Nɔ̀ɓà 15 - Ɓǎsɔ́ɔ̀ Báɓòɔ̀

Gma ɓě ɓá sáa zà jè dyíɛ

¹ Sɔ̀ìn ɓóɛ gboɛɛ, Bounɓoɔ̀ cɛ̃ɛ ma Mózè gbo, ké ɔ ɖá,

² “Cɛ̃ɛ Éézùɖùɛ̀-dyù ɓěɔ̀ gbo kà ḿ ɖá ti ɓɛ́ ɓě mu ɓóɖó ɓɛ́ ḿ nìà ɓě nyíɛń nyɛɛ kɔ̃ cĩ́ɛ muùn wɛ̃ɛ,

³ ɔ jǔ ké ɓě ɖò dyi nyúà-ɖɛ̀ ɖò sáa zàìn ɓó ḿ bìì, ɓɛ́ ɔ ké fɔ̃ɔ-sàǎ-zàìn-ɖɛ̀ jǔ, mɔɔ ɓɛ́ ɔ ké sáa-zàìn-ɖɛ̀ ɖò ɓá wuɖu-ɖi-ɖi ɖò jè dyíɛɛ jǔ, mɔɔ ɓɛ́ ɔ ké hwòɖǒ-wáɖáá-nyìǐ-ɖɛ̀ jǔ, mɔɔ ɓɛ́ ɔ ké sáa-zàìn-ɖɛ̀ ɓá ɓěɛ̀ hwɔ-wè ɓěɔ̀ ɖò dyíɛɛ jǔ ní, nìí, nyúà-ɖɛ̀ɔ̀ mɛ mɔ̀ ɓìɖǐ mɔɔ ɓáɖáá mɔɔ wiɖi. Ɖɛ nìà kɛ mɔ̀ ɖii-ɖɛ̀-nyìǐ-ɖɛ̀ kɔ̃̀ nyɔ́ dè ḿ hwìɖǐiɛ.

^4-5 Ɔ jǔ ké nyɔɔ̀ dyi ɓáɖáá mɔɔ wiɖi sáa zàìn ɓó ḿ bìì ní, nìí, ɔ mɛ dyà fáɖáɓà nìɛ̀-nìɛ̀ kópò-wè mɛ̀nɛ̌ìn-tã ɓɛ́ wa caìn ɔ́ɖè-cànà kópò-wè hĩinyɛ kɛ, ɓɛ́ ɔ ké ɖii-ɖɛ̀-sàǎ-zàìn-ɖɛ̀ jǔ, kè wã́ìn-kòpò-wè hĩinyɛ, ɓɛ́ ɔ ké náá-ɖɛ̀-sàǎ-zàìn-ɖɛ̀ jǔ.

⁶ Nyɔɔ̀ dyi ɓáɖáá ɓíɔ́ sáa zàìn ní, ɔ mɛ dyà fáɖáɓà nìɛ̀-nìɛ̀ kópò-wè ɓaɖa-bùè sè mɛ̀nɛ̌ìn-ɖò ɓɛ́ wa caìn ɔ́ɖè-cànà kópò-wè hm̀m̌ wɛ̃, ɓɛ́ ɔ ké ɖii-ɖɛ̀-sàǎ-zàìn-ɖɛ̀ jǔ.

⁷ Ké ɔ mɛ dyà wã́ìn-kòpò-wè hm̀m̌, ɓɛ́ ɔ ké náá-ɖɛ̀-sàǎ-zàìn-ɖɛ̀ jǔ. Sáa-zàìn-ɖɛ̀ ɓěɛ̀ mɔ̀ ɖii-ɖɛ̀-nyìǐ-ɖɛ̀ kɔ̃̀ nyɔ́ dè mɔ̄ Bounɓoɔ̀ hwìɖǐiɛ.

⁸ Nyɔɔ̀ dyi ɓìɖǐ ɓíɔ́ sáa zàìn ɓó ḿ bìì, ɓɛ́ ɔ ké fɔ̃ɔ-sàǎ-zàìn-ɖɛ̀ jǔ, mɔɔ ɓɛ́ ɔ ké sáa-zàìn-ɖɛ̀ ɓá wuɖu-ɖi-ɖi ɖò dyíɛɛ jǔ, mɔɔ ɓɛ́ ɔ ké gbo-kpɔ̃ìn-sàǎ-zàìn-ɖɛ̀ jǔ ní,

⁹ nìí, ɔ mɛ dyà fáɖáɓà nìɛ̀-nìɛ̀ kópò-wè kpáɖá-nyɔ sè hĩinyɛ ɓɛ́ wa caìn ɔ́ɖè-cànà kópò-wè mɛ̀nɛ̌ìn-tã kɛ, ɓɛ́ ɔ ké ɖii-ɖɛ̀-sàǎ-zàìn-ɖɛ̀ jǔ.

¹⁰ Ké ɔ mɛ dyà wã́ìn-kòpò-wè mɛ̀nɛ̌ìn-tã, ɓɛ́ ɔ ké náá-ɖɛ̀-sàǎ-zàìn-ɖɛ̀ jǔ. Sáa-zàìn-ɖɛ̀ ɓěɛ̀ mɔ̀ ɖii-ɖɛ̀-nyìǐ-ɖɛ̀ kɔ̃̀ nyɔ́ dè mɔ̄ Bounɓoɔ̀ hwìɖǐiɛ.

¹¹ “Kà dyúáɖòɔ̀ kǎà ɓě mɛ nyuɛ ɓá ɓìɖǐ ɓíɔ́ ɖò-ɖò séín mɔɔ ɓáɖáá ɓíɔ́ ɖò-ɖò séín mɔɔ ɓáɖáá-dyù ɖò-ɖò séín mɔɔ wiɖi-dyù ɖò-ɖò séín ɓɛ́ wa zàìn sáa kɛɛ dyí.

¹² Ɔ jǔ ké nyúà-ɖɛ̀ ɓɛ́ nyɔ ɖò mu sáa zàìn nyɛɛ dyi dyúáɖò kɔ̃ ziín, ɔ mɛ gmɔ̀ ɖii-ɖɛ̀-sàǎ-zàìn-ɖɛ̀ kè náá-ɖɛ̀-sàǎ-zàìn-ɖɛ̀ jĩ̀ kà ɔ ɓéɖé ɔ ké tò ɓó nyúà-ɖɛ̀ dyúáɖò bììɛɛ xwíníín, ɓɛ́ ɔ ké jĩ̀ náa tò ɓó nyúà-ɖɛ̀ ɓěɔ̀ ɖò-ɖò bìì.

¹³ Ɓě mɔ̀à ɓóɖó-dyù séín ɓěɛɛ ɓéɖé ɓě ké ɖɛ nìà kɛ nyu ti séín ɓɛ́ ɓě mu ɖii-ɖɛ̀-nyìǐ-ɖɛ̀ kɔ̃̀ nyɔ́ dè mɔ̄ Bounɓoɔ̀ hwìɖǐiɛɛ dyàùn wɛ̃.

¹⁴ Ɔ jǔ ké ɖéè ɖò dyi ɖé ɓě hwìɛ̀ nì, mɔɔ ké ɖíà ɖò dyi ɖé ɓě hwìɛ̀ cĩ́, ké ɔ dyi ɖii-ɖɛ̀-nyìǐ-ɖɛ̀ kɔ̃̀ nyɔ́ dè ḿ hwìɖǐiɛɛ tòɛ̀ mɔ́ ní, ɔ mɛ nyu hwɔìn-ɖɛ̀ dyúáɖò ɓɛ́ ɓě mɔ̀ùn nyuà kɛ.

¹⁵ Gma ɓɛ́ ɓě ɓéɖé ɓó ɓě mìɔùn bììɛɛ, gma dyúáɖòɔ̀ mɛ nì ɓó ɖíà ɓěɔ̀ bìì ɖekè. Kà ɓě nyu nìɛ̀ kɛɛ, kǎà ɖíà ɓěɔ̀ mɔ̀ùn mɛ nì ɓó ḿ dyúa ɖekè. Gma dyúáɖò mɛ nì ɓó ɓě kè ɓěɛ̀ xwíníín-dyù ɓě bìì kánáá pū.

¹⁶ Gma ɓɛ́ ɓě ɓéɖé ɓó ɓě mìɔùn bììɛɛ, gma dyúáɖòɔ̀ ɓě mɛ ɓéɖé ɓó ɖíà ɓě ɓɛ́ wa mu ɖé ɓě hwìɛ̀ cĩ́ìn nyɛɛ bìì ɖekè.”

¹⁷ Ké Bounɓoɔ̀ cɛ̃ɛ ma Mózè gbo ɖe, ké ɔ ɖá,

¹⁸ “Cɛ̃ɛ Éézùɖùɛ̀-dyù ɓěɔ̀ gbo kà ḿ ɖá ti ɓě mu ɖé ɓóɖó ɓɛ́ ḿ nìà ɓě kɔ̃ kpauń wɛ̃ɛ kɔ̃ nyiniìn,

¹⁹ ké ɓě mu ɖii-ɖɛ̀ ɓě bãà ɖé ɓóɖóɔ̀ múɛɛ ɖò ɖiìn nyɛɛ, ɓě mɛ po ɖò wáká, ɓɛ́ ɔ ké nyíí-ɖɛ̀ jǔ ɓó mɔ̄ mɔ̀à Bounɓoɔ̀ kɛɛ bìì.

²⁰ Ɓě dyi fáɖáɓà kĩ́ín-kĩ́ínɔ̀ bɛɖɛɛ̀ mú pĩ ní, ɓěɛ̀ bɛɖɛɛ̀ kĩ́ín-kĩ́ínɔ̀ kpo kĩ́ín-kĩ́ínɔ̀ mɛ mɔ̀ nyíí-ɖɛ̀ kpa ɖɛ ɖò ɓó ḿ bìì. Ɓě mɛ tòɛ̀ kà dyúáɖò kà ɓě nyuà nyíí-ɖɛ̀ kpa ɖɛ mɔ̀à ɓěɛ̀ ɖii-ɖɛ̀ kĩ́ín-kĩ́ín sɔ̀à ɖé ɓěɛ̀ mɔɔ́-dyí-síìn-naín ɓěɔ̀ kɛɛ tòɛ̀ kɛ.

²¹ Ɖɛ nìà kɛ mɛ mɔ̀ nyíí-ɖɛ̀ kpa ɖɛ ɓɛ́ ɓě kéɛ mɔ̄ Bounɓoɔ̀ nyí sɔ̀ìn ɖé ɓěɛ̀ bɛɖɛɛ̀ kĩ́ín-kĩ́ín ɓɛ́ ɓě pĩɛɛ gbo. Ɓěɛ̀ xwíníín-dyù ɓě mɛ nyu ɖɛ nìà kɛ kánáá pū.

^22-23 “Ɔ jǔ ké ɓě mɔɔ ɓěɛ̀ xwíníín-dyù ɓě seó ɖei dyé, ké ɓě dyi gma ɓě ɓɛ́ ḿ tòìn ma kà mɔ̀ Mózè múɛɛ ɖò wáɖá ní, nìí, ɖɛ mɔ̀ ɖɛ ɓě mɛ nyuɛɛ kɛà kɛ̀.

²⁴ Ɓě séín dyi ɖò wáɖá seó-ɖei-dyé-kà ní, ɓě séín mɛ zàìn ɓìɖǐ ɓíɔ́ gmɔ̀ ɖò sáa, ɓɛ́ ɔ ké fɔ̃ɔ-sàǎ-zàìn-ɖɛ̀ kɔ̃̀ nyɔ́ dè mɔ̄ Bounɓoɔ̀ hwìɖǐiɛɛ jǔ. Ɓě mɛ tòɛ̀ kè ɖii-ɖɛ̀-sàǎ-zàìn-ɖɛ̀ kè náá-ɖɛ̀-sàǎ-zàìn-ɖɛ̀ dyììn ɖé kà gmaɔ̀ nyuà cɛ̃ɛ kɛɛ mú. Ké ɓě mɛ zàìn vã́á dyúáɖò sáa, ɓɛ́ ɔ ké nàmàǔn-sàǎ-zàìn-ɖɛ̀ jǔ.

²⁵ Sáa-zà-nyɔ̀ ɓěɔ̀ ɖò mu nàmàǔnɔ̀ kɔ̃in-ɓáìn-ɖɛ̀ nyuùn ɓó ɓě mɔ̀ Éézùɖùɛ̀-dyù séín ɓěɔ̀ bìì. Ɔ ɖǎ ná nìǐn, ní mu ɓě kɔ̃in zĩ̀ìn, sepóɛɖé ɖɛ ɓě nyuà kɛɛ mɔ̀ ma seó-ɖei-dyé-nàmàǔn, ké ɓě ɖǎ sáa-zàìn-ɖɛ̀ ɓɛ́ ɔ mɔ̀ ɖii-ɖɛ̀-nyìǐ-ɖɛ̀ kɛ kè nàmàǔn-sàǎ-zàìn-ɖɛ̀ɔ̀ tò ɓó ḿ dyúa, ɓó seó-ɖei-dyé-nàmàǔnɔ̀ jè.

²⁶ Ní mu ɓě mɔ̀ Éézùɖùɛ̀-dyù séín ɓěɔ̀ kɔ̃in zĩ̀ìn, dè ɖíà ɓě ɓɛ́ wa mu ɖé ɓě hwìɛ̀ nììn nyɛɛ kɔ̃, sepóɛɖé ɓě séín nyuà seó-ɖei-dyé-nàmàǔnɔ̀ kɛ.

²⁷ “Ɔ jǔ ké nyɔ dyúáɖò mɔ̀ nyɔ seó ɖei dyé, ké ɔ dyià nàmàǔnɔ̀ nyu ní, nìí, ɔ mɛ zàìn gbǎà nyɔ́nɔ́ ɓɛ́ ɔ nyuá zɔ̃ dyúáɖòɛɛ sáa, ɓɛ́ ɔ ké nàmàǔn-sàǎ-zàìn-ɖɛ̀ jǔ.

²⁸ Sáa-zà-nyɔ̀ ɓěɔ̀ ɖò mu kɔ̃in-ɓáìn-ɖɛ̀ nyuùn ɓó nyɔɔ̀ seó-ɖei-dyé-nàmàǔnɔ̀ jè, ɓó ḿ dyúa, ké ní mu ɔ kɔ̃in zĩ̀ìn.

²⁹ Gma nìà ɓó nyɔ dyúáɖò bììɛɛ mɛ nì ɓá nyɔ ɖò-ɖò séín ɓɛ́ wa seó ɖei dyé ké wa mu nàmàǔn ɖò nyuùn wɛ̃ɛ bìì, kɛbì ɔ mɛ mɔ̀ Éézùɖùɛ̀-ɓòɖòɔ̀ dyú mɔɔ ɖíà ɓɛ́ ɔ cĩ́ ɖé ɓě hwìɛ̀ kɛ.

³⁰ “Kɛɛ nyɔ mɔ̀ nyɔ ɓɛ́ ɔ nyu gmɔ̀ǐn-gmɔ̀, ɓɛ́ ɔ dyi ɖɛ gbà ɖò nyuɛɛ, kɛbì nyɔɔ̀ mɛ mɔ̀ Éézùɖùɛ̀-ɓòɖòɔ̀ dyú mɔɔ ɖíà ɓɛ́ ɔ cĩ́ ɖé ɓě hwìɛ̀ kɛɛ, ɔ zàìn mɔ̄ Bounɓoɔ̀ zùǔn, ké ɓě ɓéɖé ɓě ké ɔ woɖo gbo cɛ̃ sɔ̀ìn ɖé ɔ nyɔ ɓěɔ̀ hwìɛ̀.

³¹ Sepóɛɖé ɔ ɖǎ ní gma ɓěɔ̀ jè dyií dyi po, ké ɔ ɖǎ ɖò wáɖá jèɛɛ, ɓě mɛ cɛ̃ ɔ woɖo gbo, ké ɔ mu ɔ mìɔùn nììn ɖɛ gbàɔ̀ kpa dyí ɖúùn.”

Gàa ɖò wáɖá gma ɓá Bounɓoɔ̀ fɔ̀-wèɔ̀ jè dyíɛ

³² Ti ɓɛ́ Éézùɖùɛ̀-nyɔ̀ ɓěɔ̀ nì ma kà ɖé gbǎùn-fúɖúáɔ̀ kɔ̃ɛɛ, wé ɖòɛ̀ ɓaɖaa, wa kpɔ̃̀ìn ma gàa ɖò nyɛ mɔ́ɔ ɓó Bounɓoɔ̀ fɔ̀-wèɔ̀ ɓaɖa.

³³ Ké nyɔ ɓě ɓɛ́ wa kpɔ̃̀ìn ma kà ɔ nyɛ mɔ́ɔ dyiɛɛ dyà ma ɔ Mózè kè Eɖóún ɔ kè Éézùɖùɛ̀-nyɔ̀ tɔ̀ɔ̀ séín ɓěɔ̀ gbo.

³⁴ Ké wa po ma ɔ kpɔɖɔ ɖeín, sepóɛɖé wa séè ɖɛ wa ké ɔ bũ̌ nyuɛɛ dyuò ke.

³⁵ Hwɛ̀ ké Bounɓoɔ̀ cɛ̃ɛ ma Mózè gbo, ké ɔ ɖá, “Ɓě ɓéɖé ɓě ké gàaɔ̀ ɖáɓá. Nyɔ séín ɓěɔ̀ mɛ kpa ɔ ɖé jàɖàìn-hwɔ̀ɖɔ̀ɔ̀ ɖeín, ɓɛ́ wa ké ɔ sɔ́ɔ́-kpò dyi taɓaìn, ɓɛ́ ɔ ké mɛ́.”

³⁶ Ké nyɔ séín ɓěɔ̀ kpa ma ɔ ɖé jàɖàìn-hwɔ̀ɖɔ̀ɔ̀ ɖeín, ké wa taɓaìn ma ɔ sɔ́ɔ́-kpò dyi kà Bounɓoɔ̀ nyuɛ ma kà Mózè gbo cɛ̃ɛ kɛ, ké ɔ mɛ́ ma.

Gma ɓá bù-bù ké ɖɔ wĩin nìɛɛ jè dyíɛ

³⁷ Ti ɖòɛ̀ ɓaɖa ɖeɛɛ, Bounɓoɔ̀ cɛ̃ɛ ma Mózè gbo, ké ɔ ɖá,

³⁸ “Cɛ̃ɛ Éézùɖùɛ̀-dyù ɓěɔ̀ gbo, ɓɛ́ wa ké waà mú-po-ɖɔ̀ ɓěɔ̀ bù-bù ɓě wĩin po, ɓɛ́ wa kéɛ ɖò-ɖò dyèě-ɖúú ɓéɖé ɓùɖǔù-dyèɖèɛɛ sã̀ìn. Kǎà wa mɛ nyuɛ tee ɖé waà xwéɖé-dù deìn dúún ɓěɔ̀ mú.

³⁹ Bù-bù muà waà ɖɔ ɓěɔ̀ wĩin nììn nyɛɛ mu nyɔ-ɖɛ-hwìɖǐi-dyàìn-ɖɛ̀ jǔùn, ké ti séín ɓɛ́ wa muɛ dyéɖé dya wáɖáùn wɛ̃ɛ, ní gma ɓěɔ̀ mu wa hwìɖǐi dyiìn, ɓɛ́ wa ké wa dyi kpɔ̃. Ɔ dyi ná nìǐn, nìí, wa se ḿ kɔ̃ín pòɛ̌n mu, ɓɛ́ wa ké wa mìɔùn nììn hwòɖǒɛ̀-mɔ́ɔ́-ɖɛ̀ kíɖíí sí.

⁴⁰ Kǎà ní gma séín ɓěɔ̀ mu wa hwìɖǐi nììn, ɓɛ́ wa kéɛ séín dyi kpɔ̃, nìí ɓɛ́ wa ké ní nyɔ ɓě jǔ gàná cá.

⁴¹ Mɔ̄ mɔ̀ Bounɓo mɔ̀à waà Gèɖèpɔ́ɔ̀ zà ma kà wa ɖé Íjè-ɓòɖòɔ̀ kɔ̃, ɓɛ́ ḿ kéà waà Gèɖèpɔ́ɔ̀ jǔɛ̀. Mɔ̄ mɔ̀ Bounɓo mɔ̀à waà Gèɖèpɔ́ɔ̀ kɛ̀.”