Máfíò 14 - Ɓǎsɔ́ɔ̀ Báɓòɔ̀

Jɔ̃́ɔ́ nyɔ-níɔ-po-nyɔ̀ɔ̀ mɛ́ jè

¹ Ɓó tia ɓaɖaa, Hɛ́wɔ̀ɖɔ̀ mɔ̀à Gáɖàɖíì-ɓòɖòɔ̀ nàìn-nyɔ̀ɔ̀ kɛɛ wɔ̃́ ma Jízɛ̀ jè,

² ké ɔ cɛ̃ɛ ma ɔ gbo-nì-nyɔ̀ ɓěɔ̀ gbo, ké ɔ ɖá, “Gàa nìà kɛ mɔ̀ Jɔ̃́ɔ́ nyɔ-níɔ-po-nyɔ̀ɔ̀. Ɔ ɖǎ gĩɔ wóɖó. Ɔ jèɛɛ, ɔ ɓéɖéà zɛ̃̀ìn-ɖɛ̀-nyu-kpè kɛ̀.”

^3-4 Hɛ́wɔ̀ɖɔ̀ ɖǎ ma Jɔ̃́ɔ́ kpɔ̃ kĩ́ín, ké ɔ sã ma ɔ, ké ɔ po ma ɔ kpɔɖɔ ɖeín ɓó Hɛ̀wóɖóɖìà jè. Jɔ̃́ɔ́ cɛ̃ɛ ma Hɛ́wɔ̀ɖɔ̀ gbo, ké ɔ ɖá, “Ɔ se dyíin nɔ̀mɔ̀ ɓɛ́ m̀ ké Hɛ̀wóɖóɖìà mɔ̀à m̀ ɖíí-gàà Féɖòɛ̀ gmàà kɛɛ dyi kpɔ̃, ɓɛ́ ɔ ké nì gmàà jǔ.”

⁵ Hɛ́wɔ̀ɖɔ̀ mɔ́ ɓɛ́ ɔ ké ma Jɔ̃́ɔ́ ɖáɓá, kɛɛ ɔ fɛ̃̀ìn ma nyɔ ɓěɔ̀, sepóɛɖé wa ɖáìn Jɔ̃́ɔ́ kpáá-ɖɛ̀-cɛ̃-nyɔ̀ ɖò.

⁶ Ti ɓɛ́ Hɛ́wɔ̀ɖɔ̀ wóɖó-wè nyini ma kɛɛ, Hɛ̀wóɖóɖìàà dyú-màà dye ma ɓó nyɔ ɓěɔ̀ dyúa, ké ɔ dè ma Hɛ́wɔ̀ɖɔ̀ hwìɖǐi.

⁷ Ké Hɛ́wɔ̀ɖɔ̀ ɖììn ma ɔ wuɖu dyéɖéín, ké ɔ ɖá, “Ní mu ɖɛ séín nì mu ḿ zɔ̀ìn nyɛɛ m̀ nyíìn.”

⁸ Ké màa-dyùɔ̀ cɛ̃ɛ ma Hɛ́wɔ̀ɖɔ̀ gbo, ké ɔ ɖá, “Nyíìn ḿ Jɔ̃́ɔ́ nyɔ-níɔ-po-nyɔ̀ɔ̀ dú-ɓòɔ̀ tɛ́nɛ́ɛ̀ ɖò mú.” Ɔ cɛ̃ɛ ma náa, sepóɛɖé kǎà ɔ ɖe cɛ̃ɛ ma ɔ gbo.

⁹ Wìì nyu ma Kã́á Hɛ́wɔ̀ɖɔ̀ dyɛo, kɛɛ ɓó wuɖu ɔ ɖi ma kà ɓó ɔ ɖéè ɓěɔ̀ dyúa kɛ jèɛɛ, ɔ cɛ̃ɛ ma ɓɛ́ ɔ sójà ɓěɔ̀ ké ma màa-dyùɔ̀ Jɔ̃́ɔ́ɛ̀ dú-ɓòɔ̀ nyí.

¹⁰ Ké wa mu ma, ké wa zà ma Jɔ̃́ɔ́ dúí ɖé kpɔɖɔɔ̀ ɖeín.

¹¹ Ké wa dyàìn ma Jɔ̃́ɔ́ɛ̀ dú-ɓòɔ̀ tɛ́nɛ́ɛ̀ ɖò mú, ké wa nyíɛ ma màa-dyùɔ̀, ké ɔ kpaa ma ɔ ɖe gbo.

¹² Ké Jɔ̃́ɔ́ɛ̀ ɖeín-nà-nyɔ̀ ɓěɔ̀ dyi ma, ké wa kpa ɔ xwɛ́ɔ̀, ké wa zàà ma dyóɖóún. Ké wa mu, ké wa cɛ̃ɛ ma Jízɛ̀ gbo.

Jízɛ̀ nyí gàa táázĩ̀ìn hm̀m̌ ɖii-ɖɛ̀

¹³ Ti ɓɛ́ Jízɛ̀ wɔ̃́ ma ɖɛa kɛɛ, ɔ sɔ̀ ma ɓó, ké ɔ kpá ma ɓáɖáà ɖò mú, ɓɛ́ ɔ ké ma dà kpái-kpái ɖò mu. Ti ɓɛ́ nyɔ kúɖúú ɓě wɔ̃́ɔ ma kɛɛ, wa sɔ̀ ma ɖé waà hwɔɖɔ ɓěɔ̀ múin, ké wa kpa ma ɓo, ké wa mu ma dɛ̀ ɓɛ́ Jízɛ̀ nì ma kà muɛń nyɛ.

¹⁴ Ti ɓɛ́ Jízɛ̀ sɔ̀ ma ɖé ɓáɖáàɔ̀ múɛɛ, ɔ dyé ma nyɔ kúɖúú ɓěɔ̀, ké wa jè nyùìn ma ɔ wìì, ké ɔ kánáìn ma waà wɛ́-nyɔ̀ ɓěɔ̀ dyi.

¹⁵ Ti hwìo ɖǎ ma jǔɛɛ, ɔ ɖeín-nà-nyɔ̀ ɓěɔ̀ dyi ma ɔ gbo, ké wa ɖá, “Nɔ̄ ɖé mɔ̀ dà kpái-kpái, ké tíe nìǎ kpɔ̃uń. Ɖoɓo nyɔ ɓěɔ̀ ɖe, ɓɛ́ wa ké hwɔɖɔ-kpàǎ ɓěɔ̀ kɔ̃ mu, ɓɛ́ wa ké waà ɖii-ɖɛ̀ dɔ̃.”

¹⁶ Kɛɛ Jízɛ̀ cɛ̃ɛ ma wa gbo, ké ɔ ɖá, “Wa se ɓéɖé ɓɛ́ wa ké mu. Ɓě nyí wa ɖɛ ɖò, ɓɛ́ wa kéɛ ɖi.”

¹⁷ Ké wa cɛ̃ɛ ma ɔ gbo, ké wa ɖá, “Ɖɛ à ɓéɖéɛɛ mɔ̀ bɛɖɛɛ̀-kpò hm̀m̌ kè zimii-dyù sɔ̃́ nyɛ̀nɛ̀ɛ̀.”

¹⁸ Ké Jízɛ̀ ɖá, “Ɓě dyà wa nɔ̄ ḿ gbo.”

¹⁹ Ké ɔ cɛ̃ɛ ma nyɔ ɓěɔ̀ gbo, ɓɛ́ wa ké ma pìǐɔ̀ kɔ̃in kò. Ké ɔ ɖú ma bɛɖɛɛ̀-kpò hm̀m̌ɔ̀ kè zimii-dyù sɔ̃́ɔ̀ dyí, ké ɔ gmɔ̀ ma ɖé dyií, ké ɔ po Gèɖèpɔ́ɔ̀ zùo ɓó ɖii-ɖɛ̀ɔ̀ jè. Ké ɔ jaɖaìn bɛɖɛɛ̀-kpò ɓěɔ̀ kpói, ké ɔ nyí ma wa ɖeín-nà-nyɔ̀ ɓěɔ̀, ké ɖeín-nà-nyɔ̀ ɓěɔ̀ mɔ̀ùn geìn ma wa nyɔ kúɖúú ɓěɔ̀ múin.

²⁰ Ké nyɔ séín ɓěɔ̀ ɖi ma ɖɛ, ké wa ɖoɓo ma. Ké wa poìn ma bɛɖɛɛ̀ɔ̀ kè zimiiɔ̀ nyɔ sè dyiɛɛ dyí, ké ɔ nyu ma tìě-wè ɓaɖa-bùè sè sɔ̃́.

²¹ Nyɔ ɓě ɓɛ́ wa ɖi ma kà bɛɖɛɛ̀ɔ̀ kè zimiiɔ̀ kɛɛ ɓɛ́ìn ma gàa táázĩ̀ìn hm̀m̌ jǔɛ. Wa se ma màa ɓěɔ̀ kè dyú ɓěɔ̀ zɛɖɛ.

Jízɛ̀ nà ní kɔ̃in

²² Sɔ̀ìn ɓóɛ gboɛɛ, Jízɛ̀ cɛ̃ɛ ma ɔ ɖeín-nà-nyɔ̀ ɓěɔ̀ gbo, ɓɛ́ wa ké ɓáɖáàɔ̀ mú kpá, ɓɛ́ wa ké dyúa mu ɖé níɔ̀ kpóó tɔ̀ɔ̀ kɔ̃. Ké ɔ cɛ̃ɛ ma nyɔ ɓěɔ̀ gbo, ɓɛ́ wa ké ma wa ɓíɖí-taún ɖe kɔ́ìn.

²³ Ti ɓɛ́ Jízɛ̀ ɖǎ ma nyɔ ɓěɔ̀ wa ɓíɖí-taún ɖe ɖoɓoɛɛ, ɔ ɖòùn mu ma toɖo ɖò dya, ɓɛ́ ɔ ké ma ɓaà. Tíe nìǎ ma kpɔ̃uń, ké ɔ ɖòùn nì ma ɖé.

²⁴ Ɔ nì ná kɛɛ, ɓáɖáà kɔ̃̀ mú ɖeín-nà-nyɔ̀ ɓěɔ̀ nìà kɛɛ ɖǎ ma ɖé níɔ̀ hwòɖǒǔn dyí ɓɛ̀ɖɛ̀ìn. Ké dyóó-kpɛ̀ nì ma ɓáɖáàɔ̀ dyí ɓaɖauń, sepóɛɖé dìì nì ma ɔ dyí dèɛ̌n.

²⁵ Ké ɓó zɔ̃ wĩín vɛ̀nɛ̀ kɛɛ, Jízɛ̀ dyà níɔ̀ kɔ̃in nàà, ké ɔ nì ma wa gbo dyiɛń.

²⁶ Ti ɓɛ́ ɖeín-nà-nyɔ̀ ɓěɔ̀ dyé ma ɔ níɔ̀ kɔ̃in nàà kɛɛ, díɖí taɓa ma wa, ké wa ɖá, “Ɔ mɔ̀ gĩɔ-nyɔ̀ wà!” Ké wa páná ma mú ɖé fã̀à mú.

²⁷ Kɛɛ Jízɛ̀ wùɖù ma wa gbo wàɖà, ké ɔ ɖá, “Ɓěɛ̀ hwòɖǒ mɛ ɓɔ́ ɓaɖaa. Ɔ mɔ̀ mɔ̄. Ɓě ɓɔ́ fɛ̃̀ìn.”

²⁸ Ké Píɖɛ̀ ɖá, “Bounɓo, ɔ dyi m̀ jǔ jǎà ní, nìí, cɛ̃ɛ ḿ gbo, ɓɛ́ ḿ ké m̀ gbo dyi ɖé níɔ̀ kɔ̃.”

²⁹ Ké Jízɛ̀ ɖá, “Dyi.” Ɔ jèɛɛ, Píɖɛ̀ sɔ̀ ma ɖé ɓáɖáàɔ̀ mú, ké ɔ ɖú ma níɔ̀ kɔ̃in nà kpàǐ, ké ɔ nì ma ɖé Jízɛ̀ gbo muɛń.

³⁰ Kɛɛ ti ɔ dyé ma kà ɓɛ́ dììɔ̀ nì ma dyiɛń nyɛɛ, ɔ fɛ̃̀ìn ma, ké ɔ ɖú ma níɔ̀ gbo pa kpàǐ. Ké ɔ páná ma mú, ké ɔ ɖá, “Bounɓo, póìn ḿ.”

³¹ Wàɖà cá kɛɛ, Jízɛ̀ pɛ́ɛ̀ ma sɔ̃, ké ɔ kpɔ̃ ma Píɖɛ̀ɛ̀ sɔ̃ dyi, ké ɔ ɖá, “Ɖɛ́ kɔ̃̀ jè m̀ seà ḿ hwìɖǐǐ taɓa cá kɛ́?”

³² Ké wa sɔ̃́ɔ̀ dyá ma ɖé ɓáɖáàɔ̀ mú, ké dììɔ̀ kpá ma ɓɔ́í.

³³ Púɛɛ, ɖeín-nà-nyɔ̀ ɓě nì ma ɓáɖáàɔ̀ múɛɛ ɓiè ma Jízɛ̀, ké wa ɖá, “M̀ mɔ̀ Gèɖèpɔ́ɔ̀ Dyú-gààɔ̀ jǎà wà!”

Jízɛ̀ kánáìn wɛ́-nyɔ̀ ɓě dyi ɖé Gɛ̀nɛ́sɛ́wɛ̀ɖɛ̀-hwɔ̀ɖɔ̀ɔ̀ mú

³⁴ Ti ɓɛ́ wa ɖǎ ma dòùnɓìǎɔ̀ péɖéɛɛ, wa dyi ma ɖé Gɛ̀nɛ́sɛ́wɛ̀ɖɛ̀-hwɔ̀ɖɔ̀ɔ̀ mú.

³⁵ Hwɔɖɔɔ̀ nyɔ ɓěɔ̀ dyuò ma Jízɛ̀ dyí. Ɔ jèɛɛ, wa ɖoɓo ma waà wɛ́-nyɔ̀ séín ɓěɔ̀ jè, ké wa dyà ma wa Jízɛ̀ gbo.

³⁶ Ké wa ɖú ma ɔ ɓaà kpàǐ, ɓɛ́ ɔ ké wɔ̃́ ɓɛ́ wɛ́-nyɔ̀ ɓěɔ̀ ké ɔ mú-po-ɖɔ̀ɔ̀ wɔ̃ɔ̀ dyi tìnììn ɖòùn pū. Ké nyɔ séín ɓě ɓɛ́ wa tìnììn ma ɔ ɖɔɔ̀ dyiɛɛ káná ma dyi.