Ɖìvéɖékɔ̀ 9 - Ɓǎsɔ́ɔ̀ Báɓòɔ̀

Sáa-zà-nyɔ̀ ɓěɔ̀ dè kũ̀àɔ̀ gbɔ

¹ Ɓó wéɔ̀ mɛ̀nɛ̌ìn-tã nììnɔ̀ ɓaɖaa, Mózè poìn ma Eɖóún kè ɔ dyú-gàà ɓěɔ̀ kè Éézùɖùɛ̀-nyɔ̀ ɓěɔ̀ nyɔ vɛ̀nɛ̀ ɓěɔ̀ dyí.

² Ké ɔ cɛ̃ɛ ma Eɖóún gbo, ké ɔ ɖá, “Ɖú ɓìɖǐ ɓíɔ́-dyù ɖò dyí, ɓɛ́ ɔ ké nì nàmàǔn-sàǎ-zàìn-ɖɛ̀ jǔ, ké m̀ mɛ ɖú ɓáɖáá ɓíɔ́ ɖò dyí, ɓɛ́ ɔ ké nì fɔ̃ɔ-sàǎ-zàìn-ɖɛ̀ jǔ. Wa sɔ̃́ɔ̀ mɛ ɓɔ́ kɛɛ ɖò ɓéɖéɛ. M̀ mɛ dyà wa Bounɓoɔ̀ gbo.

³ Ɔ ɖǎ ná nìǐn, nìí, m̀ mɛ cɛ̃ɛ Éézùɖùɛ̀-nyɔ̀ ɓěɔ̀ gbo, ɓɛ́ m̀ ké níiń, ‘Ɓě mɛ ɖú vã́á ɖò dyí, ɓɛ́ ɔ ké ɓěɛ̀ nàmàǔn-sàǎ-zàìn-ɖɛ̀ jǔ. Ké ɓě mɛ ɖú ɓìɖǐ ɖò kè ɓáɖáá ɖò ɓɛ́ wa se kɛɛ ɖò ɓéɖé, ɓɛ́ wa nyuá zɔ̃ dyúáɖòɛɛ dyí, ɓɛ́ wa ké ɓěɛ̀ fɔ̃ɔ-sàǎ-zàìn-ɖɛ̀ jǔ.

⁴ Ké ɓě mɛ ɖú ɓìɖǐ ɖò kè ɓáɖáá ɓíɔ́ ɖò dyí ɖe, ɓɛ́ wa ké ɓěɛ̀ gbo-kpɔ̃ìn-sàǎ-zàìn-ɖɛ̀ jǔ. Ɓě mɛ ɖú ɖɛ ɓěɛ̀ kè ɖii-ɖɛ̀-sàǎ-zàìn-ɖɛ̀ caìn cáná kɛɛ dyí, ɓɛ́ ɓě ké wa Bounɓoɔ̀ gbo sáa zàìn. Sepóɛɖé Bounɓoɔ̀ mu ɓě dyí wóɖóìn ɓó zɛ̃̌ɛ̀.’ ”

⁵ Ké Eɖóún kè ɔ dyú-gàà ɓěɔ̀ kè Éézùɖùɛ̀-nyɔ̀ vɛ̀nɛ̀ ɓěɔ̀ kpa ma ɖɛ ɓě kɔ̃̀ jè Mózè cɛ̃ ma kà wa gboɛɛ ɓó jàɖàìn-gbòɔ̀ dyúa. Ké nyɔ séín ɓěɔ̀ poìn ma ɓó Bounɓoɔ̀ dyúa dyí.

⁶ Ké Mózè cɛ̃ɛ ma wa gbo, ké ɔ ɖá, “Ɖɛ ɓě nìà nyuɛń dyiɛń nyɛɛ mɔ̀ ɖɛ Bounɓoɔ̀ ɖá ɓě mɛ nyuɛ. Ɔ jǔ ké ɓě dyiɛ nyu ní, nìí, Bounɓoɔ̀ dĩ́ín-dĩ̀ìnɔ̀ mu ɓě dyí wóɖóìn.”

⁷ Hwɛ̀ ké ɔ cɛ̃ɛ ma Eɖóún gbo, ké ɔ ɖá, “Mu ɓó sáa-kɔ̃-zàìn-gbààɔ̀ gbo, ɓɛ́ m̀ ké nì nàmàǔn-sàǎ-zàìn-ɖɛ̀ɔ̀ kè nì fɔ̃ɔ-sàǎ-zàìn-ɖɛ̀ɔ̀ nyu, ɓɛ́ wa ké m̀ kè nì nyɔ ɓěɔ̀ nàmàǔn ɓěɔ̀ kɔ̃in-ɓáìn-ɖɛ̀ jǔ. Ké m̀ mɛ nyu nyɔ ɓěɔ̀ nììn sáa-zàìn-ɖɛ̀ ɓěɔ̀, ɓɛ́ wa ké nyɔ ɓěɔ̀ nììn nàmàǔn ɓěɔ̀ kɔ̃in-ɓáìn-ɖɛ̀ jǔ. M̀ mɛ nyuɛ náa kà Bounɓoɔ̀ nyuà cɛ̃ɛ kɛ.”

⁸ Ɔ jèɛɛ, Eɖóún mu ma ɓó gbààɔ̀ gbo, ké ɔ ɖáɓá ma ɓìɖǐ ɓíɔ́-dyùɔ̀, ɓɛ́ ɔ ké ɔ mìɔùn nììn nàmàǔn-sàǎ-zàìn-ɖɛ̀ jǔ.

⁹ Ké Eɖóúnɛ̀ dyú-gàà ɓěɔ̀ zà ma nyɔmɔɔ̀ ɖéɛ mú dyi, ké wa nyíɛ ɔ xwa. Ké ɔ kpa ma jìì-dyùà dyúáɖò ɖé nyɔmɔɔ̀ gbo, ké ɔ poɛ ma ɖɛ hwɔìn nimii-gmɛ̌ ɓě nìà ɓó sáa-kɔ̃-zàìn-gbààɔ̀ gã hĩinyɛɔ̀ kɔ̃ɛɛ bũ̌. Ké ɔ púè ma nyɔmɔɔ̀ nyɔ sèà ɓóɛɛ ɓó gbààɔ̀ gbɔí.

¹⁰ Hwɛ̀ ké ɔ ɖú ma nàmàǔn-sàǎ-zàìn-ɖɛ̀ɔ̀ cánáɔ̀ kèɛ̀ pɔnɔ-mɛ́ sɔ̃́ɔ̀ kèɛ̀ pìùɔ̀ dà kpa ɖɛɔ̀ dyí, ké ɔ fɔ̃̀ìn ma wa ɓó sáa-kɔ̃-zàìn-gbààɔ̀ kɔ̃. Ɔ nyu ɖɛ séín ɓěɛ̀ kà Bounɓoɔ̀ nyuɛ ma kà Mózè gbo cɛ̃ɛ kɛ.

¹¹ Hwɛ̀ ké ɔ ɖúɛ ma fɔ́ɔ̀ kèɛ̀ kúɖúùɔ̀ dyí, ké ɔ kpa wa, ké ɔ fɔ̃̀ìn ma wa ɖé jàɖàìn-hwɔ̀ɖɔ̀ɔ̀ ɖeín.

¹² Sɔ̀ìn ɓóɛ gboɛɛ, Eɖóún ɖáɓá ma ɔ mìɔùn nììn fɔ̃ɔ-sàǎ-zàìn-ɖɛ̀ɔ̀. Ké ɔ dyú-gàà ɓěɔ̀ zà ma ɔ nyɔmɔɔ̀ múin, ké wa nyíɛ ɔ xwa, ké ɔ mɛ́nɛ́ìn maa gbààɔ̀ wáká hĩinyɛɔ̀ bũ̌in.

¹³ Hwɛ̀ ké wa nyí ma ɔ fɔ̃ɔ-sàǎ-zàìn-ɖɛ̀ɔ̀ suaɖɛ̀ɔ̀ kpo ɓěɔ̀ ɖò-ɖò kèɛ̀ dúɔ̀ xwa. Ké ɔ fɔ̃̀ìn wa ɓó gbààɔ̀ kɔ̃.

¹⁴ Kĩ́ín-kĩ́ín nyɛɛ, ɔ wɔɔ̀ ma nyúà-ɖɛ̀ɔ̀ mɛ́ séín ɓěɔ̀ kèɛ̀ pɔ̃́ sɔ̃́ɔ̀, ké ɔ fɔ̃̀ìn wa ɓó gbààɔ̀ kɔ̃, ɓó fɔ̃ɔ-sàǎ-zàìn-ɖɛ̀ tɔ̀ɔ̀ kɔ̃in.

¹⁵ Sɔ̀ìn ɓóɛ gboɛɛ, Eɖóún ɖú ma sáa-zàìn-ɖɛ̀ ɓě nì ma kà ɓó nyɔ ɓěɔ̀ bììɛɛ dyí. Ɔ xwíníín mɔ̀, ɔ ɖú wiɖi mɔ̀à nyɔ ɓěɔ̀ nàmàǔn-sàǎ-zàìn-ɖɛ̀ɔ̀ kɛɛ dyí, ké ɔ ɖáɓáa, ké ɔ zàìn sáa ɓó nyɔ ɓěɔ̀ nàmàǔn ɓěɔ̀ jè kà ɔ nyuɛ ma kà ɔ kĩ́ín-kĩ́ínɔ̀ nyuɛ kɛ.

¹⁶ Hwɛ̀ ké ɔ ɖú ma fɔ̃ɔ-sàǎ-zàìn-ɖɛ̀ɔ̀ dyí, ké ɔ zàìn ma ɔ sáa kà gmaɔ̀ nyuɛ ma kà cɛ̃ɛ kɛ.

¹⁷ Ké ɔ ɖú ma ɖii-ɖɛ̀-sàǎ-zàìn-ɖɛ̀ɔ̀ dyí, ké ɔ zà ma ɓóɛ xwa-wè ɖò, ké ɔ fɔ̃̀ìn ma ɓóɛ gbààɔ̀ kɔ̃, ɓó gànà-kṹún nììn fɔ̃ɔ-sàǎ-zàìn-ɖɛ̀ɔ̀ kɔ̃in ɖe.

¹⁸ Hwɛ̀ ké ɔ ɖáɓá ma ɓìɖǐɔ̀ kè ɓáɖáá ɓíɔ́ mɔ̀à gbo-kpɔ̃ìn-sàǎ-zàìn-ɖɛ̀ ɓó nyɔ ɓěɔ̀ bììɛ. Ké ɔ dyú-gàà ɓěɔ̀ zà ma nyɔmɔɔ̀ ɖéɛ mú dyi, ké wa nyíɛ ɔ xwa, ké ɔ mɛ́nɛ́ìn maa ɓóɛ sáa-kɔ̃-zàìn-gbààɔ̀ wáká hĩinyɛɔ̀ bũ̌in.

¹⁹ Ké ɔ dyú-gàà ɓěɔ̀ ɖú ma ɓìɖǐɔ̀ kè ɓáɖáá ɓíɔ́ɔ̀ cáná-dà ɓě mɔ̀à cáná nì ɖé wa xwíníín nyɛ kè pɔnɔ-mɛ́ ɓěɔ̀ kè waà pìùɔ̀ dà kpa ɖɛ ɓěɔ̀ kɛ ɔ kè ɓáɖááɔ̀ vɔ̃-gbòò nì cánáúnɔ̀ dyí,

²⁰ ké wa nɛ́ìn wa kɛ́ ɓěɔ̀ kɔ̃, ké wa nyíɛ séín Eɖóún xwa. Ké ɔ fɔ̃̀ìn cánáɔ̀ ɓó gbààɔ̀ kɔ̃.

²¹ Kɛɛ ɔ vũà ma sáa-zàìn-ɖɛ̀ ɓěɔ̀ kɛ́ ɓěɔ̀ kè ɖiaún-pɔ̃̀ ɓěɔ̀ dyi, ɓɛ́ wa ké nyíí-ɖɛ̀ kpa ɖɛ jǔ ɓó Bounɓoɔ̀ bìì. Ɔ nyu ɖɛ séín ɓěɛ̀ kà Mózè nyuɛ ma kà cɛ̃ɛ kɛ.

²² Ti ɓɛ́ Eɖóún ɖǎ ma nàmàǔn-sàǎ-zàìn-ɖɛ̀ ɓěɔ̀ kè fɔ̃ɔ-sàǎ-zàìn-ɖɛ̀ ɓěɔ̀ nyuɛ hwɔɛɛ, púɛɛ, ɔ pɛ́ɛ̀ ma sɔ̃, ké ɔ tòɛ̀ ɖéɛ nyɔ ɓěɔ̀ gbo, ké ɔ po wa mana kɔ̃, ké ɔ sí ma ɓíɖíi sɔ̀ìn ɓó gbààɔ̀ ɖɛ ɔ nyànà ma kà kɔ̃ɛɛ kɔ̃.

²³ Hwɛ̀ ké Mózè kè Eɖóún mu ma ɖé jàɖàìn-gbòɔ̀ mú. Ti ɓɛ́ wa sí ma kɛɛ, wa po ma nyɔ ɓěɔ̀ mana kɔ̃. Ké Bounɓoɔ̀ dĩ́ín-dĩ̀ìnɔ̀ wóɖóìn ma nyɔ séín ɓěɔ̀ dyí.

²⁴ Púɛɛ, Bounɓoɔ̀ tò ma nyɛ, ké ɔ fɔ̃ ma fɔ̃ɔ-sàǎ-zàìn-ɖɛ̀ ɓěɔ̀ kè sáa-zàìn-ɖɛ̀ tɔ̀ɔ̀ ɓěɔ̀ cáná-dà ɓě nì ma kà ɓó gbààɔ̀ kɔ̃ɛɛ ɓó dyi. Ké ti ɓɛ́ nyɔ séín ɓěɔ̀ dyéɛ ma kɛɛ, wa páná ma mú ɖé múà mú, ké wa taɓa ma dú hwuɖu ɓó Bounɓoɔ̀ dyúa.