Nɔ̀ɓà 12 - Ɓǎsɔ́ɔ̀ Báɓòɔ̀

Gèɖèpɔ́ɔ̀ tò Méwìɖìàùn gǎ kɔ̃

¹ Ti ɓɛ́ Éézùɖùɛ̀-nyɔ̀ ɓěɔ̀ nìà ɖé Hàzéwòɖò-pàɔ̀ múɛɛ, Méwìɖìàùn kè Eɖóún ɖú ma Mózè ɖei wùɖùìn kpàǐ, sepóɛɖé Mózè ɖǎ ma Kúsì-màà ɖò dyi kpɔ̃ jè.

² Wa nìɛ̀ ma cɛ̃iń, ké wa ɖá, “Mózè ɖòùn mɔ̀ nyɔ Bounɓoɔ̀ wùɖùìn mú cáe? Ɔ séè à mɔ̀ùn mú wùɖùìn ɖò ɖekèè?” Ké Bounɓoɔ̀ wɔ̃́ ɖɛ wa cɛ̃ ma kàa ní.

³ Ɔ nì ná kɛɛ, Mózè mɔ̀ nyɔ ɓɛ́ ɔ dyà ma ɔ mìɔùn ɓíɖíi mìɔ, ɓɛ́ ɔ zi nyɔ séín nì ɓóɖó-kpàà kɔ̃ɛɛ dyíɛ.

⁴ Wàɖà cáa, Bounɓoɔ̀ cɛ̃ɛ ma Mózè kè Eɖóún ɔ kè Méwìɖìàùn gbo, ké ɔ ɖá, “Ɓě mɔ̀ nyɔ tã ɓěɔ̀ mɛ mu ɖé jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ dyéàìn nyɛɛ dyúa.” Ké wa nyɔ tãɔ̀ mu ma ɖé.

⁵ Ké Bounɓoɔ̀ dyi ma ɓíɖíi ɖé ní-kpòɔ̀ mú, ké ɔ nyànà ɓó jàɖàìn-gbòɔ̀ wĩín dyi, ké ɔ ɖá ma Eɖóún kè Méwìɖìàùn. Ké wa nyɔ sɔ̃́ɔ̀ dyi ma ɓó ɔ dyúa.

⁶ Ké Bounɓoɔ̀ ɖá, “Ɓě tò ḿ gbo ɖùǔ. Kpáá-ɖɛ̀-cɛ̃-nyɔ̀ ɖò dyi ɖé ɓě hwìɛ̀ nìǐn, mɔ̄ Bounɓoɔ̀ mɔ̀ nyɔ tɛ̀mɛ̀ìn ḿ mìɔùn ɔ dyí ɖé dyí-tɛ̀mɛ̀ìn-ɖɛ̀ mú, ké ḿ kè ɔ dè dɔ́ɔ́ ɖé dya-dya mú.

⁷ Kɛɛ ní gbo-nì-nyɔ̀ Mózè mɔ̀ùn jè kò ní. Ḿ nyu ɔ ní nyɔ séín ɓěɔ̀ wuɖuí-kɔ̃̀-nyɔ̀ mú.

⁸ Ḿ kè ɔ gmɔìn dya cá, ké à dè dɔ́ɔ́ wáɖáá, ké ɔ se ɖé nɔ́ɔ́ kàmà múin wɔ̃́uń wɛ̃ɛ mú. Ɔ ɖǎ kà mɔ̄ Bounɓoɔ̀ nyu nìɛ̀ kɛɛ dyé. Kà ɔ nìà náa, nìí, ɖɛ́ kɔ̃̀ jè ɓě seà fɛ̃̀ìn, ɓɛ́ ɓě dyià ní gbo-nì-nyɔ̀ Mózè ɖei wùɖùɛ̌n nì cá kɛ́?”

⁹ Ké Bounɓoɔ̀ kpáìn ma wa dyoɖoún mìɔ, ké ɔ mu ma ɖe.

¹⁰ Ti ɓɛ́ ní-kpòɔ̀ ɖǎ ma ɓó jàɖàìn-gbòɔ̀ kɔ̃in sɔ̀ nyɛ̀nɛ̀ɛ̀ kɛɛ, púɛɛ, caà kpɔ̃ ma Méwìɖìàùn, ké ɔ nyuɛ ké ɔ dyɔɔ̀-kùɔ̀ nì ma púú-púú múin. Ti Eɖóún gmɔ̀ìn ma ɖé Méwìɖìàùn gboɛɛ, púɛɛ, ɔ dyéɛ ma kà caà ɖǎ ɔ kpɔ̃ kɛ.

¹¹ Hwɛ̀ ké Eɖóún cɛ̃ɛ ma Mózè gbo, ké ɔ ɖá, “Ɓɔ̌ɔ̀, ɓɔ́ à gǎ kɔ̃ tòɛ̀ ɓó zuɖuu-nàmàǔn ɓɛ́ à ɖǎà nyuɛɛ jè.

¹² Méwìɖìàùn mɛ ɓɔ́ nìɛ̀ kà nyɔ ɓɛ́ ɔ mɛ́ìn ɖé ɔ ɖe xwíníín, ɓɛ́ ɔ dyi zɔ̃̌ɔ táà hwɛ̀ ɓɛ́ ɔ dyi wóɖóɛɛ nìà kɛ.”

¹³ Ké Mózè pòìn ma Bounɓoɔ̀ kpéi, ké ɔ ɖá, “Óó Bounɓo, kánáìn Méwìɖìàùn dyi, ní ɓaà m̀ ní.”

¹⁴ Kɛɛ Bounɓoɔ̀ cɛ̃ɛ ma Mózè gbo, ké ɔ ɖá, “Ɔ jǔ ké ɔ ɓǎ dyiɔ́ má ɔ tɔ̃ɔ dyúa po ní, má, dɛ̃ muɔ́ má ɔ nyuùn tee ɓó wé mɛ̀nɛ̌ìn-sɔ̃́ xwínííne? Ɔ ná nì jèɛɛ, ɓě kpa ɔ ɖé jàɖàìn-hwɔ̀ɖɔ̀ɔ̀ ɖeín, ɓɛ́ ɔ ɖòùn ké ɖé nì ɓó wé mɛ̀nɛ̌ìn-sɔ̃́ xwíníín, hwɛ̀ ɓɛ́ ɓě ké ɔ hwɔɖɔɔ̀ mú ɖe dyà.”

¹⁵ Ɔ jèɛɛ, wa kpa ma Méwìɖìàùn ɖé jàɖàìn-hwɔ̀ɖɔ̀ɔ̀ ɖeín, ké ɔ nyu ma ɖé wé mɛ̀nɛ̌ìn-sɔ̃́. Nyɔ ɓěɔ̀ se ma nà-hwìè kɔ̃ kpá ɖe, ɔ sèìn ké Méwìɖìàùn dyi ma ɖe hwɛ̀.

¹⁶ Sɔ̀ìn ɓóɛ gboɛɛ, nyɔ ɓěɔ̀ sɔ̀ ma ɖé Hàzéwòɖò-pàɔ̀ mú dyí, ké wa mu tee ké wa nyànàìn waà jàɖàìn-gbò ɓěɔ̀ dyi ɖé Páwàɖàùn Gbǎùn-fúɖúáɔ̀ kɔ̃.