Ɖìvéɖékɔ̀ 27 - Ɓǎsɔ́ɔ̀ Báɓòɔ̀

Gma ɓě ɓá ɖɛ ɓě ɓɛ́ nyɔ ɖò ɖǎ Bounɓoɔ̀ nyíɛɛ jè dyíɛ

¹ Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá,

² “Cɛ̃ɛ Éézùɖùɛ̀-dyù ɓěɔ̀ gbo kà ḿ ɖá ɔ jǔ ké nyɔ ɖò dyi wuɖu-ɖi-ɖi jɛ́ɛ́ ɖò nyu, ké ɔ dyi ɔ mǔè-nyɔ̀ǔn-dyù ɖò ḿ nyí ní, nìí, ɔ ɓɛ́ìn nyɔɔ̀ gbǎà ɖe dyììn ɖé wíɖí mú.

³ Kǎà ɔ mɛ nyu kà nìɛ̀. Ɔ jǔ ké nyɔɔ̀ dyi gàa ɓɛ́ ɔ zɔ̃ nì ɓó zɔ̃ kpáɖá-nyɔ kè kpáɖá-nyɔ tã pṹa kɛɛ jǔ ní, nìí, wa mɛ pɛ́ɛ̀ séɓàɖà-cɛ̀kò kpáɖá-nyɔ sɔ̃́ ɓaɖa-bùè ɓó ɔ jè, dyììn ɖé kà sáa-zà-nyɔ̀ ɓěɔ̀ nììn séɓàɖà-cɛ̀kò nyu nìɛ̀ kɛɛ mú.

⁴ Ké ɔ jǔ ké nyɔɔ̀ dyi màa jǔǐn, nìí, wa mɛ pɛ́ɛ̀ cɛ́kò kpáɖá-nyɔ ɓaɖa-bùè ɓó ɔ jè.

⁵ Ɔ jǔ ké ɔ dyi dyú kɔ̃̀ zɔ̃ nì ɓó zɔ̃ hm̀m̌ kè kpáɖá-nyɔ pṹa kɛɛ jǔǐn, nìí, gàa-dyù mɛ kpa cɛ́kò kpáɖá-nyɔ ɖò, ké màa-dyù mɛ kpa cɛ́kò ɓaɖa-bùè.

⁶ Ɔ jǔ ké ɔ dyi dyú ɓɛ́ ɔ séè zɔ̃ hm̀m̌ nyuɛɛ jǔǐn, nìí, gàa-dyù mɛ kpa cɛ́kò hm̀m̌, ké màa-dyù mɛ kpa cɛ́kò tã.

⁷ Ɔ jǔ ké nyɔɔ̀ dyi zɔ̃ kpáɖá-nyɔ tã mɔɔ zi kɔ̃ nyuín, nìí, gàa mɛ kpa cɛ́kò ɓaɖa-bùè sè hm̀m̌, ké màa mɛ kpa cɛ́kò ɓaɖa-bùè.

⁸ Kɛɛ ɔ jǔ ké nyɔ ɖià wuɖuɔ̀ kɛɛ dyi gǎ dyé mìɔ, ké ɔ se wíɖí jĩ̀ kà nyɔɔ̀ kpa kɛɛ pɛ́ɛ̀ ɓɛ́ìn ní, nìí, ɔ mɛ dyà nyɔ ɔ kéà ḿ nyíɛɛ sáa-zà-nyɔ̀ ɓěɔ̀ gbo, ɓɛ́ sáa-zà-nyɔ̀ ɓěɔ̀ ké jĩ̀ kà ɓɛ́ nyɔ ɖià wuɖuɔ̀ kɛɛ ɓɛ́ìn pɛ́ɛ̀ kɛɛ nyɛ́nɛ́ ɖá.

⁹ “Ɔ jǔ ké ɖɛ kɔ̃̀ jè nyɔɔ̀ ɖià wuɖuɔ̀ kɛɛ dyi nyúà-ɖɛ̀ ɖò ɓɛ́ ɔ nɔ̀mɔ̀ dyíin ɓó sáa zàìn jèɛɛ jǔ ní, nìí, nyúà-ɖɛ̀ nì náa ɓéɖé ɓɛ́ ɔ ké wáká kpá ɓó ḿ bìì, ké nyɔɔ̀ mɛ ɓɔ́ɔ gbǎà fɔɔ cá.

¹⁰ Ɔ jèɛɛ, nyɔɔ̀ mɛ ɓɔ́ɔ ɖɛ kà kò ɖò gboi zĩàìn. Kɛbì nyúà-ɖɛ̀ɔ̀ mɛ nyìnììn dyíin nyɛɛ, ɔ mɛ ɓɔ́ɔ nyúà-ɖɛ̀ nɔ̀mɔ̀ dyíin bɛ̃̌ǐn poɛ, mɔɔ kɛbì nyúà-ɖɛ̀ɔ̀ mɛ nɔ̀mɔ̀ dyíin nyɛɛ, ɔ mɛ ɓɔ́ɔ nyúà-ɖɛ̀ nyìnììn dyíin bɛ̃̌ǐn poɛ. Ɔ jǔ ké ɔ dyiɔ́ nyúà-ɖɛ̀ɔ̀ ɔ mǔè-nyùà-ɖɛ̀ ɖò gboi zĩàìn ní, nìí, nyúà-ɖɛ̀ sɔ̃́ɔ̀ ɓéɖé ɓɛ́ wa ké wáká kpá ɓó ḿ bìì.

¹¹ Kɛɛ ɔ jǔ ké ɖɛ kɔ̃̀ jè ɔ ɖià wuɖuɔ̀ kɛɛ dyi nyúà-ɖɛ̀ ɖò ɓɛ́ ɔ se dyíin nɔ̀mɔ̀ ɓó sáa zàìn jèɛɛ jǔ ní, nìí, nyɔɔ̀ mɛ dyà nyúà-ɖɛ̀ɔ̀ sáa-zà-nyɔ̀ ɓěɔ̀ gbo.

¹² Ké sáa-zà-nyɔ̀ ɓěɔ̀ ɖò mɛ gmɔìn bũ̌in, ɓɛ́ ɔ kéɛ dɛ̀ nɔ̀mɔ̀ dyíin nyɛ kè dɛ̀ nyìnììn dyíin nyɛɛ dyé, ɓɛ́ ɔ kéɛ píɔ́ taɓa. Wíɖí jĩ̀ kà ɓɛ́ sáa-zà-nyɔ̀ɔ̀ mu nyɛ́nɛ́ ɖáùn wɛ̃ɛ, jĩ̀ náa ɔ nyúà-ɖɛ̀ɔ̀ mu kpaùn.

¹³ Ɔ jǔ ké nyɔ kɔ̃̀à nyúà-ɖɛ̀ɔ̀ kɛɛ dyiɛ gbǎà mɔ́ ní, nìí, ɔ mɛ po jĩ̀ kà ɓɛ́ nyúà-ɖɛ̀ɔ̀ kpa kɛɛ wáká hm̀m̌ nììn ɓó kɔ̃in ɖe.

¹⁴ “Ɔ jǔ ké nyɔ ɖò dyi ɔ gbǒ gànáɔ̀ ḿ nyí ní, nìí, sáa-zà-nyɔ̀ɔ̀ mɛ gmɔìn jè múin, ɓɛ́ ɔ kéɛ dɛ̀ nɔ̀mɔ̀ dyíin nyɛ kè dɛ̀ nyìnììn dyíin nyɛɛ dyé, ɓɛ́ ɔ kéɛ píɔ́ taɓa. Wíɖí jĩ̀ kà ɓɛ́ sáa-zà-nyɔ̀ɔ̀ mu nyɛ́nɛ́ ɖáùn wɛ̃ɛ, jĩ̀ náa ɔ gbǒɔ̀ mu kpaùn.

¹⁵ Ɔ jǔ ké nyɔ nyíà ḿ gbǒɔ̀ kɛɛ dyiɛ gbǎà mɔ́ ní, nìí, ɔ mɛ po jĩ̀ kà ɓɛ́ gbǒɔ̀ kpa kɛɛ wáká hm̀m̌ nììn ɓó kɔ̃in ɖe. Ɔ dyiɛ náa nyuín, gbǒɔ̀ mu ɔ kɔ̃̀ɔ̀-ɖɛ̀ jǔùn ɖe.

¹⁶ “Ɔ jǔ ké nyɔ ɖò dyi pá ɓɛ́ ɔ gbǒ-xwíníín-nyɔ̀ ɓěɔ̀ kɔ̃̀ɛɛ ɖò ḿ nyí ní, nìí, báɖè-dyùà ɓɔ̀ɔ̌ jĩ̀ kà ɓɛ́ìn ɓó páɔ̀ kɔ̃ kpáa kɛɛ, wa mɛ gmɔ̀ xwíníín, ɓɛ́ wa ké páɔ̀ píɔ́ taɓa. Ɔ jǔ ké páɔ̀ dyi báɖè-ɓɔ̀ɔ̌ tã kpaa ɓɛ́ìn ní, nìí, ɔ mɛ kpa séɓàɖà-cɛ̀kò kpáɖá-nyɔ sɔ̃́ ɓaɖa-bùè.

¹⁷ Ɔ jǔ ké nyɔɔ̀ dyi ɔ páɔ̀ ḿ nyí ɖé ɖɛ-séín-ɖe-tò-zɔ̃̀ɔ̀ xwíníín ní, nìí, píɔ́ ɓɛ́ sáa-zà-nyɔ̀ɔ̀ mu nyɛ́nɛ́ ɖáùn ɓó tia ɓaɖaa, kǎà ɔ mɛ sè.

¹⁸ Kɛɛ ɔ jǔ ké ɖɛ-séín-ɖe-tò-zɔ̃̀ɔ̀ dyi dyi zi, hwɛ̀ ké nyɔɔ̀ dyi ḿ páɔ̀ nyí ní, nìí, sáa-zà-nyɔ̀ɔ̀ mɛ gmɔ̀ zɔ̃ jĩ̀ kà sè ɓó dyúa hwɛ̀ ɓɛ́ ɖɛ-séín-ɖe-tò-zɔ̃̀ɔ̀ ɖò ké ɓó nyiniɛɛ xwíníín, ɓɛ́ ɔ kéɛ píɔ́ taɓa. Ɔ ɖǎ ná nìǐn, nìí, páɔ̀ píɔ́ɔ̀ mu ɓíɖíi dyiìn.

¹⁹ Ɔ jǔ ké nyɔ nyíà ḿ páɔ̀ kɛɛ dyiɛ gbǎà mɔ́ ní, nìí, ɔ mɛ po wíɖí jĩ̀ kà ɓɛ́ páɔ̀ kpa kɛɛ wáká hm̀m̌ nììn ɓó kɔ̃in ɖe. Ɔ ɖǎ ná nìǐn, nìí, páɔ̀ mɔ̀ǎ ɔ kɔ̃̀ɔ̀-ɖɛ̀ ɖe.

²⁰ Kɛɛ ɔ jǔ ké ɔ se páɔ̀ gbǎà hwɛ̀ ɓɛ́ ɖɛ-séín-ɖe-tò-zɔ̃̀ɔ̀ ké ɓó nyini ní, mɔɔ ké ɔ seɛ gbǎà, ké ɔ dyiɛ nyɔ ɖò gbo pèɖèìn ní, nìí, ɔ mɛ ɓɔ́ɔ gbǎà ɖe fɔɔ cá.

²¹ Ti ɓɛ́ páɔ̀ mu buɛ̀ìn ɖé ɖɛ-séín-ɖe-tò-zɔ̃̀ɔ̀ xwíníín nyɛɛ ní, wa ɓéɖé ɓɛ́ wa kéɛ wáká po ɓó ḿ bìì, ɓɛ́ ɔ ké ní kɔ̃̀ɔ̀-ɖɛ̀ jǔ kánáá pū. Ɔ ɖǎ ná nìǐn, nìí, páɔ̀ muá sáa-zà-nyɔ̀ ɓěɔ̀ kɔ̃̀ɔ̀-ɖɛ̀ jǔùn ɖekè.

²² “Ɔ jǔ ké nyɔ ɖò dyi pá ɓɛ́ ɔ dɔ̃ ɔ mǔè ɖò gbo, ké páɔ̀ se ɔ gbǒ-xwíníín-pàɔ̀ ɖòɛɛ ḿ nyí ní,

²³ nìí, sáa-zà-nyɔ̀ɔ̀ mɛ gmɔ̀ zɔ̃ jĩ̀ kà sè ɓó dyúa hwɛ̀ ɓɛ́ ɖɛ-séín-ɖe-tò-zɔ̃̀ɔ̀ ké ɓó nyiniɛɛ xwíníín, ɓɛ́ ɔ kéɛ píɔ́ taɓa. Ké nyɔɔ̀ mɛ pɛ́ɛ̀ páɔ̀ jè wàɖà, ké wíɖíɔ̀ mɔ̀ ní kɔ̃̀ɔ̀-ɖɛ̀.

²⁴ Sɔ̀ìn ɓóɛ gboɛɛ, nyɔɔ̀ mɛ tò páɔ̀ nyɔ ɓɛ́ ɔ dɔ̃ɔ ma kà gbo kĩ́ín nyɛɛ dyí ɖe ɖé ɖɛ-séín-ɖe-tò-zɔ̃̀ɔ̀ xwíníín.

²⁵ “Sáa-zà-nyɔ̀ ɓěɔ̀ mɛ taɓa ɖɛ ɖò-ɖò ɓěɛ̀ píɔ́ dyììn ɖé kà sáa-zà-nyɔ̀ ɓěɔ̀ nììn cɛ́kò nyu nìɛ̀ kɛɛ mú. Géwàɖà-pĩ̀à kpáɖá-nyɔ ɖò sɔ̀ cɛ́kò dyúáɖò mú.

²⁶ “Nyɔ ɖò ní ɖá ɓɛ́ ɔ ké ḿ nyúà-ɖɛ̀ ɖòɛ̀ nyíɔ́-dyù nyí, sepóɛɖé mɔ̄ kɔ̃̀ nyíɔ́-dyùɔ̀ nɔ̀ɔ̀. Kɛbì ɔ mɛ mɔ̀ ɓìɖǐ-dyù mɔɔ ɓáɖáá-dyù mɔɔ wiɖi-dyù ɖòɛɛ, mɔ̄ kɔ̃̀ɔ̀.

²⁷ Kɛɛ ɔ jǔ ké nyíɔ́-dyùɔ̀ dyi nyúà-ɖɛ̀ ɖò ɓɛ́ ɔ se dyíin nɔ̀mɔ̀ ɓó sáa zàìn jèɛɛ jǔ ní, nìí, nyɔ kɔ̃̀à nyúà-ɖɛ̀ɔ̀ kɛɛ ɓɛ́ìn gbǎà dyììn ɖé wíɖí jĩ̀ kà ɓɛ́ sáa-zà-nyɔ̀ɔ̀ ɖá nyɛ́nɛ́ kɛɛ mú, ké ɔ mɛ po jĩ̀ kà ɓɛ́ nyúà-ɖɛ̀ɔ̀ kpa kɛɛ wáká hm̀m̌ nììn ɓó kɔ̃in ɖe. Ɔ jǔ ké nyɔɔ̀ seɛ gbǎà ní, nìí, sáa-zà-nyɔ̀ɔ̀ mɛ pèɖèɛ̀n wíɖí jĩ̀ kà ɓɛ́ ɔ kpa kɛɛ ɖé nyɔ ɖò gbo.

²⁸ “Ɖɛ kã̀ìn séín ɓɛ́ nyɔ ɖò kɔ̃̀, ké ɔ poɛ wáká, ɓɛ́ ɔ ké ní kɔ̃̀ɔ̀-ɖɛ̀ jǔ kánáá pūɛɛ, nyɔ ɖò mɛ ɓɔ́ɔ peɖeɛ, mɔɔ ké ɔ mɛ ɓɔ́ɔ gbǎà fɔɔ cá. Kɛbì ɔ mɛ mɔ̀ nyɔǔn-dyù mɔɔ nyúà-ɖɛ̀ ɖò mɔɔ gbǒ-xwíníín-pà ɖòɛɛ, nyɔɔ̀ mɛ ɓɔ́ ɖɛ ɓěɛ̀ ɖò peɖeɛ, mɔɔ ké ɔ mɛ ɓɔ́ɔ gbǎà, sepóɛɖé ɖɛ kã̀ìn séín ɓɛ́ wa po kà ɓó wáká ɓó ḿ bììɛɛ, mɔ̄ kɔ̃̀ wa.

²⁹ Nyɔ ɖò mɛ ɓɔ́ nyɔ ɖò ɓɛ́ wa po kà ɓó wáká ɓó ḿ bììɛɛ gbǎà. Wa ɓéɖé ɓɛ́ wa ké ɔ ɖáɓá wɛ̃́ɛ́.

³⁰ “Ɖɛ kã̀ìn séín mu ɖé ɓěɛ̀ ɓóɖóɔ̀ kɔ̃ bãùn wɛ̃ɛ ɓàɖàìn-bùèɔ̀, mɔ̄ kɔ̃̀ɔ̀, kɛbì ɔ mɛ mɔ̀ ɓáá-ɖɛ̀-ɓò mɔɔ tòɖòò-cù-ɓò kɛ. Wa mɛ poɛ wáká ɓó ḿ bìì.

³¹ Ɔ jǔ ké nyɔ ɖò dyi ɔ ɓàɖàìn-bùèɔ̀ ɖò gbǎà mɔ́ ní, nìí, nyɔɔ̀ mɛ po jĩ̀ kà ɓɛ́ ɖɛɔ̀ kpa kɛɛ wáká hm̀m̌ nììn ɓó kɔ̃in ɖé.

³² Ké ɓìɖǐ kè ɓáɖáá kè wiɖi séín ɓěɔ̀ ɓàɖàìn-bùèɔ̀, mɔ̄ kɔ̃̀ɔ̀ ɖekè. Ti ɓáɖáá-dyí-gmɔ̀-nyɔ̀ ɖò mu ɔ nyúà-ɖɛ̀ ɓěɔ̀ zɛɖɛɛ́ nììn nyɛɛ, ɔ ɓàɖàìn-bùèɔ̀, mɔ̄ kɔ̃̀ɔ̀.

³³ Nyɔɔ̀ ní ɖá ɓɛ́ ɔ kéɛ nɔ̀mɔ̀ kɔ̃inɔ̀ ɖéɛ nyìnììn kɔ̃inɔ̀ múin zà ɓó ɔ mìɔùn bìì, mɔɔ ké ɔ ní ɖá ɓɛ́ ɔ kéɛ ɓàɖàìn-bùèɔ̀ ɖɛ kà kò ɖò gboi zĩàìn. Ɔ jǔ ké nyɔɔ̀ dyiɔ́ nyúà-ɖɛ̀ɔ̀ gboi zĩàìn ní, nìí, ɔ kè nyɔ ɓɛ́ ɔ poà bɛ̃̌ǐn nyɛɛ, wa sɔ̃́ɔ̀ ɓéɖé ɓɛ́ wa ké wáká kpá ɓó ḿ bìì, ké nyɔɔ̀ mɛ ɓɔ́ wa gbǎà fɔɔ cá.”

³⁴ Kǎà gma ɓě ɓɛ́ Bounɓoɔ̀ nyí ma kà Mózè ɖé Sányà-tòɖòɔ̀ dya, ɓó Éézùɖùɛ̀-nyɔ̀ ɓěɔ̀ bììɛɛ jè nyu nìɛ̀.