Nɔ̀ɓà 13 - Ɓǎsɔ́ɔ̀ Báɓòɔ̀

Dyéɖé-dyi-kpaìn-nyɔ̀ ɓě jè

¹ Wé ɖòɛ̀ ɓaɖaa, Bounɓoɔ̀ cɛ̃ɛ ma Mózè gbo, ké ɔ ɖá,

² “Ɖoɓo gàa ɖíɛ́ ɓě, ɓɛ́ wa ké Kénà-ɓòɖòɔ̀ dyéɖé gboi kpaìn. Ɔ mɔ̀ ɓóɖó ɓɛ́ ḿ nìà Éézùɖùɛ̀-dyù ɓěɔ̀ nyíɛń nyɛ. M̀ mɛ gã gàa ɖò-ɖò sɔ̀ìn ɖé wa ɓǎ ɓěɛ̀ xwéɖé-dù ɖò-ɖò ɓěɔ̀ mú, ɓɛ́ m̀ ké wa ɖoɓo. Ɔ mɛ mɔ̀ nyɔ ɓɛ́ ɔ mɔ̀ ɔ nììn xwéɖé-dùɔ̀ nyɔ vɛ̀nɛ̀ ɓěɔ̀ ɖò kɛ.”

³ Ɔ jèɛɛ, Mózè ɖoɓo ma wa sɔ̀ìn ɖé Páwàɖàùn Gbǎùn-fúɖúáɔ̀ kɔ̃. Ɔ ɖoɓo ma gàa ɓě ɓɛ́ wa mɔ̀ ma xwéɖé-dù ɖò-ɖòɛ̀ nyɔ vɛ̀nɛ̀ kɛɛ dyììn ɖé kà Bounɓoɔ̀ nyuɛ ma kà cɛ̃ɛ kɛɛ mú.

⁴ Nyɔ ɓě ɓɛ́ ɔ ɖoɓo ma kàa kɛà kɛ̀. Nyɔ ɓɛ́ ɔ ɖoɓo ma sɔ̀ìn ɖé Wuɖuɓíín nììn xwéɖé-dùɔ̀ múɛɛ mɔ̀ Sàmúà ɓɛ́ ɔ mɔ̀ ma Zákùɛ̀ dyú-gàà kɛ.

⁵ Nyɔ ɓɛ́ ɔ ɖoɓo ma sɔ̀ìn ɖé Símìɔ̀ nììn xwéɖé-dùɔ̀ múɛɛ mɔ̀ Sáfà ɓɛ́ ɔ mɔ̀ ma Hówìɖìɛ̀ dyú-gàà kɛ.

⁶ Nyɔ ɓɛ́ ɔ ɖoɓo ma sɔ̀ìn ɖé Júɖà nììn xwéɖé-dùɔ̀ múɛɛ mɔ̀ Kéɖɛ̀ ɓɛ́ ɔ mɔ̀ ma Jɛ̀fúnɛ̀ɛ̀ dyú-gàà kɛ.

⁷ Nyɔ ɓɛ́ ɔ ɖoɓo ma sɔ̀ìn ɖé Ɛ́sàkà nììn xwéɖé-dùɔ̀ múɛɛ mɔ̀ Ígàò ɓɛ́ ɔ mɔ̀ ma Jòséɛ̀ dyú-gàà kɛ.

⁸ Nyɔ ɓɛ́ ɔ ɖoɓo ma sɔ̀ìn ɖé Ífèɖèìn nììn xwéɖé-dùɔ̀ múɛɛ mɔ̀ Hòséà ɓɛ́ ɔ mɔ̀ ma Núùnɛ̀ dyú-gàà kɛ.

⁹ Nyɔ ɓɛ́ ɔ ɖoɓo ma sɔ̀ìn ɖé Bɛ̃́címà nììn xwéɖé-dùɔ̀ múɛɛ mɔ̀ Páátì ɓɛ́ ɔ mɔ̀ ma Wáɖáfùɛ̀ dyú-gàà kɛ.

¹⁰ Nyɔ ɓɛ́ ɔ ɖoɓo ma sɔ̀ìn ɖé Zɛ́ɓíúɖɔ̀ùn nììn xwéɖé-dùɔ̀ múɛɛ mɔ̀ Gáɖìè ɓɛ́ ɔ mɔ̀ ma Sóɖìɛ̀ dyú-gàà kɛ.

¹¹ Nyɔ ɓɛ́ ɔ ɖoɓo ma sɔ̀ìn ɖé Mànásì mɔ̀à Jòséɛ̀ dyú-gààɔ̀ kɛɛ xwéɖé-dùɔ̀ múɛɛ mɔ̀ Gáɖì ɓɛ́ ɔ mɔ̀ ma Súsìɛ̀ dyú-gàà kɛ.

¹² Nyɔ ɓɛ́ ɔ ɖoɓo ma sɔ̀ìn ɖé Dɛ̃́ìn nììn xwéɖé-dùɔ̀ múɛɛ mɔ̀ Àmíè ɓɛ́ ɔ mɔ̀ ma Gàmáɖìɛ̀ dyú-gàà kɛ.

¹³ Nyɔ ɓɛ́ ɔ ɖoɓo ma sɔ̀ìn ɖé Ásè nììn xwéɖé-dùɔ̀ múɛɛ mɔ̀ Sɛ́fù ɓɛ́ ɔ mɔ̀ ma Makɔ́ɛ̀ dyú-gàà kɛ.

¹⁴ Nyɔ ɓɛ́ ɔ ɖoɓo ma sɔ̀ìn ɖé Náfátàɖì nììn xwéɖé-dùɔ̀ múɛɛ mɔ̀ Náɓì ɓɛ́ ɔ mɔ̀ ma Vósìɛ̀ dyú-gàà kɛ.

¹⁵ Nyɔ ɓɛ́ ɔ ɖoɓo ma sɔ̀ìn ɖé Gáà nììn xwéɖé-dùɔ̀ múɛɛ mɔ̀ Gèdyúò ɓɛ́ ɔ mɔ̀ ma Mácìɛ̀ dyú-gàà kɛ.

¹⁶ Nyɔ ɓěa mɔ̀ gàa ɓě ɓɛ́ Mózè ɖoɓo ma, ɓɛ́ wa ké ma ɓóɖóɔ̀ dyéɖé gboi kpaìn nyɛ. Mózè ɖáìn ma Hòséà mɔ̀à Núùnɛ̀ dyú-gààɔ̀ kɛɛ Jasúé.

¹⁷ Ti ɓɛ́ Mózè ɖoɓo ma kà wa, ɓɛ́ wa ké ma kà Kénà-ɓòɖòɔ̀ dyéɖé gboi kpaìn nyɛɛ, ɔ cɛ̃ɛ ma wa gbo, ké ɔ ɖá, “Ɓě zĩ̀ìn ɖé Nɛ́gà-ɓòɖòɔ̀ kɔ̃, ɓɛ́ ɓě ké ɖé Kénà Toɖo-ɓòɖòɔ̀ kɔ̃ mu,

¹⁸ ɓɛ́ ɓě ké kà ɓóɖóɔ̀ nyu nìɛ̀ kɛɛ dyé, ɓɛ́ ɓě kéɛ dyé kɛbì nyɔ ɓě cĩ́à ɖé ɓóɖóɔ̀ kɔ̃ɛɛ ku dyi mɔɔ kɛbì wa hwɛ̀ kpéí ní. Ɓě mɛ dyéɛ kɛbì wa vò dyí mɔɔ kɛbì wa se dyí vò ní.

¹⁹ Ɓě mɛ dyéɛ kɛbì ɓóɖó ɓɛ́ wa cĩ́à kɔ̃ɛɛ nɔ̀mɔ̀ dyíin mɔɔ kɛbì ɔ nyìnììn dyíin ní. Ɓě mɛ dyéɛ kɛbì hwɔɖɔ ɓě wa cĩ́à múɛɛ mɔ̀ jàɖàìn-hwɔ̀ɖɔ̀ ɓě pū mɔɔ kɛbì wa mɔ̀ hwɔɖɔ cɛ̃̀ìn gmɔ ɖei ní.

²⁰ Ɓě mɛ dyéɛ kɛbì ɓóɖóɔ̀ mɔ̀ ɓóɖó bã-bã mɔɔ kɛbì ɔ mɔ̀ ɓóɖó se bãa-ɓòɖòɛɛ ní. Ɓě mɛ dyéɛ kɛbì ɓóɖóɔ̀ ɓéɖé cu mɔɔ kɛbì ɔ se cu ɓéɖé ní. Ɓě mɛ vɔ̃ wɛ̃́ɛ́, ɓɛ́ ɓě ké ɖɛ ɓě bã ɖé ɓóɖóɔ̀ kɔ̃ɛɛ ɖò dyà.” Ɓó tia ɓaɖaa, ɔ mɔ̀ ma géɖéè ɓěɔ̀ bo-tìɔ̀ gbɔ-dè-dè.

²¹ Ké gàa ɓěɔ̀ mu ma, ké wa kpaìn ma ɓóɖóɔ̀ dyéɖé gboi sɔ̀ìn ɖé Zĩ́ìn Gbǎùn-fúɖúáɔ̀ kɔ̃ nyinià ɖé Wíɖíhò-hwɔ̀ɖɔ̀ ɓɛ́ ɔ nì ma ɖé Ɖíɓò-Hámà-hwɔ̀ɖɔ̀ɔ̀ wĩín nyɛɛ múɛ.

²² Wa mùìn ma ɖé Nɛ́gà-ɓòɖòɔ̀ kɔ̃, ké wa dyììn ma ɖé Hɛ́bɔ̀nɔ̀-hwɔ̀ɖɔ̀ɔ̀ mú. Àhímà kè Sésàì ɔ kè Táámàì ɓɛ́ wa mɔ̀ ma Ánàkìɛ̀ dyú-gàà ɓěɛɛ nì ma ɖé. Wa dè ma Hɛ́bɔ̀nɔ̀-hwɔ̀ɖɔ̀ɔ̀, ké ɔ zĩ̀ìn ma zɔ̃ mɛ̀nɛ̌ìn-sɔ̃́ hwɛ̀ ké wa dè ma Zóàùn-hwɔ̀ɖɔ̀ ɓɛ́ ɔ nì ma ɖé Íjè-ɓòɖòɔ̀ kɔ̃ɛ.

²³ Ké Éézùɖùɛ̀-gàà ɓěɔ̀ nyini ma ɖé Ɛ́kò Bɔɔ-kpàɔ̀ kɔ̃, ké wa kpã́ ma géɖéè-hwàɖà ɖò ɖé géɖéè-gbǎ ɖò nì ɖéɛɛ mú, ké wa poɛ ma cu hwòɖǒ kɔ̃, ké gàa ɓěɔ̀ sɔ̃́ ɓéɖéɛ̀n ma kɔún. Ké wa dyà ma pɔ́mɛ́gàɖànɛ̀-ɓò kè féè-ɓò ɖíɛ́ ɓě ɖekè.

²⁴ Géɖéè-hwàɖà vɛ̀nɛ̀ ɓɛ́ Éézùɖùɛ̀-gàà ɓěɔ̀ kpã́ ma kà ɓó bɔɔ-kpàɔ̀ kɔ̃ɛ jèɛɛ, wa jǔìn ma bɔɔ-kpàɔ̀ Ɛ́kò-nyɛ̀nɛ̀ kɔ̃̀ xwíníín mɔ̀à géɖéè-hwàɖà vɛ̀nɛ̀ kɛ.

²⁵ Wa nyu ma ɖé ɓóɖóɔ̀ dyéɖé-gboi-kpaìn-naínɔ̀ wé kpáɖá-nyɔ sɔ̃́ hwɛ̀ ké wa kɔ́ìn ma ɖe.

²⁶ Ké wa dyi ma ɖé Mózè kè Eɖóún ɔ kè Éézùɖùɛ̀-nyɔ̀ séín ɓěɔ̀ gbo ɖe, ɖé Páwàɖàùn Gbǎùn-fúɖúáɔ̀ kɔ̃, ɖé Káɖɛ̀-hwɔ̀ɖɔ̀ɔ̀ mú. Ké wa dyà ma Mózè kè Eɖóún ɔ kè Éézùɖùɛ̀-nyɔ̀ ɓěɔ̀ wuɖu gbo ɖe. Ké ɓó kɔ̃in ɖeɛɛ, wa tɛ̀mɛ̀ìn ma ɓáá-ɖɛ̀ ɓě bã ma ɖé ɓóɖóɔ̀ kɔ̃ɛɛ ɓo ɓě ɓɛ́ wa dyà ma kà kɛɛ nyɔ ɓěɔ̀ dyí.

²⁷ Wa cɛ̃ɛ ma Mózè gbo, ké wa ɖá, “À mu ma ɖé ɓóɖó kɔ̃̀ kɔ̃ m̀ ɖoɓo ma kà à kɛɛ ní. Ɓóɖóɔ̀ zi bãuń mìɔ. Gmɔ̀ nɔ̄, kà ɓáá-ɖɛ̀ ɓě nì ɖéɛɛ tòɖòò-ɓò ɖíɛ́ ɓě nìɛ.

²⁸ Kɛɛ nyɔ ɓě ɓɛ́ wa cĩ́à ɖé ɓóɖóɔ̀ kɔ̃ɛɛ ɓéɖé gana mìɔ. Ké waà hwɔɖɔ ɓěɔ̀ cɛ̃̀ìn gmɔ ɖei, ké wa mɔ̀ hwɔɖɔ vɛ̀nɛ̀-vɛ̀nɛ̀. Ké ɓó kɔ̃in ɖeɛɛ, à dyé ɖé Ánàkìɛ̀ xwíníín-dyù ɓě ɖekè.

²⁹ Àmáɖɛ̀-nyɔ̀ ɓěɔ̀ cĩ́ ɖé Nɛ́gà-ɓòɖòɔ̀ mú. Ké Hítì-nyɔ̀ ɓěɔ̀ kè Jɛ́ɓù-nyɔ̀ ɓěɔ̀ ɔ kè Ámɔ̀-nyɔ̀ ɓěɔ̀ cĩ́ ɖé Toɖo-ɓòɖòɔ̀ kɔ̃. Ké Kénà-nyɔ̀ ɓěɔ̀ cĩ́ ɖé dyóóɔ̀ wĩín ɔ kè ɖé Jɔ́nì-nìɔ̀ wĩín.”

³⁰ Púɛɛ, Kéɖɛ̀ po ma nyɔ ɓěɔ̀ ɓɔ́í ɓó Mózè dyúa, ké ɔ ɖá, “Ɓěà mu wàɖà, ɓɛ́ ɓěà ké ɓóɖóɔ̀ dyí ɖú, sepóɛɖé à ɓɛ́ìn kpé, ɓɛ́ à ké ɓóɖóɔ̀ toún ɖu.”

³¹ Kɛɛ gàa ɓě ɓɛ́ ɔ kè wa sɔ̀ ma kà ɓóɖóɔ̀ dyéɖé gboi kpaǐn nyɛɛ ɖá, “À se nyɔ ɓěɔ̀ to kɔ̃ kpaa ɓɛ́ìn, sepóɛɖé wa ku dyi, ké wa zi à dyí.”

³² Ké wa dyà Éézùɖùɛ̀-nyɔ̀ ɓěɔ̀ se-bɔ̃̀ gbo ɓá ɓóɖó ɓɛ́ wa sɔ̀ ma kà dyéɖé gboi kpaǐn nyɛɛ jè dyí. Wa cɛ̃ɛ ma, ké wa ɖá, “Ɓóɖó ɓɛ́ à sɔ̀à dyéɖé gboi kpaǐn nyɛɛ se ɖii-ɖɛ̀ ɓéɖé ɓɛ́ ɔ ké nyɔ ɓě cĩ́à ɖéɛɛ dyí ɓɛ́ìn dyɛ mɔ̀ùn, ké gàa séín ɓě ɓɛ́ à dyéà ɖé ɓóɖóɔ̀ kɔ̃ɛɛ mɔ̀ gàa gbosai saá-saá.

³³ Ké ɓó kɔ̃in ɖeɛɛ, à dyé ɖé Ánàkìɛ̀ xwíníín-dyù ɓě mɔ̀à gàa-zà-nyɔ̀ gbosai ɓěɛɛ ɖekè. À ɓíè ma kɔ̃in, ké à nì kà kpã̌ùn nìà kɛɛ ɓó wa dyúa, ké wa gmɔ̀ ma à kɔ̃ kà kpã̌ùn nìà kɛ.”