Nɔ̀ɓà 2 - Ɓǎsɔ́ɔ̀ Báɓòɔ̀

Kà xwéɖé-dù ɓěɔ̀ nyu ma waà jàɖàìn-gbò ɓěɔ̀ páún poɛ kɛ

¹ Sɔ̀ìn ɓóɛ gboɛɛ, Bounɓoɔ̀ cɛ̃ɛ ma Mózè kè Eɖóún gbo, ké ɔ ɖá,

² “Éézùɖùɛ̀-dyù ɓěɔ̀ xwéɖé-dù ɖò-ɖò ɓěɔ̀ mɛ nyànàìn waà jàɖàìn-gbò ɓěɔ̀ dyi dyììn ɖé kà wa ɓǎà gbǒ-xwíníín ɓěɔ̀ nyu nìɛ̀ kɛɛ mú, ɖé wa mìɔùn nììn xwéɖé-dùɔ̀ kè waà gbǒ-xwíníínɔ̀ kɔ́ɖɔ̀ ɓěɔ̀ xwíɖíi. Waà jàɖàìn-gbò ɓěɔ̀ wɔ̃ mɛ gmɔ̀ìn ɖé ní jàɖàìn-gbò nìà ɓó wa hwòɖǒǔn wɛ̃ɛ gbo.

³ “Júɖà nììn xwéɖé-dùɔ̀ kè xwéɖé-dù ɓě nì ɔ xwíɖíiɛɛ kpoo kò-kò ɓěɔ̀ mɛ nyànàìn wa nììn jàɖàìn-gbò ɓěɔ̀ dyi hwɔ ɖé ní jàɖàìn-gbòɔ̀ dyóɖó-xwáɖáún-wóɖóìn-naínɔ̀ dyí, ɖé wa nììn kɔ́ɖɔ̀ɔ̀ xwíɖíi. Násɔ̀ùn mɔ̀à Ámìnáɖàà dyú-gààɔ̀ kɛɛ mɔ̀ Júɖà nììn xwéɖé-dùɔ̀ nyɔ vɛ̀nɛ̀.

⁴ Júɖà-nyɔ̀ ɓěɔ̀ mɔ̀ nyɔ-kpò táázĩ̀ìn kpáɖá-nyɔ tã ɓaɖa-bùè sè hĩinyɛ kè hɔ̃dɛ̀ɖɛ̀ mɛ̀nɛ̌ìn-ɖò.

⁵ Ɛ́sàkà nììn xwéɖé-dùɔ̀ mɛ nì Júɖà-nyɔ̀ ɓěɔ̀ jàɖàìn-hwɔ̀ɖɔ̀ɔ̀ wáká ɖò kɔ̃. Nɛ̀fánìò mɔ̀à Zúàà dyú-gààɔ̀ kɛɛ mɔ̀ Ɛ́sàkà nììn xwéɖé-dùɔ̀ nyɔ vɛ̀nɛ̀.

⁶ Ɛ́sàkà-nyɔ̀ ɓěɔ̀ mɔ̀ nyɔ-kpò táázĩ̀ìn kpáɖá-nyɔ sɔ̃́ ɓaɖa-bùè sè hĩinyɛ kè hɔ̃dɛ̀ɖɛ̀ hĩinyɛ.

⁷ Zɛ́ɓíúɖɔ̀ùn nììn xwéɖé-dùɔ̀ mɛ nì Júɖà-nyɔ̀ ɓěɔ̀ jàɖàìn-hwɔ̀ɖɔ̀ɔ̀ wáká tɔ̀ɔ̀ kɔ̃. Ɛ̀ɖíà mɔ̀à Héɖɔ̀ùnɛ̀ dyú-gààɔ̀ kɛɛ mɔ̀ Zɛ́ɓíúɖɔ̀ùn nììn xwéɖé-dùɔ̀ nyɔ vɛ̀nɛ̀.

⁸ Zɛ́ɓíúɖɔ̀ùn-nyɔ̀ ɓěɔ̀ mɔ̀ nyɔ-kpò táázĩ̀ìn kpáɖá-nyɔ sɔ̃́ ɓaɖa-bùè sè mɛ̀nɛ̌ìn-sɔ̃́ kè hɔ̃dɛ̀ɖɛ̀ hĩinyɛ.

⁹ Júɖà nììn xwéɖé-dùɔ̀ kè xwéɖé-dù ɓě nìà ɔ xwíɖíiɛɛ kpoo séín ɓěɔ̀ poìn dyí mɔ̀ nyɔ-kpò táázĩ̀ìn hɔ̃dɛ̀ɖɛ̀ ɖò kpáɖá-nyɔ hĩinyɛ sè mɛ̀nɛ̌ìn-ɖò kè hɔ̃dɛ̀ɖɛ̀ hĩinyɛ. Ti ɓɛ́ wa mu hwìè xwíníín kpáùn wɛ̃ɛ, wa mɔ̀ nyɔ mɛ nì hwìèɔ̀ nya.

¹⁰ “Wuɖuɓíín nììn xwéɖé-dùɔ̀ kè xwéɖé-dù ɓě nì ɔ xwíɖíiɛɛ kpoo kò-kò ɓěɔ̀ mɛ nyànàìn wa nììn jàɖàìn-gbò ɓěɔ̀ dyi hwɔ ɖé ní jàɖàìn-gbòɔ̀ zɔ̃̌in-wàkáɔ̀ kɔ̃ dyí, ɖé wa nììn kɔ́ɖɔ̀ɔ̀ xwíɖíi. Ɛ̀ɖízù mɔ̀à Sɛ̀ɖédyùɛ̀ dyú-gààɔ̀ kɛɛ mɔ̀ Wuɖuɓíín nììn xwéɖé-dùɔ̀ nyɔ vɛ̀nɛ̀.

¹¹ Wuɖuɓíín-nyɔ̀ ɓěɔ̀ mɔ̀ nyɔ-kpò táázĩ̀ìn kpáɖá-nyɔ sɔ̃́ sè mɛ̀nɛ̌ìn-ɖò kè hɔ̃dɛ̀ɖɛ̀ hm̀m̌.

¹² Símìɔ̀ nììn xwéɖé-dùɔ̀ mɛ nì Wuɖuɓíín-nyɔ̀ ɓěɔ̀ jàɖàìn-hwɔ̀ɖɔ̀ɔ̀ wáká ɖò kɔ̃. Sɛ̀ɖúmìè mɔ̀à Zúwìɖìsáɖàìɛ̀ dyú-gààɔ̀ kɛɛ mɔ̀ Símìɔ̀ nììn xwéɖé-dùɔ̀ nyɔ vɛ̀nɛ̀.

¹³ Símìɔ̀-nyɔ̀ ɓěɔ̀ mɔ̀ nyɔ-kpò táázĩ̀ìn kpáɖá-nyɔ sɔ̃́ ɓaɖa-bùè sè mɛ̀nɛ̌ìn-hĩinyɛ kè hɔ̃dɛ̀ɖɛ̀ tã.

¹⁴ Gáà nììn xwéɖé-dùɔ̀ mɛ nì Wuɖuɓíín-nyɔ̀ ɓěɔ̀ jàɖàìn-hwɔ̀ɖɔ̀ɔ̀ wáká tɔ̀ɔ̀ kɔ̃. Ɛ̀ɖìásà mɔ̀à Ɖɛ̀dyúòɛ̀ dyú-gààɔ̀ kɛɛ mɔ̀ Gáà nììn xwéɖé-dùɔ̀ nyɔ vɛ̀nɛ̀.

¹⁵ Gáà-nyɔ̀ ɓěɔ̀ mɔ̀ nyɔ-kpò táázĩ̀ìn kpáɖá-nyɔ sɔ̃́ sè hm̀m̌ kè hɔ̃dɛ̀ɖɛ̀ mɛ̀nɛ̌ìn-ɖò kè kpáɖá-nyɔ sɔ̃́ ɓaɖa-bùè.

¹⁶ Wuɖuɓíín nììn xwéɖé-dùɔ̀ kè xwéɖé-dù ɓě nìà ɔ xwíɖíiɛɛ kpoo séín ɓěɔ̀ poìn dyí mɔ̀ nyɔ-kpò táázĩ̀ìn hɔ̃dɛ̀ɖɛ̀ ɖò kpáɖá-nyɔ sɔ̃́ ɓaɖa-bùè sè ɖò kè hɔ̃dɛ̀ɖɛ̀ hĩinyɛ kè kpáɖá-nyɔ sɔ̃́ ɓaɖa-bùè. Ti ɓɛ́ wa mu hwìè xwíníín kpáùn wɛ̃ɛ, wa mɛ kɔ ɓó Júɖà nììn xwéɖé-dùɔ̀ kè xwéɖé-dù ɓě nìà ɔ xwíɖíiɛɛ ɖeín dyí.

¹⁷ “Ɔ ɖǎ ná nìǐn, Ɖíìváà-nyɔ̀ ɓěɔ̀ mɛ kpá hwìèɔ̀ kɔ̃ sɔ̀ìn ɖé jàɖàìn-hwɔ̀ɖɔ̀ɔ̀ hwòɖǒǔn, ɓɛ́ wa ké ní jàɖàìn-gbòɔ̀ ɓéɖé, ɓɛ́ wa ké ɓó Wuɖuɓíín nììn xwéɖé-dùɔ̀ kè xwéɖé-dù ɓě nìà ɔ xwíɖíiɛɛ ɖeín dyí kɔ. Kà Éézùɖùɛ̀-dyù ɓěɔ̀ jàɖàìn-gbò ɓěɔ̀ nyuà ɖeín dyi deɛ̀n nyɛɛ, kǎà wa mɛ nyu dɔ̃̀ǐn mú kpáa ɓó hwìèɔ̀ kɔ̃. Wa ɖò-ɖò mɛ nì dɔ̃̀ǐn mú ɖé waà kɔ́ɖɔ̀ɔ̀ xwíɖíi.

¹⁸ “Ífèɖèìn nììn xwéɖé-dùɔ̀ kè xwéɖé-dù ɓě nì ɔ xwíɖíiɛɛ kpoo kò-kò ɓěɔ̀ mɛ nyànàìn wa nììn jàɖàìn-gbò ɓěɔ̀ dyi hwɔ ɖé ní jàɖàìn-gbòɔ̀ dyóɖó-dyi-kpáìn-naínɔ̀ dyí, ɖé wa nììn kɔ́ɖɔ̀ɔ̀ xwíɖíi. Ɛ̀ɖìsámà mɔ̀à Àmíhùɛ̀ dyú-gààɔ̀ kɛɛ mɔ̀ Ífèɖèìn nììn xwéɖé-dùɔ̀ nyɔ vɛ̀nɛ̀.

¹⁹ Ífèɖèìn-nyɔ̀ ɓěɔ̀ mɔ̀ nyɔ-kpò táázĩ̀ìn kpáɖá-nyɔ sɔ̃́ kè hɔ̃dɛ̀ɖɛ̀ hm̀m̌.

²⁰ Mànásì nììn xwéɖé-dùɔ̀ mɛ nì Ífèɖèìn-nyɔ̀ ɓěɔ̀ jàɖàìn-hwɔ̀ɖɔ̀ɔ̀ wáká ɖò kɔ̃. Gàmɛ́ɖìè mɔ̀à Pɛ̀ɖázùɛ̀ dyú-gààɔ̀ kɛɛ mɔ̀ Mànásì nììn xwéɖé-dùɔ̀ nyɔ vɛ̀nɛ̀.

²¹ Mànásì-nyɔ̀ ɓěɔ̀ mɔ̀ nyɔ-kpò táázĩ̀ìn kpáɖá-nyɔ ɓaɖa-bùè sè sɔ̃́ kè hɔ̃dɛ̀ɖɛ̀ sɔ̃́.

²² Bɛ̃́címà nììn xwéɖé-dùɔ̀ mɛ nì Ífèɖèìn-nyɔ̀ ɓěɔ̀ jàɖàìn-hwɔ̀ɖɔ̀ɔ̀ wáká tɔ̀ɔ̀ kɔ̃. Àbíɖàùn mɔ̀à Gíɖìónìɛ̀ dyú-gààɔ̀ kɛɛ mɔ̀ Bɛ̃́címà nììn xwéɖé-dùɔ̀ nyɔ vɛ̀nɛ̀.

²³ Bɛ̃́címà-nyɔ̀ ɓěɔ̀ mɔ̀ nyɔ-kpò táázĩ̀ìn kpáɖá-nyɔ ɓaɖa-bùè sè hm̀m̌ kè hɔ̃dɛ̀ɖɛ̀ hĩinyɛ.

²⁴ Ífèɖèìn nììn xwéɖé-dùɔ̀ kè xwéɖé-dù ɓě nìà ɔ xwíɖíiɛɛ kpoo séín ɓěɔ̀ poìn dyí mɔ̀ nyɔ-kpò táázĩ̀ìn hɔ̃dɛ̀ɖɛ̀ sè mɛ̀nɛ̌ìn-tã kè hɔ̃dɛ̀ɖɛ̀ dyúáɖò. Ti ɓɛ́ wa mu hwìè xwíníín kpáùn wɛ̃ɛ, wa mɛ kɔ ɓó Ɖíìváà-nyɔ̀ ɓěɔ̀ ɖeín dyí.

²⁵ “Dɛ̃́ìn nììn xwéɖé-dùɔ̀ kè xwéɖé-dù ɓě nì ɔ xwíɖíiɛɛ kpoo kò-kò ɓěɔ̀ mɛ nyànàìn wa nììn jàɖàìn-gbò ɓěɔ̀ dyi hwɔ ɖé ní jàɖàìn-gbòɔ̀ xwía-wàkáɔ̀ kɔ̃ dyí, ɖé wa nììn kɔ́ɖɔ̀ɔ̀ xwíɖíi. Áhìɛ́zɛ̀ mɔ̀à Ámìsáɖàìɛ̀ dyú-gààɔ̀ kɛɛ mɔ̀ Dɛ̃́ìn nììn xwéɖé-dùɔ̀ nyɔ vɛ̀nɛ̀.

²⁶ Dɛ̃́ìn-nyɔ̀ ɓěɔ̀ mɔ̀ nyɔ-kpò táázĩ̀ìn kpáɖá-nyɔ tã sè sɔ̃́ kè hɔ̃dɛ̀ɖɛ̀ mɛ̀nɛ̌ìn-sɔ̃́.

²⁷ Ásè nììn xwéɖé-dùɔ̀ mɛ nì Dɛ̃́ìn-nyɔ̀ ɓěɔ̀ jàɖàìn-hwɔ̀ɖɔ̀ɔ̀ wáká ɖò kɔ̃. Págìè mɔ̀à Ókànàà dyú-gààɔ̀ kɛɛ mɔ̀ Ásè nììn xwéɖé-dùɔ̀ nyɔ vɛ̀nɛ̀.

²⁸ Ásè-nyɔ̀ ɓěɔ̀ mɔ̀ nyɔ-kpò táázĩ̀ìn kpáɖá-nyɔ sɔ̃́ sè dyúáɖò kè hɔ̃dɛ̀ɖɛ̀ hm̀m̌.

²⁹ Náfátàɖì nììn xwéɖé-dùɔ̀ mɛ nì ɓó Dɛ̃́ìn-nyɔ̀ ɓěɔ̀ jàɖàìn-hwɔ̀ɖɔ̀ɔ̀ wáká tɔ̀ɔ̀ kɔ̃. Àhíwàɖà mɔ̀à Énàà dyú-gààɔ̀ kɛɛ mɔ̀ Náfátàɖì nììn xwéɖé-dùɔ̀ nyɔ vɛ̀nɛ̀.

³⁰ Náfátàɖì-nyɔ̀ ɓěɔ̀ mɔ̀ nyɔ-kpò táázĩ̀ìn kpáɖá-nyɔ sɔ̃́ ɓaɖa-bùè sè tã kè hɔ̃dɛ̀ɖɛ̀ hĩinyɛ.

³¹ Dɛ̃́ìn nììn xwéɖé-dùɔ̀ kè xwéɖé-dù ɓě nìà ɔ xwíɖíiɛɛ kpoo séín ɓěɔ̀ poìn dyí mɔ̀ nyɔ-kpò táázĩ̀ìn hɔ̃dɛ̀ɖɛ̀ kpáɖá-nyɔ sɔ̃́ ɓaɖa-bùè sè mɛ̀nɛ̌ìn-sɔ̃́ kè hɔ̃dɛ̀ɖɛ̀ mɛ̀nɛ̌ìn-ɖò. Wa mɛ mɔ̀ xwéɖé-dù ɓěɔ̀ ɓɔ́ìn ɖe, ɓɛ́ wa ké hwìèɔ̀ xwíníín kpáa. Wa mɛ nì wa nììn kɔ́ɖɔ̀ ɓěɔ̀ xwíɖíi.”

³² Kǎà Éézùɖùɛ̀-nyɔ̀ ɓě ɓɛ́ wa zɛɖɛ ma dyììn ɖé wa ɓǎà gbǒ-xwíníín ɓěɔ̀ múɛɛ jè nyu nìɛ̀. Waà kpoo ɖò-ɖò ɓě nì ma kà ɖé waà jàɖàìn-hwɔ̀ɖɔ̀ɔ̀ múɛɛ poìn dyí mɔ̀ nyɔ-kpò táázĩ̀ìn hɔ̃dɛ̀ɖɛ̀ mɛ̀nɛ̌ìn-ɖò sè tã kè hɔ̃dɛ̀ɖɛ̀ hm̀m̌ kè kpáɖá-nyɔ sɔ̃́ ɓaɖa-bùè.

³³ Kɛɛ wa se ma Ɖíìváà-nyɔ̀ ɓěɔ̀ zɛɖɛ ɖé Éézùɖùɛ̀-nyɔ̀ ɓěɔ̀ hwìɛ̀ kà Bounɓoɔ̀ nyuɛ ma kà Mózè gbo cɛ̃ɛ kɛ.

³⁴ Éézùɖùɛ̀-nyɔ̀ ɓěɔ̀ nyu ɖɛ séín ɓě ɓɛ́ Bounɓoɔ̀ cɛ̃ ma kà Mózè gboɛɛ ní. Wa nyànàìn ma waà jàɖàìn-gbò ɓěɔ̀ dyi ɖé wa ɖò-ɖòɛ̀ kɔ́ɖɔ̀ɔ̀ xwíɖíi, ké wa deìn ma ɖeín dyi ti wa mu hwìè xwíníín kpáùn wɛ̃. Nyɔ ɖò-ɖò séín nì ma ɖé wa ɓǎà gbǒ-xwíníínɔ̀ nììn kpooɔ̀ mú.