Néhɔ̃̀ 2 - Ɓǎsɔ́ɔ̀ Báɓòɔ̀

Nínívà-hwɔ̀ɖɔ̀ɔ̀ wáɖá jè

¹ Nínívà-hwɔ̀ɖɔ̀ wè, ɖɛ-dyi-wàìn-nyɔ̀ ɓě ɖǎ m̀ to kɔ̃ dyà. Gmɔ̀ nì to-pèɖèìn-naín ɓěɔ̀ dyí. Fò nì hwìèɔ̀. Jìnììn m̀ mìɔùn kóɖó-kóɖó. Dyéìn nì sójà séín ɓěɔ̀ ti ɓó to jè.

² Bounɓoɔ̀ nìǎ Júɖà-nyɔ̀ ɓěɔ̀ dĩ́ín-dĩ̀ìnɔ̀ ɖe tòɛ̌n dyiɛń, kà dyúáɖò kà ɔ nyuà Éézùɖùɛ̀-nyɔ̀ ɓěɔ̀ nyɛ́nɛ́ín ɖáìn nyɛ. Sepóɛɖé ɖɛ-mú-gbɔɔ̀-nyɔ̀ ɓěɔ̀ ɖǎ zɔ̃̌ɔ̀ waà ɓóɖóɔ̀ dyíin nyìnììn, kà nyɔ kéɔ́ kà géɖéè-gbǎ dyi wàìn nyɛ.

³ Nì mú-nyɛ́-nyɔ̀ ɓěɔ̀ sójà ɓěɔ̀ dyí-zĩ̀ìn-ɖɛ̀ ɓěɔ̀ nì zĩ-zã, ké waà mú-po-ɖɔ̀ ɓěɔ̀ nì zĩ-zã. Nɛɛ̀-pĩ̀à ɓě nì hwíì-sǒ ɓěɔ̀ bũ̌in nyɛɛ nì wànà-wànà nyuɛń, ti ɓɛ́ sǒ se hwòɖǒ kuɛ ɓɛ́ìn ɓěɔ̀ nì fòèɛ̌n ɓó to gbo mu jèɛ.

⁴ Hwíì-sǒ ɓěɔ̀ nì gbǔɛ kpauń ɖé nì hwɔɖɔ-gboi-hwìè ɓěɔ̀ gbai. Wa nì mu nya dyi ɖe nyuɛń ɖé hwɔɖɔɔ̀ píé hwòɖǒǔn. Wa nì kà dɔ̀ɔ̀-kpà nì wãuń nìà kɛ. Wa fɛ̃́ìn ɓo xwai kà wɛ́ɖɛ́-wɛ́ɖɛ́ poà kɛ.

⁵ Nì kã́áɔ̀ ɖoɓo ɔ gàa-zà-nyɔ̀ ɓěɔ̀ jè, kɛɛ wa dyà dyi ɓuɖuɛ̀n. Nì mú-nyɛ́-nyɔ̀ ɓěɔ̀ fṹà, ké wa mu ɖé gmɔɔ̀ gbo, ɓɛ́ wa kéɛ dyí vɔ̃̀ìn, ké wa po dyí-zĩ̀ìn-ɖɛ̀ ɓěɔ̀ páún.

⁶ Wa kaà gmɔ ɓě ɓɛ́ wa zĩ̀ìn kà níɔ̀ dyíɛ, ké kã́á-mú-cĩ́-gbòɔ̀ wáɖá.

⁷ Wa zà nì kã́á-mààɔ̀ ɖɔún dyi, ké wa kpa ɔ, ɓɛ́ ɔ ké toɛ̀-kpɔ̃-nyɔ̀ jǔ. Ké ɔ gbo-nì-màà ɓěɔ̀ nì vĩ̌ɛń kà gbúɛ́ nyuà kɛ, ké wa nì kpá hwòɖǒ taɓauń ɖé wìì mú.

⁸ Nínívà-hwɔ̀ɖɔ̀ wè, m̀ nì kà ní-dòùnɓìǎ ɖò nìà kɛ. Wa kaà m̀ dyí, ké nì nyɔ ɓěɔ̀ nì síɛń. Nì sójà-nàìn-nyɔ̀ ɓěɔ̀ páná mú, ké wa ɖá, “Ɓě ɓɔ́ muɛ! Ɓě ɓɔ́ muɛ!” Kɛɛ nyɔ ɖò se ma ɖe gmɔ̀.

⁹ Nì mú-nyɛ́-nyɔ̀ ɓě ɖá, “Ɓěà zà hwɔɖɔɔ̀ séɓàɖàɔ̀ kè ɔ góòɔ̀ xwa. Ɔ kɔ́mɔ́-ɖɛ̀ ɓěɔ̀ zi dyí vòɛ̌n mìɔ. Ɔ zi wɔ̃ kɔ̃.”

¹⁰ Wa ɖǎ Nínívà-hwɔ̀ɖɔ̀ɔ̀ wáɖá. Wa ɖǎa kɔ̃ wã. Ɔ ɖǎ fóɖóún kpá. Fã̀à nyuɛ ké hwòɖǒ se nyɔ ɖò xwíníín sè, ké kɔ́-dù ɓě kè dyɔɔ̀ nì tɛɖɛiń, ké dyúa séín zàìn dyí.

¹¹ Dɛ̌ hwɔɖɔ ɓɛ́ ɔ hwɔìn ma kà ganìǎ-ɓìɛɛ nìɛ́? Ɔ mɔ̀ dɛ̀ ɓɛ́ ganìǎ ɓěɔ̀ nyíìn ma kà waà dyú ɓěɔ̀ kɛ, kè dɛ̀ ɓɛ́ ganìǎ nyɔ́nɔ́ kèɛ̀ ɓíɔ́ ɓěɔ̀ pa ma kà, nìí ɓɛ́ ɖɛ ɖò seà waà dyú ɓěɔ̀ ɖò bũ̌in puàà ɓɛ́ìn nyɛ.

¹² Ganìǎ ɓěɔ̀ fáìn ma ɖɛ ɓě ɓɛ́ wa kpɔ̃ɛɛ dyi ɓó ganìǎ nyɔ́nɔ́ ɓěɔ̀ kè waà dyú ɓěɔ̀ bìì, ké wa dyíìn ma suaɖɛ̀ ɓě ɓɛ́ wa kpɔ̃ɛɛ ɖé waà ɓíɔ̀ mú.

¹³ Kɛɛ Bounɓo mɔ̀ nyɔ nìà ɖɛ séín kɔ̃in nyɛɛ ɖá, “Ní mu m̀ gǎ kɔ̃ tòùno, Nínívà-hwɔ̀ɖɔ̀ wè. Ní mu nì hwíì-sǒ ɓěɔ̀ fɔ̃ùn, ké gàsíàɔ̀ mu nì sójà ɓěɔ̀ ɖáɓáùn. Ké ḿ se ɖɛ ɓě ɓɛ́ m̀ zà ma kà to gboɛɛ ɖò m̀ xwa sèɛ̌ mu nɔ̄ ɓóɖó-kpàà kɔ̃. M̀ se kíá ɓě ɓóɖó-dù kà kò ɖò ɓě kɔ̃ ɖoɓoɛ́ mu ɖe, ɓɛ́ wa ké ɓóɖó-dù ɓěɔ̀ ganaún kpɔ̃̀ìn ɓó ɖɛ nì mɔ́ɛɛ jè ɖe.”