Ɖìvéɖékɔ̀ 15 - Ɓǎsɔ́ɔ̀ Báɓòɔ̀

Gma ɓě ɓá se-mú-hwɛ̀-ɖɛ̀ ɓě sɔ̀ nyɔǔn múɛɛ jè dyíɛ

¹ Hwɛ̀ ké Bounɓoɔ̀ wùɖù ma Mózè kè Eɖóún gbo ɖe, ké ɔ ɖá,

² “Ɓě cɛ̃ɛ Éézùɖùɛ̀-dyù ɓěɔ̀ gbo kà ḿ ɖá ɔ jǔ ké wɛ́ ɖò dyi gàa ɖò kpɔ̃, ké wɛ́ɔ̀ dyiɛ nyu ké ní ɖò dyi ɔ nɛ́ɛ-pòìn-naínɔ̀ sɔ̀ ní, ní sɔ̀à ɔ múɛɛ se mú hwɛ̀.

³ Kɛbì níɔ̀ mɛ sɔ̀ ɔ mú, ɓɛ́ ɔ ké dyi síɛ, mɔɔ kɛbì ɔ mɛ kã ɔ nɛ́ɛ-pòìn-naínɔ̀ kɛɛ, ɔ nyuɛ ké gàaɔ̀ se mú hwɛ̀.

⁴ Ɔ dyi ná nìǐn, kɔ̃-pɛ̃́-ɖɛ̀ séín ɓɛ́ gàaɔ̀ mu kɔ̃ pɛ̃́ìn nyɛɛ mɔ̀ se-mú-hwɛ̀-ɖɛ̀, ké ɖɛ séín ɔ mu kɔ̃ kòùn wɛ̃ɛ mɔ̀ se-mú-hwɛ̀-ɖɛ̀ ɖekè.

⁵ Ké nyɔ kã̀ìn séín mu kɔ̃-pɛ̃́-ɖɛ̀ ɔ pɛ̃́à kɔ̃ɛɛ dyi tìnììn nyɛɛ mɛ wɔɔ̀ ɔ mú-po-ɖɔ̀ɔ̀, ɓɛ́ ɔ ké dèɖè, sepóɛɖé nyɔɔ̀ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ.

⁶ Ké nyɔ kã̀ìn séín mu ɔ kò-naín ɖò dyi kòùn wɛ̃ɛ mɛ wɔɔ̀ ɔ ɖɔɔ̀, ɓɛ́ ɔ ké dèɖè, sepóɛɖé nyɔɔ̀ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ.

⁷ Ké nyɔ kã̀ìn séín mu gàa ɓɛ́ níɔ̀ sɔ̀à múɛɛ dyi tìnììn nyɛɛ mɛ wɔɔ̀ ɔ mú-po-ɖɔ̀ɔ̀, ɓɛ́ ɔ ké dèɖè, sepóɛɖé nyɔɔ̀ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ.

⁸ Ɔ jǔ ké gàa ɓɛ́ níɔ̀ sɔ̀à múɛɛ dyi nyɔ hwɛ̀ múɛɛ ɖò tɔ̃ɔ dya po ní, nyɔɔ̀ mɛ wɔɔ̀ ɔ mú-po-ɖɔ̀ɔ̀, ɓɛ́ ɔ ké dèɖè, sepóɛɖé nyɔɔ̀ se mú hwɛ̀ ɖekè, ké kǎà ɔ mu ná gã̀ùn tee ɓɛ́ hwìo ké jǔ.

⁹ Ké kɔ̃-kò-ɖɛ̀ séín ɓɛ́ gàa ɓɛ́ níɔ̀ sɔ̀à múɛɛ mu kɔ̃ kòùn ɓó ɔ kɔ̃ún-kpá-nìmììɔ̀ kɔ̃ún wɛ̃ɛ mɔ̀ se-mú-hwɛ̀-ɖɛ̀.

¹⁰ Nyɔ kã̀ìn séín mu ɖɛ ɓě ɓɛ́ ɔ kòà kɔ̃ mɔɔ ɔ pɛ̃́à kɔ̃ɛɛ ɖò dyi tìnììn nyɛɛ mɔ̀ se-mú-hwɛ̀-nyɔ̀, ké kǎà ɔ mu ná gã̀ùn tee ɓɛ́ hwìo ké jǔ. Ké nyɔ kã̀ìn séín mu ɖɛ ɓěa ɖò dyí ɖúùn wɛ̃ɛ mɛ wɔɔ̀ ɔ mú-po-ɖɔ̀ɔ̀, ɓɛ́ ɔ ké dèɖè, sepóɛɖé nyɔɔ̀ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ.

¹¹ Ɔ jǔ ké gàa ɓɛ́ níɔ̀ sɔ̀à múɛɛ se xwai dèɖè, ké ɔ dyi nyɔ ɖò dyi tìnììn ní, nyɔɔ̀ mɛ wɔɔ̀ ɔ mú-po-ɖɔ̀ɔ̀, ɓɛ́ ɔ ké dèɖè, sepóɛɖé nyɔɔ̀ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ.

¹² Ɔ jǔ ké gàaɔ̀ dyi mɛ-dyàà ɖò dyi tìnììn ní, wa ɓéɖé ɓɛ́ wa kéɛ wa. Ɔ jǔ ké ɖɛ ɔ tìnìàìn dyiɛɛ dyi cu-ɖɛ̀-fùù ɖò jǔ ní, wa mɛ wɔɔ̀ìn ní.

¹³ “Ɔ jǔ ké gàaɔ̀ ɖǎ dyi káná ní, ɔ mɛ fòìn, ɓɛ́ wé mɛ̀nɛ̌ìn-sɔ̃́ ké zi, hwɛ̀ ɓɛ́ ɔ ké ɖɛ ɓě ɓá ɔ mú hwɛ̀ jè dyíɛɛ gbɔ dè. Sɔ̀ìn ɓóɛ gboɛɛ, nìí, ɔ mɛ wɔɔ̀ ɔ mú-po-ɖɔ̀ɔ̀, ɓɛ́ ɔ ké ní ɓɛ́ wa sɔ̀ wĩín ɖieɛɛ dèɖèìn. Ɔ ɖǎa náa nyuín, nìí, ɔ mu mú-hwɛ̀-nyɔ̀ jǔùn.

¹⁴ Ɓó wéɔ̀ mɛ̀nɛ̌ìn-tã nììnɔ̀ ɓaɖaa, ɔ mɛ ɖú gbúɛ́-kpò sɔ̃́ mɔɔ póo-póo-kpò sɔ̃́ dyí, ɓɛ́ ɔ ké wa ɓó ḿ dyúa dyà ɓó jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ dyéàìn nyɛɛ wĩín, ɓɛ́ ɔ ké wa sáa-zà-nyɔ̀ ɓěɔ̀ ɖò xwa nyí.

¹⁵ Ɔ ɖǎ ná nìǐn, sáa-zà-nyɔ̀ɔ̀ mɛ zàìn wa sáa. Dyúáɖò mɛ nì ɓó nàmàǔn-sàǎ-zàìn-ɖɛ̀ jè, ɓɛ́ ɔ tɔɔ̀ ké nì ɓó fɔ̃ɔ-sàǎ-zàìn-ɖɛ̀ jè. Kǎà sáa-zà-nyɔ̀ɔ̀ mu gàaɔ̀ se-mú-hwɛ̀-ɖɛ̀ɔ̀ kɔ̃in-ɓáìn-ɖɛ̀ nyuɛ nyuùn ɓó ḿ dyúa.

¹⁶ “Ɔ jǔ ké gàa ɖò dyi nyíɔún-pòǐn dya ní, ɔ mɛ dèɖè, sepóɛɖé ɔ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ.

¹⁷ Ké mú-po-ɖɔ̀ ɖò mɔɔ kúɖúù-kpã̀ ɖò ɓɛ́ níɔ̀ mu kpɔ̃ùn wɛ̃ɛ, wa ɓéɖé ɓɛ́ wa kéɛ wɔɔ̀, sepóɛɖé ɔ mɔ̀ se-mú-hwɛ̀-ɖɛ̀, ké kǎà ɔ mu ná gã̀ùn tee ɓɛ́ hwìo ké jǔ.

¹⁸ Ɔ jǔ ké gàa ɖò kè màa ɖò dyi ɓó da nì ní, wa sɔ̃́ɔ̀ mɛ dèɖè, sepóɛɖé wa se mú hwɛ̀, ké kǎà wa mu ná gã̀ùn tee ɓɛ́ hwìo ké jǔ.

¹⁹ “Ɔ jǔ ké màa-ɓíɖí-wɛ̀ dyi màa ɖò gbo nì ní, nìí, ɔ mɔ̀ se-mú-hwɛ̀-nyɔ̀ ɓó wé mɛ̀nɛ̌ìn-sɔ̃́ xwíníín. Ké nyɔ kã̀ìn séín mu ɔ dyi tìnììn nyɛɛ mɔ̀ se-mú-hwɛ̀-nyɔ̀ ɖekè, ké kǎà nyɔɔ̀ mu ná gã̀ùn tee ɓɛ́ hwìo ké jǔ.

²⁰ Ké ɖɛ kã̀ìn séín màaɔ̀ mu kɔ̃ pɛ̃́ìn ɓó tia ɓaɖaa mɔ̀ se-mú-hwɛ̀-ɖɛ̀, ké ɖɛ séín ɔ mu kɔ̃ kòùn wɛ̃ɛ mɔ̀ se-mú-hwɛ̀-ɖɛ̀ ɖekè.

²¹ Ké nyɔ kã̀ìn séín mu kɔ̃-pɛ̃́-ɖɛ̀ ɔ pɛ̃́à kɔ̃ɛɛ dyi tìnììn nyɛɛ mɛ wɔɔ̀ ɔ mú-po-ɖɔ̀ɔ̀, ɓɛ́ ɔ ké dèɖè, sepóɛɖé nyɔɔ̀ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ.

²² Ké nyɔ kã̀ìn séín mu màaɔ̀ kò-naín ɖò dyi tìnììn nyɛɛ mɛ wɔɔ̀ ɔ ɖɔɔ̀, ɓɛ́ ɔ ké dèɖè, sepóɛɖé nyɔɔ̀ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ.

²³ Ɔ jǔ ké nyɔ ɖò dyi ɖɛ kã̀ìn séín ɔ pɛ̃́ kɔ̃ mɔɔ ɔ kò kɔ̃ɛɛ ɖò dyi tìnììn ní, nìí, nyɔɔ̀ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ.

²⁴ Ɔ jǔ ké gàa ɖò dyi màaɔ̀ gbo pɛ̃́ ɓó ti kɔ̃̀ ɓaɖa ɓɛ́ màaɔ̀ nìà ɔ tiɔ̀ dyéɛń keɛɛ ní, ɔ mɔ̀ se-mú-hwɛ̀-nyɔ̀ ɖekè ɓó wé mɛ̀nɛ̌ìn-sɔ̃́ xwíníín, sepóɛɖé nyɔmɔɔ sɔ̀à màaɔ̀ múɛɛ ɖò ɖǎ ɔ dyi tìnììn. Ké kɔ̃-pɛ̃́-ɖɛ̀ séín ɓɛ́ gàaɔ̀ pɛ̃́ kɔ̃ɛɛ mɔ̀ se-mú-hwɛ̀-ɖɛ̀ ɖekè.

²⁵ “Ɔ jǔ ké nyɔmɔɔ dyi màa ɖò mú sɔ̀ ɓó wé ɓáún-ɓáún xwíníín, ké ɔ se ti ɔ dyéà ɓó dɛ̀nɛ̀ séín xwíníín nyɛɛ nììn tiɔ̀ ní, mɔɔ ké ɔ dyi màaɔ̀ tiɔ̀ jǔ, kɛɛ wéɔ̀ dyi kɔ̃ zi ní, nìí, ti ɓɛ́ nyɔmɔɔ̀ nìà ɔ mú sɔ̀ǔn keɛɛ, ɔ mɔ̀ se-mú-hwɛ̀-nyɔ̀ kà dyúáɖò kà ɔ nyuà nìɛ̀ ɓá ɔ ti jɛ́ɛ́ɔ̀ jè dyíɛ.

²⁶ Ké kɔ̃-pɛ̃́-ɖɛ̀ séín màaɔ̀ mu kɔ̃ pɛ̃́ìn ɓó tia ɓaɖaa mɔ̀ se-mú-hwɛ̀-ɖɛ̀ kà dyúáɖò kà ɔ nyuà nìɛ̀ ɓó ɔ ti jɛ́ɛ́ɔ̀ ɓaɖaa. Ké ɖɛ kã̀ìn séín ɔ mu kɔ̃ kòùn wɛ̃ɛ mɔ̀ se-mú-hwɛ̀-ɖɛ̀ ɖekè kà dyúáɖò kà ɔ nyuà nìɛ̀ ɓó ɔ ti jɛ́ɛ́ɔ̀ ɓaɖaa.

²⁷ Ké nyɔ kã̀ìn séín mu ɖɛ ɓěɛ̀ ɖò dyi tìnììn nyɛɛ mɔ̀ se-mú-hwɛ̀-nyɔ̀. Nyɔɔ̀ mɛ wɔɔ̀ ɔ ɖɔɔ̀, ɓɛ́ ɔ ké dèɖè, sepóɛɖé ɔ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ.

²⁸ “Ɔ jǔ ké màaɔ̀ ɖǎ dyi káná ní, nìí, ɔ mɛ fòìn, ɓɛ́ wé mɛ̀nɛ̌ìn-sɔ̃́ ké zi, hwɛ̀ ké ɔ mɔ̀ mú-hwɛ̀-nyɔ̀ ɖe.

²⁹ Ɓó wéɔ̀ mɛ̀nɛ̌ìn-tã nììnɔ̀ ɓaɖaa, ɔ mɛ ɖú gbúɛ́-kpò sɔ̃́ mɔɔ póo-póo-kpò sɔ̃́ dyí, ɓɛ́ ɔ ké wa sáa-zà-nyɔ̀ ɓěɔ̀ ɖò gbo dyà ɓó jàɖàìn-gbòɔ̀ wĩín.

³⁰ Ɔ ɖǎ ná nìǐn, sáa-zà-nyɔ̀ɔ̀ mɛ zàìn wa sáa. Dyúáɖò mɛ nì ɓó nàmàǔn-sàǎ-zàìn-ɖɛ̀ jè, ɓɛ́ ɔ tɔɔ̀ ké nì ɓó fɔ̃ɔ-sàǎ-zàìn-ɖɛ̀ jè. Kǎà sáa-zà-nyɔ̀ɔ̀ mu màaɔ̀ se-mú-hwɛ̀-ɖɛ̀ɔ̀ kɔ̃in-ɓáìn-ɖɛ̀ɔ̀ nyuɛ nyuùn ɓó ḿ dyúa.

³¹ “Ɔ jèɛɛ, Mózè kè Eɖóún, ɓě mɛ nyuɛ ɓɛ́ Éézùɖùɛ̀-dyù ɓěɔ̀ ké wáká kpá sɔ̀ìn ɓó ɖɛ ɓě ɓɛ́ìn wa se-mú-hwɛ̀-nyɔ̀ mú nyuɛ kɛɛ bũ̌, wa ní kɔ̃̀ ɖà ní cĩ́-naín nìà ɖé wa hwìɛ̀ kɛɛ zɛ̀nɛ̌ po, nìí, wa ní kɔ̃̀ ɖà mɛ́ ɓóɛ jè.”

³² Kǎà gma ɓě ɓá gàa ɓɛ́ wɛ́ ɖò nyuɛ ké ní sɔ̀ ɔ nɛ́ɛ-pòìn-naínɔ̀ kɛɛ jè dyíɛ kè ɓá gàa ɓɛ́ ɔ dya nyíɔún-pòǐn nyɛɛ jè dyíɛ

³³ kè ɓá màa ɓɛ́ ɔ nì ɔ ti dyéɛń nyɛɛ jè dyíɛ kè ɓá màa ɓɛ́ nyɔmɔɔ sɔ̀ mú, ké ɔ se ɔ tiɔ̀ kɛɛ jè dyíɛ kè ɓá gàa ɖò ɓɛ́ ɔ pɛ̃́ màa ɖò se mú hwɛ̀ kɛ gboɛɛ jè dyíɛɛ nyu nìɛ̀.