Ɖìvéɖékɔ̀ 18 - Ɓǎsɔ́ɔ̀ Báɓòɔ̀

Gma ɓě ɓá gàa ɖò kè màa ɖòɛ̀ da nì jè dyíɛ

¹ Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá,

² “Cɛ̃ɛ Éézùɖùɛ̀-dyù ɓěɔ̀ gbo kà ḿ ɖá mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛ̀.

³ Ɔ jèɛɛ, ɓě mɛ ɓɔ́ kpeɖe ɓě ɓɛ́ Íjè-nyɔ̀ ɓě kɔ̃̀ ɓíɖí-ɓòɖò ɓɛ́ ɓě cĩ́ ma kà kɔ̃ɛɛ nyuà kɛɛ ɖò nyuɛ, ké ɓě mɛ ɓɔ́ kpeɖe ɓě ɓɛ́ Kénà-nyɔ̀ ɓě kɔ̃̀ ɓíɖí-ɓòɖò ɓɛ́ ḿ nìà ɓě kɔ̃ kpauń wɛ̃ɛ nyuà kɛɛ ɖò nyuɛ. Ɓěǐn ɖá ɓɛ́ ɓě ké waà kpeɖe ɓěɔ̀ kíɖíí sí.

⁴ Kɛɛ ɓě mɛ kpɔ̃ ní gma ɓěɔ̀ dyi kóɖó-kóɖó, ɓɛ́ ɓě ké wa kíɖíí sí. Sepóɛɖé mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛ̀.

⁵ Ɓě mɛ kpɔ̃ ní gma séín ɓěɔ̀ dyi kóɖó-kóɖó. Mɔ̄ mɔ̀ Bounɓoɔ̀ jèɛɛ, nyɔ mu ní gma ɓěɔ̀ dyi kpɔ̃ùn wɛ̃ɛ mu cĩ́ìn dyììn ɖéɛ mú.

⁶ “Gma ɓěɔ̀ kɛà kɛ̀. Mɔ̄ mɔ̀ Bounɓoɔ̀ jèɛɛ, nyɔ ɖò ní ɖá ɓɛ́ ɔ kè nyɔ ɖò mɔ̀ ɔ gbǒ-xwíníín-nyɔ̀ɔ̀ ɖòɛɛ ké ɓó da nì.

⁷ Nyɔ ɖò ní ɖá ɓɛ́ ɔ ké ɔ ɓǎ zùǔn zàìn dyììn ɖé nyɔɔ̀ kè ɔ ɖe da-nì-nì mú. Ɔ mɔ̀ nyɔɔ̀ ɖe jèɛɛ, nyɔɔ̀ kè ɔ ɖeɔ̀ mɛ ɓɔ́ ɓó da nìɛ̀.

⁸ Nyɔ ɖò ní ɖá ɓɛ́ ɔ kè ɔ ɓǎà gmàà ké ɓó da nì, sepóɛɖé ɔ mɔ̀ ɔ ɓǎà gbɔ-fɔ̀nɔ̀-fɔ̀nɔ̀.

⁹ Nyɔ ɖò ní ɖá ɓɛ́ ɔ kè ɔ ɖíí-màà ɖò ké ɓó da nì, kɛbì ɔ mɛ mɔ̀ ɔ ɓǎà dyú-màà kɛ, mɔɔ kɛbì ɔ mɛ mɔ̀ ɔ ɖeɛ̀ xwíníín-zà-dyù-màà ɓɛ́ ɔ gmɛ̀ìn ɖé wa ɓíɖí-taún mɔɔ dà kà kò ɖòɛ.

¹⁰ Nyɔ ɖò ní ɖá ɓɛ́ ɔ kè ɔ dyú-gàà nììn dyú-màà ɖò mɔɔ ɔ dyú-màà nììn dyú-màà ɖò ké ɓó da nì, sepóɛɖé ɔ gbɔ-fɔ̀nɔ̀-fɔ̀nɔ̀ mɔ̀ nyɔɔ̀ nììn gbɔ-fɔ̀nɔ̀-fɔ̀nɔ̀.

¹¹ Nyɔ ɖò ní ɖá ɓɛ́ ɔ kè ɔ ɓǎà dyú-màà ɓɛ́ ɔ ɓǎɔ̀ kè ɔ gmàà kà kò ɖò ɓɛ́ ɔ ɓǎɔ̀ kpɔ̃ dyiɛɛ wóɖóìn nyɛɛ ké ɓó da nì, sepóɛɖé ɔ mɔ̀ nyɔɔ̀ ɖíí-màà.

¹² Nyɔ ɖò ní ɖá ɓɛ́ ɔ kè ɔ ɓǎà ɖíí-màà ɖò ké ɓó da nì, sepóɛɖé ɔ mɔ̀ ɔ ɓǎà gbǒ-xwíníín-nyɔ̀ ɖò.

¹³ Nyɔ ɖò ní ɖá ɓɛ́ ɔ kè ɔ ɖeɛ̀ ɖíí-màà ɖò ké ɓó da nì, sepóɛɖé ɔ mɔ̀ ɔ ɖeɛ̀ gbǒ-xwíníín-nyɔ̀ ɖò.

¹⁴ Nyɔ ɖò ní ɖá ɓɛ́ ɔ kè ɔ ɓǎ ɖíí-gàà nììn gmàà ké ɓó da nì, sepóɛɖé ɔ mɔ̀ ɔ ɓǎ ɖíí-gàà gmàà.

¹⁵ Nyɔ ɖò ní ɖá ɓɛ́ ɔ kè ɔ dyúɛ̀ gmàà ké ɓó da nì, sepóɛɖé ɔ mɔ̀ ɔ dyúɛ̀ gmàà.

¹⁶ Nyɔ ɖò ní ɖá ɓɛ́ ɔ kè ɔ ɖíí-gàà gmàà ké ɓó da nì, sepóɛɖé ɔ mɔ̀ nyɔɔ̀ ɖíí-gààɔ̀ gbɔ-fɔ̀nɔ̀-fɔ̀nɔ̀.

¹⁷ Ɔ jǔ ké nyɔ ɖò kè màa ɖò dyi ɓó da nì ní, nìí, nyɔɔ̀ ní ɖá ɓɛ́ ɔ kè màaɔ̀ dyú-màà mɔɔ màaɔ̀ dyúɛ̀ dyú-màà ké ɓó da nì ɖekè, sepóɛɖé wa mɔ̀ǎ ɔ gbǒ-xwíníín-nyɔ̀ ɓě. Ɔ jǔ ké nyɔ ɖò dyi ɖɛ nì kàà kɛɛ nyuín, nìí, ɔ mɔ̀ hwòɖǒ-kɔ̃in-nyìnììn-ɖɛ̀ cá.

¹⁸ Nyɔ ɖò ní ɖá ɓɛ́ ɔ ké ɔ gmàà ɖíí-màà ɖò dyi kpɔ̃, ɓɛ́ wa sɔ̃́ɔ̀ ké ɔ xwa peɖeìn.

¹⁹ “Nyɔ ɖò ní ɖá ɓɛ́ ɔ kè màa ɖò ɓɛ́ ɔ nì ɔ tiɔ̀ dyéɛń nyɛɛ ké ɓó da nì, sepóɛɖé màaɔ̀ se mú hwɛ̀ ɓó tia ɓaɖa.

²⁰ Nyɔ ɖò ní ɖá ɓɛ́ ɔ kè ɔ mǔè ɖòɛ̀ gmàà ké ɓó da nì, sepóɛɖé ɖɛ nìà kɛ muɛ nyuùn ké nyɔɔ̀ se mú hwɛ̀.

²¹ Nyɔ ɖò ní ɖá ɓɛ́ ɔ ké ɔ dyú ɖò Móɖɛ̀ mɔ̀à kũùn-kpò-gèɖèpɔ́ɔ̀ kɛɛ gbo sáa zàìn, sepóɛɖé nyɔɔ̀ dyiɛ náa nyuín, nìí, ɔ nyìnììn ní nyɛ́nɛ́ɔ̀ dyíin. Ɓě nyɔ ɖò ní nyuɛ náa, sepóɛɖé mɔ̄ mɔ̀ Bounɓoɔ̀.

²² Gàa ɖò ní ɖá ɓɛ́ ɔ kè ɔ mǔè-gàà ɖò ké ɓó da nì kà gàa kè màa nìà ɓó da kɛ, sepóɛɖé ɖɛ nì náa mɔ̀ dyi-nyàìn-ɖɛ̀.

²³ Nyɔ ɖò ní ɖá ɓɛ́ ɔ kè nimii ɖò ké ɓó da nì, sepóɛɖé ɖɛ nìà kɛ muɛ nyuùn ɓɛ́ nyɔɔ̀ ké se mú hwɛ̀. Ké màa ɖò ní ɖá ɓɛ́ ɔ ké ɔ mìɔùn nimii ɖò xwáɖáún zàìn, ɓɛ́ ɔ kè nimiiɔ̀ ké ɓó da nì, sepóɛɖé ɖɛ nìà kɛ mɔ̀ ɖɛ nyìnììn dyíin mìɔ cá.

²⁴ “Ɓě ní ɖá ɓɛ́ ɓě ké ɓě mìɔùn se-mú-hwɛ̀-nyɔ̀ mú nyu dyììn ɖé ɖɛ ɓěɛ̀ ɖò nyu-nyu mú. Sepóɛɖé ɓóɖó-dù kà kò ɖò ɓěɛ̀ nyɔ ɓě ɓɛ́ ḿ nìà ɓó ɓě dyúa dyi kúmúɛń nyɛɛ nyu wa mìɔùn se-mú-hwɛ̀-nyɔ̀ mú dyììn ɖé ɖɛ ɓěɛ̀ nyu-nyu mú.

²⁵ Ké wa nyuɛ ké ɓóɖóɔ̀ se mú hwɛ̀ ɖekè. Ɔ jèɛɛ, ní muɛ gǎ kɔ̃ tòùn ɓó waà nàmàǔn ɓěɔ̀ jè, ké wa mu gǎ dyéìn mìɔ jèɛɛ, wa mu ɓóɖóɔ̀ mú sɔ̀ùn.

²⁶ Ɔ jèɛɛ, ɓě mɔ̀ùn mɛ kpɔ̃ ní gma séín ɓěɔ̀ dyi. Ɓě mɔ̀ Éézùɖùɛ̀-dyù ɓěɛ kè ɖíà ɓě cĩ́à ɖé ɓě hwìɛ̀ kɛɛ mɛ ɓɔ́ dyi-nyàìn-ɖɛ̀ ɓěɛ̀ ɖò nyuɛ.

²⁷ Sepóɛɖé ɖɛ ɓěɛ̀ mɔ̀ ɖɛ ɓě ɓɛ́ nyɔ ɓě cĩ́à ɖé ɓóɖóɔ̀ múɛɛ nyuà ké ɓóɖóɔ̀ seà mú hwɛ̀ kɛ̀.

²⁸ Ɔ jǔ ké ɓě mɔ̀ùn dyiɛ nyu ké ɓóɖóɔ̀ se mú hwɛ̀ ní, nìí, ɓóɖóɔ̀ mu ɓě mɔ̀ùn ɓɔ́ùn ɖekè kà dyúáɖò kà ɔ muà nyɔ-dù kò-kò ɓě ɓɛ́ wa cĩ́à ɖéɛɛ mɔ̀ùn ɓɔ́ùn wɛ̃.

²⁹ Ké nyɔ kã̀ìn séín ɓɛ́ ɔ mu dyi-nyàìn-ɖɛ̀ ɓěɛ̀ ɖò nyuùn wɛ̃ɛ, ɓě mɛ cɛ̃ nyɔ nì náa woɖo gbo sɔ̀ìn ɓó ɓě hwìɛ̀.

³⁰ Mɔ̄ mɔ̀ Bounɓoɔ̀ jèɛɛ, ɓě mɛ kpɔ̃ ní gma ɓěɔ̀ dyi, ké ɓěǐn ɖá ɓɛ́ ɓě ké dyi-nyàìn-kpèɖè ɓě ɓɛ́ nyɔ ɓěɔ̀ nyuà ɖé ɓóɖóɔ̀ mú, hwɛ̀ ɓɛ́ ɓě kéà ɖé muɛɛ ɖò nyu, ɓěǐn kɔ̃̀ ɖà se-mú-hwɛ̀-nyɔ̀ jǔ.”