Jóɓò 29 - Ɓǎsɔ́ɔ̀ Báɓòɔ̀

Jóɓò kpa wuɖu dyúa ke

¹ Jóɓò kpa ma wuɖu dyúa ke, ké ɔ ɖá,

² “Nyɛ́ ɖá ḿ nìɔ̌ má kà ḿ nyuó zɔ̃̌ɔ̀ kà nìɛ̀, ti ɓɛ́ Gèɖèpɔ́ɔ̀ nìǒ zɔ̃̌ɔ̀ kà ḿ dyí gmɔ̀ǔn wɛ̃ɛ kɛ́?

³ Ɔ ceɔ̀ fã̀ìn zɔ̃̌ɔ̀ ḿ kɔ̃in ɓó wé ɓěa ɓaɖa, ké ɔ ceɔ̀ nyuɛ ké ḿ ɓɛ́ìn zɔ̃̌ɔ̀ tíe-kpò mú nàà.

⁴ Nyɛ́ ɖá ḿ nìɔ̌ má kà ḿ nyu zɔ̃̌ɔ̀ kà nìɛ̀ ti ɓɛ́ kpé nì zɔ̃̌ɔ̀ ḿ dyíɛɛ kɛ́? Ɔ mɔ̀ ti ɓɛ́ Gèɖèpɔ́ɔ̀ mɔ̀ ma ní ɓǎto, ké ɔ gmɔ̀ ma ní taàɔ̀ dyí kɛ.

⁵ Ɓó tia ɓaɖaa, kpé-séín-ɓéɖé-Gèɖèpɔ́ɔ̀ nì ma ɓó ḿ gbo, ké ní dyú ɓěɔ̀ nì ma ɓó ḿ ɖei.

⁶ Ɓó tia ɓaɖaa, ḿ mɔ̀ ma ɖɛ-kɔ̃̀-nyɔ̀, ké ɔ nì pū kà ní hwìè ɓěɔ̀ mɔ̀ ma góò saá-saá kɛ.

⁷ Ti ɓɛ́ ní mu ma níǐn kò-naínɔ̀ dyi kòɛ̌ muùn ɖé hwɔɖɔɔ̀ zɔ̃́ín-wɔ̃-pòìn-naínɔ̀ kɛɛ,

⁸ nìí, nyɔ gmɔ̀ ɓěɔ̀ dyi ma ḿ dyé nyɛ̀nɛ̀ɛ̀ ní, wa sɔ̀ìn hwìǐ, ké nyɔ vɛ̀nɛ̀ ɓěɔ̀ nyànà dyi, sepóɛɖé wa dyé ma ḿ kpéín mìɔ jè.

⁹ Ɓó tia ɓaɖaa, nyɔ-wuɖuí-kɔ̃̀-nyɔ̀ ɓě ɓɔ́ ma wùɖùɛ̀,

¹⁰ ké nyɔ kpa ɖɛ ɓěɔ̀ ɓɔ́ ma wùɖùɛ̀ ɖekè. Wa séín nì ma gìɖìǐ.

¹¹ “Nyɔ séín ɓɛ́ wa wɔ̃́ ɖɛ ɓě ɓɛ́ ḿ cɛ̃ ma kɛɛ, waà hwòɖǒ dè dyi, ké nyɔ séín ɓě ɓɛ́ wa dyé ma ḿ wɛ̃ɛ kpá ma múàǔn,

¹² sepóɛɖé, ḿ póìn ma gǎ-dyé-nyɔ̀ ɓě ɓɛ́ wa pòìn ḿ kpéi ɓó gbo-kpá-kpá jèɛɛ ní, ɔ kè xwíè-dyù ɓě ɓɛ́ wa se gbo-kpá-nyɔ̀ ɖò ɓéɖéɛ.

¹³ Nyɔ ɓě ɓɛ́ wa nìǎ ma mɛ́iń muɛń, ɓɛ́ ḿ dyi wa póìn nyɛɛ po ḿ zùo. Ké ḿ nyuɛ ké jɔ̌ɔ̀-màà ɓěɛ̀ hwòɖǒ kpá múàǔn, ké wa po wɛ́ɖɛ́ píé.

¹⁴ Dyí-sɛ́ɖɛ́ìn-ɖɛ̀ nyu-nyu nì ma ḿ mú kà nyɔ poà ɖɔ múɛ. Jǎà-ɖɛ̀-nyu-nyu mɔ̀ ma ní dúi-bĩìn-ɖɛ̀.

¹⁵ Mɔ̄ mɔ̀ ma dyéɖéín-dyi-kpè-nyɔ̀ ɓěɔ̀ dyéɖé, ké mɔ̄ mɔ̀ ma nyɔ ɓě kɔ̃̀ ɓoɛ̀ mɛ́ɛ ɓo.

¹⁶ Mɔ̄ mɔ̀ ma gǎ-dyé-nyɔ̀ ɓěɔ̀ ɓǎ, ké mɔ̄ mɔ̀ ma nyɔ ɓě ɓɛ́ ḿ se ma dyí dyuòɛɛ bìì kɔ̃-zàà-zi-nyɔ̀.

¹⁷ Mɔ̄ mɔ̀ ma hwòɖǒ-kɔ̃in-nyìnììn-nyɔ̀ ɓěɔ̀ ga-dyi-pàɖàìn-nyɔ̀, ké wa po ma ɖɛ ɓě wa ké ma kpã́ mànàìn nyɛɛ dyi.

¹⁸ “Ní hwòɖǒ ɖá ní muɔ́ má hwèɖèìn-fɛ̀ɛ̀ cĩ́ìn, ɓɛ́ ḿ kéɔ́ má ɖé ḿ ɓíɖí-taún mɛ́ìn ɖé gìɖìǐ mú.

¹⁹ Ḿ nì ma kà cu kɔ̃̀ gmɛ̀nɛ̀ɛ̀ ɓě mu ɓóɖóún vɛ̃in nyɛ. Ní gmɛ̀nɛ̀ɛ̀ dyɛ̀ìn ní, ké dunu tèìn ní ɖɔ́ ɓěɔ̀.

²⁰ Nyɔ séín nì ma ḿ ɓàǐn, ké kpé nì ma ḿ dyí kóɖó-kóɖó ke kánáá pū.

²¹ Nyɔ séín nì ma gìɖìǐ, ké wa gmɔ̀ ma ní ná-wùɖù dya.

²² Ḿ ɖǎ ma wùɖù ní, nyɔ ɖò ní dè ma ɓó wuɖu ɖò ɖe. Ní wuɖuɔ̀ ma ma wa ní.

²³ Nyɔ séín kpɔ̃ ma ní wuɖuɔ̀ dyi, kà geɖe-ɓǎ nyuà múàǔn kpáa ɓó ní ɖàɓàìn ɔ ɓáá-ɖɛ̀ ɓěɔ̀ kɛɛ jèɛ.

²⁴ Ní dyɔ́-wɔ̃̀ɔ̀ dè ma waà hwòɖǒ dyi ti ɓɛ́ waà hwòɖǒ kpá ɖé ɖeiɛ. Ní dyɔ́-dyùǎɔ̀ mɔ̀ ma wa kpéí-po-nyɔ̀.

²⁵ Mɔ̄ mɔ̀ ma wa bìì ɖɛ-gã-nyɔ̀. Ḿ hwɔìn ma kã́á ɖé wa hwìɛ̀. Ḿ mɔ̀ ma nyɔ ɓě ɓɛ́ wa nì vĩ̌ɛń nyɛɛ hwòɖǒ-dyi-dè-nyɔ̀.