Nɔ̀ɓà 19 - Ɓǎsɔ́ɔ̀ Báɓòɔ̀

Ɖɛ ɓá ɓìɖǐ zĩ-zãɔ̀ tĩ́ɔ jè dyíɛ

¹ Ké Bounɓoɔ̀ cɛ̃ɛ ma Mózè kè Eɖóún gbo, ké ɔ ɖá,

² “Gma ɓɛ́ ḿ nì poɛń nyɛɛ kɛà kɛ̀. Cɛ̃ɛ Éézùɖùɛ̀-dyù ɓěɔ̀ gbo, ɓɛ́ wa ké ɓìɖǐ nyɔ́nɔ́ gmɔ̀ zĩ-zã ɖò ɓɛ́ ɔ se kɛɛ ɖò ɓéɖé, mɔɔ ké wa séèɛ̀ gɛ̀ɛ̀ ɖò ɖɔ po ɖòɛɛ m̀ gbo dyà.

³ Ké m̀ mɛ nyíɛ Ɛ̀ɖɛ̀ázà mɔ̀à sáa-zà-nyɔ̀ɔ̀ kɛɛ xwa, ɓɛ́ ɔ kéɛ ɖé jàɖàìn-hwɔ̀ɖɔ̀ɔ̀ ɖeín kpa, ɓɛ́ wa kéɛ ɓó ɔ dyéɖé waí ɖáɓáìn.

⁴ Ɔ ɖǎ ná nìǐn, Ɛ̀ɖɛ̀ázà mɛ ɖúìn ɓìɖǐɔ̀ nyɔmɔɔ̀ ɖò jìì mánáín dyí, ɓɛ́ ɔ ké nyɔmɔɔ̀ ɖò hwɔ ɖé ní jàɖàìn-gbòɔ̀ dyúa dyí dyi mɛ́nɛ́ìn kpa mɛ̀nɛ̌ìn-sɔ̃́.

⁵ Sɔ̀ìn ɓóɛ gboɛɛ, nìí, wa mɛ fɔ̃̀ìn ɓìɖǐɔ̀ kúɖúùɔ̀ kè ɔ fɔ́ɔ̀ kè ɔ nyɔmɔɔ̀ kè ɔ xwáɖáún-kpa-ɖɛ̀ɔ̀ ɓó ɔ dyéɖé waí.

⁶ Ké sáa-zà-nyɔ̀ɔ̀ mɛ ɖú síɖà-cùɛ̀ pĩ́á ɖò kè ɓáá-ɖɛ̀ kɔ̃̀ nyɛ́nɛ́ mɔ̀à hésɔ̀ kɛɛ ɖɔ́ ɖò ɔ kè ɖúú zĩ-zã ɖò dyí, ɓɛ́ ɔ ké wa ɓó nyɛ nì wãuńɔ̀ mú po.

⁷ Ɔ ɖǎ ná nìǐn, nìí, sáa-zà-nyɔ̀ɔ̀ mɛ wɔɔ̀ ɔ mú-po-ɖɔ̀ɔ̀, ɓɛ́ ɔ ké dèɖè. Ké sɔ̀ìn ɓóɛ gboɛɛ, nìí, ɔ ɓɛ́ìn ɖé jàɖàìn-hwɔ̀ɖɔ̀ɔ̀ mú ɖe dyiɛ, kɛɛ ɔ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ.

⁸ Ké nyɔ mɔ̀ nyɔ ɓɛ́ ɔ fɔ̃à ɓìɖǐɔ̀ kɛɛ ɓéɖé ɓɛ́ ɔ ké ɔ mú-po-ɖɔ̀ɔ̀ wɔɔ̀, ɓɛ́ ɔ ké dèɖè. Ɔ ɖǎ ná nììn, ɔ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ.

⁹ Ké gàa ɓɛ́ ɔ hwɛ̀ múɛɛ mɔ̀ nyɔ mɛ kuɖu ɓìɖǐ nyɔ́nɔ́ɔ̀ tĩ́ɔɔ̀, ɓɛ́ ɔ kéɛ ɖé pá hwɛ̀ǐn-hwɛ̀ǐn ɖò mú gbǒìn ɖé jàɖàìn-hwɔ̀ɖɔ̀ɔ̀ ɖeín. Tĩ́ɔɔ̀ mu ɖé nììn ɓɛ́ wa kéɛ ní gbo po, ɓɛ́ níɔ̀ ké Éézùɖùɛ̀-dyù ɓěɔ̀ nàmàǔn bũ̌in wɔɔ̀, ɓɛ́ wa ké mu hwɛ̀.

¹⁰ Sɔ̀ìn ɓóɛ gboɛɛ, nìí, nyɔ mɔ̀ nyɔ ɓɛ́ ɔ kuɖuà ɓìɖǐ nyɔ́nɔ́ɔ̀ tĩ́ɔɔ̀ kɛɛ ɓéɖé ɓɛ́ ɔ ké ɔ ɖɔɔ̀ wɔɔ̀. Nìí, ɔ se mú hwɛ̀, ké kǎà ɔ mu gã̀ùn tee ɓɛ́ hwìo ké jǔ. Ɖɛ nìà kɛ mɛ mɔ̀ gma kánáá pū ɓó Éézùɖùɛ̀-dyù ɓěɔ̀ kè ɖíà ɓě ɓɛ́ wa cĩ́ ɖé ɓě hwìɛ̀ kɛɛ bìì.

Ɖɛ ɓá xwɛ́ dyi tìnììn jè dyíɛ

¹¹ “Nyɔ mɔ̀ nyɔ ɓɛ́ ɔ tìnììn nyɔ ɖòɛ̀ xwɛ́ dyiɛɛ, ɔ se mú hwɛ̀ ɓó wé mɛ̀nɛ̌ìn-sɔ̃́ xwíníín.

¹² Ɔ mɛ hwɔ ɔ mìɔùn mú dyììn ɖé ní ɓɛ́ ɔ hwɔà nyɔ múɛɛ mú, ɓó wéɔ̀ tã nììnɔ̀ kè wéɔ̀ mɛ̀nɛ̌ìn-sɔ̃́ nììnɔ̀ ɓaɖa, ɓɛ́ ɔ ké mú hwɛ̀. Kɛɛ ɔ jǔ ké ɔ se ɔ mìɔùn mú hwɔ ɓó wéɔ̀ tã nììnɔ̀ kè wéɔ̀ mɛ̀nɛ̌ìn-sɔ̃́ nììnɔ̀ ɓaɖa ní, nìí, ɔ se mú-hwɛ̀-nyɔ̀ jǔɛ mu.

¹³ Nyɔ mɔ̀ nyɔ ɓɛ́ ɔ tìnììn nyɔ ɖòɛ̀ xwɛ́ dyi, ké ɔ se ɔ mìɔùn mú hwɔɛɛ, nyɔ nì náa po ní jàɖàìn-gbòɔ̀ zɛ̀nɛ̌. Ɔ jèɛɛ, wa ɓéɖé ɓɛ́ wa ké ɔ woɖo gbo cɛ̃ sɔ̀ìn ɖé Éézùɖùɛ̀-dyù ɓěɔ̀ hwìɛ̀. Wa se ɔ ní hwɔà nyɔ múɛɛ ɖò dya wáɖá jèɛɛ, ɖɛ nyuɛ ké ɔ seà mú hwɛ̀ɛ nì ɔ mú ke, ké ɔ séè mú hwɛ̀ ke.

¹⁴ “Gma ɓá nyɔ ɓɛ́ ɔ mɛ́ìn ɖé jàɖàìn-gbò ɖò múɛɛ jè dyíɛɛ kɛà kɛ̀. Nyɔ mɔ̀ nyɔ ɓɛ́ ɔ nì ɖé jàɖàìn-gbò kɔ̃̀ mú ɓɛ́ nyɔ ɖò mɛ́ɛ, mɔɔ nyɔ mɔ̀ nyɔ ɓɛ́ ɔ wáɖáìn ɖé jàɖàìn-gbòɔ̀ múɛɛ, ɔ se mú hwɛ̀ ɓó wé mɛ̀nɛ̌ìn-sɔ̃́ xwíníín.

¹⁵ Ké ɖɛ-fùù séín nì ɖé jàɖàìn-gbòɔ̀ mú, ɓɛ́ wa fɔ̀nɔ̀ wĩín dyi, ɓɛ́ wa se ɖɛ wĩín ɓáìn kóɖó-kóɖóɛɛ mɔ̀ se-mú-hwɛ̀-ɖɛ̀.

¹⁶ Nyɔ mɔ̀ nyɔ ɓɛ́ ɔ tìnììn xwɛ́ ɖò dyi ɖé píéɛɛ, kɛbì ɔ mɛ mɔ̀ nyɔ ɓɛ́ wa ɖáɓá gàsíà dyíɛɛ xwɛ́ɛ, mɔɔ kɛbì ɔ mɛ mɔ̀ nyɔ wɛ́ ké ɔ mɛ́ɛ xwɛ́ɛ, mɔɔ kɛbì ɔ mɛ mɔ̀ nyɔ ɖòɛ̀ kpáa, mɔɔ kɛbì ɔ mɛ mɔ̀ xwɛ́-gmàà kɛɛ, nyɔɔ̀ se mú hwɛ̀ ɓó wé mɛ̀nɛ̌ìn-sɔ̃́ xwíníín.

¹⁷ “Ɖɛ wa mɛ nyu ɓá nyɔ seà mú hwɛ̀ɛ jè dyíɛɛ kɛà kɛ̀. Wa mɛ ɖú ɓìɖǐ zĩ-zã mɔ̀à nàmàǔn-sàǎ-zàìn-ɖɛ̀ ɓɛ́ wa ɖǎà fɔ̃ɛɛ tĩ́ɔ dyí, ɓɛ́ wa kéɛ ní ɓɛ́ wa sɔ̀ wĩín ɖieɛɛ gbo po ɖé ɖɛ-fùù ɖò mú.

¹⁸ Ɔ ɖǎ ná nìǐn, nìí, nyɔ ɓɛ́ ɔ hwɛ̀ múɛɛ mɛ ɖú hésɔ̀ɛ̀ ɖɔ́ ɖò dyí, ɓɛ́ ɔ kéɛ ɖé níɔ̀ gbo sṹ, ɓɛ́ ɔ kéɛ jàɖàìn-gbò kɔ̃̀ mú xwɛ́ɔ̀ nìà kɛ kè ɖɛ séín kè nyɔ séín nì ɖéɛ múɛɛ dya dyi mɛ́nɛ́ìn. Kǎà ɔ mɛ mɛ́nɛ́ìn níɔ̀ nyɔ mɔ̀ nyɔ ɓɛ́ ɔ tìnììn kà nyɔǔn-kpà mɔɔ xwɛ́ mɔɔ xwɛ́-gmàà dyiɛɛ kɔ̃in ɖekè.

¹⁹ Nyɔ mɔ̀ nyɔ ɓɛ́ ɔ hwɛ̀à múɛɛ mɛ mɛ́nɛ́ìn níɔ̀ ɖò nyɔ mɔ̀ nyɔ seà mú hwɛ̀ɛ kɔ̃in ɓó wéɔ̀ tã nììnɔ̀ kè wéɔ̀ mɛ̀nɛ̌ìn-sɔ̃́ nììnɔ̀ ɓaɖa. Ɔ dyiɛ náa nyuín, nìí, nyɔɔ̀ mɛ wɔɔ̀ ɔ ɖɔɔ̀, ɓɛ́ ɔ ké dèɖè, ké hwìo dyi jǔ ní, ɔ mɔ̀ǎ mú-hwɛ̀-nyɔ̀ ɓó wéɔ̀ mɛ̀nɛ̌ìn-sɔ̃́ nììnɔ̀ ɓaɖa.

²⁰ “Kɛɛ nyɔ mɔ̀ nyɔ ɓɛ́ ɔ seà mú hwɛ̀, ké ɔ seà ɔ mìɔùn mú hwɔɛɛ, wa ɓéɖé wa ké nyɔɔ̀ woɖo gbo cɛ̃ sɔ̀ìn ɖé Éézùɖùɛ̀-dyù ɓěɔ̀ hwìɛ̀, sepóɛɖé ɔ ɖǎ mɔ̄ Bounɓoɔ̀ jàɖàìn-gbòɔ̀ zɛ̀nɛ̌ po. Wa se ɔ ní hwɔà nyɔ múɛɛ ɖò dya wáɖá jèɛɛ, ɔ séè mú hwɛ̀ ke.

²¹ Ɖɛ nìà kɛ mɛ mɔ̀ gma kánáá pū ɓó wa bìì. Ké nyɔ mɔ̀ nyɔ mɛ́nɛ́ìn kà nyɔɔ̀ ní hwɔà nyɔ múɛɛ kɔ̃in nyɛɛ ɓéɖé ɓɛ́ ɔ ké ɔ ɖɔɔ̀ wɔɔ̀. Ké ɔ tìnììn ní hwɔà nyɔ múɛɛ dyi jèɛɛ, ɔ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ.

²² Ké ɖɛ kã̀ìn séín ɓɛ́ se-mú-hwɛ̀-nyɔ̀ɔ̀ tìnììn dyiɛɛ mɔ̀ùn se mú hwɛ̀ ɖekè, ké nyɔ kã̀ìn séín ɓɛ́ wa muɛ dyi tìnììn nyɛɛ mɔ̀ se-mú-hwɛ̀-nyɔ̀ ɖekè, ɓɛ́ hwìo ké jǔ hwɛ̀.”