Nɔ̀ɓà 11 - Ɓǎsɔ́ɔ̀ Báɓòɔ̀

Pá ɖò kɔ̃̀ nyɛ́nɛ́ mɔ̀ Tàbéwàɖà kɛɛ jè

¹ Wé ɖòɛ̀ ɓaɖaa, Éézùɖùɛ̀-nyɔ̀ ɓěɔ̀ ɖú ma ka kpàǐ ɓó gǎ-ɖɛ̀ ɓě ɓɛ́ wa nì dyí dyéɛń nyɛɛ jè, ké Bounɓoɔ̀ wɔ̃́ ma waà ka-wùɖùɔ̀, ké ɔ kpá ma dyoɖoún mìɔ. Ké nyɛ sɔ̀ ma ɖé Bounɓoɔ̀ gboɛɛ ɖú ma wã kpàǐ ɖé wa hwìɛ̀, ké ɔ fɔ̃ ma jàɖàìn-hwɔ̀ɖɔ̀ɔ̀ wáká hwɔ ma ɖé kpóó-gbìǐ dyíɛ.

² Púɛɛ, nyɔ ɓěɔ̀ ɖú ma Mózè kpé dyai pòìn kpàǐ. Ké Mózè ɓaà ma Bounɓoɔ̀, ké nyɛɔ̀ mɔ́ ma.

³ Ɔ jèɛɛ, wa jǔìn ma páɔ̀ Tàbéwàɖà-nyɛ̀nɛ̀ kɔ̃̀ xwíníín mɔ̀ nyɛ nì wãuń wɛ̃, sepóɛɖé Bounɓoɔ̀ nyɛɔ̀ kpɔ̃ ma dyí ɖé nyɔ ɓěɔ̀ hwìɛ̀.

Mózè gã nyɔ-kpò kpáɖá-nyɔ tã ɓaɖa-bùè ɓɛ́ wa ké nyɔ ɓěɔ̀ wuɖuí kɔ̃̀

⁴ Wé ɖòɛ̀ ɓaɖaa, ɓóɖó-dù kà kò ɖòɛ̀ nyɔ ɓě nì ma Éézùɖùɛ̀-nyɔ̀ ɓěɔ̀ hwìɛ̀, ké suaɖɛ̀-tà-tò nì ma wa nyuɛń xwéé. Ké Éézùɖùɛ̀-nyɔ̀ ɓěɔ̀ ɖú ma ka kpàǐ ɖekè, ké wa ɖá, “Nyɛ́ ɖá à dyéɔ́ suaɖɛ̀ wè, ɓɛ́ à kéɔ́ tà kɛ́?

⁵ Ti ɓɛ́ à nì ma kà ɖé Íjè-ɓòɖòɔ̀ kɔ̃ɛɛ, à ɖi ma zimii jĩ̀ kà à hwòɖǒ mɔ́ɛ, ké à seɛ ɖɛ ɖò dyí pɛ́ɛ̀. Ké à ɖi ma ɖé kpɛ̀ɖɛ̀-kpɔ̀ kè mɛ́ɖɛ̀ìn kè kíì kò-kò ɓě ɔ kè gáɖè jĩ̀ kà à mɔ́ɛ.

⁶ Kɛɛ dyéɛ, ɓó kàǔn wɛ̃ɛ, kpé ɖǎ à dyí hwɛ̀, ké ɖɛ kà kò ɖò se nì ɖe ɓɛ́ à ké ɖi, ɔ sèìn mánà nìà kɛ ɖòùn à ɓéɖé à ké ɖi kánáá pū.”

⁷ Mánàɔ̀ kè ɓáá-ɖɛ̀-dyùà mɛ́nɛ́ɛ́ hwɔìn ní. Ɔ ɓéɖé ɖaa-cànà-dyèɖè ɖàɓàìn púú nìɛ̀ kɛ.

^8-9 Dunuɔ̀ dyi jàɖàìn-hwɔ̀ɖɔ̀ɔ̀ kɔ̃ ɓùɖùìn ɓó máaún ní, ɔ mɔ̀ ti mánàɔ̀ wáɖá. Nyɔ ɓěɔ̀ mu, ké wa cɛ̃́ɛ. Ké wa ɖuɛ pù-ɓóɖó, mɔɔ ké wa sũ̀ɛ̀n sɔ́ɔ́ kɔ̃ ké ɔ nyu pù-ɓóɖó. Ké wa pĩɛ, ké wa nyuɛ kpo mɛ́nɛ́ɛ́ ɓě mú. M̀ dyiɔ́ɔ wɔ̃ dɔ̃̌ ní, ɔ nì kà bɛɖɛɛ̀ ɓɛ́ wa nyùìn cáná kɛɛ nìà kɛ.

¹⁰ Ti ɓɛ́ Éézùɖùɛ̀-nyɔ̀ ɓěɔ̀ gbǒ-xwíníín ɖò-ɖò nì ma kauń wɛ̃ɛ, wa nyanaìn ma ɓó waà jàɖàìn-gbò ɓěɔ̀ wĩín dyi, ké Mózè wɔ̃́ ma wa ka-wùɖùɔ̀. Ké Bounɓoɔ̀ kpá ma dyoɖoún mìɔ. Púɛɛ, Mózè hwòɖǒ kpá ma ɖé ɖei.

¹¹ Ké Mózè diè ma Bounɓoɔ̀ dyi, ké ɔ ɖá, “Ɖɛ́ kɔ̃̀ jè m̀ dyàà mɔ̄ mɔ̀à nì gbo-nì-nyɔ̀ɛɛ fũ̀à-fṹá nìà kɛ kɔ̃ kɛ́? Ɖɛ́ kɔ̃̀ jè nì hwòɖǒ seà ḿ múin dèìn, ɓɛ́ m̀ dyià nyɔ séín ɓěɛ̀ gbɛ̌ɔ̀ ḿ dú dè kɛ́?

¹² Mɔ̄ mɔ̀ nyɔ se nyɔ ɓěɛ̀ mɛ, mɔɔ ké mɔ̄ seɛ nyu ɓɛ́ wa ké ɖé wa ɖe xwíníín wóɖó. Kà ɔ nìà náa, nìí, ɖɛ́ kɔ̃̀ jè nì mɔ́ ɓɛ́ ḿ kéà wa ɓéɖé kà nyɔ kéɔ́ kà nyáá-dyù-pɛ̀ɖɛ̀ɛ̀ ɓéɖéɛ, ɓɛ́ ḿ kéà wa ɓóɖó ɓɛ́ m̀ ɖáìn zɔ̃̌ɔ̀ kà wa ɓǎ ɓěɔ̀ nyɛ́nɛ́ín nyɛɛ kɔ̃ kpa kɛ́?

¹³ Dɛ̌ ní mu suaɖɛ̀ zàùn, ɓɛ́ ḿ kéɛ nyɔ séín ɓěɛ̀ nyíɛ́? Wa nì ḿ kpé dyi pòɛ̌n, ké wa ɖá, ‘Nyí à suaɖɛ̀, ɓɛ́ à kéɛ tà.’

¹⁴ Ḿ ɖòǔn se nyɔ séín ɓěɛ̀ nàìn ɓɛ́ìn. Ɔ kàmà mú mìɔ ɓó ḿ bìì.

¹⁵ Ɔ jǔ ké m̀ dyi ḿ ɖɛ nì kàà bũ̌ nyuɛ́ mu ní, ɖáɓá ḿ nɔ̀ɔ̀, ɓɛ́ mɔ́ún kɔ̃̀ ɖà fũ̀à-fṹá-ɖɛ̀ nìà kɛ dyí dyé ɖe.”

¹⁶ Ké Bounɓoɔ̀ cɛ̃ɛ ma Mózè gbo, ké ɔ ɖá, “Poìn ḿ bìì gàa kpáɖá-nyɔ tã ɓaɖa-bùè dyí sɔ̀ìn ɖé Éézùɖùɛ̀-nyɔ̀ vɛ̀nɛ̀ ɓěɔ̀ hwìɛ̀. Wa mɛ mɔ̀ nyɔ ɓě ɓɛ́ m̀ dyuò dyí kĩ́ín kà wa mɔ̀ nyɔ ɓěɔ̀ nyɔ vɛ̀nɛ̀ kè wa wuɖuí-kɔ̃̀-nyɔ̀ɛ. Ké m̀ mɛ dyà wa ɓó jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ dyéàìn nyɛɛ dyúa, ɓɛ́ wa ké ɓó m̀ wáún dyi nyànà.

¹⁷ Ɔ ɖǎ ná nìǐn, ní mu dyiìn, ɓɛ́ ḿ kè mɔ̀ ké wùɖù, ɓɛ́ ḿ ké ní Zùù nìà ɖé m̀ múɛɛ ɖò ɖé wa mú po, nìí ɓɛ́ m̀ kè wa ké nyɔ ɓěɔ̀ nàìn, ɓɛ́ ɔ ké se m̀ ɖòùn jǔ ɖe.

¹⁸ Ɓó kɔ̃in ɖeɛɛ, cɛ̃ɛ nyɔ ɓěɔ̀ gbo, ɓɛ́ m̀ ké níiń, ‘Ɓě po ɓě mìɔùn wáká, ɓɛ́ ɓě ké mú hwɛ̀, ké ɓó gàɖàà ní, ɓě muɔ̀ suaɖɛ̀ tàùn, sepóɛɖé Bounɓoɔ̀ ɖǎ ɓěɛ̀ ka-wùɖùɔ̀ wɔ̃́. Ɓě cɛ̃ɛ, ké ɓě ɖá, “Nyɛ́ mu à suaɖɛ̀ nyíìn nyɛ́? Ti à nì ma ɖé Íjè-ɓòɖòɔ̀ kɔ̃ɛɛ, má, ɖɛ séín nì ma páún ɓó à bììe?” Ɓě ɖá ná jèɛɛ, Bounɓoɔ̀ muɔ̀ ɓě suaɖɛ̀ nyíìn, ɓɛ́ ɓě kéɛ tà.

¹⁹ Ɓě seɛ ɖiɛ́ mu pū ɓó wé dyúáɖò xwíníín, hwɛ̀ ḿ po níiń, wé sɔ̃́ mɔɔ wé hm̀m̌ mɔɔ wé ɓaɖa-bùè mɔɔ wé kpáɖá-nyɔ xwíníín ɖòùn pū,

²⁰ kɛɛ ɓě muɛ ɖiìn ɓó dɛ̀nɛ̀ gàná xwíníín, ɓɛ́ ɔ ké ɓěɛ̀ máná-ɓì ɓěɔ̀ mú dyi wóɖóìn, ɓɛ́ ɔ ké ɓě dyi nyàìn hwɛ̀, sepóɛɖé ɓě ɖǎ Bounɓo mɔ̀ nyɔ nìà ɓě hwìɛ̀ kɛɛ ɓɔ́, ké ɓě nì kauń ɓó ɔ dyúa. Ɓě nìɛ̀ cɛ̃iń, ké ɓě ɖá, “Ɖɛ́ kɔ̃̀ jè à sɔ̀à ɖé Íjè-ɓòɖòɔ̀ kɔ̃ɛ́?” ’ ”

²¹ Kɛɛ Mózè cɛ̃ɛ ma Bounɓoɔ̀ gbo, ké ɔ ɖá, “Dyéɛ, nyɔ ɓě kɔ̃̀ hwìɛ̀ ɓɛ́ ḿ nìà kɛɛ mɔ̀ gàa táázĩ̀ìn hɔ̃dɛ̀ɖɛ̀ mɛ̀nɛ̌ìn-ɖò. Ké m̀ cɛ̃ɛ kà nì mu wa suaɖɛ̀ nyíìn, ɓɛ́ wa kéɛ tà ɓó dɛ̀nɛ̀ gàná xwíníín nyɛ.

²² Nyɛ́ ɓɛ́ìn ɓáɖáá kè ɓìɖǐ jĩ̀ náa ɖáɓáa, ɓɛ́ ɔ ké nyɔ ɓěɔ̀ hwòɖǒ dyi dèɛ́? Kɛbì wa mɛ poìn má zimii séín nì dyóóɔ̀ kɔ̃ɛ dyíɛɛ, ɔ ɓɛ́ìn waà hwòɖǒ dyi dèɛ̀e?”

²³ Ké Bounɓoɔ̀ cɛ̃ɛ ma Mózè gbo, ké ɔ ɖá, “Nì hwòɖǒ ɖá mɔ̄ Bounɓoɔ̀ ní sɔ̃ xwã́ níe? Ɓó kàǔn wɛ̃ɛ, nì muɛ dyéìn kɛbì ní wuɖuɔ̀ mɔ̀ jǎà mɔɔ ɔ se jǎà ní.”

²⁴ Ɔ jèɛɛ, Mózè mu ma, ké ɔ cɛ̃ ɖɛ ɓě ɓɛ́ Bounɓoɔ̀ cɛ̃ ma kàa nyɔ ɓěɔ̀ gbo, ké ɔ poìn ma gàa kpáɖá-nyɔ tã ɓaɖa-bùè dyí sɔ̀ìn ɖé nyɔ vɛ̀nɛ̀ ɓěɔ̀ hwìɛ̀, ké ɔ nyànàìn ma wa Bounɓoɔ̀ jàɖàìn-gbòɔ̀ ɖei.

²⁵ Hwɛ̀ ké Bounɓoɔ̀ dyi ma ɓíɖíi ɖé ní-kpòɔ̀ mú, ké ɔ ɖú ɔ Zùù nìà ɖé Mózè múɛɛ ɖò dyí, ké ɔ poɛ nyɔ vɛ̀nɛ̀ kpáɖá-nyɔ tã ɓaɖa-bùè ɓěɔ̀ mú. Ké ti ɓɛ́ Zùùɔ̀ dyi ma wa kɔ̃ɛɛ, wa ɖú ma zùù ɓuɖu kpàǐ. Kɛɛ sɔ̀ìn ɓóɛ gboɛɛ, wa seɛ náa nyu ɖe.

²⁶ Ɓó tia ɓaɖaa, Éézùɖùɛ̀-nyɔ̀ vɛ̀nɛ̀ kpáɖá-nyɔ tã ɓaɖa-bùè ɓɛ́ Mózè gã ma kà kɛɛ sɔ̃́ se ma ɓó Bounɓoɔ̀ jàɖàìn-gbòɔ̀ gbo mu. Wa gã̀ ma ɖé jàɖàìn-hwɔ̀ɖɔ̀ɔ̀ mú dyi. Kɛɛ Gèɖèpɔ́ɔ̀ Zùùɔ̀ dyi ma wa mɔ̀ùn kɔ̃ ɖekè, ké wa ɖú ma zùù ɓuɖu kpàǐ. Wa ɖòɛ̀ nyɛ́nɛ́ mɔ̀ Ɛ́ɖàɖì, ké nyɔ tɔ̀ɔ̀ nyɛ́nɛ́ mɔ̀ Mɛ́ɖà.

²⁷ Ké gàa-dyù gmɔ̀ ɖò kpa ma peɖeɛ, ké ɔ cɛ̃ɛ ma Mózè gbo, ké ɔ ɖá, “Ɛ́ɖàɖì kè Mɛ́ɖà nì zùù ɓuɖuɛń ɖé jàɖàìn-hwɔ̀ɖɔ̀ɔ̀ múo.”

²⁸ Ké Jasúé ɓɛ́ ɔ mɔ̀ ma Núùnɛ̀ dyú-gàà, ɓɛ́ ɔ mɔ̀ ma Mózèɛ̀ sɔ̃-xwíɖíi-dè-nyɔ̀ sɔ̀ìn ɖé ɔ nyɔ-gmɔ̀-tìǐn nyɛɛ cɛ̃ɛ ma Mózè gbo, ké ɔ ɖá, “Ɓɔ̌ɔ̀, po wa ɓɔ́í.”

²⁹ Kɛɛ Mózè cɛ̃ɛ ma ɔ gbo, ké ɔ ɖá, “Hwɛ̀nɛ̌ nyu m̀ ní ɓó ní jèè? Nyɛ́ ɖá Bounɓoɔ̀ poɔ́ má ɔ Zùùɔ̀ ɔ nyɔ séín ɓěɔ̀ kɔ̃, ké wa mɔ̀ɔ̌ má kpáá-ɖɛ̀-cɛ̃-nyɔ̀ kɛ́?”

³⁰ Ké Mózè kè Éézùɖùɛ̀-nyɔ̀ ɓěɔ̀ nyɔ vɛ̀nɛ̀ ɓěɔ̀ mu ma ɖé jàɖàìn-hwɔ̀ɖɔ̀ɔ̀ mú ɖe.

Bounɓoɔ̀ tò gbɔ̌ɔ̀

³¹ Sɔ̀ìn ɓóɛ gboɛɛ, Bounɓoɔ̀ nyuɛ ké pìɔ̌ ɖò dyi ma. Ké pìɔ̌ɔ̀ dyà ma gbɔ̌ɔ̀ sɔ̀ìn ɖé dyóóɔ̀ kɔ̃, ké wa wáɖá ma ɓó jàɖàìn-hwɔ̀ɖɔ̀ɔ̀ ɖei. Wa xwɛ̃́ìn ma ɓíɖíi dyi mìɔ cá. Kà naà ɓěɔ̀ kè ɓóɖó-kpàɔ̀ nyu ma gboi cɛ̃ìn nyɛɛ mɔ̀ ɓáɖáa ɓɛ́ìn-hwìɛ̀. Ké naà-gbǎɔ̀ ɓúá ma wĩín dyi mìɔ jèɛɛ, nyɔ ɓɛ́ìn wé sɔ̃́ dyí ɖúɛ ɓóɛ múin nà jè, hwɛ̀ ké nyɔ cɛ̃ɛ kpó.

³² Ké nyɔ ɓěɔ̀ sɔ̀ ma dyí, ké wa gã̀ ma naà ɓěɔ̀ kpɔ̃uń dyi tee ɓó wé gànáɔ̀ xwíníín kè máaún-hwùɖù gànáɔ̀ mú, hwɛ̀ ḿ po níiń, wéɔ̀ nyɔ kɔ ɓó dyíɛ. Nyɔ mɔ̀ nyɔ ɓɛ́ ɔ se ma naàɔ̀ ɓáún-ɓáún kpɔ̃ɛɛ ní, ɔ kpɔ̃ ma ɓɔ̀ɔ̌-wè kpáɖá-nyɔ ɓaɖa-bùè. Ké wa po ma naà ɓěɔ̀ dyóɖóún ɖé jàɖàìn-hwɔ̀ɖɔ̀ɔ̀ dà séín.

³³ Kɛɛ suaɖɛ̀ɔ̀ gã̀ ma wa wĩín dyi, ké Bounɓoɔ̀ kpáìn ma wa dyoɖoún mìɔ, ké ɔ dyà ma wa wɛ́ nyìnììn dyíin ɖò kɔ̃, ké ɔ ɖáɓá ma waà nyɔ ɓáún-ɓáún.

³⁴ Ɔ jèɛɛ, wa ɖáìn ma páɔ̀ Kíwòɖò-Hàtáávà kɔ̃̀ xwíníín mɔ̀à ɖɛ ɖòɛ̀ tó-kù-toɖoún wɛ̃, sepóɛɖé ɓóɛ̀ wa zàìn ma nyɔ ɓě ɓɛ́ suaɖɛ̀-tà-tò nyu ma kà mìɔ kɛɛ xwɛ́ ɓěɔ̀ dyóɖóún.

³⁵ Hwɛ̀ ké nyɔ ɓěɔ̀ sɔ̀ ma ɓó Kíwòɖò-Hàtáávà-pàɔ̀ mú dyí, ké wa mu ma ɖé Hàzéwòɖò-pàɔ̀ mú, ké ɖéɛ̀ wa nì ma.