Ɖìvéɖékɔ̀ 4 - Ɓǎsɔ́ɔ̀ Báɓòɔ̀

Sáa-zàìn-ɖɛ̀ nì ɓó seó-ɖei-dyéɛ̀ nàmàǔn jèɛ

¹ Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá,

² “Cɛ̃ɛ Éézùɖùɛ̀-dyù ɓěɔ̀ gbo kà ḿ ɖá ɔ jǔ ké nyɔ ɖò seó ɖei dyé, ké ɔ dyi gma ɓě ɓá ɖɛ ɓě, ɓɛ́ ḿ ɖá ɓě mɛ ɓɔ́à nyuɛ kɛɛ jè dyíɛɛ ɖò wáɖá dyììn ɖé ɖɛ ɓěɛ̀ ɖò nyu-nyu mú ní, nìí, ɖɛ ɓě nyɔɔ̀ ké nyu ɓó gmaɔ̀ dyáìn jèɛɛ, wa kɛà kɛ̀.

³ Ɔ jǔ ké sáa-zà-nyɔ̀ vɛ̀nɛ̀ɔ̀ dyi nàmàǔn ɖò nyu ní, nìí, zaa mu nyɔ ɓěɔ̀ dúún wáɖáùn. Ɔ dyi ná nìǐn, nìí, sáa-zà-nyɔ̀ vɛ̀nɛ̀ɔ̀ mɛ dyà ɓìɖǐ ɓíɔ́ ɖò mɔ̄ mɔ̀à Bounɓoɔ̀ kɛɛ gbo, ɓɛ́ ɔ ké sáa-zàìn-ɖɛ̀ jǔ ɓó ɔ nàmàǔnɔ̀ jè. Ɓìɖǐ ɓíɔ́ɔ̀ mɛ ɓɔ́ kɛɛ ɖò ɓéɖéɛ.

⁴ Ɔ mɛ dyà ɓìɖǐ ɓíɔ́ɔ̀ ɓó ḿ dyúa ɓó jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ dyéàìn nyɛɛ wĩín, ɓɛ́ ɔ kéɛ sɔ̃ dúún dè. Sɔ̀ìn ɓóɛ gboɛɛ, nìí, ɔ mɛ ɖáɓáìn ɓó ɓìɖǐ ɓíɔ́ɔ̀.

⁵ Ɔ ɖǎa náa nyuín, nìí, ɔ mɛ ɖúɛ nyɔmɔɔ̀ ɖò dyí, ɓɛ́ ɔ kéɛ nɔ̄ jàɖàìn-gbòɔ̀ mú dyà.

⁶ Ɔ ɖǎa náa nyuín, nìí, ɔ mɛ kpa ɔ jìì-dyùà dyúáɖò ɖé nyɔmɔɔ̀ gbo, ɓɛ́ ɔ kéɛ ɖò ɓó faà-ɖɔ̀ ɓáà nɔ̄ jàɖàìn-gbòɔ̀ mú dyiíɛɛ dyúa ɓó ɓíɖíi dyi téìn ɓó ḿ dyúa. Ɔ mɛ nyùɛ̀n náa kpa mɛ̀nɛ̌ìn-sɔ̃́.

⁷ Sɔ̀ìn ɓóɛ gboɛɛ, nìí, ɔ mɛ ɖú nyɔmɔɔ̀ ɖò dyí, ɓɛ́ ɔ kéɛ ɖɛ hwɔìn nimii-gmɛ̌ ɓě nìà gbàà kɔ̃̀ kɔ̃ mɔ̀à nyɔ́ún-nɔ̀mɔ̀-ɖɛ̀ fɔ̃̀ìn-naín nyɛɛ gã hĩinyɛɔ̀ kɔ̃ɛɛ bũ̌ po. Gbàà nìà kɛ nì ɓó ḿ dyúa nɔ̄ jàɖàìn-gbòɔ̀ mú. Ɔ ɖǎ ná nìǐn, nìí, ɔ mɛ púè nyɔmɔɔ̀ nyɔ sè ɓóɛɛ ɓó sáa-kɔ̃-zàìn-gbàà nìà ɓó jàɖàìn-gbòɔ̀ wĩín nyɛɛ gbɔí. Ɔ mɔ̀ gbàà kɔ̃̀ kɔ̃ ɓɛ́ wa fɔ̃̀ìn sáa-zàìn-ɖɛ̀ kɛ.

⁸ Ɔ ɖǎa náa nyuín, ɔ mɛ zà ɓìɖǐ ɓíɔ́ mɔ̀à nàmàǔn-sàǎ-zàìn-ɖɛ̀ɔ̀ kɛɛ cáná séín nìɛ̀ múɛɛ ɖé dyi. Ɔ xwíníín mɔ̀, ɔ mɛ zà ɓó cáná séín ɓáìn mɛ́ɔ̀ bũ̌in nyɛ

⁹ kèɛ̀ pɔnɔ-mɛ́ sɔ̃́ xwɛ̃́àìn ɓó ɔ gbe-zèɖèɔ̀ dyiɛ kè cáná ɓáìn wa kɔ̃in nyɛ kèɛ̀ pìùɔ̀ dà kpa ɖɛɔ̀.

¹⁰ Ɔ mɛ zà ɖɛ ɓěɛ̀ ɓìɖǐɔ̀ múin kà ɔ nyuà ɓìɖǐ mɔ̀ sáa-zàìn-ɖɛ̀ ɓá gbo kpɔ̃ìn jè dyíɛɛ nyuɛ kɛ. Ké ɔ mɛ ɖú ɖɛ ɓěɛ̀ dyí, ɓɛ́ ɔ ké wa gbàà kɔ̃̀ kɔ̃ mɔ̀à fɔ̃ɔ-sàǎ-zàìn-ɖɛ̀ fɔ̃̀ìn-naínɔ̀ kɛɛ kɔ̃ fɔ̃̀ìn.

¹¹ Kɛɛ ɔ mɛ ɖúɛ kúɖúùɔ̀ kè fɔ́ séínɔ̀ kè dúɔ̀ kèɛ̀ ɖáá ɓěɔ̀ kè xwíníín-ɖɛ̀ séínɔ̀ kèɛ̀ mɛ́ɔ̀ dyí.

¹² Ɔ xwíníín mɔ̀, wa mɛ ɖú ɓìɖǐ ɓíɔ́ɔ̀ ɖɛ séín sè ɓóɛɛ dyí, ɓɛ́ wa ké wa jàɖàìn-hwɔ̀ɖɔ̀ɔ̀ ɖeín kpa. Ɔ mɛ mɔ̀ pá ɓɛ́ ḿ ɖá ɔ hwɛ̀à múɛɛ mú. Ɔ mɔ̀ dɛ̀ ɓɛ́ wa kpaà tĩ́ɔ-pɛ̀ɛ̀ɔ̀ xwáɖáún wɛ̃. Ɖé tĩ́ɔ-kòòɔ̀ kɔ̃, ɖéɛ̀ wa mɛ po nyɛ dyí, ɓɛ́ wa ké ɖé wa fɔ̃̀ìn.

¹³ “Ɔ jǔ ké ɓě mɔ̀ Éézùɖùɛ̀-ɓòɖò gànáɔ̀ kɛɛ seó ɖei dyé, ké ɓě dyi gma ɓě ɓá ɖɛ ɓě ɓɛ́ ḿ ɖá ɓě mɛ ɓɔ́à nyuɛ kɛɛ jè dyíɛɛ ɖò wáɖá dyììn ɖé ɖɛ ɓěɛ̀ ɖò nyu-nyu mú ní, nìí, ɓě seó ɖei dyé dyɛo, kɛɛ zaa ɖǎ ɓě dúún wáɖá nɔ̀ɔ̀.

¹⁴ Ɔ dyi ná nìǐn, ti ɓě muɛ dyuòùn kà ɓě nyu nàmàǔn wɛ̃ɛ ní, nìí, ɓě mɛ ɖú ɓìɖǐ ɓíɔ́ ɖò dyí, ɓɛ́ ɓě kéɛ ɓóɛ jàɖàìn-gbòɔ̀ dyúa dyà, ɓɛ́ ɔ ké sáa-zàìn-ɖɛ̀ jǔ ɓó ɓěɛ̀ nàmàǔnɔ̀ jè.

¹⁵ Ɔ ɖǎ ná nìǐn, nìí, ɓěɛ̀ nyɔ vɛ̀nɛ̀ ɓěɔ̀ mɛ dè ɓìɖǐ ɓíɔ́ɔ̀ sɔ̃ dúún ɓó ḿ dyúa kĩ́ín, hwɛ̀ ɓɛ́ ɓě kéɛ ɓóɛ ɖáɓáìn.

¹⁶ Sɔ̀ìn ɓóɛ gboɛɛ, sáa-zà-nyɔ̀ vɛ̀nɛ̀ɔ̀ mɛ dyàà nyɔmɔɔ̀ ɖò nɔ̄ jàɖàìn-gbòɛ̀ mú.

¹⁷ Ɔ ɖǎa náa nyuín, nìí, ɔ mɛ kpa jìì-dyùà dyúáɖò ɖé nyɔmɔɔ̀ gbo, ɓɛ́ ɔ kéɛ ɖò ɓó faà-ɖɔ̀ɔ̀ dyúa ɓó ɓíɖíi dyi téìn ɓó ḿ dyúa. Ɔ mɛ nyùɛ̀n náa kpa mɛ̀nɛ̌ìn-sɔ̃́.

¹⁸ Sɔ̀ìn ɓóɛ gboɛɛ, nìí, ɔ mɛ ɖú nyɔmɔɔ̀ ɖò dyí, ɓɛ́ ɔ kéɛ ɖɛ hwɔìn nimii-gmɛ̌ ɓě nìà gbàà kɔ̃̀ kɔ̃ mɔ̀à nyɔ́ún-nɔ̀mɔ̀-ɖɛ̀ fɔ̃̀ìn-naín nyɛɛ gã hĩinyɛɔ̀ kɔ̃ɛɛ bũ̌ po. Gbàà nìà kɛ nì ɓó ḿ dyúa nɔ̄ jàɖàìn-gbòɛ̀ mú. Ɔ ɖǎa náa nyuín, ɔ mɛ púè nyɔmɔɔ̀ nyɔ sè ɓóɛɛ ɓó sáa-kɔ̃-zàìn-gbàà nìà ɓó jàɖàìn-gbòɔ̀ wĩín nyɛɛ gbɔí. Ɔ mɔ̀ gbàà kɔ̃̀ kɔ̃ ɓɛ́ wa fɔ̃̀ìn sáa-zàìn-ɖɛ̀ kɛ.

¹⁹ Ɔ ɖǎa náa nyuín, ɔ mɛ zàà cáná séínɔ̀ múin, ɓɛ́ ɔ kéɛ ɓóɛ sáa-kɔ̃-zàìn-gbààɔ̀ kɔ̃ fɔ̃̀ìn.

²⁰ Kà ɔ nyuà ɓìɖǐ ɓíɔ́ mɔ̀à ɔ mìɔùn nììn nàmàǔnɔ̀ sáa-zàìn-ɖɛ̀ɔ̀ nyuɛ kɛɛ, kà dyúáɖòɔ̀ kǎà ɔ mɛ nyu ɓìɖǐ ɓíɔ́ɔ̀ nyɔ nìà kɛ. Ɖɛ nìà kɛ mu ɓěɛ̀ nàmàǔnɔ̀ kɔ̃in-ɓáìn-ɖɛ̀ jǔùn, ɓɛ́ sáa-zà-nyɔ̀ vɛ̀nɛ̀ɔ̀ kéɛ nyu. Ɔ dyi ná nìǐn, nìí, ní mu ɓěɛ̀ nàmàǔnɔ̀ kɔ̃in zĩ̀ìn.

²¹ Sɔ̀ìn ɓóɛ gboɛɛ, nìí, wa mɛ ɖú ɓìɖǐ ɓíɔ́ɔ̀ ɖɛ séín sè ɓóɛɛ dyí, ɓɛ́ wa ké wa ɖé jàɖàìn-hwɔ̀ɖɔ̀ɔ̀ ɖeín kpa, ɓɛ́ wa ké ɖé wa fɔ̃̀ìn kà wa nyuà ɓìɖǐ tɔ̀ɔ̀ mɔ̀à sáa-zà-nyɔ̀ vɛ̀nɛ̀ɔ̀ nììn nàmàǔnɔ̀ sáa-zàìn-ɖɛ̀ɔ̀ kɛɛ fɔ̃ɔ kɛ. Ɖɛ nìà kɛ mɔ̀ ɓěɛ̀ nàmàǔnɔ̀ sáa-zàìn-ɖɛ̀.

²² “Ɔ jǔ ké nyɔ ɓěɔ̀ wuɖuí-kɔ̃̀-nyɔ̀ ɓěɔ̀ ɖò seó ɖei dyé, ké ɔ dyi gma ɓě ɓá ɖɛ ɓě ɓɛ́ ḿ ɖá ɓě mɛ ɓɔ́à nyuɛ kɛɛ jè dyíɛɛ ɖò wáɖá dyììn ɖé ɖɛ ɓěɛ̀ ɖò nyu-nyu mú ní, nìí, zaa ɖǎ ɔ dúún wáɖá.

²³ Ɔ ɖǎ ná nìǐn, ti ɔ muɛ dyuòùn kà ɔ nyu nàmàǔn wɛ̃ɛ ní, nìí, ɔ mɛ dyà vã́á ɖò, ɓɛ́ ɔ ké sáa-zàìn-ɖɛ̀ jǔ ɓó ɔ nàmàǔnɔ̀ jè. Vã́áɔ̀ mɛ ɓɔ́ kɛɛ ɖò ɓéɖéɛ.

²⁴ Ɔ ɖǎa náa nyuín, ɔ mɛ dè vã́áɔ̀ sɔ̃ dúún kĩ́ín, hwɛ̀ ɓɛ́ ɔ kéɛ ɖáɓá. Ɔ mɛ ɖáɓáìn ɓóɛ ḿ dyúa, dà ɓɛ́ wa ɖáɓáìn fɔ̃ɔ-sàǎ-zàìn-ɖɛ̀ɔ̀ kɛ. Ɖɛ nìà kɛ mɔ̀ nàmàǔn-sàǎ-zàìn-ɖɛ̀.

²⁵ Sɔ̀ìn ɓóɛ gboɛɛ, sáa-zà-nyɔ̀ ɓěɔ̀ ɖò mɛ ɓéɖéìn nàmàǔn-sàǎ-zàìn-ɖɛ̀ɔ̀ nyɔmɔɔ̀ ɖò jìì mánáín, ɓɛ́ ɔ kéɛ ɖɛ hwɔìn nimii-gmɛ̌ ɓě nìà gbàà kɔ̃̀ kɔ̃ mɔ̀à fɔ̃ɔ-sàǎ-zàìn-ɖɛ̀ɔ̀ nyùìn-naínɔ̀ kɛɛ gã hĩinyɛɔ̀ kɔ̃ɛɛ bũ̌ po. Nìí, ɔ mɛ púè nyɔmɔɔ̀ nyɔ sè ɓóɛɛ ɓó sáa-kɔ̃-zàìn-gbààɔ̀ gbɔí.

²⁶ Sɔ̀ìn ɓóɛ gboɛɛ, ɔ mɛ fɔ̃̀ìn sáa-zàìn-ɖɛ̀ɔ̀ cáná séínɔ̀ ɓó gbààɔ̀ kɔ̃ kà dyúáɖò kà wa nyuà sáa-zàìn-ɖɛ̀ ɓá gbo kpɔ̃ìn jè dyíɛɛ nììn cánáɔ̀ fɔ̃ɔ kɛ. Ɖɛ nìà kɛ mu wuɖuí-kɔ̃̀-nyɔ̀ɔ̀ nàmàǔnɔ̀ kɔ̃in-ɓáìn-ɖɛ̀ jǔùn, ɓɛ́ sáa-zà-nyɔ̀ɔ̀ kéɛ nyu. Ɔ dyi ná nìǐn, nìí, ní mu ɔ nàmàǔnɔ̀ kɔ̃in zĩ̀ìn.

²⁷ “Ɔ jǔ ké nyɔ tɔ̀ɔ̀ ɓěɔ̀ ɖò seó ɖei dyé, ké ɔ dyi gma ɓě ɓá ɖɛ ɓě ɓɛ́ ḿ ɖá ɓě mɛ ɓɔ́à nyuɛ kɛɛ jè dyíɛɛ ɖò wáɖá dyììn ɖé ɖɛ ɓěɛ̀ ɖò nyu-nyu mú ní, nìí, zaa ɖǎ ɔ dúún wáɖá.

²⁸ Ɔ ɖǎ ná nìǐn, ti ɔ muɛ dyuòùn kà ɔ nyu nàmàǔn wɛ̃ɛ ní, nìí, ɔ mɛ dyà gbǎà nyɔ́nɔ́ ɖò, ɓɛ́ ɔ ké sáa-zàìn-ɖɛ̀ jǔ ɓó ɔ nàmàǔnɔ̀ jè. Gbǎà nyɔ́nɔ́ɔ̀ mɛ ɓɔ́ kɛɛ ɖò ɓéɖéɛ.

²⁹ Ɔ ɖǎa náa nyuín, ɔ mɛ dè sáa-zàìn-ɖɛ̀ ɓɛ́ ɔ dyàà ɓó ɔ nàmàǔnɔ̀ jèɛɛ sɔ̃ dúún kĩ́ín, hwɛ̀ ɓɛ́ ɔ kéɛ ɖáɓá. Ɔ mɛ ɖáɓáìn ɓóɛ pá dyúáɖò kɔ̃̀ mú wa ɖáɓáìn fɔ̃ɔ-sàǎ-zàìn-ɖɛ̀ɔ̀ kɛ.

³⁰ Sɔ̀ìn ɓóɛ gboɛɛ, sáa-zà-nyɔ̀ ɓěɔ̀ ɖò mɛ ɓéɖéìn nyɔmɔɔ̀ ɖò jìì mánáín, ɓɛ́ ɔ kéɛ ɖɛ hwɔìn nimii-gmɛ̌ ɓě nìà gbàà kɔ̃̀ kɔ̃ mɔ̀à fɔ̃ɔ-sàǎ-zàìn-ɖɛ̀ɔ̀ nyùìn-naínɔ̀ kɛɛ gã hĩinyɛɔ̀ kɔ̃ɛɛ bũ̌ po. Nìí, ɔ mɛ púè nyɔmɔɔ̀ nyɔ sè ɓóɛɛ ɓó sáa-kɔ̃-zàìn-gbààɔ̀ gbɔí.

³¹ Ɔ ɖǎ ná nìǐn, nìí, nyɔ dyàà sáa-zàìn-ɖɛ̀ɔ̀ kɛɛ mɛ zà sáa-zàìn-ɖɛ̀ɔ̀ cáná séínɔ̀ ɖé dyi kà wa nyuà sáa-zàìn-ɖɛ̀ ɓá gbo kpɔ̃ìn jè dyíɛ, ɓɛ́ sáa-zà-nyɔ̀ɔ̀ kéɛ ɓóɛ sáa-kɔ̃-zàìn-gbààɔ̀ kɔ̃ fɔ̃̀ìn, ɓɛ́ ɔ ké sáa-zàìn-ɖɛ̀ kɔ̃̀ nyɔ́ dè ḿ hwìɖǐiɛɛ jǔ. Ɖɛ nìà kɛ mu nyɔɔ̀ nàmàǔnɔ̀ kɔ̃in-ɓáìn-ɖɛ̀ jǔùn, ɓɛ́ sáa-zà-nyɔ̀ɔ̀ kéɛ nyu. Ɔ dyi ná nìǐn, nìí, ní mu ɔ nàmàǔnɔ̀ kɔ̃in zĩ̀ìn.

³² “Ɔ jǔ ké nyɔɔ̀ dyi ɓáɖáá ɖò dyàà mɔ́, ɓɛ́ ɔ ké sáa-zàìn-ɖɛ̀ jǔ ɓó ɔ nàmàǔnɔ̀ jè ní, nìí, ɔ mɛ mɔ̀ ɓáɖáá nyɔ́nɔ́ se kɛɛ ɖò ɓéɖéɛ.

³³ Ɔ ɖǎa náa nyuín, nìí, ɔ mɛ dèɛ̀ sɔ̃ dúún. Sɔ̀ìn ɓóɛ gboɛɛ, nìí, ɔ mɛ ɖáɓáìn ɓóɛ pá dyúáɖò kɔ̃̀ mú wa ɖáɓáìn fɔ̃ɔ-sàǎ-zàìn-ɖɛ̀ɔ̀ kɛ, ɓɛ́ ɔ ké nàmàǔn-sàǎ-zàìn-ɖɛ̀ jǔ.

³⁴ Ɔ ɖǎ ná nìǐn, sáa-zà-nyɔ̀ɔ̀ mɛ ɓéɖéìn nyɔmɔɔ̀ ɖò jìì mánáín, ɓɛ́ ɔ kéɛ ɖɛ hwɔìn nimii-gmɛ̌ ɓě nìà gbàà kɔ̃̀ kɔ̃ mɔ̀à fɔ̃ɔ-sàǎ-zàìn-ɖɛ̀ɔ̀ nyùìn-naínɔ̀ kɛɛ gã hĩinyɛɔ̀ kɔ̃ɛɛ bũ̌ po. Nìí, ɔ mɛ púè nyɔmɔɔ̀ nyɔ sè ɓóɛɛ ɓó sáa-kɔ̃-zàìn-gbààɔ̀ gbɔí.

³⁵ Ɔ ɖǎ ná nìǐn, nìí, nyɔ dyàà sáa-zàìn-ɖɛ̀ɔ̀ kɛɛ mɛ zà sáa-zàìn-ɖɛ̀ɔ̀ cáná séínɔ̀ ɖé dyi kà wa nyuà ɓáɖáá mɔ̀à sáa-zàìn-ɖɛ̀ ɓá gbo kpɔ̃ìn jè dyíɛ, ɓɛ́ sáa-zà-nyɔ̀ɔ̀ kéɛ ɓóɛ sáa-kɔ̃-zàìn-gbààɔ̀ kɔ̃ fɔ̃̀ìn ɓó sáa-zàìn-ɖɛ̀ tɔ̀ɔ̀ ɓě ɓɛ́ wa nyí ḿ wɛ̃ɛ kɔ̃in. Ɖɛ nìà kɛ mu nyɔɔ̀ nàmàǔnɔ̀ kɔ̃in-ɓáìn-ɖɛ̀ jǔùn, ɓɛ́ sáa-zà-nyɔ̀ɔ̀ kéɛ nyu. Ɔ dyi ná nìǐn, nìí, ní mu ɔ nàmàǔnɔ̀ kɔ̃in zĩ̀ìn.