Nɔ̀ɓà 17 - Ɓǎsɔ́ɔ̀ Báɓòɔ̀

Eɖóúnɛ̀ kùì-kpà

¹ Ké Bounɓoɔ̀ cɛ̃ɛ ma Mózè gbo, ké ɖá,

² “Cɛ̃ɛ Éézùɖùɛ̀-dyù ɓěɔ̀ gbo, ɓɛ́ wa ké m̀ kùì-kpà ɓě nyí. Éézùɖùɛ̀ xwéɖé-dù ɓaɖa-bùè sè sɔ̃́ ɓěɔ̀ nyɔ vɛ̀nɛ̀ ɖò-ɖò mɛ tò kùì-kpà dyúáɖò, ɓɛ́ wa poìn dyí séínɔ̀ ké kùì-kpà ɓaɖa-bùè sè sɔ̃́ jǔ. M̀ mɛ céè nyɔ ɖò-ɖòɛ̀ nyɛ́nɛ́ ɓó ɔ nììn kùì-kpàɔ̀ kɔ̃.

³ Ké m̀ mɛ céè Eɖóún nììn nyɛ́nɛ́ ɓó Ɖíìváà nììn xwéɖé-dùɔ̀ kùì-kpàɔ̀ kɔ̃, sepóɛɖé kùì-kpà dyúáɖò ɓéɖé ɔ ké nì ɓó xwéɖé-dù ɖò-ɖò bìì.

⁴ Sɔ̀ìn ɓóɛ gboɛɛ, nìí, m̀ mɛ pɛ̃́ìn wa ɖé ní jàɖàìn-gbòɔ̀ mú dyi, hwɔ ɓó gma-gbɔ̀ɖɔ̀ɔ̀ gbo dyí, dɛ̀ ɓɛ́ ḿ kè mɔ̀ gmɔ̌ìn kà kɛ.

⁵ Ké nyɔ mɔ̀ nyɔ ɓɛ́ ḿ gã ɓɛ́ ɔ kéà sáa-zà-nyɔ̀ jǔɛɛ nììn kùì-kpàɔ̀ mu kɔ̃ mɛìn. Dyììn ɖéɛ múɛɛ, ní muɛ nyuùn ɓɛ́ m̀ kè Eɖóúnɛ̀ dúi-jɛ̀ìn-jɛ̀ìn Éézùɖùɛ̀-dyù ɓěɔ̀ nyuà teeɛɛ ké ɓɔ́í kpá.”

⁶ Ké Mózè cɛ̃ɛ ma Éézùɖùɛ̀-nyɔ̀ ɓěɔ̀ gbo, ké waà nyɔ vɛ̀nɛ̀ séín ɓěɔ̀ dyà ma waà kùì-kpà ɓěɔ̀ ɔ gbo. Kùì-kpà dyúáɖò sɔ̀ ma xwéɖé-dù ɖò-ɖò mú. Wa poìn dyíɔ̀ mɔ̀ ma kùì-kpà ɓaɖa-bùè sè sɔ̃́, ké Eɖóúnɛ̀ kùì-kpàɔ̀ nì ma wa hwìɛ̀.

⁷ Ké Mózè pɛ̃́ìn ma kùì-kpà ɓěɔ̀ ɓó Bounɓoɔ̀ dyúa dyi ɖé jàɖàìn-gbò kɔ̃̀ mú ɓɛ́ gma-gbɔ̀ɖɔ̀ɔ̀ nì ma kà kɛ.

⁸ Zɔ̃ zɔ̃ ma ɓó ɖeɛɛ, Mózè mu ma ɖé jàɖàìn-gbòɔ̀ mú. Púɛɛ, ɔ dyéɛ ma kà Eɖóún ɓɛ́ ɔ sɔ̀à ɖé Ɖíìváà nììn xwéɖé-dùɔ̀ múɛɛ nììn kùì-kpàɔ̀ ɖǎ ma kɔ̃ mɛ, ké ɔ ɖǎ bùè, ké ɔ bùè ɓěɔ̀ ɖǎ ma vaà kɛ. Ké ɓó kɔ̃in ɖeɛɛ, ɔ ɖǎ ámɔ̀-ɓò ɓě tòɖò, ké ámɔ̀-ɓò ɓěɔ̀ ɖǎ bo.

⁹ Hwɛ̀ ké Mózè ɖú ma kùì-kpà séín ɓě nì ma kà ɓó Bounɓoɔ̀ dyúa kɛɛ dyí, ké ɔ síìn ma wa píé ɓó Éézùɖùɛ̀-nyɔ̀ séín ɓěɔ̀ dyúa, ké wa dyéɛ ké wa gmɔìn ma wa múin, ké nyɔ vɛ̀nɛ̀ ɖò-ɖò séín ɖú ma ɔ nììn kùì-kpàɔ̀ dyí.

¹⁰ Hwɛ̀ ké Bounɓoɔ̀ cɛ̃ɛ ma Mózè gbo, ké ɔ ɖá, “Po Eɖóún nììn kùì-kpàɔ̀ ɖé ní jàɖàìn-gbòɔ̀ mú ɖe, hwɔ ɓó gma-gbɔ̀ɖɔ̀ɔ̀ gbo dyí, ɓɛ́ ɔ ké dyí-tɛ̀mɛ̀ìn-ɖɛ̀ jǔ kánáá pū ɓó ní gbo-vɔ̃-nyɔ̀ ɓěɔ̀ bìì, nìí ɓɛ́ ní ɖei-wùɖùìn-wùɖùìn ɓɛ́ wa nyuà teeɛɛ ké ɓɔ́í kpá, wa ní kɔ̃̀ ɖà mɛ́.”

¹¹ Ké Mózè nyuɛ ma náa kà Bounɓoɔ̀ nyuɛ ma kà ɔ gbo cɛ̃ɛ kɛ.

¹² Hwɛ̀ ké nyɔ ɓěɔ̀ cɛ̃ɛ ma Mózè gbo, ké wa ɖá, “Dyéɛ, à nìǎ mú gbɔɔ̀ hwɛ̀ǐn. À séín nìǎ mú gbɔɔ̀ hwɛ̀ǐn.

¹³ Nyɔ mɔ̀ nyɔ ɓɛ́ ɔ mu Bounɓoɔ̀ jàɖàìn-gbòɔ̀ bũ̌in xwɛ̃́ìn nyɛɛ, ɔ mu mɛ́ìn. Kà ɔ nìà náa, nìí, à séín mu mú gbɔɔ̀ hwɛ̀ìn cáe?”