Ɖìvéɖékɔ̀ 3 - Ɓǎsɔ́ɔ̀ Báɓòɔ̀

Sáa-zàìn-ɖɛ̀ ɓá gbo-kpɔ̃ìn-kpɔ̃ìn jè dyíɛ

¹ “Ɔ jǔ ké nyɔ ɖò dyi ɔ ɓìɖǐ ɓěɔ̀ nyɔ́nɔ́ ɖò mɔɔ ɓíɔ́ ɖò ḿ gbo sáa zàìn mɔ́ ɓó gbo-kpɔ̃ìn-sàǎ-zàìn-ɖɛ̀ jè ní, nìí, ɔ mɛ dyà ḿ ɓìɖǐ se kɛɛ ɖò ɓéɖéɛ.

² Ɔ ɖǎa náa nyuín, nìí, ɔ mɛ dèɛ̀ sɔ̃ dúún ɓó jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ dyéàìn nyɛɛ wĩín. Sɔ̀ìn ɓóɛ gboɛɛ, nìí, ɔ mɛ ɖáɓáa, ɓɛ́ Eɖóúnɛ̀ dyú-gàà ɓě mɔ̀à sáa-zà-nyɔ̀ ɓěɔ̀ kɛɛ kéɛ nyɔmɔɔ̀ dyí ɖú, ɓɛ́ wa kéɛ sáa-kɔ̃-zàìn-gbààɔ̀ wáká hĩinyɛɔ̀ bũ̌in mɛ́nɛ́ìn.

³ Sɔ̀ìn ɓóɛ gboɛɛ, nyɔ dyàà sáa-zàìn-ɖɛ̀ɔ̀ kɛɛ mɛ zà ɓó gbo-kpɔ̃ìn-sàǎ-zàìn-ɖɛ̀ɔ̀ wáká ɖíɛ́ ɓě, ɓɛ́ wa ké ɖii-ɖɛ̀-nyìǐ-ɖɛ̀ jǔ ɓó ḿ bìì. Wáká ɓěɔ̀, wa kɛà kɛ̀. Wa mɔ̀ nyúà-ɖɛ̀ɔ̀ cáná séín ɓáìn mɛ́ɔ̀ bũ̌in nyɛ

⁴ kèɛ̀ pɔnɔ-mɛ́ sɔ̃́ xwɛ̃́àìn ɓó ɔ gbe-zèɖèɔ̀ dyiɛ kè cáná ɓáìn wa kɔ̃in nyɛ kèɛ̀ pìùɔ̀ dà kpa ɖɛɔ̀.

⁵ Sáa-zà-nyɔ̀ ɓěɔ̀ mɛ ɖú ɖɛ séín ɓěɛ̀ dyí, ɓɛ́ wa kéɛ ɓóɛ sáa-kɔ̃-zàìn-gbààɔ̀ kɔ̃ fɔ̃̀ìn. Wa mɛ fɔ̃̀ìn ɓóɛ fɔ̃ɔ-sàǎ-zàìn-ɖɛ̀ ɓɛ́ ɔ nìà sĩɛń ɓó nyɛ-mìɔ̀ɔ̀ múɛɛ kɔ̃. Ɖɛ nìà kɛ mu nyíí-ɖɛ̀ ɓɛ́ ɔ mɔ̀ ɖii-ɖɛ̀ kɔ̃̀ nyɔ́ dè ḿ hwìɖǐiɛɛ jǔùn.

⁶ “Ɔ jǔ ké nyɔ ɖò dyi ɓáɖáá ɖò mɔɔ wiɖi ɖò ḿ gbo sáa zàìn mɔ́ ɓó gbo-kpɔ̃ìn-sàǎ-zàìn-ɖɛ̀ jè ní, nìí, ɔ mɛ dyàà nyɔ́nɔ́ mɔɔ ɓíɔ́ ɓɛ́ ɔ se kɛɛ ɖò ɓéɖéɛ.

⁷ Ɔ jǔ ké nyɔ ɖò dyi ɓáɖáá ɖò ḿ gbo sáa zàìn mɔ́ ɓó gbo-kpɔ̃ìn-sàǎ-zàìn-ɖɛ̀ jè ní, nìí, ɔ mɛ dyàà ḿ gbo,

⁸ ké ɔ mɛ dèɛ̀ sɔ̃ dúún ɓó jàɖàìn-gbòɔ̀ dyúa. Sɔ̀ìn ɓóɛ gboɛɛ, nìí, ɔ mɛ ɖáɓáa, ɓɛ́ Eɖóúnɛ̀ dyú-gàà ɓěɔ̀ kéɛ nyɔmɔɔ̀ dyí ɖú, ɓɛ́ wa kéɛ sáa-kɔ̃-zàìn-gbààɔ̀ wáká hĩinyɛɔ̀ bũ̌in mɛ́nɛ́ìn.

⁹ Sɔ̀ìn ɓóɛ gboɛɛ, nyɔ dyàà sáa-zàìn-ɖɛ̀ɔ̀ kɛɛ mɛ zà ɓó gbo-kpɔ̃ìn-sàǎ-zàìn-ɖɛ̀ɔ̀ cáná séín nìɛ̀ múɛɛ ɖé dyi, ɓɛ́ ɔ ké ɖii-ɖɛ̀-nyìǐ-ɖɛ̀ jǔ ɓó ḿ bìì. Ɔ xwíníín mɔ̀, ɔ mɛ zà ɓó nyúà-ɖɛ̀ɔ̀ vɔ̃ nì cánáún gàná cɛ̃̀àìn ɖéɛ kɔ̃-kpàɔ̀ dyéɖéín dyíɛ kè cáná séín ɓáìn mɛ́ɔ̀ bũ̌in nyɛ

¹⁰ kèɛ̀ pɔnɔ-mɛ́ sɔ̃́ xwɛ̃́àìn ɓó ɔ gbe-zèɖèɔ̀ dyiɛ kè cáná ɓáìn wa kɔ̃in nyɛ kèɛ̀ pìùɔ̀ dà kpa ɖɛɔ̀.

¹¹ Sáa-zà-nyɔ̀ ɓěɔ̀ mɛ ɖú ɖɛ séín ɓěɛ̀ dyí, ɓɛ́ wa kéɛ ɓóɛ sáa-kɔ̃-zàìn-gbààɔ̀ kɔ̃ fɔ̃̀ìn, ɓɛ́ wa ké ɖii-ɖɛ̀-nyìǐ-ɖɛ̀ jǔ ɓó ḿ bìì.

¹² “Ɔ jǔ ké nyɔ ɖò dyi wiɖi ɖò ḿ gbo sáa zàìn mɔ́ ɓó gbo-kpɔ̃ìn-sàǎ-zàìn-ɖɛ̀ jè ní, nìí, ɔ mɛ dyàà ḿ gbo,

¹³ ké ɔ mɛ dèɛ̀ sɔ̃ dúún ɓó jàɖàìn-gbòɔ̀ dyúa. Sɔ̀ìn ɓóɛ gboɛɛ, nìí, ɔ mɛ ɖáɓáa, ɓɛ́ Eɖóúnɛ̀ dyú-gàà ɓěɔ̀ kéɛ nyɔmɔɔ̀ dyí ɖú, ɓɛ́ wa kéɛ sáa-kɔ̃-zàìn-gbààɔ̀ wáká hĩinyɛɔ̀ bũ̌in mɛ́nɛ́ìn.

¹⁴ Sɔ̀ìn ɓóɛ gboɛɛ, nyɔ dyàà sáa-zàìn-ɖɛ̀ɔ̀ kɛɛ mɛ zà ɓó gbo-kpɔ̃ìn-sàǎ-zàìn-ɖɛ̀ɔ̀ wáká ɖíɛ́ ɓě, ɓɛ́ wa ké ɖii-ɖɛ̀-nyìǐ-ɖɛ̀ jǔ ɓó ḿ bìì. Wáká ɓěɔ̀, wa kɛà kɛ̀. Wa mɔ̀ cáná séín ɓáìn mɛ́ɔ̀ bũ̌in nyɛ

¹⁵ kèɛ̀ pɔnɔ-mɛ́ sɔ̃́ xwɛ̃́àìn ɓó ɔ gbe-zèɖèɔ̀ dyiɛ kè cáná ɓáìn wa kɔ̃in nyɛ kèɛ̀ pìùɔ̀ dà kpa ɖɛɔ̀.

¹⁶ Sáa-zà-nyɔ̀ ɓěɔ̀ mɛ ɖú ɖɛ séín ɓěɛ̀ dyí, ɓɛ́ wa kéɛ ɓóɛ sáa-kɔ̃-zàìn-gbààɔ̀ kɔ̃ fɔ̃̀ìn. Ɖɛ nìà kɛ mu nyíí-ɖɛ̀ ɓɛ́ ɔ mɔ̀ ɖii-ɖɛ̀ kɔ̃̀ nyɔ́ dè ḿ hwìɖǐiɛɛ jǔùn. Mɔ̄ mɔ̀à Bounɓoɔ̀ kɛɛ, mɔ̄ kɔ̃̀ nyúà-ɖɛ̀-cànà séínɔ̀.

¹⁷ Ɔ jèɛɛ, ɓěǐn ɖá ɓɛ́ ɓě ké nyúà-ɖɛ̀ ɖòɛ̀ nyɔmɔɔ mɔɔ ɔ cáná ɖò ɖi fɔɔ cá. Ɖɛ nìà kɛ mɛ mɔ̀ gma ɓó ɓě kè ɓěɛ̀ xwíníín-dyù ɓě bìì kánáá pū ɖé dɛ̀ kã̀ìn séín ɓě mu nììn nyɛ.”