Ɖìvéɖékɔ̀ 12 - Ɓǎsɔ́ɔ̀ Báɓòɔ̀

Gmàà-věèɛ̀ mú hwɔ jè

¹ Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá,

² “Cɛ̃ɛ Éézùɖùɛ̀-dyù ɓěɔ̀ gbo kà ḿ ɖá ɔ jǔ ké màa ɖò dyi zùù kɔ̃ nì, ké ɔ dyi gàa-dyù wóɖóìn ní, nìí, màaɔ̀ mɔ̀ se-mú-hwɛ̀-nyɔ̀ ɓó wé mɛ̀nɛ̌ìn-sɔ̃́ xwíníín kà dyúáɖò kà ɔ nyuà nìɛ̀ ɓá ɔ tiɔ̀ dyé jè dyíɛ.

³ Ɔ ɖǎ ná nìǐn, wa mɛ ɖáɓá gàa-dyùɔ̀ sàà ɓó wéɔ̀ mɛ̀nɛ̌ìn-tã nììnɔ̀ ɓaɖa.

⁴ Sɔ̀ìn ɓó wéɔ̀ mɛ̀nɛ̌ìn-sɔ̃́ nììnɔ̀ gbo hwɛ̀ ɓɛ́ dyúɔ̀ kéà sàà mɛ́ɛ, màaɔ̀ ɓéɖé ɔ ké fòìn ɓó wé kpáɖá-nyɔ ɓaɖa-bùè sè tã xwíníín, hwɛ̀ ɓɛ́ ɔ ké mú hwɛ̀ ɓá ɔ nyɔmɔɔ-mú-sɔ̀-sɔ̀ nyuɛ ma kà ké ɔ se ma kà mú hwɛ̀ɛ jè dyí. Ɔ mɛ ɓɔ́ mú-hwɛ̀-ɖɛ̀ ɖò dyi tìnìɛ̀n, mɔɔ ké ɔ mɛ ɓɔ́ ɖé jàɖàìn-gbò hwɛ̀ǐn-hwɛ̀ǐnɔ̀ mú dyáa, ɓɛ́ ɔ se-mú-hwɛ̀-tìɔ̀ ké ɖé hwɛ̀ kĩ́ín hwɛ̀.

⁵ Kɛɛ ɔ jǔ ké màaɔ̀ dyi màa-dyù wóɖóìn ní, nìí, ɔ mɔ̀ se-mú-hwɛ̀-nyɔ̀ ɓó wíkì sɔ̃́ xwíníín kà dyúáɖò kà ɔ nyuà nìɛ̀ ɓá ɔ tiɔ̀ dyé jè dyíɛ. Sɔ̀ìn ɓóɛ gboɛɛ, màaɔ̀ ɓéɖé ɔ ké fòìn ɓó wé kpáɖá-nyɔ tã sè mɛ̀nɛ̌ìn-ɖò xwíníín, hwɛ̀ ɓɛ́ ɔ ké mú hwɛ̀ ɓá ɔ nyɔmɔɔ-mú-sɔ̀-sɔ̀ nyuɛ ma kà ké ɔ se ma kà mú hwɛ̀ɛ jè dyí.

⁶ “Ti ɓɛ́ ɔ se-mú-hwɛ̀-tì ɓá ɔ gàa-dyù mɔɔ màa-dyù wóɖóìn jè dyíɛɛ mu ɖé hwɛ̀ìn nyɛɛ, nìí, ɔ mɛ dyà ɓáɖáá ɓɛ́ ɔ nyuá zɔ̃ dyúáɖòɛ, ɓɛ́ ɔ ké fɔ̃ɔ-sàǎ-zàìn-ɖɛ̀ jǔ. Ké ɔ mɛ dyà póo-póo ɖò mɔɔ gbúɛ́ ɖò, ɓɛ́ ɔ ké nàmàǔn-sàǎ-zàìn-ɖɛ̀ jǔ. Ɔ mɛ dyà ɖɛ ɓěɛ̀ ɓó jàɖàìn-gbòɔ̀ wĩín, ɓó sáa-zà-nyɔ̀ ɓěɔ̀ gbo.

⁷ Sɔ̀ìn ɓóɛ gboɛɛ, nìí, sáa-zà-nyɔ̀ ɓěɔ̀ ɖò mɛ zàìn ɖɛ ɓěɛ̀ Bounɓoɔ̀ gbo sáa, ɓɛ́ wa ké màaɔ̀ se-mú-hwɛ̀ɔ̀ kɔ̃in-ɓáìn-ɖɛ̀ jǔ. Ɔ ɖǎ ná nìǐn, nìí, màaɔ̀ mu mú hwɛ̀ìn ɖé ḿ dyéɖéín ɓá ɔ nyɔmɔɔ-mú-sɔ̀-sɔ̀ɔ̀ jè dyí. Kǎà gma ɓě ɓá màa ɓɛ́ ɔ wóɖóìn gàa-dyù mɔɔ màa-dyùɛɛ jè dyíɛɛ nyu nìɛ̀.

⁸ Kɛɛ ɔ jǔ ké màaɔ̀ se ɓáɖááɔ̀ dyéɛ ɓɛ́ìn ní, nìí, ɔ mɛ dyà gbúɛ́-kpò sɔ̃́ mɔɔ póo-póo-kpò sɔ̃́. Dyúáɖò mɛ nì ɓó fɔ̃ɔ-sàǎ-zàìn-ɖɛ̀ jè, ké ɔ tɔɔ̀ mɛ nì ɓó nàmàǔn-sàǎ-zàìn-ɖɛ̀ jè. Ɔ dyi ná nìǐn, nìí, sáa-zà-nyɔ̀ɔ̀ mɛ nyu ɖɛ ɓěɛ̀ màaɔ̀ se-mú-hwɛ̀ɔ̀ kɔ̃in-ɓáìn-ɖɛ̀ mú. Nìí, màaɔ̀ mu mú hwɛ̀ìn ɖé ḿ dyéɖéín.”