Ɖìvéɖékɔ̀ 17 - Ɓǎsɔ́ɔ̀ Báɓòɔ̀

Gma ɓě ɓá nyɔmɔɔ ɖɛ kpa jè dyíɛ

¹ Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá,

² “Cɛ̃ɛ Eɖóún kè ɔ dyú-gàà ɓěɔ̀ kè Éézùɖùɛ̀-dyù séín ɓěɔ̀ gbo kà ḿ ɖá

³ ɔ jǔ ké Éézùɖùɛ̀-dyù ɓěɔ̀ ɖò dyi ɓìɖǐ ɖò mɔɔ ɓáɖáá ɖò mɔɔ wiɖi ɖò ɖáɓá ɖé jàɖàìn-hwɔ̀ɖɔ̀ɔ̀ mú mɔɔ ɖéɛ píé,

⁴ ké ɔ seɛ ɓóɛ jàɖàìn-gbòɔ̀ wĩín dyà, ɓɛ́ ɔ kéɛ ɓóɛ sáa zàìn ɖé ḿ gbo ní, nìí, nyɔɔ̀ ɖǎ nyɔmɔɔ dyi wáɖáìn, ké zaa kpɔ̃ ɔ ní ɓóɛ jè. Ɔ dyi ná nìǐn, nìí, wa mɛ cɛ̃ nyɔɔ̀ woɖo gbo sɔ̀ìn ɓó ɔ nyɔ ɓěɔ̀ hwìɛ̀.

⁵ Ɖɛ kɔ̃̀ jè ḿ tòà gma nìà kɛ mɔ̀ ɓɛ́ Éézùɖùɛ̀-dyù ɓěɔ̀ ní kɔ̃̀ ɖà waà nyúà-ɖɛ̀ ɓěɔ̀ ɖé xwáɖá xwíɖíi ɖáɓáìn ɖe, kɛɛ wa kéá waà nyúà-ɖɛ̀ ɓěɔ̀ ḿ gbo dyà. Ɔ xwíníín mɔ̀, wa mɛ dyà waà nyúà-ɖɛ̀ ɓěɔ̀ sáa-zà-nyɔ̀ ɓěɔ̀ gbo ɓó jàɖàìn-gbòɔ̀ wĩín, ɓɛ́ sáa-zà-nyɔ̀ ɓěɔ̀ ké ɓó wa sáa zàìn, ɓɛ́ wa ké gbo-kpɔ̃ìn-sàǎ-zàìn-ɖɛ̀ ɓě jǔ.

⁶ Ké sáa-zà-nyɔ̀ ɓěɔ̀ mɛ mɛ́nɛ́ìn sáa-zàìn-ɖɛ̀ ɓěɔ̀ nyɔmɔɔ̀ ní gbàà nìà ɓó jàɖàìn-gbòɔ̀ wĩín nyɛɛ bũ̌in, ɓɛ́ wa ké waà cáná ɓěɔ̀ fɔ̃, ɓɛ́ wa ké ɖii-ɖɛ̀-nyìǐ-ɖɛ̀ kɔ̃̀ nyɔ́ dè ḿ hwìɖǐiɛɛ jǔ.

⁷ Éézùɖùɛ̀-dyù ɓěɔ̀ mɛ ɓɔ́ waà nyúà-ɖɛ̀ ɓěɔ̀ sáa zàìn ɖé nàmàǔn-zùù ɓě ɓɛ́ wa kè wiɖi hwɔàìn, ɓɛ́ wa síà kíɖíí ɓó ḿ bɛ̃̌ǐn nyɛɛ gbo ɖé xwáɖá xwíɖíi ɖe. Ɖɛ nìà kɛ mɛ mɔ̀ gma kánáá pū ɓó wa kè waà xwíníín-dyù ɓě bìì.

⁸ “M̀ mɛ cɛ̃ɛ Éézùɖùɛ̀-dyù ɓěɔ̀ gbo ɖe kà ḿ ɖá ɔ jǔ ké wa ɖò mɔɔ ɖíà ɓě cĩ́à ɖé wa hwìɛ̀ kɛɛ ɖò dyi fɔ̃ɔ-sàǎ-zàìn-ɖɛ̀ ɖò mɔɔ sáa-zàìn-ɖɛ̀ tɔ̀ɔ̀ ɖò nyu,

⁹ ké nyɔɔ̀ seɛ ɓóɛ jàɖàìn-gbòɔ̀ wĩín dyà, ɓɛ́ ɔ kéɛ ḿ gbo sáa zàìn ní, nìí, wa mɛ cɛ̃ nyɔɔ̀ woɖo gbo sɔ̀ìn ɓó ɔ nyɔ ɓěɔ̀ hwìɛ̀.

¹⁰ “Ɔ jǔ ké Éézùɖùɛ̀-dyù ɓěɔ̀ ɖò mɔɔ ɖíà ɓě cĩ́à ɖé wa hwìɛ̀ kɛɛ ɖò dyi nyɔmɔɔ ɖò ɖi ní, nìí, ní mu nyɔ ɓɛ́ ɔ ɖià nyɔmɔɔ̀ kɛɛ dyoɖoún kpáìn, ɓɛ́ ḿ ké ɔ ɓó ɔ nyɔ ɓěɔ̀ hwìɛ̀ zà.

¹¹ Sepóɛɖé fɔ̀ɔ̀-ɖɛ̀ɔ̀ fɛ̀ɛ̀ɔ̀ nì ɖéɛ nyɔmɔɔ̀ mú, ké ḿ ɖǎa Éézùɖùɛ̀-dyù ɓěɔ̀ nyí, ɓɛ́ wa kéɛ waà nàmàǔn ɓěɔ̀ kɔ̃in-ɓáìn-ɖɛ̀ mú nyu ɓó gbààɔ̀ kɔ̃. Fɛ̀ɛ̀ nì ɖé nyɔmɔɔ̀ mú jèɛɛ, ɔ ɓáìn nàmàǔn kɔ̃in.

¹² Ɔ jèɛɛ, ḿ nìɛ̀ Éézùɖùɛ̀-dyù ɓěɔ̀ gbo cɛ̃iń, ké ḿ ɖá waà nyɔ ɖò ní ɖá ɓɛ́ ɔ ké nyɔmɔɔ ɖò ɖi, hwɛ̀ ḿ po níiń, ɖíà ɓě cĩ́à ɖé wa hwìɛ̀ kɛɛ ɖò ní ɖá ɓɛ́ ɔ ké nyɔmɔɔ ɖò ɖi ɖekè.

¹³ “Ɔ jǔ ké Éézùɖùɛ̀-dyù ɓěɔ̀ ɖò, mɔɔ ɖíà ɓě cĩ́à ɖé wa hwìɛ̀ kɛɛ ɖò dyi xwáɖá xwíɖíi mu, ké ɔ dyi nimii ɖò mɔɔ naà ɖò ɓɛ́ ḿ ɖá ɓě ɓɛ́ìn ɖiɛ kɛɛ ɖò ɖáɓá ní, ɔ mɛ zàà nyɔmɔɔ̀ mú, ɓɛ́ ɔ kéɛ ɓíɖíi dyi púè, ɓɛ́ ɔ kéɛ ɓóɖó kɔ̃in wáɖá.

¹⁴ Sepóɛɖé fɔ̀ɔ̀-ɖɛ̀ɔ̀ fɛ̀ɛ̀ɔ̀ nì ɖéɛ nyɔmɔɔ̀ mú. Ɔ jèɛɛ, ḿ cɛ̃à Éézùɖùɛ̀-dyù ɓěɔ̀ gbo, ké ḿ ɖá waà nyɔ ɖò ní ɖá ɓɛ́ ɔ ké fɔ̀ɔ̀-ɖɛ̀ ɖòɛ̀ nyɔmɔɔ ɖiɛ. Fɔ̀ɔ̀-ɖɛ̀ séínɛ̀ fɛ̀ɛ̀ɔ̀ nì ɖé wa nyɔmɔɔ̀ mú jèɛɛ, nyɔ kã̀ìn séín ɓɛ́ ɔ mu nyɔmɔɔ ɖò ɖiìn nyɛɛ, wa ɓéɖé ɓɛ́ wa ké ɔ woɖo gbo cɛ̃.

¹⁵ “Ɔ jǔ ké Éézùɖùɛ̀-dyù ɓěɔ̀ ɖò mɔɔ ɖíà ɓě cĩ́à ɖé wa hwìɛ̀ kɛɛ ɖò dyi nimii ɖò ɓɛ́ ɔ mɛ́ìn ɓíɖíiɛ mɔɔ ɓɛ́ kpɔ̃ɔ-nìmìì ɖò kpɔ̃ɛɛ ɖi ní, nìí, ɔ mɛ wɔɔ̀ ɔ ɖɔɔ̀, ɓɛ́ ɔ ké dèɖè, sepóɛɖé ɔ mɔ̀ se-mú-hwɛ̀-nyɔ̀, ké kǎà ɔ mu ná gã̀ùn tee ɓɛ́ hwìo ké jǔ, hwɛ̀ ɓɛ́ ɔ ké mú hwɛ̀.

¹⁶ Kɛɛ ɔ jǔ ké ɔ se ɔ ɖɔɔ̀ wɔɔ̀, ɓɛ́ ɔ ké dèɖè ní, nìí, ɔ mu ɔ ɖɛ gbàɔ̀ kpa dyí ɖúùn.”