Nɔ̀ɓà 14 - Ɓǎsɔ́ɔ̀ Báɓòɔ̀

Nyɔ ɓěɔ̀ ɖú ka kpàǐ

¹ Púɛɛ, nyɔ séín ɓěɔ̀ ɖú ma vĩ̌ kpàǐ ɖé wuɖu zoo mú. Wa gã̀ ma vĩ̌ɛń dyi tee ɓó máaún-hwùɖù gànáɔ̀ mú.

² Ké Éézùɖùɛ̀-nyɔ̀ séín ɓěɔ̀ ɖú ma Mózè kè Eɖóún dúi jɛ̀ìn kpàǐ. Wa cɛ̃ɛ ma Mózè kè Eɖóún gbo, ké wa ɖá, “Ɔ muɔ́ má dyíin nɔ̀mɔ̀ùn ɓɛ́ à kéɔ́ má ɖé Íjè-ɓòɖòɔ̀ kɔ̃ mɔɔ nɔ̄ gbǎùn-fúɖúá nìà kɛ kɔ̃ mɛ́ìn.

³ Ɖɛ́ kɔ̃̀ jè Bounɓoɔ̀ nìà à ɓóɖóa kɔ̃ kpauń, ɓɛ́ à kéà gàsíà dyúa sè kɛ́? Dyéɛ, à gmàà ɓě kè à dyú ɓěɔ̀ muá to-gbo-zà-ɖɛ̀ jǔùn. Ɓěɛ̀ hwòɖǒ ɖá ɔ se dyíin nɔ̀mɔ̀ ɓɛ́ ɓěà ké Íjè-ɓòɖòɔ̀ kɔ̃ ɖe kɔ́ìne?”

⁴ Ké wa cɛ̃ìn cɛ̃̀ìn gbo, ké wa ɖá, “Ɓěà gã nàìn-nyɔ̀ ɖò, ɓɛ́ ɔ ké ɓěà Íjè-ɓòɖòɔ̀ kɔ̃ ɖe kpa.”

⁵ Hwɛ̀ ké Mózè kè Eɖóún taɓa ma dú hwuɖu ɓó Éézùɖùɛ̀-nyɔ̀ séín ɓěɔ̀ dyúa, ɓɛ́ wa ké Bounɓoɔ̀ ɓaà.

⁶ Ké Jasúé mɔ̀à Núùnɛ̀ dyú-gààɔ̀ kɛ kè Kéɖɛ̀ mɔ̀à Jɛ̀fúnɛ̀ɛ̀ dyú-gàà ɓɛ́ wa mɔ̀ ma nyɔ ɓě mu ma kà ɓóɖóɔ̀ dyéɖé gboi kpaìn nyɛ ɖòɛɛ fáìn ma wa mìɔùn ɖɔún dyi.

⁷ Ké wa cɛ̃ɛ ma Éézùɖùɛ̀-nyɔ̀ séín ɓěɔ̀ gbo, ké wa ɖá, “Ɓóɖó ɓɛ́ à zĩ̀ìn ma kà mú, ɓɛ́ à dyià dyéɖé gboi kpaìn nyɛɛ mɔ̀ ɓóɖó zi dyíin nɔ̀mɔ̀ǔn wɛ̃.

⁸ Ɔ jǔ ké Bounɓoɔ̀ hwòɖǒ dyi à múin dèìn ní, nìí, ɔ mu à ɖé ɓóɖóɔ̀ mú kpaùn, ɓɛ́ ɔ kéɛ à nyí. Ɔ mɔ̀ ɓóɖó zi bãuń mìɔ kɛ.

⁹ Ɓě ɓɔ́ Bounɓoɔ̀ wuɖu ɖùǔn dyi zàìn. Ké ɓěǐn ɖá ɓɛ́ ɓě ké nyɔ ɓě nìà ɖé ɓóɖóɔ̀ múɛɛ dyi fɛ̃̀ìn, sepóɛɖé wa hwɔìn bòò ɓó à bìì. Waà dyí-gmɔ̀ìn-ɖɛ̀ɔ̀ ɖǎ wa xwa sɔ̀, ké Bounɓoɔ̀ nì ɓó à gbo. Ɔ jèɛɛ, ɓěǐn ɖá ɓɛ́ ɓě ké wa dyi fɛ̃̀ìn.”

¹⁰ Kɛɛ nyɔ séín ɓěɔ̀ mɔ́ ma wa sɔ́ɔ́-kpò dyi taɓaìn dyi. Púɛɛ, Bounɓoɔ̀ dĩ́ín-dĩ̀ìnɔ̀ wóɖóìn ma Éézùɖùɛ̀-nyɔ̀ séín ɓěɔ̀ dyí ɓó Bounɓoɔ̀ jàɖàìn-gbòɔ̀ kɔ̃in.

¹¹ Ké Bounɓoɔ̀ cɛ̃ɛ ma Mózè gbo, ké ɔ ɖá, “Ti jĩ̀ xwɛ̌ nyɔ ɓěɛ̀ mu ḿ zùǔn zàìn keɛ́? Tiɔ̀ nyɛ́ hwɛ̀ wa ké ḿ hwòɖǒ kɔ̃ dè gàná cá kɛ́? Dyé zɛ̃̀ìn-ɖɛ̀ jĩ̀ kà ɓɛ́ ḿ ɖǎà ɖé wa hwìɛ̀ nyuɛ.

¹² Ní mu wa wɛ́ nyìnììn dyíin ɖò kɔ̃ dyàùn, ké wa se ní nyɔ ɓě jǔɛ mu ɖe. Ní mu m̀ ɓóɖó-dù vɛ̀nɛ̀ ɓɛ́ ɔ kpa ɖɛ ké ɔ ɓéɖé kpé ké ɔ zi wa dyíɛɛ mú nyuùn.”

¹³ Kɛɛ Mózè cɛ̃ɛ ma Bounɓoɔ̀ gbo, ké ɔ ɖá, “Ɓɔ̌ɔ̀, m̀ dyiɛ náa nyuín, Íjè-nyɔ̀ ɓěɔ̀ muɛ jè wɔ̃́ùn. M̀ zà ma nì nyɔ ɓěɛ̀ ɖé wa hwìɛ̀ ɖé nì kpé vɛ̀nɛ̀ɔ̀ mú.

¹⁴ Íjè-nyɔ̀ ɓěɔ̀ dyiɛ wɔ̃́ ní, wa muɛ Kénà-nyɔ̀ ɓěɔ̀ gbo cɛ̃ìn. Bounɓo, wa ɖǎa wɔ̃́ kà m̀ nì nɔ̄ nì nyɔ ɓěɛ̀ hwìɛ̀, sepóɛɖé à kè mɔ̀ ɖǎ dya gmɔìn, ké nì ní-kpòɔ̀ nì ɓó à kɔ̃in, ké à dyi muɛń nìǐn, mɔ̀ mɔ̀ nyɔ nì à dyúa dyììn ɖé ní-kpòɔ̀ mú ɓó dyóɖóaún ɔ kè nyɛ-mìɔ̀ mú ɓó máaún wɛ̃.

¹⁵ Ɔ jǔ ké m̀ dyi nyɔ ɓěɛ̀ séín ɖáɓá ní, ɓóɖó-dù ɓě ɓɛ́ wa wɔ̃́ ma kà dĩ́ín-dĩ̀ìn-ɖɛ̀ ɓě ɓɛ́ m̀ nyuɛ bɔ̃̌ɛɛ muɛ cɛ̃ìn, ɓɛ́ wa ké níiń,

¹⁶ ‘Bounɓoɔ̀ se ɔ nyɔ ɓěɔ̀ ɓóɖó ɓɛ́ ɔ ɖáìn ma kà wa nyɛ́nɛ́ín nyɛɛ kɔ̃ kpaa ɓɛ́ìn jè, ké ɔ ɖáɓáìn kà wa ɖé gbǎùn-fúɖúáɔ̀ kɔ̃ɛ̀.’

¹⁷ Ɔ ná nì jèɛɛ, Ɖɛɓíɔ́, tɛ̀mɛ̀ìn nì kpé vɛ̀nɛ̀ɔ̀ à dyí, ɓɛ́ m̀ ké ɖɛ m̀ ɖáìn ma kà à nyɛ́nɛ́ín nyɛɛ nyu. M̀ cɛ̃ɛ zɔ̃̌ɔ̀, ké m̀ ɖá,

¹⁸ ‘Mɔ̄ Bounɓoɔ̀, ní dyoɖo-hwòɖò mɛɛ̀ ní, ké ní ɖɛ̀ɓɛ̀ǐn-ɖɛ̀ɓɛ̀ǐnɔ̀ se sèìn-naín kɔ̃̀. Ní zĩ̀ìn wuɖuún-jaɖa-nyɔ̀ ɓě kè nàmàǔn-nyɔ̀ tɔ̀ɔ̀ ɓě kɔ̃in. Kɛɛ wɛ̃́ɛ́ kɛɛ, nyɔ ɓě ɓɛ́ zaa wáɖá dúún wɛ̃ɛ, ḿ tò wa gǎ kɔ̃ wɛ̃́ɛ́ pū. Ḿ tò waà dyú ɓě kè waà dyú ɓěɔ̀ nììn dyú ɓě gǎ kɔ̃ ɓó wa ɓǎ ɓěɛ̀ nàmàǔn ɓěɔ̀ jè, ké ɔ dyɛ̀ìn waà xwéɖé-dù deìn dúún tã kè hĩinyɛ nììnɔ̀.’

¹⁹ Ɓɔ̌ɔ̀, ní ɓaà m̀ ní, po ɖé nì ɖɛ̀ɓɛ̀ǐn-ɖɛ̀ɓɛ̀ǐn se sèìn-naín kɔ̃̀ɔ̀ gbo hwòɖǒ, ɓɛ́ m̀ ké nyɔ ɓěɛ̀ nàmàǔnɔ̀ kɔ̃in zĩ̀ìn kà dyúáɖò kà m̀ ɖúó kà wa kɔ̃in zĩ̀ɛ̌n dyí ti ɓɛ́ m̀ ɖǎǒ wa Íjè-ɓòɖòɔ̀ kɔ̃ zà dyɛ̀ìn ɓó kàǔn wɛ̃.”

²⁰ Hwɛ̀ ké Bounɓoɔ̀ zà ma ɖé wuɖu, ké ɔ ɖá, “Ḿ ɖǎ wa kɔ̃in zĩ̀ìn kà m̀ nyuà zɔ̀ɔ̀ kɛ.

²¹ Kɛɛ ḿ gboò ḿ mìɔùn dyí kà ní dĩ́ín-dĩ̀ìnɔ̀ nyuà ɓóɖó-kpàɔ̀ dà séín nìɛ̀ kɛɛ,

²² nyɔ ɓě ɓɛ́ wa ɖǎà dĩ́ín-dĩ̀ìn-ɖɛ̀ ɓě kè zɛ̃̀ìn-ɖɛ̀ ɓě ɓɛ́ ḿ nyu ma kà ɖé Íjè-ɓòɖòɔ̀ kɔ̃ kè nɔ̄ gbǎùn-fúɖúáɛ̀ kɔ̃ɛɛ dyé, hwɛ̀ ké wa nìà ḿ mú dɔ̃̌uń kánáá pū, ké wa seà ní wuɖuɔ̀ dyi kpɔ̃ɔ mɔ́ɛɛ,

²³ wa ɖò se ɓóɖó ɓɛ́ ḿ ɖǎà wa ɓǎ ɓěɔ̀ nyɛ́nɛ́ín ɖáìn nyɛɛ dyéɛ mu. Nyɔ séín ɓě ɓɛ́ wa zàìn ḿ zùǔn wɛ̃ɛ ɖò se ɓóɖóɔ̀ dyéɛ mu.

²⁴ Kɛɛ sepóɛɖé ní gbo-nì-nyɔ̀ Kéɖɛ̀ nììn hwòɖǒ-dyùà kò ní, ké ɔ sí ḿ kíɖíí hwòɖǒɛ̀-ɖé-hwɛ̀-kà jèɛɛ, ní mu ɖé ɔ ɓóɖó ɓɛ́ ɔ kpaìn ma kà dyéɖé gboiɛɛ kɔ̃ nyìnììn, ké ɔ xwíníín-dyù ɓě muɛ wuɖuí kɔ̃̀ùn.

²⁵ “Ɓó gàɖàà ní, ɓě cɛ́ɛ̀ xwa, ɓɛ́ ɓě ké hwìè muà ɖé Dyóó Zĩ-zãɔ̀ wĩín nyɛɛ kpa, ɓɛ́ ɓě ké ɖé gbǎùn-fúɖúáɔ̀ kɔ̃ mu. Ɓě mɛ ɓɔ́ ɖé bɔɔ-kpà ɓě kɔ̃̀ kɔ̃ ɓɛ́ Àmáɖɛ̀-nyɔ̀ ɓěɔ̀ kè Kénà-nyɔ̀ ɓěɔ̀ cĩ́à kɛɛ muɛ.”

Bounɓoɔ̀ tò nyɔ ɓěɔ̀ gǎ kɔ̃ ɓó waà ka-kaɔ̀ jè

²⁶ Ké Bounɓoɔ̀ cɛ̃ɛ ma Mózè kè Eɖóún gbo, ké ɔ ɖá,

²⁷ “Tiɔ̀ nyɛ́ hwɛ̀ ɓɛ́ hwòɖǒ-kɔ̃in-nyìnììn-nyɔ̀ kúɖúú ɓěɛ̀ ké ḿ ɖei wùɖùɛ̀n ɓɔ́ɛ́? Ḿ ɖǎ ní ɖei-wùɖùìn-wùɖùìn jĩ̀ kà ɓɛ́ Éézùɖùɛ̀-dyù ɓěɔ̀ ɖǎà nyuɛɛ wɔ̃́.

²⁸ Cɛ̃ɛ wa gbo kà mɔ̄ Bounɓoɔ̀ ɖá ḿ gboò ḿ mìɔùn dyí kà ɖɛ ɓě cɛ̃à ɓɛ́ ḿ ɖǎà wɔ̃́ɛɛ, ɔ mɔ̀ ɖɛ ní mu ɓě bũ̌ nyuùn wɛ̃.

²⁹ Ɓěɛ̀ xwɛ́ mu dyi wáɖáìn nɔ̄ gbǎùn-fúɖúá nìà kɛ kɔ̃. Ɓě mɔ̀ nyɔ séín ɓě ɓɛ́ wa zɛɖɛ ma kà, ɓɛ́ ɓě ɖǎà zɔ̃ kpáɖá-nyɔ mɔɔ zi kɔ̃ nyu, ɓɛ́ ɓě ɖǎà ḿ ɖei wùɖùìn nyɛɛ,

³⁰ ɓěɛ̀ nyɔ dyúáɖò dyɛ mɔ̀ùn se ɓóɖó ɓɛ́ ḿ ɖáìn ma kà ɓě nyɛ́nɛ́ín, ké ḿ ɖá ɓě mu ma kà ɖé cĩ́ìn nyɛɛ kɔ̃ muɛ́ mu, ɔ sèìn Kéɖɛ̀ mɔ̀à Jɛ̀fúnɛ̀ɛ̀ dyú-gààɔ̀ kɛ kè Jasúé mɔ̀à Núùnɛ̀ dyú-gààɔ̀ kɛ.

³¹ Kɛɛ ɓěɛ̀ dyú ɓě ɓɛ́ ɓě ɖá wa muà to-gbo-zà-ɖɛ̀ jǔùn wɛ̃ɛ, wa mɔ̀ nyɔ ní mu ɖé kpaùn, ké wa mɔ̀ nyɔ mu ɓóɖó kɔ̃̀ jè ɓɛ́ ɓě zàìn zùǔn wɛ̃ɛ dyí dyuòùn.

³² Kɛɛ ɓá ɓě mɔ̀ùn jè dyíɛɛ, ɓěɛ̀ xwɛ́ mu nɔ̄ gbǎùn-fúɖúá nìà kɛ kɔ̃ dyi wáɖáìn.

³³ Ké ɓěɛ̀ dyú ɓěɔ̀ mu nɔ̄ gbǎùn-fúɖúá nìà kɛ mú dyi bũɛń dyi gã̀ùn tee ɓó zɔ̃ kpáɖá-nyɔ sɔ̃́ xwíníín, ké wa mu gǎ dyéɛń dyi gã̀ùn tee, sepóɛɖé ɓě ɖǎ ḿ kɔ̃ín pòìn. Kǎà ɔ mu ná gã̀ùn tee ké ɓě hwɔ ɖé gbǎùn-fúɖúáɔ̀ kɔ̃ mɛ́ìn hwɛ̀.

³⁴ Ɓě mu ɓěɛ̀ ɖɛ gbàɔ̀ kpa dyí ɖúùn ɓó zɔ̃ kpáɖá-nyɔ sɔ̃́ xwíníín. Wé jĩ̀ kà ɔ ɖúà dyí ɓó ɓóɖóɔ̀ dyéɖé gboi kpaìn jèɛɛ, kǎà zɔ̃ɔ̀ mu jĩ̀ìn. Wé ɖò ní zɔ̃ ɖò. Ɓě muɛ dyuòùn ɖɛ ɔ jǔ ɓɛ́ ḿ ké ɓěɛ̀ mú-nyɛ́-nyɔ̀ jǔɛ.

³⁵ Mɔ̄ Bounɓoɔ̀ ɖǎa cɛ̃. Ní mu ɖɛ nìà kɛ hwòɖǒ-kɔ̃in-nyìnììn-nyɔ̀ ɓě ɓɛ́ wa ɖǎà dyí poìn, ɓɛ́ wa kéà ḿ gbo vɔ̃ɛɛ bũ̌ nyuùn. Wa jè mu nɔ̄ gbǎùn-fúɖúá nìà kɛ kɔ̃ sèìn. Nɔ̄ ɖéɛ̀ wa mu mɛ́ìn.”

³⁶ Púɛɛ, gàa ɓě ɓɛ́ wa dyà ma kà Éézùɖùɛ̀-nyɔ̀ ɓěɔ̀ ɓóɖóɔ̀ se-bɔ̃̀ɔ̀ gbo sɔ̀ìn ɖé nyɔ ɓě ɓɛ́ Mózè ɖoɓo ma kà ɓɛ́ wa kéà ɓóɖóɔ̀ dyéɖé gboi kpaìn nyɛɛ hwìɛ̀, ɓɛ́ bɔ̃̌ɔ̀ dyià nyu ɓɛ́ nyɔ kúɖúú ɓěɔ̀ dyi ma kà Bounɓoɔ̀ ɖei wùɖùìn nyɛɛ,

³⁷ Bounɓoɔ̀ nyuɛ ma ké wɛ́ nyìnììn dyíin ɖò ɖáɓá wa séín nyɛ̀nɛ̀ɛ̀.

³⁸ Kɛɛ Jasúé mɔ̀à Núùnɛ̀ dyú-gààɔ̀ kɛ kè Kéɖɛ̀ mɔ̀à Jɛ̀fúnɛ̀ɛ̀ dyú-gààɔ̀ kɛɛ ɖòùn mɔ̀ nyɔ se ma mɛ́ sɔ̀ìn ɖé gàa ɓě mu ma kà ɓóɖóɔ̀ dyéɖé gboi kpaìn nyɛɛ hwìɛ̀.

Ɓóɖóɔ̀ to kɔ̃ kpa-kpaɔ̀ mú-dɔ̃̌-dɔ̃̌ kĩ́ín

³⁹ Ké Mózè cɛ̃ ma ɖɛ séín ɓě ɓɛ́ Bounɓoɔ̀ cɛ̃ ma kà ɔ gboɛɛ Éézùɖùɛ̀-nyɔ̀ séín ɓěɔ̀ gbo, ké nyɔ ɓěɔ̀ vĩ̌ ma mìɔ.

⁴⁰ Wéɔ̀ nyɔ kɔ ma ɓó dyíɛɛ gànà-kṹún mɛ̀nɛ̀ɛ̀ kɛɛ, wa sɔ̀ ma dyí, ké wa pòìn ma ɖé Kénà Toɖo-ɓòɖòɔ̀ kɔ̃ dú, ɓɛ́ wa kéɛ ma to kɔ̃ kpa. Wa cɛ̃ɛ ma, ké wa ɖá, “À ɖǎ ti dyé, ɓɛ́ à kéá ɓóɖó ɓɛ́ Bounɓoɔ̀ ɖáìn ma kà à nyɛ́nɛ́ín nyɛɛ kɔ̃ mu. À ɖǎa dyéɖéi hwɔ̀ìn kà à ɖǎ nàmàǔn nyuɛ.”

⁴¹ Kɛɛ Mózè cɛ̃ɛ ma wa gbo, ké ɔ ɖá, “Ɖɛ́ kɔ̃̀ jè ɓě nìà Bounɓoɔ̀ wuɖuɔ̀ mú jaɖauń ɖeɛ́? Ɖɛ ɓě nìà nyuɛń nyɛɛ se ɓě kpáná ɖò dyí nyuɛ́ mu.

⁴² Ɓě ɓɔ́ toɔ̀ kpaa pídyi, ɓěǐn kɔ̃̀ ɖà ɓěɛ̀ mú-nyɛ́-nyɔ̀ ɓěɔ̀ dyúa dyi kpá, sepóɛɖé Bounɓoɔ̀ se ɓó ɓě gbo nì.

⁴³ Ɓě dyi Àmáɖɛ̀-nyɔ̀ ɓěɔ̀ kè Kénà-nyɔ̀ ɓěɔ̀ gbo vɔ̃ ní, ɓě mu waà gàsíàɔ̀ dyúa sèìn, sepóɛɖé Bounɓoɔ̀ se ɓó ɓě gbo nì. Ɓě ɖǎ Bounɓoɔ̀ kɔ̃ín pòìn, ké ɓě se ɔ kíɖíí síɛń nì ɖe.”

⁴⁴ Kɛɛ wa jìnìɛ̀n ma kɔ̃, ɓɛ́ wa ké ma ɖé Kénà Toɖo-ɓòɖòɔ̀ kɔ̃ mu wɛ̃́ɛ́, kɛbì Bounɓoɔ̀ gma-gbɔ̀ɖɔ̀ɔ̀ mɔɔ Mózè mɛ se ma wa dyúa zi sɔ̀ìn ɖé jàɖàìn-hwɔ̀ɖɔ̀ɔ̀ múɛ.

⁴⁵ Púɛɛ, Àmáɖɛ̀-nyɔ̀ ɓěɔ̀ kè Kénà-nyɔ̀ ɓě ɓɛ́ wa cĩ́ ma kà ɖé toɖo-ɓòɖòɔ̀ kɔ̃ɛɛ dyi ma wa wɔ̃, ké wa ɖu ma Éézùɖùɛ̀-nyɔ̀ ɓěɔ̀ toún. Wa gã̀ ma wa kíɖíí kpáuń dyi tee, ké wa nyini ma ɖé Hɔ́mà-hwɔ̀ɖɔ̀ɔ̀ mú.