Nɔ̀ɓà 10 - Ɓǎsɔ́ɔ̀ Báɓòɔ̀

Séɓàɖà-gã̀à ɓě jè

¹ Ɓó tia ɓaɖaa, Bounɓoɔ̀ cɛ̃ɛ ma Mózè gbo, ké ɔ ɖá,

² “Nyu gã̀à sɔ̃́ ɓɛ́ wa mɔ̀ séɓàɖà ɓaɖa-ɓaɖa kɛ. Wa mɛ mɔ̀ nyɔ ɓěɔ̀ ɖáìn-gã̀à kè nyɔ ɓěɔ̀ bɔ̃̌ǔn-pòìn-ɖɛ̀ ti ɓɛ́ ɔ mɔ̀ǎ ti ɓɛ́ wa kéá daí sɔ̀ìn nyɛ.

³ Ti ɓɛ́ gã̀à sɔ̃́ɔ̀ mu wúɖúùn wɛ̃ɛ, nìí, nyɔ séín mɛ poìn ɓó m̀ gbo dyí ɓó jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ dyéàìn nyɛɛ wĩín.

⁴ Kɛɛ ɔ jǔ ké gã̀à sɔ̃́ ɓěɔ̀ dyúáɖò nyɛ̀nɛ̀ɛ̀ mɔ̀ nyɔ dyi wúɖú ní, nìí, Éézùɖùɛ̀-dyù ɓěɔ̀ xwéɖé-dù ɖò-ɖò ɓěɔ̀ nyɔ vɛ̀nɛ̀ ɓěɔ̀ mɔ̀ nyɔ mɛ poìn dyí ɓó ḿ gbo.

⁵ Wa dyi gã̀à-wùɖù xwã́ ɓoún kĩ́ín-kĩ́ínɔ̀ ɓaɖa ní, ɔ mɔ̀ ti ɓɛ́ nyɔ ɓě kɔ̃̀ nììn jàɖàìn-gbò ɓě nìà ɖé dyóɖó-xwáɖáún-wóɖóìn-naínɔ̀ kɛɛ ké hwìè kɔ̃ kpá.

⁶ Ké ti wa mu gã̀à-wùɖù xwã́ ɓoúnɔ̀ sɔ̃́ nììnɔ̀ ɓaɖaùn wɛ̃ɛ, nìí, ɔ mɔ̀ ti ɓɛ́ nyɔ ɓě kɔ̃̀ nììn jàɖàìn-gbò ɓě nìà ɖé zɔ̃̌in-wàkáɔ̀ kɔ̃ɛɛ ké hwìè kɔ̃ kpá. Ti séín ɔ mɔ̀ǎ hwìè-kɔ̃-kpá-tìɛɛ, nìí, wa mɛ ɓaɖa gã̀à-wùɖù xwã́ ɓoún, ɓɛ́ ɔ ké nyɔ ɓěɔ̀ bɔ̃̌ǔn po.

⁷ Kɛɛ ɔ jǔ ké m̀ dyi mɔ́ ɓɛ́ nyɔ séín ɓěɔ̀ ké dyí poìn ní, wa mɛ ɓaɖa gã̀à-wùɖù zɛin ɖò. Ɔ mɛ ɓɔ́ gã̀à-wùɖù xwã́ún-xwã́ún mɔ̀à nyɔ-bɔ̃̌ǔn-po-wùɖùɛɛ jǔɛ.

⁸ Eɖóúnɛ̀ dyú-gàà ɓě mɔ̀à sáa-zà-nyɔ̀ ɓěɔ̀ kɛɛ mɛ mɔ̀ gã̀à ɓěɔ̀ ɓaɖa-nyɔ̀. Sɔ̀ìn ɓó zɛ̃̌ɛ̀ gboɛɛ, ɓě kè ɓěɛ̀ xwíníín-dyù ɓě mɛ nyu ɖɛ ɓě ɓá gã̀à ɓěɔ̀ jè dyíɛɛ kánáá pū.

⁹ “Ɔ jǔ ké ɓěɛ̀ mú-nyɛ́-nyɔ̀ ɓěɔ̀ dyi ɓě to kɔ̃ dyà ɖé ɓěɛ̀ ɓóɖóɔ̀ kɔ̃ ní, nìí, ɓě mɛ ɓaɖa gã̀à-wùɖù xwã́ún-xwã́únɔ̀. Nìí mɔ̄ Bounɓo mɔ̀à ɓěɛ̀ Gèɖèpɔ́ɔ̀ kɛɛ mu ɓě gbo kpáùn, ɓɛ́ ḿ ké ɓě póìn sɔ̀ìn ɖé ɓěɛ̀ mú-nyɛ́-nyɔ̀ ɓěɔ̀ xwaún.

¹⁰ Ké ɓě mɛ ɓaɖa gã̀à ɓěɔ̀ ti ɓě mu múàǔn kpáùn wɛ̃. Ɔ mɔ̀ ti ɓě paà Dɛ̀nɛ̀-Ɖìè-Hwèɖè-hwɔ̀ɔ̀ kè hwɔ tɔ̀ɔ̀ ɓě kɔ̃̀ ɓaɖa ɓě nyuà fɔ̃ɔ-sàǎ-zàìn-ɖɛ̀ kè gbo-kpɔ̃ìn-sàǎ-zàìn-ɖɛ̀ ɓě kɛ. Ɔ dyi ná nìǐn nìí, ní mu ɓě gbo kpáùn. Mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛ̀.”

Éézùɖùɛ̀-nyɔ̀ ɓěɔ̀ kpá hwìè kɔ̃

¹¹ Ti ɓɛ́ Éézùɖùɛ̀-nyɔ̀ ɓěɔ̀ ɖǎ ma Íjè-ɓòɖòɔ̀ kɔ̃ sɔ̀ɛɛ, ɔ zɔ̃ sɔ̃́ nììnɔ̀ dɛ̀nɛ̀ sɔ̃́ nììnɔ̀ wé kpáɖá-nyɔ nììnɔ̀ ɓaɖaa, ní-kpòɔ̀ ɖú ma daí sɔ̀ìn kpàǐ ɓó jàɖàìn-gbò kɔ̃̀ mú ɓɛ́ gma-gbɔ̀ɖɔ̀ɔ̀ nì ma kà kɛɛ kɔ̃in.

¹² Ké Éézùɖùɛ̀-nyɔ̀ ɓěɔ̀ kpá ma hwìè xwíníín ɖé Sányà Gbǎùn-fúɖúáɔ̀ kɔ̃. Ké wa gã̀ ma muɛń dyi tee, ké ní-kpòɔ̀ dɔ̀ ma ɓo ɖé Páwàɖàùn Gbǎùn-fúɖúáɔ̀ kɔ̃.

¹³ Wa kpá ma waà hwìè-kpà kĩ́ín-kĩ́ín nìà kɛ kɔ̃ dyììn ɖé kà Bounɓoɔ̀ nyuɛ ma kà Mózè gbo cɛ̃ɛ kɛɛ mú.

¹⁴ Ti wa sɔ̀ìn ma daíɛɛ, waà dɔ̃̀ǐn-mú-kpá-kpáɔ̀ nì dyúáɖò. Júɖà nììn xwéɖé-dùɔ̀ kè xwéɖé-dù ɓě nìà ɔ xwíɖíiɛɛ kpoo kò-kò ɓěɔ̀ nì ma dyúa ɖé wa nììn kɔ́ɖɔ̀ɔ̀ xwíɖíi. Násɔ̀ùn mɔ̀à Ámìnáɖàà dyú-gààɔ̀ kɛɛ mɔ̀ ma Júɖà nììn xwéɖé-dùɔ̀ nyɔ vɛ̀nɛ̀.

¹⁵ Ké Nɛ̀fánìò mɔ̀à Zúàà dyú-gààɔ̀ kɛɛ mɔ̀ ma Ɛ́sàkà nììn xwéɖé-dùɔ̀ nyɔ vɛ̀nɛ̀.

¹⁶ Ké Ɛ̀ɖíà mɔ̀à Héɖɔ̀ùnɛ̀ dyú-gààɔ̀ kɛɛ mɔ̀ ma Zɛ́ɓíúɖɔ̀ùn nììn xwéɖé-dùɔ̀ nyɔ vɛ̀nɛ̀.

¹⁷ Ké Gésɔ̀ùn nììn xwíníín-dyù ɓě kè Mɛ̀wáɖáwìɖì nììn xwíníín-dyù ɓě ɓɛ́ wa mɔ̀à Bounɓoɔ̀ jàɖàìn-gbòɔ̀ ɓéɖé-nyɔ̀ɛɛ kɔ ɓó dyí. Wa kpá hwìèɔ̀ kɔ̃ ti ɓɛ́ wa ɖǎ jàɖàìn-gbòɔ̀ xwaún zaìn nyɛ.

¹⁸ Ké Wuɖuɓíín nììn xwéɖé-dùɔ̀ kè xwéɖé-dù ɓě nìà ɔ xwíɖíiɛɛ kpoo kò-kò ɓěɔ̀ kɔ ɓó dyí ɖé wa nììn kɔ́ɖɔ̀ɔ̀ xwíɖíi. Ɛ̀ɖízù mɔ̀à Sɛ̀ɖédyùɛ̀ dyú-gààɔ̀ kɛɛ mɔ̀ ma Wuɖuɓíín nììn xwéɖé-dùɔ̀ nyɔ vɛ̀nɛ̀.

¹⁹ Ké Sɛ̀ɖúmìè mɔ̀à Zúwìɖìsáɖàìɛ̀ dyú-gààɔ̀ kɛɛ mɔ̀ ma Símìɔ̀ nììn xwéɖé-dùɔ̀ nyɔ vɛ̀nɛ̀.

²⁰ Ké Ɛ̀ɖìásà mɔ̀à Ɖɛ̀dyúòɛ̀ dyú-gààɔ̀ kɛɛ mɔ̀ ma Gáà nììn xwéɖé-dùɔ̀ nyɔ vɛ̀nɛ̀.

²¹ Nyɔ kɔ ɓó dyíɛɛ mɔ̀ Kóhà nììn xwíníín-dyù ɓěɔ̀. Wa mɔ̀ ɖɛ hwɛ̀ǐn-hwɛ̀ǐn ɓě sɔ̀à ɖé Bounɓoɔ̀ jàɖàìn-gbòɔ̀ múɛɛ ɓéɖé-nyɔ̀. Dɛ̀ séín wa mu muùn wɛ̃ɛ, jàɖàìn-gbòɔ̀ ɓéɖé-nyɔ̀ ɓěɔ̀ mu dyúa, ké wa poìn jàɖàìn-gbòɔ̀ xwaún séín hwɛ̀ ké wa mɔ̀ùn nyini ɓó.

²² Ké Ífèɖèìn nììn xwéɖé-dùɔ̀ kè xwéɖé-dù ɓě nìà ɔ xwíɖíiɛɛ kpoo kò-kò ɓěɔ̀ kɔ ɓó dyí ɖé wa nììn kɔ́ɖɔ̀ɔ̀ xwíɖíi. Ɛ̀ɖìsámà mɔ̀à Àmíhùɛ̀ dyú-gààɔ̀ kɛɛ mɔ̀ ma Ífèɖèìn nììn xwéɖé-dùɔ̀ nyɔ vɛ̀nɛ̀.

²³ Ké Gàmɛ́ɖìè mɔ̀à Pɛ̀ɖázùɛ̀ dyú-gààɔ̀ kɛɛ mɔ̀ ma Mànásì nììn xwéɖé-dùɔ̀ nyɔ vɛ̀nɛ̀.

²⁴ Ké Àbíɖàùn mɔ̀à Gíɖìónìɛ̀ dyú-gààɔ̀ kɛɛ mɔ̀ ma Bɛ̃́címà nììn xwéɖé-dùɔ̀ nyɔ vɛ̀nɛ̀.

²⁵ Hwɛ̀ ké Dɛ̃́ìn nììn xwéɖé-dùɔ̀ kè xwéɖé-dù ɓě nìà ɔ xwíɖíiɛɛ kpoo kò-kò ɓě ɓɛ́ wa mɔ̀ nyɔ gmɔ̀ ma hwìèɔ̀ ɖeín dyíɛɛ kɔ ma ɓó dyí ɖé wa nììn kɔ́ɖɔ̀ɔ̀ xwíɖíi. Áhìɛ́zɛ̀ mɔ̀à Ámìsáɖàìɛ̀ dyú-gààɔ̀ kɛɛ mɔ̀ ma Dɛ̃́ìn nììn xwéɖé-dùɔ̀ nyɔ vɛ̀nɛ̀.

²⁶ Ké Págìè mɔ̀à Ókànàà dyú-gààɔ̀ kɛɛ mɔ̀ ma Ásè nììn xwéɖé-dùɔ̀ nyɔ vɛ̀nɛ̀.

²⁷ Ké Àhíwàɖà mɔ̀à Énàà dyú-gààɔ̀ kɛɛ mɔ̀ ma Náfátàɖì nììn xwéɖé-dùɔ̀ nyɔ vɛ̀nɛ̀.

²⁸ Éézùɖùɛ̀-nyɔ̀ ɓěɔ̀ dyi hwìè xwíníín kpáín, kǎà wa nyu kà ɓó ɖeín dyi deɛ̀n dyììn ɖé waà xwéɖé-dù ɖò-ɖò ɓěɔ̀ mú.

²⁹ Hwɛ̀ ɓɛ́ Éézùɖùɛ̀-nyɔ̀ ɓěɔ̀ ké ma hwìè kɔ̃ kpáa, Mózè cɛ̃ɛ ma ɔ bùǐ-gàà ɖò kɔ̃̀ nyɛ́nɛ́ mɔ̀ Hóbà ɓɛ́ ɔ mɔ̀ Jɛ́tòɖò mɔ̀à Míɖìàùn-nyɔ̀ɔ̀ kɛɛ dyú-gàà ɓěɔ̀ ɖòɛɛ gbo, ké ɔ ɖá, “À nì ɓóɖó ɓɛ́ Bounɓoɔ̀ ɖáìn ma à nyɛ́nɛ́ín nyɛɛ kɔ̃ muɛń. Ɔ ná nì jèɛɛ, dyi, ɓɛ́ ɓěà ké mu, ké à mu m̀ nɔ̀mɔ̀ dyíin dyí nyuùn, sepóɛɖé Bounɓoɔ̀ ɖǎ à mɔ̀ Éézùɖùɛ̀-nyɔ̀ ɓěɛɛ nɔ̀mɔ̀ dyíin nyɛ́nɛ́ín ɖáìn.”

³⁰ Kɛɛ Hóbà zà ma ɖé wuɖu, ké ɔ ɖá, “Ḿ kè ɓě se muɛ́ mu. Ḿ nì ɖé ní ɓíɖí-ɓòɖòɔ̀ kɔ̃ ɖe muɛń.”

³¹ Ké Mózè cɛ̃ɛ ma ɔ gbo, ké ɔ ɖá, “Ní ɓaà m̀ ní, mɔ̀ǔn ɖá m̀ ké à dyi táà, sepóɛɖé mɔ̀ mɔ̀ nyɔ dyuò dɛ̀ à ɓéɖé à ké à jàɖàìn-gbò ɓěɔ̀ dyi nyànàìn nɔ̄ gbǎùn-fúɖúáɛ̀ kɔ̃ɛ, ké mɔ̀ mɔ̀ nyɔ ɓɛ́ìn à dyéɖé gbo dèɛ̀.

³² Ɔ jǔ ké m̀ dyi à kíɖíí sí ní, nɔ̀mɔ̀ dyíin séín ɓɛ́ Bounɓoɔ̀ mu à dyí nyuùn wɛ̃ɛ, ɖò ɖé à mu mɔ̀ùn dyí nyuùn ɖekè.”

Nyɔ ɓěɔ̀ hwìè-kɔ̃-kpá-kpá

³³ Sɔ̀ìn ɓóɛ gboɛɛ, Éézùɖùɛ̀-nyɔ̀ ɓěɔ̀ kpá ma hwìè kɔ̃ sɔ̀ìn ɓó Sányà mɔ̀à Bounɓoɔ̀ toɖoɔ̀ kɛɛ gbo, ké wa nàìn wé tã. Nyɔ ɓě ɓéɖé ma kà Bounɓoɔ̀ gma-gbɔ̀ɖɔ̀ɔ̀ kɛɛ nì ma wa dyúa, ɓɛ́ Bounɓoɔ̀ ké dɛ̀ wa ké waà jàɖàìn-gbò ɓěɔ̀ dyi nyànàìn ɖeɛɛ da zà.

³⁴ Ké ti séín wa mu hwìè xwíníín kpáùn wɛ̃ɛ, Bounɓoɔ̀ ní-kpòɔ̀ nì ma ɓó wa kɔ̃in ɓó dyóɖóaún.

³⁵ Ti séín wa kè Bounɓoɔ̀ gma-gbɔ̀ɖɔ̀ɔ̀ muá hwìè xwíníín kpáuń nììn nyɛɛ ní, Mózè ɖá, “Óó Bounɓo, sɔ̀ dyí, ɓɛ́ m̀ kéɛ nyu ɓɛ́ nì mú-nyɛ́-nyɔ̀ ɓěɔ̀ ké dyi gbɛ̀ìn. Wa mɛ gbǔ m̀ dyúa.”

³⁶ Ké ti séín gma-gbɔ̀ɖɔ̀ɔ̀ mu ɓo dɔ̀ùn wɛ̃ɛ ní, Mózè ɖá, “Óó Bounɓo, dyi nì nyɔ ɓě mɔ̀ Éézùɖùɛ̀-nyɔ̀ táázĩ̀ìn deìn táázĩ̀ìn kɔ̃in ɓěɔ̀ gbo ɖeo.”