Jóɓò 2 - Ɓǎsɔ́ɔ̀ Báɓòɔ̀

Nɔɔ́-nàmàǔn kè Gèɖèpɔ́ɔ̀ dè dɔ́ɔ́ ɖe ɓá Jóɓò jè dyí

¹ Wé ɖòɛ̀ ɓaɖa ɖeɛɛ, Gèɖèpɔ́ɔ̀ ínjà ɓěɔ̀ dyi ma ɓó Gèɖèpɔ́ɔ̀ dyúa ɖe. Ké Nɔɔ́-nàmàǔn sí ma wa hwìɛ̀ ɖekè.

² Ké Bounɓoɔ̀ diè ma Nɔɔ́-nàmàǔn dyi, ké ɔ ɖá, “Dɛ̌ m̀ sɔ̀ kɛ́?” Ké Nɔɔ́-nàmàǔn jǔ ma Bounɓoɔ̀ gɔ̃̌, ké ɔ ɖá, “Ḿ sɔ̀ muùn dyi nyuɛń ɖé ɓóɖó-kpàɔ̀ kɔ̃e. Ḿ nì ɓóɖó-kpàɔ̀ kɔ̃ dyi téɛńe.”

³ Ké Bounɓoɔ̀ ɖá, “Má, m̀ dyé ní gbo-nì-nyɔ̀ mɔ̀à Jóɓò kɛɛ níe? Má, m̀ dyéɛ kà nyɔ ɖò se ɓóɖó-kpàɔ̀ kɔ̃ nì kà ɔ nìà kɛe? Ɔ mɔ̀ nyɔ sɛ́ɖɛ́ìn dyí. Ɔ fɛ̃̀ìn mɔ̄ Gèɖèpɔ́ɔ̀ dyi, ké ɔ cĩ́-cĩ́ɔ̀ se kɛɛ ɖò ɓéɖé. Ɔ nyɛ́ ɖɛ-gbà-nyu-nyu mú. M̀ nyuɛ ké ḿ dyéìn ɔ gǎ pídyi. Kɛɛ, má m̀ dyéɛ kà ɔ taɓa ḿ hwìɖǐǐ ke kánáá pūɛe?”

⁴ Hwɛ̀ ké Nɔɔ́-nàmàǔn jǔ ma Bounɓoɔ̀ gɔ̃̌, ké ɔ ɖá, “Nyɔǔn-dyù kàmà waà kpóɖó-dyùà jè. Nyɔǔn-dyù ɓɛ́ìn waà kɔ̃̀ɔ̀-ɖɛ̀ séín hwòɖǒ gbo zàà ɓó waà fɛ̀ɛ̀ póìn jè.

⁵ Kɛɛ pɛ́ɛ̀ sɔ̃ dɔ̃̌ùn, ɓɛ́ m̀ ké ɔ fɔ́ kè ɔ kpáɔ̀ dyi tìnììn dɔ̃̌ùn. Ɔ mu kà ɖé m̀ dyéɖéín gmɔ̀ùn, ɓɛ́ ɔ ké m̀ vàɖǎ cá.”

⁶ Ké Bounɓoɔ̀ cɛ̃ɛ ma Nɔɔ́-nàmàǔn gbo, ké ɔ ɖá, “Ɔ nìàǒ wɛ̀. Ɔ nì ɖé m̀ xwaún, kɛɛ mɔ̀ǔn ɖá ɓɛ́ m̀ ké ɔ ɖáɓá.”

⁷ Ɔ jèɛɛ, Nɔɔ́-nàmàǔn sɔ̀ ma ɓó Bounɓoɔ̀ dyúa, ké ɔ nyuɛ ké jě wáɖá ma Jóɓò mú. Jěɔ̀ sɔ̀ìn ma ɖé ɔ ɓo xwíɖíi, ké ɔ nyini ma ɖé ɔ dú-hwìɛ̀.

⁸ Ké Jóɓò ɖú ma mɛ-dyàà-xwɛ̃̀ ɖò dyí, ké ɔ kpana ma ɔ jěɔ̀ dyíin, ti ɓɛ́ ɔ kò ma ɓó tĩ́ɔ-pɛ̀ɛ̀ mú dyiɛ.

⁹ Hwɛ̀ ké ɔ gmàà cɛ̃ɛ ma ɔ gbo, ké ɔ ɖá, “M̀ taɓa nì Gèɖèpɔ́ɔ̀ hwìɖǐǐ ke kánáá pūe? Vàɖǎ Gèɖèpɔ́ɔ̀, ɓɛ́ m̀ ké mɛ́.”

¹⁰ Kɛɛ Jóɓò cɛ̃ɛ ma ɔ gbo, ké ɔ ɖá, “M̀ wùɖù pū kà zuɖuu-màà ɓěɔ̀ ɖò kéɔ́ kà wùɖùɛ̀ nyuɛ. À mɛ dyé ɖɛín-ɖɛ̀ ɖé Gèɖèpɔ́ɔ̀ xwaún tee pū, ké à mɛ ɓɔ́ ɖɛ gbà ɖò dyí dyéɛ fɔɔ cáe?” Jóɓò dyé ma ɖɛ gbà kúɖúú ɓěa dyí dyɛo, kɛɛ ɔ se ma Gèɖèpɔ́ɔ̀ ɖɛ gbà ɖò kɔ̃ún cɛ̃.

Jóɓòɛ̀ ɓǎto ɓě dyi ɔ gbo

¹¹ Ti ɓɛ́ Jóɓòɛ̀ ɓǎto ɓě wɔ̃́ ma ɖɛ gbà jĩ̀ kà ɓɛ́ Jóɓò nì ma kà dyí dyéɛń nyɛ jèɛɛ, wa ɖò-ɖò sɔ̀ ma ɖé wa ɓíɖí, ké wa dyi ma. Wa ɖǎ ma wuɖu dè kĩ́ín kà ɓɛ́ wa ké dyi, nìí wa ké ma Jóɓòɛ̀ hwòɖǒ dyi dèɛ. Ɔ ɓǎto ɓěɔ̀ nyɛ́nɛ́ mɔ̀ Ɛ̀ɖífà ɓɛ́ ɔ sɔ̀ ma ɖé Témàùn-hwɔ̀ɖɔ̀ɔ̀ múɛ kè Bíódà ɓɛ́ ɔ sɔ̀ ma ɖé Súwà-hwɔ̀ɖɔ̀ɔ̀ múɛ ɔ kè Zófà ɓɛ́ ɔ sɔ̀ ma ɖé Náámà-pàɔ̀ múɛ.

¹² Ti ɓɛ́ wa ɖǎ ma dyi xwɛ̃́ìn, ké wa dyé ma Jóɓò kɛɛ, wa se ma ɔ dyí dyuò. Púɛɛ, wa ɖú ma vĩ̌ kpàǐ. Wa fáìn ma wa mìɔùn ɖɔún dyi, ké wa po ma ɓóɖó dú, ɓɛ́ ɔ kéɛ nyɔǔn dyí tɛ̀mɛ̀ìn kà wa kpá wìǐn mìɔ kɛ.

¹³ Wa dyi ma, ké wa kò ma ɓó ɔ gbo ɓíɖíiɔ̀ dyi ɓó dyóɖóaún-wè mɛ̀nɛ̌ìn-sɔ̃́ kè máaún-hwùɖù mɛ̀nɛ̌ìn-sɔ̃́ xwíníín, ké wa nyɔ ɖò se ma wuɖu wĩín zàà ɓɛ́ìn, ɓɛ́ wa ké ɔ gbo wùɖù, sepóɛɖé wa dyéɛ kà gǎ ɓɛ́ ɔ nì ma kà dyéɛń nyɛɛ ku ma wɔ̃ mìɔ kɛ.