Jóɛ̀ 2 - Ɓǎsɔ́ɔ̀ Báɓòɔ̀

Kpã̌ùn-tòɔ̀ mɔ̀ ná-wùɖù ɓá Bounɓoɔ̀ wéɔ̀ jè dyíɛ

¹ Júɖà-nyɔ̀ ɓě, ɓě ɓaɖa ɖɔ-kpaɔ̀ ɖé Bounɓoɔ̀ toɖo hwɛ̀ǐn-hwɛ̀ǐn mɔ̀à Zádyɔún wɛ̃ɛ dya. Ɓě séín mɛ tɛɖɛ kɔ̃in, sepóɛɖé Bounɓoɔ̀ wéɔ̀ ɖǎ dyi xwɛ̃́ìn. Ɔ ɖǎ dyi xwɛ̃́ìn mìɔ cá.

² Ɔ mɔ̀ wé kɔ̃̀ ɓaɖa ɓɛ́ gbèè mu dyí dyììn, ɓɛ́ tíe ké kpɔ̃ kɛ. Ɔ mɔ̀ wé kɔ̃̀ ɓaɖa ɓɛ́ ní-tìě mu kpɔ̃ùn wɛ̃. Ɔ mu nììn kà tíe kpɔ̃à toɖo ɓě dya dyiɛɛ nìà kɛ. Ɔ mɔ̀ kpã̌ùn-tò ku wɔ̃ ɖò ɓɛ́ à séèǒ zɔ̃̌ɔ̀ dyé ɖòɛɛ nìà dyiɛń nyɛ̀, mɔɔ ké à seɛ ɓɛ́ náa ɖò dyéɛ mu ɖe fɔɔ cá.

³ Wa ɖò-ɖò ɓɛ ɓáá-ɖɛ̀ ɓě nì ɓó wa ɖeiɛ, kà nyɛ ɓɛà ɖɛ ɓó da dyi kɛ. Ɖé wa dyúa nì kà Ídɛ̃̀ìn Ɓáá-ɖɛ̀-gbǎɔ̀ nìà kɛɛ ɓó bã jè. Kɛɛ wa ɖǎ ɓó zi ní, nìí, páɔ̀ nì kà gbǎùn-fúɖúá nìà kɛ. Wa ní sè ɓáá-ɖɛ̀ ɖò ɓíɖíi.

⁴ Wa kè sǒ hwɔìn ní. Wa gbǔ kà sǒ ɓě nì to gboɛɛ gbǔà kɛ.

⁵ Wa dyi toɖo vɛ̀nɛ̀ ɓěɔ̀ kɔ̃in wã̀ǐn nìǐn, waà jĩ̌ɔ̀ nì kà hwíì-sǒ ɓěɛ̀ jĩ̌ nìà kɛ. Waà jĩ̌ɔ̀ nì kà pìǐ dyɛ-dyɛ kpá nyɛ kɔ̃ɛɛ jĩ̌ dyià kɛ. Wa kpá dɔ̃̀ǐn mú kà sójà kúɖúú ɓě kpáà dɔ̃̀ǐn mú ké wa ɖǎà ti dyé ɓó to gbo mu jèɛ.

⁶ Ti wa wóɖó xwáɖáún nyɛ̀nɛ̀ɛ̀ kɛɛ ní, nìí, nyɔ séín kpá fã̀àǔn, ké wa dyúa séín zàìn dyí.

⁷ Wa po gbàà kà gàa-zà-nyɔ̀ ɓě nìà kɛ. Wa dyá gmɔ ɓě dya kà sójà ɓě nìà kɛ. Wa séín kpá dɔ̃̀ǐn mú, ké wa mu dyúa déín.

⁸ Wa ní sɔ̀ìn hwìǐ, mɔɔ ké ɖò ní cɛ̃ ɔ mǔè ɖò mɔ̀ùn dyúa. Wa ɖò-ɖò séín mu dyúa déín cá. Waà dɔ̃̀ǐnɔ̀ mùìn dyí-zĩ̀ìn-ɖɛ̀ ɓě mú, ké wa ní gbɛ̀ dya.

⁹ Wa wóɖó hwɔɖɔ ɓěɔ̀ wàɖà, ké wa dyáìn gmɔ ɓěɔ̀ dyi wàɖà. Wa dyáìn gbǒ ɓěɔ̀ wúɖɛ̀-wɔ̃̀ gbo wàɖà, kà sṹún-gɔ̀-nyɔ̀ ɓě nìà kɛ.

¹⁰ Ɓóɖó-kpàɔ̀ túò dyi, ké dyɔɔ̀ tɛɖɛ ɓó wa jè. Tíe kpɔ̃ dyóɖóɔ̀ kè dɛ̀nɛ̀ɔ̀ kɔ̃in, ké dɛ̀nɛ̀ mɛ́nɛ́ɛ́ ɓěɔ̀ ɓɔ́ fãa.

¹¹ Bounɓoɔ̀ wùɖù ɔ sójà ɓěɔ̀ gbo kà dyɔɔ̀ pánáà kɛ. Ɔ sójà ɓěɔ̀ vò dyí mìɔ. Nyɔ ɓě ɓɛ́ wa nyu ɔ wuɖuɔ̀ kɛɛ ɓéɖé kpé mìɔ. Bounɓoɔ̀ wéɔ̀ mɔ̀ wé vɛ̀nɛ̀, ké ɔ ku wɔ̃ mìɔ. Nyɛ́ ɓɛ́ìn wéɔ̀ jè xwa kɛ́?

Ɖá-wùɖù ɓá wìǐn kpá jè dyíɛ

¹² Bounɓoɔ̀ ɖá, “Ɓó kàǔn wɛ̃ɛ, ɓě gmɔ̀ìn ḿ gbo ɖe hwòɖǒɛ̀-ɖé-hwɛ̀-kà, dyììn ɖé wɔ̃-kɔ̃-hwèɖè-hwèɖè kè vĩ̌-vĩ̌ ɔ kè wìì vɛ̀nɛ̀ mú.

¹³ Ɓěɛ̀ wììɔ̀ mɛ sɔ̀ìn ɖé ɓě hwòɖǒ bũ̌. Ɔ mɛ ɓɔ́ nɔ̄ ku kɔ̃in nìɛ̀ ɖòùn pū.” Ɓě gmɔ̀ìn Bounɓo mɔ̀à ɓěɛ̀ Gèɖèpɔ́ɔ̀ kɛɛ gbo ɖe, sepóɛɖé ɔ ɓéɖé jĩ́á-jè kè wìì. Ké ɔ dyoɖo-hwòɖò mɛɛ̀ ní, ké ɖɛ̀ɓɛ̀ǐn-ɖɛ̀ɓɛ̀ǐn dyíìn ɔ múin. Ké ɔ zàìn ɖɛ gbà ɓɛ́ ɔ kéɔ́ nyɔǔn kɔ̃ dyàa dyí.

¹⁴ Nyɛ́ dyuòɛ̀ kɛbì Bounɓo mɔ̀à ɓěɛ̀ Gèɖèpɔ́ɔ̀ kɛɛ mu dyɛ̀ ɔ hwòɖǒɔ̀ gbo zĩàìn, ɓɛ́ ɔ ké ɓě wìǐn dyé, ɓɛ́ ɔ ké ɓě mana kɔ̃ po, nìí, ɓɛ́ ɓě ké ɔ ɖii-ɖɛ̀-sàǎ-zàìn-ɖɛ̀ kè náá-ɖɛ̀-sàǎ-zàìn-ɖɛ̀ ɓě nyí ní kɛ́?

¹⁵ Ɓě ɓaɖa gã̀àɔ̀ ɖé Zádyɔún-tòɖòɔ̀ dya. Ɓě cɛ̃ɛ nyɔ ɓěɔ̀ gbo, ɓɛ́ wa ké dyí poìn, ɓɛ́ wa ké wɔ̃ kɔ̃ hwèɖè, ɓɛ́ wa ké Gèɖèpɔ́ɔ̀ ɓiè.

¹⁶ Ɓě poìn nyɔ ɓěɔ̀ dyí, ɓɛ́ ɓě ké wa wáká po, ɓɛ́ wa ké mú hwɛ̀. Ɓě poìn nyɔ vɛ̀nɛ̀ ɓěɔ̀ kè dyú mɛ́nɛ́ɛ́ ɓěɔ̀ dyí. Ɓě dyà dyú-pɛ̀ɖɛ̀ ɓě nì nɛɛ̀ wɔ̃ɛɛ ɖekè. Gàa ɓɛ́ ɔ kpɔ̃ nyɔ́nɔ́ dyi ɖieɛɛ mɛ sɔ̀ ɔ gbǒɔ̀ mú, ɓɛ́ nyɔ́nɔ́ ɖìèɔ̀ ké ɖé ɔ ɓí-dyùɔ̀ mú sɔ̀.

¹⁷ Sáa-zà-nyɔ̀ ɓě nyuà kũ̀à ɓó Bounɓoɔ̀ dyúa kɛɛ mɛ vĩ̌ìn, ɓó Bounɓoɔ̀ gbǒɔ̀ sí-xwíníínɔ̀ kè sáa-kɔ̃-zàìn-gbààɔ̀ pṹa. Waà vĩ̌-wùɖùɔ̀ mɛ ɖá, “Óó Bounɓo, dyé nì nyɔ ɓěɔ̀ wìǐn. Ɓɔ́ nì nyɔ ɓě mɔ̀à nì kɔ̃̀ɔ̀-ɖɛ̀ kɛɛ dyɔ́-cù mú nyuɛ, ɓɛ́ ɓóɖó-dù kà kò ɖò ɓě ní kɔ̃̀ ɖǎ wa nɔ́ɔ́ dyi pòìn, wa ní kɔ̃̀ɔ̀ ɖà cɛ̃, wa ní kɔ̃̀ ɖà níiń, ‘Dɛ̌ waà Gèɖèpɔ́ɔ̀ nì kɛ́?’ ”

Gèɖèpɔ́ɔ̀ nyuɛ ké ɓáá-ɖɛ̀ bã ɓóɖóɔ̀ mú ɖe

¹⁸ Sɔ̀ìn ɓó ɖɛ ɓěɛ̀ gboɛɛ, nìí, Bounɓoɔ̀ ɓóɖóɔ̀ jè mu ɔ hwòɖǒ kpɔ̃ùn, ɓɛ́ ɔ ké ɔ nyɔ ɓěɔ̀ wìǐn dyé.

¹⁹ Bounɓoɔ̀ mu wa gɔ̃̌ jǔùn, ɓɛ́ ɔ ké níiń, “Ní mu ɓě ɖii-ɖɛ̀ kè wã́ìn ɔ kè cáná jĩ̀ kà ɓɛ́ìn ɓěɛ̀ hwòɖǒ dyi dèɛ̀ kɛɛ nyíìn. Ḿ se ɓě dyi táǎ mu, ɓɛ́ ɓóɖó-dù kà kò ɖò ɓě ké ɓě dyɔ́ ɓaɖa ɖe fɔɔ cá.

²⁰ Ní mu kpã̌ùn-tò sɔ̀à ɖé ɓóɖóɔ̀ xwía kɛɛ kúmúùn sɔ̀ìn ɓó ɓě bũ̌. Ní mu wa ɖíɛ́ ɓě ɖé gbǎùn-fúɖúáɔ̀ kɔ̃ poùn. Ní mu waà wáká hwɔà ɖé dyúa dyíɛɛ ɖé Tɔ̃́ Dòùnɓìǎ nìà ɖé dyóɖó-xwáɖáún-wóɖóìn-naínɔ̀ kɛɛ kɔ̃ poùn, ɓɛ́ ḿ kéɛ wáká hwɔà ɖé ɖeín dyíɛɛ ɖé Mɛ́ɖɛ̀tɔ̀wéɖénìà-dyòǒ nìà ɖé dyóɖó-dyi-kpáìn-naínɔ̀ kɛɛ kɔ̃ po. Ké waà zɔ̃̌-nyɔ̀ɔ̀ mu dyií muùn. Ní mu wa mú gbɔɔ̀ùn ɓó ɖɛ jĩ̀ kà wa ɖǎà ɓě bũ̌ nyuɛɛ jè.

²¹ “Geɖe ɓě, ɓěɛ̀ hwòɖǒ mɛ ɓɔ́ ɓaɖaa. Ɓě mɛ kpá múàǔn, sepóɛɖé mɔ̄ Bounɓoɔ̀ ɖǎ ɖɛ ku kɔ̃in ɓě nyu.

²² Ɓě mɔ̀ xwáɖá-xwíɖíi-nìmìì ɓěɛɛ, ɓěɛ̀ hwòɖǒ mɛ ɓɔ́ ɓaɖaa, sepóɛɖé pìǐ ɓěɔ̀ nìǎ ɓɛɖɛɛ̀ǐn ɖe, ké cu ɓěɔ̀ nìǎ waà ɓo ɓěɔ̀ tòɖòɛ̌n ɖe. Féè-cù ɓěɔ̀ kè géɖéè-ɖúú-gbǒ ɓěɔ̀ nìǎ ɓo ɓáún-ɓáún tòɖòɛ̌n ɖe.

²³ “Ɓě mɔ̀à Zádyɔún-nyɔ̀ ɓěɛɛ, ɓě kpá múàǔn ɖé mɔ̄ Bounɓo mɔ̀à ɓěɛ̀ Gèɖèpɔ́ɔ̀ kɛɛ mú, sepóɛɖé ḿ ɖǎ ɓě ní ɖaɓaà ɓó ɖɛ-ɓá-tìǐn kè ɓó ɓáá-ɖɛ̀ ɓěɔ̀ tòɖò-tìǐn nyɛɛ nyí kà ḿ nyuɛ zɔ̃̌ɔ̀ kà kĩ́ín nyɛ. Ḿ ɖǎ ní jĩ̀ kà kɔ̃̀ ɔ ké ɖaɓaa tò.

²⁴ Ɖii-ɖɛ̀ mu ɖé ɓěɛ̀ sáɖá ɓěɔ̀ mú dyi dyíìn ɖe. Ké wã́ìn kè cáná mu ɓěɛ̀ tɛ̀ɓɛ̀ɛ̌ ɓěɔ̀ múin dyíìn ɖe.

²⁵ Ní mu ɓě ɖe pɛ́ɛ̀ìn ɖe ɓó zɔ̃ jĩ̀ kà ɓɛ́ kpã̌ùn ɓěɔ̀ ɖǎà ɓěɛ̀ ɓáá-ɖɛ̀ ɓěɔ̀ ɖiɛɛ jè. Wa mɔ̀ kpã̌ùn gmɔ̀ kèɛ̀ vɛ̀nɛ̀ ɓě mɔ̀à kpã̌ùn-tò vɛ̀nɛ̀ ɓɛ́ ḿ tò ma kà ɖé ɓě gboɛ.

²⁶ Ɓě mu ɖɛ ɖiìn, ɓɛ́ ɓě ké ɖoɓo, nìí, ɓɛ́ ɓě ké mɔ̄ Bounɓo mɔ̀à ɓěɛ̀ Gèɖèpɔ́ɔ̀ kɛɛ nyɛ́nɛ́ɔ̀ ɓàìn, sepóɛɖé ḿ ɖǎ dĩ́ín-dĩ̀ìn-ɖɛ̀ ɓě nyu ɓó ɓě bìì. Dɛ̃ se ɓě mɔ̀ ní nyɔ ɓěɔ̀ kɛɛ nyuɛ́ mu ɖe fɔɔ,

²⁷ ɓɛ́ ɓě kéɛ dyí dyuò kà ḿ nì nɔ̄ ɓě mɔ̀ Éézùɖùɛ̀-dyù ɓěɛɛ hwìɛ̀ kɛ. Ɓě muɛ dyí dyuòùn kà mɔ̄ Bounɓoɔ̀ mɔ̀ ɓěɛ̀ Gèɖèpɔ́ɔ̀, ké kà Gèɖèpɔ́ɔ̀ kà kò ɖò se ɓó ḿ wáún nì ɖeɛ. Dɛ̃ se ɓě nyuɛ́ mu ɖe fɔɔ cá.

Bounɓoɔ̀ wéɔ̀

²⁸ “Sɔ̀ìn ɓó ɖɛ ɓěɛ̀ gboɛɛ, nìí, ní mu ní Zùùɔ̀ nyɔ séín kɔ̃ púèìn. Ké ɓěɛ̀ dyú-gàà kè ɓěɛ̀ dyú-màà ɓěɔ̀ mu wuɖu ɓě ḿ dèìn wa wĩín nyɛɛ cɛ̃ìn. Ké ɓěɛ̀ gàa sùà ɓěɔ̀ mu dya-dya ɓě ɓéɖéìn, ké ɓěɛ̀ gàa-dyù gmɔ̀ ɓěɔ̀ mu dyí-tɛ̀mɛ̀ìn-ɖɛ̀ ɓě dyéìn.

²⁹ Ní mu ní Zùùɔ̀ gǐì-gàà kè gǐì-màà ɓě kɔ̃ púèìn ɖekè ɓó wé ɓěa ɓaɖa.

³⁰ Ní mu dĩ́ín-dĩ̀ìn-ɖɛ̀ ɓě ɖé dyɔɔ̀ dyí kè ɓóɖó-kpàɔ̀ kɔ̃ nyuùn. Dĩ́ín-dĩ̀ìn-ɖɛ̀ ɓěɔ̀ mu nyɔmɔɔ kè nyɛ ɔ kè nyànà-sò-kpò jǔùn.

³¹ Dyóɖóɔ̀ mu tíe-kpò mú zɛ̃̀ìn, ké dɛ̀nɛ̀ɔ̀ mu nyɔmɔɔ mú zɛ̃̀ìn, hwɛ̀ ɓɛ́ Bounɓoɔ̀ wé vɛ̀nɛ̀ ku wɔ̃ɔ̀ ké ɓó nyini.

³² Ké nyɔ séín mu mɔ̄ Bounɓoɔ̀ nyɛ́nɛ́ɔ̀ ɖáùn wɛ̃ɛ, wa mu póùn. Kà ḿ nyuà cɛ̃ɛ kɛɛ, kǎà ɔ mu nììn. Pó-pó mu nììn ɓó nyɔ ɓě ḿ ɖǎà gã ɖé Jùɖúsɛ̀ɖɛ̀ìn-hwɔ̀ɖɔ̀ nìà ɖé Zádyɔún-tòɖòɔ̀ dya múɛɛ bìì.”