Nɔ̀ɓà 16 - Ɓǎsɔ́ɔ̀ Báɓòɔ̀

Kówàɖà kè Dáfàùn kè Àbíwàɖàùn vɔ̃ Mózè gbo

^1-2 Wé ɖòɛ̀ ɓaɖaa, Ɖíìváà dyú-gàà mɔ̀ Kóhà kɛɛ nììn nyúà-dyú mɔ̀ Kówàɖà kɔ̃̀ ɓǎà nyɛ́nɛ́ mɔ̀ Ízà kɛ kè Wuɖuɓíín nììn xwíníín-dyù ɓě mɔ̀ Dáfàùn kè Àbíwàɖàùn ɔ kè Ɔ́ùn kɛɛ ɖú ma Mózè gbo vɔ̃ kpàǐ. Ɛ̀ɖíà wóɖóìn ma Dáfàùn kè Àbíwàɖàùn, ké Pɛ́ɖè wóɖóìn ma Ɔ́ùn. Wa poìn ma Éézùɖùɛ̀-gàà hɔ̃dɛ̀ɖɛ̀ sɔ̃́ kè kpáɖá-nyɔ sɔ̃́ ɓaɖa-bùè dyí, ké wa dyi ma ɓó Mózè dyúa. Wa mɔ̀ Éézùɖùɛ̀-nyɔ̀ ɓěɔ̀ nàìn-nyɔ̀ ɖíɛ́ ɓě ɓɛ́ wa gã ma, ɓɛ́ wa nyɛ́nɛ́ mu ma kɛ.

³ Wa poìn ma dyí, ɓɛ́ wa ké ma Mózè kè Eɖóún gbo vɔ̃. Ké wa cɛ̃ɛ ma wa gbo, ké wa ɖá, “Ɖɛ ɓě ɖúó nyuɛń dyíɛɛ ɖǎ wɔ̃ kɔ̃ zi mìɔ, sepóɛɖé Éézùɖùɛ̀-nyɔ̀ séín ɓěɔ̀ mɔ̀ Bounɓoɔ̀ nììn nyɔ ɓě, ké Bounɓoɔ̀ nì ɓó à séín gbo. Kà ɔ nìà náa, nìí, ɖɛ́ kɔ̃̀ jè ɓě ɖúà kà ɓě mìɔùn dyií ɓó Bounɓoɔ̀ nyɔ séín ɓěɔ̀ kɔ̃in nyɛ́?”

⁴ Ti ɓɛ́ Mózè wɔ̃́ɔ ma kɛɛ, ɔ taɓa ma dú hwuɖu, ɓɛ́ ɔ ké Bounɓoɔ̀ ɓaà.

⁵ Ké ɔ cɛ̃ɛ ma Kówàɖà kè ɔ nyɔ séín ɓěɔ̀ gbo, ké ɔ ɖá, “Gàɖàà gànà-kṹún ní, Bounɓoɔ̀ mu nyɔ mɔ̀ ɔ nyɔɛɛ da zàùn, ké ɔ muɛ nyuùn ɓɛ́ nyɔɔ̀ ké ɔ bũ̌in xwɛ̃́ìn. Nyɔ mɔ̀ nyɔ ɔ mu gãùn wɛ̃ɛ, ɔ muɛ nyuùn ɓɛ́ nyɔɔ̀ ké ɔ bũ̌in xwɛ̃́ìn.

⁶ Kówàɖà, m̀ kè nì nyɔ ɓěɔ̀ mɛ nyu ɖɛ nìà kɛ. Ɓě ɖú nyɔ́ún-nɔ̀mɔ̀-ɖɛ̀ mú-fɔ̃̀ìn-ɖɛ̀ ɓě dyí ɓó gàɖàà,

⁷ ɓɛ́ ɓě ké nyɛ ɖé wa mú po, ɓɛ́ ɓě ké nyɔ́ún-nɔ̀mɔ̀-ɖɛ̀ ɓó nyɛɔ̀ kɔ̃ po ɓó Bounɓoɔ̀ dyúa. Nìí, à muɛ dyéìn nyɔ ɓɛ́ Bounɓoɔ̀ ɖǎ gã ké ɔ mɔ̀ ɔ nyɔɔ̀ kɛ. Kē! Ɓě mɔ̀à Ɖíìváà xwíníín-dyù ɓěɛɛ, ɔ nyɔ ɓɛ́ ɓě nìǎ kà nyuɛń nyɛɛ ɖǎ wɔ̃ kɔ̃ zi mìɔo!”

⁸ Ké Mózè cɛ̃ɛ ma Kówàɖà gbo ɖe, ké ɔ ɖá, “Ɓě mɔ̀à Ɖíìváà xwíníín-dyù ɓěɛɛ, ɓě tò ɖùǔ.

⁹ Ɖɛ ɓɛ́ Éézùɖùɛ̀ Gèɖèpɔ́ɔ̀ ɖǎà ɓě bìì nyuɛɛ mɔ̀ ɖɛ dyùwèe? Dyéɛ, ɔ gã ɓě, ké ɔ po ɓě wáká sɔ̀ìn ɖé Éézùɖùɛ̀-nyɔ̀ tɔ̀ɔ̀ ɓěɔ̀ hwìɛ̀, ɓɛ́ ɓě ké ɔ bũ̌in xwɛ̃́ìn, ɓɛ́ ɓě ké ɖé ɔ jàɖàìn-gbòɔ̀ mú kũ̀à nyu, ɔ kè ɓɛ́ ɓě ké ɓó Éézùɖùɛ̀-nyɔ̀ tɔ̀ɔ̀ ɓěɔ̀ dyúa dyi nyànà, ɓɛ́ ɓě ké wa bìì kũ̀à nyu.

¹⁰ Ɖɛ nìà kɛ ɖǎa nyu ké ɓě ɖǎ ɔ bũ̌in xwɛ̃́ìn, dè ɓě ɖíí tɔ̀ɔ̀ ɓě mɔ̀à Ɖíìváà xwíníín-dyù ɓěɔ̀ kɔ̃. Kɛɛ ɓěɛ̀ hwòɖǒ se dyi dè, ké ɓě nìǎ sáa-zà-kũ̀àɔ̀ mɔ́uń we?

¹¹ Nyɔ ɓɛ́ m̀ kè nì nyɔ ɓěɔ̀ poìn kà dyí, ɓɛ́ ɓě kéà gbo vɔ̃ɛɛ mɔ̀ Bounɓoɔ̀ mìɔùn. Ɖɛ́ Eɖóún kpa ɓɛ́ ɓě dyià ɔ dúi jɛ̀ǐn nì kɛ́?”

¹² Sɔ̀ìn ɓóɛ gboɛɛ, Mózè ɖá ma Dáfàùn kè Àbíwàɖàùn ɓɛ́ wa mɔ̀à Ɛ̀ɖíàà dyú-gàà ɓěɔ̀ kɛ. Kɛɛ wa nɔ́ɔ̀ ma, ké wa ɖá, “À se ɖé m̀ gbo dyiɛ́ mu.

¹³ Nì hwòɖǒ ɖá ɖɛ m̀ nyuà à bũ̌ɛɛ mɔ̀ ɖɛ dyùwèe? Má, m̀ zà ɖé à ɓóɖó bã-bã ɖò kɔ̃, ɓɛ́ m̀ ké à nɔ̄ gbǎùn-fúɖúá nìà kɛ kɔ̃ ɖáɓáìn jèe? Ké ɓó kàǔn wɛ̃ɛ, m̀ mɔ́ ɓɛ́ m̀ ké à wuɖuí kɔ̃̀ ɖeè?

¹⁴ Ké ɓó kɔ̃in ɖeɛɛ, m̀ se à ɓóɖó bã-bã ɖò kɔ̃ kpa, ké m̀ se à geɖe ɓě kè géɖéè-gbǎ ɓě nyí dyɛ mɔ̀ùn, ɓɛ́ wa ké à kɔ̃̀ɔ̀-ɖɛ̀ jǔ. Nì mɔ́ m̀ ké à cáe? À se ɖé m̀ gbo dyiɛ́ mu fɔɔ.”

¹⁵ Púɛɛ, Mózè kpá ma dyoɖoún mìɔ, ké ɔ cɛ̃ɛ ma Bounɓoɔ̀ gbo, ké ɔ ɖá, “Mɔ̀ǔn ɖá ɓɛ́ m̀ ké waà sáa-zàìn-ɖɛ̀ ɓěɔ̀ dyi kpɔ̃. Ḿ séè wa jǎkasì-dyù dyúáɖò xwaún kpɔ̃ ɖò, mɔɔ ké ḿ séè wa ɖò ɖɛ gbà ɖò bũ̌ nyu ɖò.”

¹⁶ Hwɛ̀ ké Mózè cɛ̃ɛ ma Kówàɖà gbo, ké ɔ ɖá, “M̀ kè nì nyɔ séín ɓěɔ̀ mɛ dyi ɓó Bounɓoɔ̀ jàɖàìn-gbòɔ̀ dyúa ɓó gàɖàà. Eɖóún mu ɓó dyi gã̀ùn ɖekè.

¹⁷ Ké ɓě ɖò-ɖò mɛ ɖú ɓěɛ̀ nyɔ́ún-nɔ̀mɔ̀-ɖɛ̀ mú-fɔ̃̀ìn-ɖɛ̀ ɓěɔ̀ dyí, ɓɛ́ ɓě ké ɖé nyɔ́ún-nɔ̀mɔ̀-ɖɛ̀ po, ɓɛ́ nì nyɔ-kpò hɔ̃dɛ̀ɖɛ̀ sɔ̃́ kè kpáɖá-nyɔ sɔ̃́ ɓaɖa-bùè ɓěɔ̀, dè m̀ mìɔùn kè Eɖóún kɔ̃, ké ɓěɛ̀ nyɔ́ún-nɔ̀mɔ̀-ɖɛ̀ mú-fɔ̃̀ìn-ɖɛ̀ ɓěɔ̀ Bounɓoɔ̀ dyúa dyà.”

¹⁸ Ɔ jèɛɛ, wa ɖò-ɖò séín ɖú ma waà nyɔ́ún-nɔ̀mɔ̀-ɖɛ̀ mú-fɔ̃̀ìn-ɖɛ̀ ɓěɔ̀ dyí, ké wa po ɖé nyɛ, ké wa po nyɔ́ún-nɔ̀mɔ̀-ɖɛ̀ ɓó nyɛɔ̀ kɔ̃, ké wa nyànà ma ɓó jàɖàìn-gbò kɔ̃̀ mú ɓɛ́ Bounɓoɔ̀ kè ɔ nyɔ ɓěɔ̀ dyéàìn nyɛɛ wĩín dyi, ɓó Mózè kè Eɖóún gbo.

¹⁹ Ké Kówàɖà poìn ma nyɔ séín ɓěɔ̀ dyí, ɓɛ́ wa ké ma Mózè kè Eɖóún gbo vɔ̃ ɓó jàɖàìn-gbòɔ̀ wĩín. Púɛɛ, Bounɓoɔ̀ dĩ́ín-dĩ̀ìnɔ̀ dyi ma ɓó dɛ̀ nyɔ séín ɓěɔ̀ nì ma kà kɛ.

²⁰ Ké Bounɓoɔ̀ cɛ̃ɛ ma Mózè kè Eɖóún gbo, ké ɔ ɖá,

²¹ “Ɓě sɔ̀ nyɔ ɓěɛ̀ hwìɛ̀, ɓɛ́ ḿ ké wa mú gbɔɔ̀ wàɖà.”

²² Ké Mózè kè Eɖóún taɓa ma dú hwuɖu, ké wa ɖá, “Óó Gèɖèpɔ́ɔ̀, mɔ̀ mɔ̀à fɛ̀ɛ̀-séín-tò-nyɔ̀ kɛɛ ɓɔ́ nyɔ séín ɓěɔ̀ dyoɖoún kpáìn ɓó nyɔ dyúáɖòɛ̀ nyuu-nàmàǔn jè.”

²³ Ké Bounɓoɔ̀ cɛ̃ɛ ma Mózè gbo, ké ɔ ɖá,

²⁴ “Cɛ̃ɛ nyɔ séín ɓěɔ̀ gbo, ɓɛ́ wa ké ɓó Kówàɖà kè Dáfàùn ɔ kè Àbíwàɖàùn cĩ́-naín ɓěɔ̀ bũ̌ sɔ̀.”

²⁵ Hwɛ̀ ké Mózè sɔ̀ ma dyí, ké ɔ mu ma ɖé Dáfàùn kè Àbíwàɖàùn gbo, ké Éézùɖùɛ̀-nyɔ̀ vɛ̀nɛ̀ ɓěɔ̀ sí ma ɔ kíɖíí.

²⁶ Ké ɔ cɛ̃ɛ ma nyɔ séín ɓěɔ̀ gbo, ké ɔ ɖá, “Ní ɓaà ɓě ní, ɓě sɔ̀ ɖé hwòɖǒ-kɔ̃in-nyìnììn-gàà ɓěɛ̀ jàɖàìn-gbò ɓěɔ̀ xwíɖíi, ké ɓěǐn ɖá ɓɛ́ ɓě ké waà kɔ̃̀ɔ̀-ɖɛ̀ ɓěɔ̀ ɖò dyi tìnììn, Bounɓoɔ̀ ní kɔ̃̀ ɖà ɓó ɓě kè wa dyi sámá ɓó waà nàmàǔn ɓěɔ̀ jè.”

²⁷ Ɔ jèɛɛ, nyɔ ɓěɔ̀ keè ma Kówàɖà kè Dáfàùn ɔ kè Àbíwàɖàùn cĩ́-naín ɓěɔ̀ ɖei. Ɔ nì náa, Dáfàùn kè Àbíwàɖàùn sɔ̀ ma ɖé waà jàɖàìn-gbò ɓěɔ̀ mú, ké wa kè waà gmàà ɓě kè waà dyú-gàà ɓě ɔ kè waà dyú mɛ́nɛ́ɛ́ ɓěɔ̀ nyànà ma ɓó waà jàɖàìn-gbò ɓěɔ̀ wĩín dyi.

²⁸ Ké Mózè cɛ̃ɛ ma nyɔ ɓěɔ̀ gbo, ké ɔ ɖá, “Dyììn ɖé ɖɛ nìà kpáuń dyiɛń nyɛ múɛɛ, ɓě muɛ dyuòùn kà ɓɛ́ Bounɓoɔ̀ mɔ̀ nyɔ ɖoɓo ḿ, ɓɛ́ ḿ ké ɖɛ séín ɓěɛ̀ nyu, ké ɔ se ɖé ḿ mìɔùn nììn kpé mú sɔ̀ìn nyɛ.

²⁹ Ɔ jǔ ké gàa ɓěɛ̀ dyi hwuɖu-pɛ̀ɛ̀ mɛ́ kà nyɔ tɔ̀ɔ̀ ɓě nyu mɛ́ɛ kɛ, mɔɔ ké wa dyi ɖɛ tɔ̀ɔ̀ mɔ̀ nyɔǔn-dyùɛ̀ dyí-dyé-ɖɛ̀ɛ dyí dyé pū ní, Bounɓoɔ̀ se dyɛ ḿ ɖoɓo.

³⁰ Kɛɛ Bounɓoɔ̀ dyi ɖɛ ɖìè ɖò nyu, ké ɓóɖóɔ̀ dyi wɔ̃ ɓáà, ké ɔ dyi wa kè waà kɔ̃̀ɔ̀-ɖɛ̀ séín mana, ké wa dyi ɖé dɛ̀ gĩɔ-nyɔ̀ ɓěɔ̀ nìà kɛɛ mu ní, nìí, ɓě muɛ dyuòùn kà gàa ɓěɛ̀ ɖǎ Bounɓoɔ̀ zùǔn zàìn nyɛ.”

³¹ Ti ɓɛ́ Mózè jaɖa ma wuɖu nyɛ̀nɛ̀ɛ̀ kɛɛ, ɓóɖó-kpàɔ̀ fá ma wɔ̃ ɖé Dáfàùn kè Àbíwàɖàùn xwíɖíi.

³² Ɓóɖóɔ̀ ɓáà ma wɔ̃, ké ɔ mana ma wa kè waà gbǒ-xwíníín ɓěɔ̀ kè waà kɔ̃̀ɔ̀-ɖɛ̀ séín ɓěɔ̀, dè Kówàɖà kè ɔ nììn kíɖíí-sí-nyɔ̀ séín ɓěɔ̀ kè waà kɔ̃̀ɔ̀-ɖɛ̀ séín kɔ̃.

³³ Kǎà ɓóɖóɔ̀ nyu ma wa kè waà kɔ̃̀ɔ̀-ɖɛ̀ séín ɓěɔ̀ kpã mànàìn. Hwɛ̀ ké ɓóɖóɔ̀ mɔ́ìn ma wɔ̃ ɖe. Ké wa mu ma ɖé dɛ̀ ɓɛ́ nyɔ ɓě ɖǎà mɛ́ɛ muà kɛ, ké wa gbɔɔ̀ ma mú sɔ̀ìn ɓó nyɔ séín ɓěɔ̀ hwìɛ̀.

³⁴ Ti ɓɛ́ ɓóɖóɔ̀ nìà wa manauń wɛ̃ɛ, waà mú-páná-wùɖùɔ̀ nyuɛ ké Éézùɖùɛ̀-nyɔ̀ séín ɓě nì ma ɓó wa ɖeiɛɛ gbǔ ma, sepóɛɖé wa ɖá, “Ɓěà gbǔ, ɓóɖóɔ̀ ní kɔ̃̀ ɖà ɓěà mɔ̀ùn mana ɖekè.”

³⁵ Púɛɛ, nyɛ sɔ̀ ma ɖé Bounɓoɔ̀ gbo, ké ɔ fɔ̃ ma gàa hɔ̃dɛ̀ɖɛ̀ sɔ̃́ kè kpáɖá-nyɔ sɔ̃́ ɓaɖa-bùè ɓě ɓɛ́ wa nì ma kà nyɔ́ún-nɔ̀mɔ̀-ɖɛ̀ fɔ̃uń wɛ̃ɛ ɓó dyi nyɛ̀nɛ̀ɛ̀.

Nyɔ́ún-nɔ̀mɔ̀-ɖɛ̀ mú-fɔ̃̀ìn-ɖɛ̀ ɓěɔ̀

³⁶ Hwɛ̀ ké Bounɓoɔ̀ cɛ̃ɛ ma Mózè gbo, ké ɔ ɖá,

³⁷ “Cɛ̃ɛ Ɛ̀ɖɛ̀ázà mɔ̀à Eɖóún ɓɛ́ ɔ mɔ̀à sáa-zà-nyɔ̀ vɛ̀nɛ̀ɔ̀ kɛɛ dyú-gààɔ̀ kɛɛ gbo, ɓɛ́ ɔ ké nyɔ́ún-nɔ̀mɔ̀-ɖɛ̀ mú-fɔ̃̀ìn-ɖɛ̀ ɓěɔ̀ ɖé nyɛ-ɓɔ́ɔ̀ mú zà, nìí ɓɛ́ ɔ ké nyɛɔ̀ dya gba, sepóɛɖé nyɔ́ún-nɔ̀mɔ̀-ɖɛ̀ mú-fɔ̃̀ìn-ɖɛ̀ ɓěɔ̀ mɔ̀ ɖɛ hwɛ̀ mú ɓě.

³⁸ Wa mɔ̀ gàa ɓě kɔ̃̀ ɖɛ gbà nyuɛ ɓɛ́ waà fɛ̀ɛ̀ dyià wa xwa sɔ̀ɛɛ nììn nyɔ́ún-nɔ̀mɔ̀-ɖɛ̀ mú-fɔ̃̀ìn-ɖɛ̀ ɓě. Wa ɖǎ ma wa mɔ̄ Bounɓoɔ̀ xwáɖáún zàìn kĩ́ín, ké wa hwɛ̀ mú. Ɔ jèɛɛ, Ɛ̀ɖɛ̀ázà mɛ ɖú wa dyí, ɓɛ́ ɔ ké wa ɓaɖa ɖe ɖie, ɓɛ́ wa ké dyí pɛ́ɛ̀, ɓɛ́ wa ké feɖe-feɖe nì, nìí ɓɛ́ wa ké sáa-kɔ̃-zàìn-gbààɔ̀ kɔ̃in-ɓáìn-ɖɛ̀ jǔ, ɓɛ́ ɔ ké Éézùɖùɛ̀-dyù ɓěɔ̀ ɖɛ-hwìɖǐi-dyàìn-ɖɛ̀ jǔ.”

³⁹ Ɔ jèɛɛ, Ɛ̀ɖɛ̀ázà mɔ̀à sáa-zà-nyɔ̀ɔ̀ kɛɛ ɖú ma gàa ɓě ɓɛ́ wa sĩà kɛɛ nyɔ́ún-nɔ̀mɔ̀-ɖɛ̀ mú-fɔ̃̀ìn-ɖɛ̀ ɓě ɓɛ́ wa mɔ̀ ma bàɖàsǐ saá-saá kɛɛ dyí, ké ɔ ɓaɖa ma wa ɖe ɖie. Ɔ pɛ́ɛ̀ ma wa dyí, ké wa nì ma feɖe-feɖe, ké wa ɓáìn ma sáa-kɔ̃-zàìn-gbààɔ̀ kɔ̃in,

⁴⁰ ɓɛ́ ɔ ké Éézùɖùɛ̀-nyɔ̀ ɓěɔ̀ ɖɛ-hwìɖǐi-dyàìn-ɖɛ̀ jǔ kà nyɔ mɔ̀ nyɔ ɓɛ́ ɔ se sáa-zà-nyɔ̀, ɓɛ́ ɔ se Eɖóúnɛ̀ xwíníín-dyù ɖòɛɛ se kɔ̃̀ ɓɛ́ ɔ ké Bounɓoɔ̀ bũ̌in xwɛ̃́ìn, ɓɛ́ ɔ ké nyɔ́ún-nɔ̀mɔ̀-ɖɛ̀ ɖò fɔ̃, ɔ ní kɔ̃̀ ɖà nì kà Kówàɖà kè nyɔ ɓě sí ma kà ɔ kíɖííɛɛ nìà kɛ. Ɛ̀ɖɛ̀ázà nyu ma ɖɛ séínɔ̀ kà Bounɓoɔ̀ nyuɛ ma kà Mózè gbo cɛ̃ɛ kɛ.

Eɖóún póìn nyɔ ɓěɔ̀ ní

⁴¹ Kɛɛ wéɔ̀ nyɔ kɔ ma ɓó dyíɛɛ, Éézùɖùɛ̀-nyɔ̀ séín ɓěɔ̀ ɖú ma Mózè kè Eɖóún dúi jɛ̀ìn kpàǐ, ké wa ɖá, “Dyéɛ, ɓě ɖǎ Bounɓoɔ̀ nyɔ ɓěɔ̀ ɖáɓá.”

⁴² Ké ti ɓɛ́ nyɔ séín ɓěɔ̀ poìn ma kà dyí ɓó Mózè kè Eɖóún dúi jɛ̀ìn jèɛɛ, wa gmɔ̀ìn ma ɖé Bounɓoɔ̀ jàɖàìn-gbòɔ̀ gbo, ké wa dyéɛ kà ní-kpòɔ̀ ɓáìn ma jàɖàìn-gbòɔ̀ kɔ̃in nyɛ, ké wa ɖú ma Bounɓoɔ̀ dĩ́ín-dĩ̀ìnɔ̀ dyé kpàǐ.

⁴³ Ké Mózè kè Eɖóún dyi ma ɓó jàɖàìn-gbòɔ̀ wĩín,

⁴⁴ ké Bounɓoɔ̀ cɛ̃ɛ ma Mózè gbo, ké ɔ ɖá,

⁴⁵ “Ɓě sɔ̀ nyɔ ɓěɔ̀ hwìɛ̀, ɓɛ́ ḿ ké wa mú gbɔɔ̀ wàɖà cá.” Púɛɛ, Mózè kè Eɖóún taɓa ma dú hwuɖu ɓó Bounɓoɔ̀ dyúa.

⁴⁶ Hwɛ̀ ké Mózè cɛ̃ɛ ma Eɖóún gbo, ké ɔ ɖá, “Ɖú nì nyɔ́ún-nɔ̀mɔ̀-ɖɛ̀ mú-fɔ̃̀ìn-ɖɛ̀ɔ̀ dyí, ɓɛ́ m̀ ké nyɛ nìà ɓó sáa-kɔ̃-zàìn-gbààɔ̀ kɔ̃ɛɛ ɖò ɖéɛ mú po, ɓɛ́ m̀ ké nyɔ́ún-nɔ̀mɔ̀-ɖɛ̀ ɓóɛ kɔ̃ po, ɓɛ́ m̀ kéɛ ɖé nyɔ kúɖúú ɓěɔ̀ gbo kpa wàɖà, ɓɛ́ m̀ ké waà nàmàǔnɔ̀ kɔ̃in-ɓáìn-ɖɛ̀ nyu, sepóɛɖé Bounɓoɔ̀ ɖǎ dyoɖoún kpá, ké wɛ́ nyìnììn dyíin ɖò ɖǎ dyi.”

⁴⁷ Ɔ jèɛɛ, Eɖóún ɖú ma nyɔ́ún-nɔ̀mɔ̀-ɖɛ̀ mú-fɔ̃̀ìn-ɖɛ̀ɔ̀ dyí kà Mózè nyuɛ ma kà cɛ̃ɛ kɛ. Ké ɔ kpa ma peɖeɛ, ké ɔ mu ɖé nyɔ ɓěɔ̀ hwìɛ̀. Ɓó tia ɓaɖaa, púɛɛ, wɛ́ nyìnììn dyíinɔ̀ ɖǎ ma gbɔ dè nɔ̀ɔ̀ ɖé nyɔ ɓěɔ̀ hwìɛ̀. Ké ɔ po ma nyɔ́ún-nɔ̀mɔ̀-ɖɛ̀ɔ̀ ɓó nyɛɔ̀ kɔ̃, ké ɔ nyu ma nyɔ ɓěɔ̀ nàmàǔnɔ̀ kɔ̃in-ɓáìn-ɖɛ̀.

⁴⁸ Ké ɔ nyànà ma ɓó nyɔ ɓě ɖǎ mɛ́ɛ kè nyɔ ɓě nì cĩ́ɛń nyɛɛ pṹa dyi. Hwɛ̀ ké wɛ́ nyìnììn dyíinɔ̀ kpá ma ɓɔ́í.

⁴⁹ Kɛɛ nyɔ jĩ̀ kà ɓɛ́ wɛ́ nyìnììn dyíinɔ̀ ɖáɓá ma kɛɛ mɔ̀ ma nyɔ-kpò táázĩ̀ìn ɓaɖa-bùè sè hĩinyɛ kè hɔ̃dɛ̀ɖɛ̀ mɛ̀nɛ̌ìn-sɔ̃́. Nyɔ jĩ̀ kà ɓɛ́ wa mɛ́ ma kà Kówàɖà nììn nàmàǔnɔ̀ dyíɛɛ se ma ɖé kpá.

⁵⁰ Ti ɓɛ́ wɛ́ nyìnììn dyíinɔ̀ ɖǎ ma ɓɔ́í kpá kɛɛ, Eɖóún kɔ́ìn ma ɖe, ké ɔ dyi ma ɖé Mózè gbo ɖe ɓó jàɖàìn-gbòɔ̀ wĩín.