Ɖìvéɖékɔ̀ 11 - Ɓǎsɔ́ɔ̀ Báɓòɔ̀

Suaɖɛ̀ ɓɛ́ wa ɓɛ́ìn ɖiɛ kɛ

¹ Hwɛ̀ ké Bounɓoɔ̀ wùɖù ma Mózè kè Eɖóún gbo, ké ɔ ɖá,

² “Ɓě cɛ̃ɛ Éézùɖùɛ̀-dyù ɓěɔ̀ gbo kà ḿ ɖá nimii séín nìà ɓóɖó-kpàɔ̀ kɔ̃ɛɛ nyɔ ɓě kè Éézùɖùɛ̀-dyù ɓěɔ̀ ké ɖiɛɛ, wa kɛà kɛ̀.

³ Nimii kã̀ìn séín ɓɛ́ wa kɔ̃̀ zùǎ ge mú, ké wa tà wĩin nyɛɛ, ɓě mɛ ɖi wa.

⁴ Kɛɛ ɓě mɛ ɓɔ́ nimii ɓě ɓɛ́ wa tà wĩin, kɛɛ waà zùǎ se mú geɛɛ ɖiɛ. Wa ɖíɛ́ ɓě kɛà kɛ̀. Ɓě mɛ ɓɔ́ sǒ-nì-gbu-kɔ̃ún ɖiɛ, sepóɛɖé ɔ tà wĩin dyɛo, kɛɛ ɔ zùǎɔ̀ se mú ge. Ɔ mɛ mɔ̀ se-mú-hwɛ̀-ɖɛ̀ ɓó ɓě bìì.

⁵ Ɓě mɛ ɓɔ́ waɖa ɖiɛ, sepóɛɖé ɔ tà wĩin dyɛo, kɛɛ ɔ zùǎɔ̀ se mú ge. Ɔ mɛ mɔ̀ se-mú-hwɛ̀-ɖɛ̀ ɓó ɓě bìì.

⁶ Ɓě mɛ ɓɔ́ weɖema ɖiɛ, sepóɛɖé ɔ tà wĩin dyɛo, kɛɛ ɔ zùǎɔ̀ se mú ge. Ɔ mɛ mɔ̀ se-mú-hwɛ̀-ɖɛ̀ ɓó ɓě bìì.

⁷ Ké ɓě mɛ ɓɔ́ nimii ɓě ɓɛ́ wa kɔ̃̀ zùǎ ge mú, kɛɛ wa ní tà wĩin nyɛɛ ɖiɛ. Ɔ hwɔìn kà ɓeé. Ɔ mɛ mɔ̀ se-mú-hwɛ̀-ɖɛ̀ ɓó ɓě bìì.

⁸ Ɓě mɛ ɓɔ́ nimii ɓěɛ̀ ɖò ɖiɛ, mɔɔ ké ɓě mɛ ɓɔ́ wa ɖòɛ̀ xwɛ́ dyi tìnìɛ̀n. Wa mɛ mɔ̀ se-mú-hwɛ̀-ɖɛ̀ ɓó ɓě bìì.

⁹ “Ké zimii kã̀ìn séín ɓɛ́ wa ɓéɖé séá kè xwɛ̃́ kɛɛ, ɓě mɛ ɖi wa.

¹⁰ Kɛɛ zimii tɔ̀ɔ̀ séín sè ɓó ɖe ɓɛ́ wa se séá kè xwɛ̃́ ɓéɖéɛɛ, ɓě mɛ ɓɔ́ wa ɖiɛ. Wa mɛ nyàìn ɓě dyi.

¹¹ Wa mɛ mɔ̀ se-mú-hwɛ̀-ɖɛ̀ ɓó ɓě bìì. Ɓě mɛ ɓɔ́ wa ɖiɛ fɔɔ cá, ké waà xwɛ́ mɛ nyàìn ɓě dyi.

¹² Ɖɛ kã̀ìn séín nì ɖé níɔ ɓɛ́ wa se séá mɔɔ xwɛ̃́ ɓéɖéɛɛ mɛ nyàìn ɓě dyi.

¹³ “Ké naà ɓě ɓɛ́ wa mɛ nyàìn ɓě dyi, ké ɓě mɛ ɓɔ́ ɖiɛ, sepóɛɖé wa nyàìn ḿ dyi jèɛɛ, wa kɛà kɛ̀. Wa mɔ̀ ke kè fɔ́ɔ́ kè jìbǎ

¹⁴ kè ɖuú-ɖuú kè géé-kpá

¹⁵ kè hwĩ́ín-hwã

¹⁶ kè hã́à-hãà kè máaún-gèě kè gmàà-nàà kè géé kò-kò ɓě

¹⁷ kè kùnǔù kè dyóó-nàà kè jìɔ-gbɔ̀ǔn-bòò

¹⁸ kè kɔ̀-hwɔ̀ɖɔ̌ɔ̀ kè tɔ̀-pùɖù kè hwò

¹⁹ kè bá-bá kè zɔ̀ɔ̀ kè kú-dù-nàà ɔ kè zĩ́á-gã.

²⁰ “Ké wãa-ɖɛ̀ séín ɓɛ́ wa nà ɓíɖíi dyiɛɛ mɛ nyàìn ɓě dyi.

²¹ Kɛɛ wãa-ɖɛ̀ ɓě ɓɛ́ wa nà ɓíɖíi dyiɛɛ ɖíɛ́ ɓě nì ɓó, ké ɓě mɛ ɖiɛ. Wa mɔ̀ nyɔ ɓě ɓɛ́ wa ɓéɖé ɓo ɓě ɓó dã̌ jèɛ.

²² Waà nyɔ ɓě ɓɛ́ ɓě mɛ ɖiɛɛ, wa kɛà kɛ̀. Wa mɔ̀ gè-vɔ̀ kè cã-cã kè jãna ɔ kè kpã̌ùn.

²³ Kɛɛ wãa-ɖɛ̀ tɔ̀ɔ̀ ɓě sè ɓó ɖe ké wa nà ɓíɖíi dyiɛɛ mɛ nyàìn ɓě dyi.

²⁴ “Ké ɖɛ ɓɛ́ìn ɓě se-mú-hwɛ̀-nyɔ̀ mú nyuɛ kɛɛ, ɔ kɛà kɛ̀. Nyɔ kã̀ìn séín mu dyi-nyàìn-ɖɛ̀ ɓěɛ̀ ɖòɛ̀ xwɛ́ dyi tìnììn nyɛɛ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ.

²⁵ Ké nyɔ kã̀ìn séín mu ɖòɛ̀ xwɛ́ dyí ɖúùn wɛ̃ɛ ɓéɖé ɓɛ́ ɔ ké ɔ ɖɔɔ̀ wɔɔ̀, sepóɛɖé ɔ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ.

²⁶ Nimii kã̀ìn séín ɓɛ́ wa ɓéɖé zùǎ, kɛɛ waà zùǎ ɓěɔ̀ se mú ge, mɔɔ ké nimii ɓěɔ̀ ní tà wĩin nyɛɛ, wa mɛ mɔ̀ se-mú-hwɛ̀-ɖɛ̀ ɓó ɓě bìì. Ké nyɔ kã̀ìn séín mu nimii ɓěɛ̀ ɖòɛ̀ xwɛ́ dyi tìnììn nyɛɛ mɔ̀ se-mú-hwɛ̀-nyɔ̀.

²⁷ Ɓó kɔ̃in ɖeɛɛ, xwɛ̃̀ɛ̀-nìmìì kã̀ìn séín mɛ mɔ̀ se-mú-hwɛ̀-ɖɛ̀ ɓó ɓě bìì. Ké nyɔ kã̀ìn séín mu ɖòɛ̀ xwɛ́ dyi tìnììn nyɛɛ mɔ̀ se-mú-hwɛ̀-nyɔ̀, ké kǎà ɔ mu ná gã̀ùn tee ɓɛ́ hwìo ké jǔ.

²⁸ Ké nyɔ kã̀ìn séín mu ɖòɛ̀ xwɛ́ dyí ɖúùn wɛ̃ɛ ɓéɖé ɓɛ́ ɔ ké ɔ ɖɔɔ̀ wɔɔ̀, sepóɛɖé ɔ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ. Nimii ɓěɛ̀ mɛ mɔ̀ se-mú-hwɛ̀-ɖɛ̀ ɓó ɓě bìì.

²⁹ “Ké ɓíɖíi-dyi-nà-ɖɛ̀ ɓě kɔ̃̀ kɛ́ xwɛ̃́ìn ɓíɖíi dyiɛɛ mɛ mɔ̀ se-mú-hwɛ̀-ɖɛ̀ ɓó ɓě bìì. Ɔ hwɔìn kà tĩ̌ɔ̀-wè kè bũ̀ɛ̌ kè gã̀ǔn-tɛ̀ɛ̌-wɛ̀ɖɛ̀

³⁰ kè je kè xwáɖá-ɓìɖǐ kè zó-ɓíɔ́ kè hwóó ɔ kè wɛ̀ɖɛ̀-dù kò-kò séín.

³¹ Nimii ɓěɛ̀ mɛ mɔ̀ se-mú-hwɛ̀-ɖɛ̀ ɓó ɓě bìì. Ké nyɔ kã̀ìn séín mu ɖòɛ̀ xwɛ́ dyi tìnììn nyɛɛ mɔ̀ se-mú-hwɛ̀-nyɔ̀, ké kǎà ɔ mu ná gã̀ùn tee ɓɛ́ hwìo ké jǔ.

³² Ɔ jǔ ké nimii ɓěɛ̀ ɖò dyi mɛ́, ké ɖɛ ɖò dyiɛ xwɛ́ɔ̀ dyi tìnììn ní, nìí, ɖɛ ɔ tìnìàìn dyiɛɛ mɔ̀ se-mú-hwɛ̀-ɖɛ̀. Ɖɛ kã̀ìn séín wa nyùìn kũ̀à múɛɛ, kɛbì ɔ mɛ mɔ̀ ɖɛ ɖò ɓɛ́ wa nyùìn cu múɛ mɔɔ ɖɔ mɔɔ kúɖúù mɔɔ dě-ɓɔ̀ɔ̌-ɖɔ̀ɛɛ, ɔ se mú hwɛ̀. Ɔ dyi ná nìǐn, nìí, ɓě mɛ poɛ ní gbo. Ɔ mɔ̀ se-mú-hwɛ̀-ɖɛ̀, ké kǎà ɔ mu ná gã̀ùn tee ɓɛ́ hwìo ké jǔ, hwɛ̀ ɓɛ́ ɔ ké mú hwɛ̀.

³³ Ɔ jǔ ké ɖò dyi ɖé mɛ-dyàà ɖò mú mɛ́ìn ní, nìí, ɖɛ kã̀ìn séín nì ɖé mɛ-dyààɔ̀ múɛɛ mɔ̀ se-mú-hwɛ̀-ɖɛ̀. Ké ɓě mɛ wa mɛ-dyààɔ̀.

³⁴ Ɔ jǔ ké ɖɛ nìà ɖé mɛ-dyààɔ̀ múɛɛ dyi ní jǔ ní, ɔ se mú hwɛ̀ ɓó ná jè. Ké níɔ̀ dyi ɖii-ɖɛ̀ ɖò dyi tìnììn ní, ɖii-ɖɛ̀ɔ̀ mɔ̀ùn se mú hwɛ̀ ɖekè, ké ɓě mɛ ɓɔ́ɔ ɖiɛ.

³⁵ Ɖɛ kã̀ìn séín ɓɛ́ nimii ɓěɛ̀ ɖòɛ̀ xwɛ́ɔ̀ mu dyi tìnììn nyɛɛ se mú hwɛ̀. Ɓě mɛ ɓɔ́ wa kũ̀à mú nyùɛ̀n. Ɖɛɔ̀ dyi bɛɖɛɛ̀-mú-pĩ̀ìn-gbò mɔɔ gèɖèě ɓɛ́ wa nyùìn mɛ kɛɛ jǔǐn, nìí, ɓě mɛ wàìn dyi.

³⁶ Kɛɛ ɔ jǔ ké nimii ɓěɛ̀ ɖò dyi ní sɔ̀ ɓóɖóún wɛ̃ɛ ɖò mɔɔ ní ɓɛ́ wa po ɓí vɛ̀nɛ̀ ɖò múɛɛ gbo mɛ́ìn ní, nìí, níɔ̀ hwɛ̀ mú ke kánáá pū ɓó ná jè. Kɛɛ ɖɛ ɓɛ́ nyɔ ɖò mu kũ̀à mú nyùìn ɓó nimiiɔ̀ xwɛ́ɔ̀ níɔ̀ gbo zà jèɛɛ mɔ̀ se-mú-hwɛ̀-ɖɛ̀.

³⁷ Ɔ jǔ ké nimii ɓěɛ̀ ɖòɛ̀ xwɛ́ dyi ɓáá-ɖɛ̀-dyùà ɓɛ́ nyɔ ɖò ké ɓáa dyi tìnììn ní, ḿ ɖá ɓáá-ɖɛ̀-dyùàɔ̀ nɔ̀mɔ̀ dyíin ɓó ɓá jè ke kánáá pū.

³⁸ Kɛɛ ɔ jǔ ké ɓáá-ɖɛ̀-dyùàɔ̀ dyi te hwɛ̀ ké nimiiɔ̀ xwɛ́ɔ̀ dyiɛ dyi tìnììn ní, nìí, ḿ ɖá ɓáá-ɖɛ̀-dyùàɔ̀ se mú hwɛ̀ ɓó ɓě bìì.

³⁹ “Ɔ jǔ ké nimii ɓě mɔ̀à ɖii-sùàɖɛ̀ ɓó ɓě bììɛɛ ɖò dyi ɓíɖíi mɛ́ìn ní, nyɔ kã̀ìn séín muɛ xwɛ́ɔ̀ dyi tìnììn nyɛɛ mɔ̀ se-mú-hwɛ̀-nyɔ̀, ké kǎà ɔ mu ná gã̀ùn tee ɓɛ́ hwìo ké jǔ.

⁴⁰ Ɔ jǔ ké nyɔ ɖò dyiɛ suaɖɛ̀ɔ̀ ɖò tà ní, nyɔɔ̀ ɓéɖé ɓɛ́ ɔ ké ɔ ɖɔɔ̀ wɔɔ̀, sepóɛɖé ɔ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ. Ké nyɔ kã̀ìn séín muɛ xwɛ́ɔ̀ dyí ɖúùn wɛ̃ɛ ɓéɖé ɓɛ́ ɔ ké ɔ ɖɔɔ̀ wɔɔ̀, sepóɛɖé ɔ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ.

⁴¹ “Ké ɓíɖíi-dyi-nà-ɖɛ̀ ɓě kɔ̃̀ kɛ́ xwɛ̃́ìn ɓíɖíi dyiɛɛ mɛ nyàìn ɓě dyi. Wa mɔ̀ se-mú-hwɛ̀-ɖɛ̀ ɓó ɓě bìì.

⁴² Ɓě mɛ ɓɔ́ ɓíɖíi-dyi-nà-ɖɛ̀ ɓěɛ̀ ɖò ɖiɛ fɔɔ cá, kɛbì ɔ nàìn xwíɖí-kù kɔ̃, mɔɔ ɔ nàìn ɖáá hĩinyɛ mɔɔ ɖáá ɓáún-ɓáún wɛ̃, sepóɛɖé wa nyàìn ḿ dyi.

⁴³ Ɓěǐn ɖá ɓɛ́ ɓě ké ɓě mìɔùn se-mú-hwɛ̀-nyɔ̀ mú nyu dyììn ɖé ɓíɖíi-dyi-nà-ɖɛ̀ ɓěɛ̀ ɖò ɖi-ɖi mú. Ɓě ní nyuɛ náa fɔɔ cá,

⁴⁴ sepóɛɖé mɔ̄ mɔ̀ ɓěɛ̀ Bounɓo Gèɖèpɔ́ɔ̀. Ɓě mɛ po ɓě mìɔùn wáká, ɓɛ́ ɓě ké mú hwɛ̀, sepóɛɖé ḿ hwɛ̀ mú. Ɓěǐn ɖá ɓɛ́ ɓě ké ɓě mìɔùn se-mú-hwɛ̀-nyɔ̀ mú nyu dyììn ɖé ɓíɖíi-dyi-nà-ɖɛ̀ ɓěɛ̀ ɖò ɖi-ɖi mú,

⁴⁵ sepóɛɖé mɔ̄ mɔ̀ Bounɓo ɓɛ́ ḿ zà ma kà ɓě ɖé Íjè-ɓòɖòɔ̀ kɔ̃, ɓɛ́ ḿ kéà ɓěɛ̀ Gèɖèpɔ́ɔ̀ jǔɛ̀. Ɓě mɛ hwɛ̀ mú, sepóɛɖé mɔ́ún hwɛ̀ mú.

⁴⁶ “Ɖɛ nìà kɛ mɛ mɔ̀ gma ɓě ɓá nimii ɓě kè naà ɓě kè fɔ̀ɔ̀-ɖɛ̀ séín ɓɛ́ wa nì ɖé níɔ̀ gboɛ ɔ kè ɓíɖíi-dyi-nà-ɖɛ̀ ɓě kɔ̃̀ kɛ́ xwɛ̃́ìn ɓíɖíi dyiɛɛ jè dyí,

⁴⁷ ɓɛ́ gma ɓěɛ̀ kéɛ nyu ɓɛ́ ɓě ké gbo-zaìn-zaìn ɓó fɔ̀ɔ̀-ɖɛ̀ ɓě ḿ ɖá wa hwɛ̀ múɛ kè fɔ̀ɔ̀-ɖɛ̀ ɓě ḿ ɖá wa se mú hwɛ̀ɛ pṹa po. Gma ɓěɛ̀ kéɛ nyu ɓɛ́ ɓě ké gbo-zaìn-zaìn ɓó fɔ̀ɔ̀-ɖɛ̀ ɓě ɓɛ́ ɓě ké ɖiɛ kè fɔ̀ɔ̀-ɖɛ̀ ɓě ɓɛ́ ɓě se ɓéɖé ɓě ké ɖiɛɛ pṹa po.”