Nɔ̀ɓà 18 - Ɓǎsɔ́ɔ̀ Báɓòɔ̀

Sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ nììn kũ̀à

¹ Ké Bounɓoɔ̀ cɛ̃ɛ ma Eɖóún gbo, ké ɔ ɖá, “M̀ kè nì dyú-gàà ɓěɔ̀ kè Ɖíìváà-nyɔ̀ ɓěɔ̀ mu ɖɛ gbà ɓá kũ̀à ɓě nì ɖé ní jàɖàìn-gbòɔ̀ múɛɛ jè dyíɛɛ kpa dyí ɖúùn. Kɛɛ m̀ kè nì dyú-gàà ɓěɔ̀ ɖòùn mu ɖɛ gbà ɓá sáa-zà-kũ̀àɔ̀ jè dyíɛɛ kpa dyí ɖúùn.

² M̀ mɛ dyà nì ɖíí ɓě mɔ̀à Ɖíìváà-nyɔ̀ ɓěɔ̀ kɛ, ɓɛ́ m̀ kè wa ké kũ̀àɔ̀ nyu, ɓɛ́ wa ké m̀ gbo kpá ti ɓɛ́ m̀ kè nì dyú-gàà ɓěɔ̀ nì ɖé ní jàɖàìn-gbò kɔ̃̀ mú ɓɛ́ gma-gbɔ̀ɖɔ̀ɔ̀ nìà kɛɛ mú kũ̀à nyuɛń nyɛ.

³ Wa mɔ̀ nyɔ ké kũ̀à ɓě ɓá m̀ gbo kpá jè dyíɛ ɔ kè kũ̀à ɓě ɓá jàɖàìn-gbòɔ̀ dyíɛɛ nyu. Kɛɛ wa mɛ ɓɔ́ ɖɛ séín ɓě nìà ɖé ní jàɖàìn-gbòɔ̀ múɛ kè sáa-kɔ̃-zàìn-gbààɔ̀ bũ̌in xwɛ̃́ìn, ɓɛ́ m̀ kè nì dyú-gàà ɓěɔ̀ kè wa ní kɔ̃̀ ɖà mɛ́.

⁴ Wa mɛ kpá m̀ gbo ɓá kũ̀à ɓě nì ɖé ní jàɖàìn-gbòɔ̀ múɛɛ nyu jè dyí, ké nyɔ kà kò ɖò mɛ ɓɔ́ m̀ kè nì dyú-gàà ɓěɔ̀ bũ̌in xwɛ̃́ìn.

⁵ Ké m̀ kè nì dyú-gàà ɓěɔ̀ mɛ dyé kũ̀à ɓě nì ɖé jàɖàìn-gbòɔ̀ múɛ kè kũ̀à ɓě ɓá sáa-kɔ̃-zàìn-gbààɔ̀ jè dyíɛɛ jè gbo, ɓɛ́ mɔ́ún kɔ̃̀ ɖà Éézùɖùɛ̀-dyù ɓěɔ̀ dyoɖoún kpáìn ɖe.

⁶ Gmɔ̀ nɔ̄, ḿ ɖǎ nì ɖíí ɓě mɔ̀à Ɖíìváà-nyɔ̀ ɓěɔ̀ kɛɛ gã ɖé Éézùɖùɛ̀-dyù ɓěɔ̀ hwìɛ̀, ɓɛ́ wa ké nyíí-ɖɛ̀ jǔ ɓó m̀ kè nì dyú-gàà ɓěɔ̀ bìì. Wa ɖǎ wáká kpá ɓó ḿ bìì, nìí ɓɛ́ wa ké wa nììn kũ̀à ɓě ɓá jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ dyéàìn nyɛɛ jè dyíɛɛ nyu.

⁷ Kɛɛ mɔ̀ùn kè nì dyú-gàà ɓěɔ̀ ɖòùn mu sáa-zà-kũ̀à ɓá sáa-kɔ̃-zàìn-gbààɔ̀ kè ní jàɖàìn-gbòɔ̀ Pá Hwɛ̀ Mú Mìɔɔ̀ jè dyíɛɛ nyuùn. Ɓě mɔ̀ nyɔ kɔ̃̀ ɖɛ ɓěa kpé gbo, sepóɛɖé sáa-zà-kũ̀àɔ̀ mɔ̀ nyíí-ɖɛ̀ ké ḿ ɖǎa ɓě nyí. Kɛɛ nyɔ kà kò ɖò dyi ɖɛ hwɛ̀ǐn-hwɛ̀ǐn ɓěa bũ̌in xwɛ̃́ìn ní, wa mɛ ɖáɓá nyɔɔ̀.”

Ɖɛ sáa-zà-nyɔ̀ ɓěɔ̀ mɔ̀ùn kɔ̃̀ɛ

⁸ Ké Bounɓoɔ̀ cɛ̃ɛ ma Eɖóún gbo ɖe, ké ɔ ɖá, “Gmɔ̀ nɔ̄, sáa-zàìn-ɖɛ̀ ɓě ɓɛ́ Éézùɖùɛ̀-dyù ɓěɔ̀ mu ḿ gbo dyàùn wɛ̃ɛ, ɔ nyɔ séín sè ɓíɖíi ɓɛ́ m̀ se fɔ̃ɔ́ muɛɛ, ḿ nyí wa m̀ ní. Mɔ̀ kɔ̃̀ wa. Ké kǎà ɔ mu nììn ɓó m̀ kè nì xwíníín-dyù ɓě bìì kánáá pū ɓá ɖɛ séín ɓě ɓɛ́ Éézùɖùɛ̀-dyù ɓěɔ̀ mu ḿ dyàùn wɛ̃ɛ nyɔ sè ɓóɛɛ jè dyí.

⁹ Kǎà ɖɛ ɓě kpá ḿ bìì wákáa, nyɔ m̀ kɔ̃̀ɛɛ jè mu nìɛ̀ nyuùn. Wa mɔ̀ ɖɛ sè ɓó ké m̀ se fɔ̃ɛ. Sáa-zàìn-ɖɛ̀ séín ɓɛ́ nyɔ ɓěɔ̀ mu ḿ gbo dyàùn wɛ̃ɛ, kɛbì ɔ mɛ mɔ̀ ɖii-ɖɛ̀-sàǎ-zàìn-ɖɛ̀ mɔɔ nàmàǔn-sàǎ-zàìn-ɖɛ̀ mɔɔ kpa-pɛ́ɛ̀ìn-sàǎ-zàìn-ɖɛ̀ɛ, wa mu m̀ kè nì dyú-gàà ɓěɔ̀ kɔ̃̀ɔ̀-ɖɛ̀ jǔùn.

¹⁰ Ɓě mɛ ɖììn ɖɛ ɓěa ɖé pá hwɛ̀ǐn-hwɛ̀ǐn ɖò mú, ké ɓěɛ̀ gàa-dyù ɖòùn mɛ ɖiɛ, sepóɛɖé wa mɔ̀ mú-hwɛ̀-ɖɛ̀ ɓó ɓě bìì.

¹¹ “Ké ɓó kɔ̃in ɖeɛɛ, nyíí-ɖɛ̀ kpa ɖɛ ɓě ɓɛ́ Éézùɖùɛ̀-dyù ɓěɔ̀ mu ḿ dyàùn wɛ̃ɛ, ḿ nyíɛ m̀ kè nì dyú-gàà ɓěɔ̀ kè nì dyú-màà ɓěɔ̀, ɓɛ́ wa ké ɓěɛ̀ kɔ̃̀ɔ̀-ɖɛ̀ jǔ kánáá pū. Nyɔ séín ɓá nì gbǒ-xwíníínɔ̀ dyí, ɓɛ́ wa hwɛ̀ múɛɛ mɛ ɖiɛ.

¹² “Ɖii-ɖɛ̀ kĩ́ín-kĩ́ín ɓɛ́ ɔ sɔ̀ ɖé Éézùɖùɛ̀-dyù ɓěɔ̀ geɖe ɓěɔ̀ gbo, ɓɛ́ wa mu ḿ dyàùn wɛ̃ɛ, kɛbì ɔ mɛ mɔ̀ cáná mɔɔ wã́ìn mɔɔ mɔɔ́ kɛɛ, ɔ nyɔ kpa ɖɛɔ̀, mɔ̀ mɔ̀ nyɔ kɔ̃̀ɔ̀. Ḿ nyíɛ m̀ ní.

¹³ Ɓáá-ɖɛ̀ ɓěɔ̀ ɓo kĩ́ín-kĩ́ín ɓɛ́ wa mu kpã́ùn ɖé waà ɓóɖóɔ̀ kɔ̃, ké wa mu mɔ̄ Bounɓoɔ̀ gbo dyàùn wɛ̃ɛ, mɔ̀ mɔ̀ nyɔ kɔ̃̀ɔ̀. Ké nyɔ séín ɓá nì gbǒ-xwíníínɔ̀ dyí, ɓɛ́ wa hwɛ̀ múɛɛ mɛ ɖiɛ.

¹⁴ “Ɖɛ kã̀ìn séín Éézùɖùɛ̀-dyù ɓěɔ̀ po wáká ɓó mɔ̄ Bounɓoɔ̀ bìì, ɓɛ́ ɔ ké ní kɔ̃̀ɔ̀-ɖɛ̀ jǔ kánáá pūɛɛ, mɔ̀ mɔ̀ nyɔ kɔ̃̀ɔ̀.

¹⁵ “Nyíɔ́-dyù séín ɓɛ́ Éézùɖùɛ̀-dyù ɓěɔ̀ mu ḿ nyíìn nyɛɛ, kɛbì ɔ mɛ mɔ̀ nyɔǔn-dyù mɔɔ nyúà-ɖɛ̀ kɛɛ, mɔ̀ mɔ̀ nyɔ kɔ̃̀ɔ̀. Kɛɛ wɛ̃́ɛ́ kɛɛ, nyíɔ́-dyùɔ̀ dyi nyɔǔn-dyù jǔǐn, wa ɓéɖé ɓɛ́ wa ké ɔ gbǎà ɖé m̀ xwaún, mɔɔ ké ɔ dyi nyúà-ɖɛ̀ se mú hwɛ̀ kɛɛ jǔǐn, wa ɓéɖé ɓɛ́ wa kéɛ gbǎà ɖé m̀ xwaún.

¹⁶ Ɔ jǔ ké nyíɔ́-dyùɔ̀ ɖǎ dɛ̀nɛ̀ dyúáɖò nyu ní, wa ɓéɖé ɓɛ́ wa ké ɔ gbǎà ɖé m̀ xwaún. Ɔ gbǎà-wìɖìɔ̀ mɛ mɔ̀ séɓàɖà-cɛ̀kò hm̀m̌ dyììn ɖé kà sáa-zà-nyɔ̀ ɓěɔ̀ nììn cɛ́kò nyu nìɛ̀ kɛɛ mú. Géwàɖà-pĩ̀à kpáɖá-nyɔ ɖò sɔ̀ cɛ́kò dyúáɖò mú.

¹⁷ Kɛɛ ɔ dyi ɓìɖǐ mɔɔ ɓáɖáá mɔɔ wiɖiɛ̀ nyíɔ́-dyù jǔǐn, wa se ɓéɖé ɓɛ́ wa kéɛ gbǎà ɖé m̀ xwaún. Ɔ mɛ kpá wáká ɓó ḿ bìì. M̀ mɛ mɛ́nɛ́ìn ɔ nyɔmɔɔ̀ ɓó sáa-kɔ̃-zàìn-gbààɔ̀ kɔ̃ dyi, ɓɛ́ m̀ ké cáná sɔ̀ ɔ múɛɛ fɔ̃, ɓɛ́ ɔ ké ɖii-ɖɛ̀-nyìǐ-ɖɛ̀ kɔ̃̀ nyɔ́ dè mɔ̄ Bounɓoɔ̀ hwìɖǐiɛɛ jǔ.

¹⁸ Kɛɛ ɔ suaɖɛ̀ɔ̀ mɔ̀ nì kɔ̃̀ɔ̀-ɖɛ̀ kà gbo-kpɔ̃ìn-sàǎ-zàìn-ɖɛ̀ɔ̀ kɛ́ ɓɛ́ wa vũà dyiɛ kèɛ̀ ɖiaún-pɔ̃̀ɔ̀ m̀ kɔ̃̀à kɛ.

¹⁹ “Nyíí-ɖɛ̀ séín ɓě ɓɛ́ Éézùɖùɛ̀-dyù ɓěɔ̀ mu mɔ̄ Bounɓoɔ̀ gbo dyàùn wɛ̃ɛ, ḿ nyíɛ m̀ ní, ɓɛ́ ɔ ké m̀ kè nì dyú-gàà ɓěɔ̀ kè nì dyú-màà ɓěɔ̀ kɔ̃̀ɔ̀-ɖɛ̀ jǔ kánáá pū. Ɔ mɔ̀ dèè-wùɖù kánáá pū ɓá tɔ̃́ jè dyíɛɛ, ɓó mɔ̄ Bounɓoɔ̀ kè m̀ ɔ kè nì xwíníín-dyù ɓěɔ̀ pṹa.”

²⁰ Ké Bounɓoɔ̀ cɛ̃ɛ ma Eɖóún gbo ɖe, ké ɔ ɖá, “Mɔ̀ùn se pá ɖò kɔ̃̀ɔ̌ mu ɖé Éézùɖùɛ̀-ɓòɖòɔ̀ kɔ̃, ɓɛ́ ɔ ké nì dyú ɓěɛ̀ dúí-sè-ɖɛ̀ jǔ. Mɔ̄ mɔ̀ nì dúí-sè-ɖɛ̀ ɖé Éézùɖùɛ̀-dyù ɓěɔ̀ hwìɛ̀.”

Ɖɛ Ɖíìváà-nyɔ̀ ɓěɔ̀ mɔ̀ùn kɔ̃̀ɛ

²¹ Ké Bounɓoɔ̀ cɛ̃ɛ ma Eɖóún gbo ɖe, ké ɔ ɖá, “Gmɔ̀ nɔ̄, ɖɛ ḿ nyí Ɖíìváà-nyɔ̀ ɓěɔ̀ mɔ̀ùn wɛ̃ɛ mɔ̀ ɓàɖàìn-bùè séín ɓɛ́ Éézùɖùɛ̀-dyù ɓěɔ̀ mu tòùn wɛ̃. Ɔ mɔ̀ wa nììn kɔ̃̀ɔ̀-ɖɛ̀ kánáá pū. Ɔ mɔ̀ waà pɛ́ɛ̀-ɖɛ̀ ɓó kũ̀à ɓě ɓɛ́ wa nyuà ɖé jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ dyéàìn nyɛ múɛɛ jè.

²² Sɔ̀ìn dà ké dyúa muɛɛ, Éézùɖùɛ̀-dyù tɔ̀ɔ̀ ɓěɔ̀ mɛ ɓɔ́ ní jàɖàìn-gbòɔ̀ bũ̌in xwɛ̃́ìn, wa ní kɔ̃̀ ɖà waà nàmàǔnɔ̀ kpa dyí ɖú, wa ní kɔ̃̀ ɖà mɛ́.

²³ Kɛɛ Ɖíìváà-nyɔ̀ ɓěɔ̀ mɛ nyu kũ̀à ɓě ɓá ní jàɖàìn-gbòɔ̀ dyíɛ, ké wa mu ɖɛ gbà ɓá ní jàɖàìn-gbòɔ̀ jè dyíɛɛ kpa dyí ɖúùn. Kǎà ɔ mɛ nì kánáá pū ɓó waà xwíníín-dyù ɓě bìì. Ké wa mɔ̀ùn se pá ɖò kɔ̃̀ɔ̌ mu ɖé Éézùɖùɛ̀-dyù ɓěɔ̀ hwìɛ̀, ɓɛ́ ɔ ké waà dyú ɓěɛ̀ dúí-sè-ɖɛ̀ jǔ.

²⁴ Ḿ ɖǎ wa ɓàɖàìn-bùè ɓɛ́ Éézùɖùɛ̀-dyù ɓěɔ̀ muà mɔ̄ Bounɓoɔ̀ gbo dyàùn wɛ̃ɛ nyí, ɓɛ́ ɔ ké waà kɔ̃̀ɔ̀-ɖɛ̀ jǔ kánáá pū. Ɔ jèɛɛ, ḿ cɛ̃à ɓá wa jè dyí kà wa se pá ɖò dyéɛ mu ɖé Éézùɖùɛ̀-dyù ɓěɔ̀ hwìɛ̀ kɛ̀.”

Ɓàɖàìn-bùè ɓɛ́ Ɖíìváà-nyɔ̀ ɓěɔ̀ mɔ̀ùn kɔ̃̀ wa ké tòɛ

²⁵ Ké ɓó kɔ̃in ɖeɛɛ, Bounɓoɔ̀ cɛ̃ɛ ma Mózè gbo, ké ɔ ɖá,

²⁶ “M̀ mɛ cɛ̃ɛ Ɖíìváà-nyɔ̀ ɓěɔ̀ gbo kà ti ɓɛ́ wa mu ɓàɖàìn-bùè ɓɛ́ Éézùɖùɛ̀-dyù ɓěɔ̀ muà ḿ gbo dyàùn, ɓɛ́ ḿ ɖǎà wa nyí ɓɛ́ ɔ kéà waà kɔ̃̀ɔ̀-ɖɛ̀ jǔɛɛ wa xwaún kpɔ̃ùn wɛ̃ɛ, wa mɛ ɖúɛ nììn ɓàɖàìn-bùè dyí, ɓɛ́ wa kéɛ ḿ nyí.

²⁷ Wa dyiɛ náa nyuín, ní muɛ dyi kpɔ̃ùn pū kà ɔ mɔ̀ɔ̌ kà waà ɓáá-ɖɛ̀-ɓò kĩ́ín-kĩ́ín mɔɔ wã́ìn ɖìè kɛ.

²⁸ Kǎà wa mɛ nyí ḿ nyíí-ɖɛ̀ sɔ̀ìn ɖé ɓàɖàìn-bùè séín ɓě ɓɛ́ wa muà Éézùɖùɛ̀-dyù ɓěɔ̀ xwaún dyéìn nyɛɛ hwìɛ̀. Wa mɛ zà ɓó mɔ̄ Bounɓoɔ̀ nyíí-ɖɛ̀, ɓɛ́ wa kéɛ Eɖóún mɔ̀à sáa-zà-nyɔ̀ vɛ̀nɛ̀ɔ̀ kɛɛ xwa nyí.

²⁹ Nyíí-ɖɛ̀ séín ɓě ɓɛ́ Éézùɖùɛ̀-dyù ɓěɔ̀ muà wa gbo dyàùn wɛ̃ɛ, wa mɛ nyíɛ nyɔ mɔ̄ Bounɓoɔ̀ kɔ̃̀ ɓɛ́ ḿ ké dyéɛ. Ɔ nyɔ kpa ɖɛ ké ɔ hwɛ̀ mú mìɔ kɛɛ mɔ̀ ɖɛ wa mɛ po wáká ɓó ḿ bìì.

³⁰ Ɓó kɔ̃in ɖeɛɛ, m̀ mɛ cɛ̃ɛ Ɖíìváà-nyɔ̀ ɓěɔ̀ gbo kà ti ɓɛ́ wa muɛ nyɔ kpa ɖɛɔ̀ ɓó zàùn ɓɛ́ wa kéɛ nyíɛɛ, nìí, ɔ tɔ̀ɔ̀ sè ɓóɛɛ, wa mɔ̀ nyɔ kɔ̃̀ɔ̀, kà dyúáɖò kà ɓáá-ɖɛ̀-ɓò ɓěɔ̀ kè wã́ìnɔ̀ ɔ nyɔ tɔ̀ɔ̀ sèà ɓóɛɛ jè nyuà nìɛ̀ kɛ.

³¹ Ɔ ɖǎ ná nìǐn, wa kè waà gbǒ-xwíníínɔ̀ ɓɛ́ìn nyɔ sèà ɓóɛɛ dà séín ɖìɛ̀n, sepóɛɖé ɔ mɔ̀ waà pɛ́ɛ̀-ɖɛ̀ ɓó kũ̀à ɓě ɓɛ́ wa nyuà ɖé jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ dyéàìn nyɛ múɛɛ jè.

³² Ké wa se ɖɛ gbà ɖòɛ̀ kpa dyí ɖúɛ mu ɓóɛ jè, ti ɓɛ́ wa ɖǎa nyɔ kpa ɖɛɔ̀ ḿ nyíɛ. Wa ní ɖá ɓɛ́ wa ké nyíí-ɖɛ̀ hwɛ̀ǐn-hwɛ̀ǐn ɓě ɓɛ́ Éézùɖùɛ̀-dyù ɓěɔ̀ dyàà kɛɛ zùǔn zàìn dyììn ɖéɛ ɖò ɖi-ɖi mú kĩ́ín. Wa dyiɛ náa nyuín, wa mu mɛ́ìn.”