè pɛ́ɛ̀ìn. À ɓaà m̀ ní, wɔ̃́ ɓɛ́ à ké ɓo kɔ̃in nàìn, ɓɛ́ à ké nì ɓóɖóɔ̀ mú zĩ̀ìn nyɛ̀nɛ̀ɛ̀ pū. À se ɖɛ kà kò ɖò nyuɛ́ mu.”

²⁰ Kɛɛ Íɖɔ̀ùn-kã̀ǎɔ̀ ɖá, “À se wɔ̃́ ɓɛ́ ɓě ké à ɓóɖóɔ̀ mú zĩ̀ìn.” Ké Íɖɔ̀ùn-kã̀ǎɔ̀ dyà ma to-vɔ̃-nyɔ̀ ɓě kè gàa-zà-nyɔ̀ kúɖúú ɓě, ké wa dyi ma Éézùɖùɛ̀-nyɔ̀ ɓěɔ̀ wɔ̃ to-po-kà.

²¹ Kǎà Íɖɔ̀ùn-nyɔ̀ ɓěɔ̀ nyu ma kà ɓó nɔ́ɔ̀. Wa se wɔ̃́, ɓɛ́ Éézùɖùɛ̀-nyɔ̀ ɓěɔ̀ ké waà ɓóɖóɔ̀ mú zĩ̀ìn. Ɔ jèɛɛ, Éézùɖùɛ̀-nyɔ̀ ɓěɔ̀ pòìn ma dà kà kò ɖò dú.

Ɖɛ ɓá Eɖóún mɛ́ jè dyíɛ

²² Ké Éézùɖùɛ̀-nyɔ̀ séín ɓěɔ̀ sɔ̀ ma ɓó Káɖɛ̀-hwɔ̀ɖɔ̀ɔ̀ mú dyí, ké wa kpá ma hwìè xwíníín ɖe, ké wa nyini ma ɖé Hóɔ̀-tòɖòɔ̀ gbo.

²³ Ké Bounɓoɔ̀ cɛ̃ɛ ma Mózè kè Eɖóún gbo ɖé Hóɔ̀-tòɖòɔ̀ gbo, hwɔ ɓó Íɖɔ̀ùn-ɓòɖòɔ̀ wĩín dyí, ké ɔ ɖá,

²⁴ “Eɖóún mu ɔ nyɔ ɓěɔ̀ gbo muùn. Ɔ se ɓóɖó ɓɛ́ ḿ nìà Éézùɖùɛ̀-dyù ɓěɔ̀ nyíɛń nyɛɛ kɔ̃ nyiniɛ́ mu, sepóɛɖé ɓě nyɔ sɔ̃́ɔ̀ jaɖa ní wuɖuɔ̀ mú ɖé Mɛ̀wíɖíɓà-nìɔ̀ wĩín.

²⁵ Ɖú Eɖóún kè ɔ dyú-gàà Ɛ̀ɖɛ̀ázà dyí, ɓɛ́ m̀ ké wa ɖé Hóɔ̀-tòɖòɔ̀ dya kpa,

²⁶ ɓɛ́ m̀ ké Eɖóúnɛ̀ sáa-zà-ɖɔ̀ɔ̀ ɔ mú zà, ɓɛ́ m̀ kéɛ ɔ dyú-gàà Ɛ̀ɖɛ̀ázà mú po. Sɔ̀ìn ɓóɛ gboɛɛ, nìí, Eɖóún mu ɖé toɖoɔ̀ dya mɛ́ìn, ɓɛ́ ɔ ké ɔ nyɔ ɓěɔ̀ gbo mu.”

²⁷ Ké Mózè nyu ɖɛ Bounɓoɔ̀ cɛ̃ ma kà ɔ gboɛ. Wa mu ma ɖé Hóɔ̀-tòɖòɔ̀ dya, ɓó Éézùɖùɛ̀-nyɔ̀ séín ɓěɔ̀ dyéɖé waí.

²⁸ Ké Mózè zà ma Eɖóúnɛ̀ sáa-zà-ɖɔ̀ɔ̀ ɔ mú, ké ɔ poɛ wa Ɛ̀ɖɛ̀ázà mɔ̀à Eɖóúnɛ̀ dyú-gààɔ̀ kɛɛ mú. Ké Eɖóún mɛ́ìn ma ɖé toɖoɔ̀ dya. Hwɛ̀ ké Mózè kè Ɛ̀ɖɛ̀ázà sɔ̀ ma ɖé toɖoɔ̀ dya.

²⁹ Ké ti ɓɛ́ Éézùɖùɛ̀ɛ̀ gbǒ-xwíníín-nyɔ̀ séín ɓěɔ̀ wɔ̃́ɔ ma múin kà Eɖóún ɖǎ ma mɛ́ɛ, púɛɛ, wa vĩ̌ ma ɓó Eɖóún jè ɓó wé kpáɖá-nyɔ ɓaɖa-bùè xwíníín.