Tɔ̀ɔ̀-ɓìɔ̀ 9 - Ɓǎsɔ́ɔ̀ Báɓòɔ̀

Àbímɛ̀nɛ̀ jè

¹ Wé ɖòɛ̀ ɓaɖaa, Àbímɛ̀nɛ̀ mɔ̀à Jɛ́wùɖù-Béòɛ̀ dyú-gààɔ̀ kɛɛ sɔ̀ ma dyí, ké ɔ mu ma ɖé ɔ ɖeɛ̀ gbǒ-xwíníín-nyɔ̀ ɓěɔ̀ gbo, ɖé Sɛ́kɛ̃̀ìn-hwɔ̀ɖɔ̀ɔ̀ mú. Ké ɔ cɛ̃ɛ ma wa séín gbo, ké ɔ ɖá,

² “Ɓě diè nyɔ séín ɓě nì Sɛ́kɛ̃̀ìn-hwɔ̀ɖɔ̀ɔ̀ múɛɛ dyi, ɓɛ́ ɓě ké níiń, ‘Ɖɛ́ nɔ̀mɔ̀ dyíin ɓó ɓě bìì kɛ́? Ɓě mɔ́ ɓɛ́ Jɛ́wùɖù-Béòɛ̀ dyú-gàà kpáɖá-nyɔ tã ɓaɖa-bùè ɓěɔ̀ séín ké ɓě wuɖuí kɔ̃̀ ɓó ti dyúáɖòɔ̀ xwíníín, mɔɔ ɓɛ́ nyɔ dyúáɖò ké ɓě wuɖuí kɔ̃̀ɔ̀?’ Ɔ mɛ nì ɓě hwìɖǐi kà ḿ mɔ̀ ɓěɛ̀ wáká ɖò kɛ.”

³ Ɔ jèɛɛ, ɔ ɖeɛ̀ ɖíí ɓěɔ̀ wùɖù ma Sɛ́kɛ̃̀ìn-hwɔ̀ɖɔ̀ɔ̀ nyɔ ɓěɔ̀ gbo ɓó ɔ bìì. Púɛɛ, Sɛ́kɛ̃̀ìn-nyɔ̀ ɓěɔ̀ hwòɖǒ gmɔ̀ìn ma ɖé Àbímɛ̀nɛ̀ gbo, ké wa wɔ̃́ ɓɛ́ wa ké ɔ kíɖíí sí, sepóɛɖé wa ɖá, “Ɔ mɔ̀ à ɖíí-gàà.”

⁴ Ké wa nyí ma Àbímɛ̀nɛ̀ séɓàɖà-cɛ̀kò kpáɖá-nyɔ tã ɓaɖa-bùè ɓɛ́ wa zà ma ɖé Béò-Bɛ́wìɖìɛ̀ gbǒɔ̀ múɛ. Ké Àbímɛ̀nɛ̀ pɛ́ɛ̀ìn ma fùɖù-fùɖù-nyɔ̀ ɓě, ké wa sí ma ɔ kíɖíí.

⁵ Púɛɛ, ɔ sɔ̀ dyí, ké ɔ mu ɖé ɔ ɓǎ ɓíɖí-hwɔ̀ɖɔ̀ mɔ̀à Áfàɖà kɛɛ mú. Ké ɔ ɖáɓáìn ma ɔ ɖíí-gàà kpáɖá-nyɔ tã ɓaɖa-bùè ɓě mɔ̀à ɔ ɓǎà dyú ɓěɔ̀ kɛɛ ɓó sɔ́ɔ́-kpò ɖò kɔ̃. Kɛɛ Jɛ́wùɖù-Béòɛ̀ dyú-gàà dyùwè kɔ̃̀ nyɛ́nɛ́ mɔ̀ Jótàùn kɛɛ mɔ̀ nyɔ sè ma ɓíɖíi, sepóɛɖé ɔ vǐè ma ní jè.

⁶ Ké Sɛ́kɛ̃̀ìn-nyɔ̀ séín ɓěɔ̀ kè Bɛ̀-Míɖò-nyɔ̀ séín ɓěɔ̀ poìn ma ɖé óò-cù ɖò xwíɖíi dyí, ɖé nyɔ-ɖɛ-hwìɖǐi-dyàìn-sɔ̀ɔ̌-kpò nì ɖé Sɛ́kɛ̃̀ìn-hwɔ̀ɖɔ̀ɔ̀ múɛɛ wáún, ké wa nyu ma Àbímɛ̀nɛ̀ kã́á mú.

⁷ Ti ɓɛ́ Jótàùn wɔ̃́ɔ ma kɛɛ, ɔ dyá ma ɖé Gèwíɖízĩ̀ìn-tòɖòɔ̀ dú-hwìɛ̀, ké ɔ páná ma mú ɖé wa gbo, ké ɔ ɖá, “Sɛ́kɛ̃̀ìn-nyɔ̀ ɓě, ɓě tò ní wuɖuɔ̀ gbo ɖùǔ, ɓɛ́ Gèɖèpɔ́ɔ̀ ké ɓě nììn wuɖuɔ̀ ɖùǔ gbo tòo.

⁸ Wé ɖòɛ̀ ɓaɖaa, cu ɓě poìn dyí, ɓɛ́ wa ké ma cu ɖò gã, ɓɛ́ ɔ ké ma kã́á jǔ ɓó wa kɔ̃in. Ké wa cɛ̃ɛ ma ɔ́ɖè-cù gbo, ké wa ɖá, ‘À mɔ́ ɓɛ́ m̀ ké à kã́á jǔ.’

⁹ Kɛɛ ɔ́ɖè-cùɔ̀ jǔ ma wa gɔ̃̌, ké ɔ ɖá, ‘Ḿ mɛ táà ní cáná ɓɛ́ ɔ nyuà ɓɛ́ gèɖèpɔ́ɔ̀ ɓěɔ̀ kè nyɔǔn-dyù dyià dya-dè-dè ɓéɖéɛɛ tò jè dyi, ɓɛ́ ḿ ké cu ɓě kɔ̃in nìɛ̌ muù?’

¹⁰ Ké cu ɓěɔ̀ cɛ̃ɛ ma féè-cù gbo, ké wa ɖá, ‘Dyi, ɓɛ́ m̀ ké à kã́á jǔ.’

¹¹ Kɛɛ féè-cùɔ̀ jǔ ma wa gɔ̃̌, ké ɔ ɖá, ‘Ḿ mɛ táà ní ɓo ɖéé-ɖéé ɓěɔ̀ tòɖò jè dyi, ɓɛ́ ḿ ké cu ɓě kɔ̃in nìɛ̌ muù?’

¹² Ké cu ɓěɔ̀ cɛ̃ɛ ma géɖéè-ɖúú-gbǒ gbo, ké wa ɖá, ‘Dyi, ɓɛ́ m̀ ké à kã́á jǔ.’

¹³ Kɛɛ géɖéè-ɖúú-gbǒɔ̀ ɖá, ‘Ḿ mɛ táà ní wã́ìn ɓɛ́ ɔ poà gèɖèpɔ́ɔ̀ ɓě kè nyɔǔn múàǔn wɛ̃ɛ tò jè dyi, ɓɛ́ ḿ ké cu ɓě kɔ̃in nìɛ̌ muù?’

¹⁴ Hwɛ̀ ké cu séín ɓěɔ̀ cɛ̃ɛ ma wí-kpɔ̀ɔ̌ gbo, ké wa ɖá, ‘Dyi, ɓɛ́ m̀ ké à kã́á jǔ.’

¹⁵ Ké wí-kpɔ̀ɔ̌ɔ̀ jǔ ma wa gɔ̃̌, ké ɔ ɖá, ‘Ɓě dyi mɔ́ ɓɛ́ ɓě ké ḿ kã́á mú nyu jǎà ní, nìí, ɓě mɛ dyi, ɓɛ́ ɓě ké nɔ̄ ní pɛ̀ɛ̀ɔ̀ xwíɖíi pèɖèìn. Kɛɛ ɔ se ná nìǐn, nìí, nyɛ mu ní wí-kpɔ̀ɔ̌ɔ̀ mú sɔ̀ùn, ɓɛ́ ɔ ké síɖà-cù nìà ɖé Ɖɛ́ɓèɖɔ́ùn-ɓòɖòɔ̀ kɔ̃ɛɛ fɔ̃ɔ hwɔ!’

¹⁶ “Kà ɓɛ́ ɓě ɖǎà Àbímɛ̀nɛ̀ kã́á mú nyuɛɛ, ɓěɛ̀ hwòɖǒ ɖá ɖɛ ɓě nyuà kɛɛ mɔ̀ dyí-sɛ́ɖɛ́ìn-ɖɛ̀ kè jǎà-ɖɛ̀e? Ɓěɛ̀ hwòɖǒ ɖá ɖɛ ɓě nyuà Jɛ́wùɖù-Béò kè ɔ gbǒ-xwíníín-nyɔ̀ ɓěɔ̀ bũ̌ɛɛ nɔ̀mɔ̀ dyíine? Ɔ mɔ̀ ɖɛ ɓě ɓéɖé ɓě kéɔ́ ɔ bũ̌ nyuɛe?

¹⁷ Ḿ ɓǎ vɔ̃ ma ɓě bìì, ké ɔ pɛ̃́ìn ma ɔ fɛ̀ɛ̀ɔ̀ xwaún dyi, ɓɛ́ ɔ ké ɓě póìn sɔ̀ìn ɖé Míɖìàùn-nyɔ̀ ɓěɔ̀ xwaún.

¹⁸ Kɛɛ ɓě mɔ̀ǎ ḿ ɓǎà gbǒ-xwíníín-nyɔ̀ ɓěɔ̀ gbo-vɔ̃-nyɔ̀ ɓó zɛ̃̌ɛ̀. Sepóɛɖé ɓě ɖǎ ɔ dyú-gàà kpáɖá-nyɔ tã ɓaɖa-bùè ɓěɔ̀ ɓó sɔ́ɔ́-kpò dyúáɖò kɔ̃ ɖáɓáìn, ké ɓě ɖǎ Àbímɛ̀nɛ̀ mɔ̀à ɔ gǐì-mààɔ̀ dyúɛɛ kã́á mú nyu ɓó ɓě mɔ̀à Sɛ́kɛ̃̀ìn-nyɔ̀ ɓěɛɛ kɔ̃in. Ɓě nyuɛ náa, sepóɛɖé ɔ mɔ̀ ɓě ɖíí-gàà jè.

¹⁹ Ɔ jǔ ké ɖɛ ɓě nyuà ɓó zɛ̃̌ɛ̀ kɛɛ dyi dyí-sɛ́ɖɛ́ìn-ɖɛ̀ kè jǎà-ɖɛ̀ jǔ ɓó Jɛ́wùɖù-Béò kè ɔ gbǒ-xwíníín-nyɔ̀ ɓěɔ̀ bìì ní, nìí, ɓěɛ̀ hwòɖǒ mɛ dèìn Àbímɛ̀nɛ̀ múin, ké ɔ nììn hwòɖǒ mɛ dèìn ɓě múin ɖekè.

²⁰ Kɛɛ ɔ se ná nìǐn, nìí, nyɛ mɛ sɔ̀ ɖé Àbímɛ̀nɛ̀ mú, ɓɛ́ ɔ ké ɓě mɔ̀à Sɛ́kɛ̃̀ìn-nyɔ̀ ɓě kè Bɛ̀-Míɖò-nyɔ̀ ɓěɛɛ fɔ̃. Ké nyɛ mɛ sɔ̀ ɓě mɔ̀ùn mú, ɓɛ́ ɔ ké Àbímɛ̀nɛ̀ fɔ̃!”

²¹ Hwɛ̀ ké Jótàùn kpá ma xwáɖáún, ké ɔ mu, ké ɔ cĩ́ ma ɖé Béè-pàɔ̀ mú. Ɔ nyuɛ ma náa, sepóɛɖé ɔ fɛ̃̀ìn ma ɔ ɖíí-gàà Àbímɛ̀nɛ̀ jè.

²² Ti ɓɛ́ Àbímɛ̀nɛ̀ ɖǎ ma Éézùɖùɛ̀-nyɔ̀ ɓěɔ̀ wuɖuí kɔ̃̀ ɓó zɔ̃ tã xwíníín nyɛɛ,

²³ púɛɛ, Gèɖèpɔ́ɔ̀ dyà ma zùù gbà ɖò ɓó Àbímɛ̀nɛ̀ kè Sɛ́kɛ̃̀ìn-nyɔ̀ ɓěɔ̀ pṹa, ké wa ɖú ma Àbímɛ̀nɛ̀ gbo vɔ̃ kpàǐ.

²⁴ Gèɖèpɔ́ɔ̀ nyuɛ ma náa, ɓɛ́ ɔ ké hwòɖǒ-kɔ̃in-nyìnììn-ɖɛ̀ ɓɛ́ Àbímɛ̀nɛ̀ kè Sɛ́kɛ̃̀ìn-nyɔ̀ ɓěɔ̀ nyu ma kà Jɛ́wùɖù-Béòɛ̀ dyú-gàà kpáɖá-nyɔ tã ɓaɖa-bùè ɓěɔ̀ bũ̌ɛɛ nyɔmɔɔ̀ kpa zà, sepóɛɖé Àbímɛ̀nɛ̀ kè Sɛ́kɛ̃̀ìn-nyɔ̀ ɓěɔ̀ wáɖáìn ma ɔ ɖíí-gàà ɓěɔ̀ nyɔmɔɔ̀ dyi.

²⁵ Ɖé Àbímɛ̀nɛ̀ gbo-vɔ̃-vɔ̃ɔ̀ múɛɛ, Sɛ́kɛ̃̀ìn-nyɔ̀ ɓěɔ̀ gbìɖǐ ma hwìè gaún ɖé toɖo ɓěɔ̀ dya, ké wa fò ma Àbímɛ̀nɛ̀ hwìè. Ké wa nì ma zii-nyɔ̀ ɓě bũ̌ dyíɖíɛń. Ké nyɔ ɖò cɛ̃ɛ ma Àbímɛ̀nɛ̀ gbo.

²⁶ Ɓó tia ɓaɖaa, Gáò ɓɛ́ ɔ mɔ̀ ma Ɛ́ɓɛ̀ɛ̀ dyú-gàà kɛ kè ɔ ɖíí-gàà ɓě dyi ma ɖé Sɛ́kɛ̃̀ìn-hwɔ̀ɖɔ̀ɔ̀ mú. Púɛɛ, Sɛ́kɛ̃̀ìn-nyɔ̀ ɓěɔ̀ taɓa ma ɔ hwìɖǐi.

²⁷ Wé ɖòɛ̀ ɓaɖaa, Sɛ́kɛ̃̀ìn-nyɔ̀ ɓěɔ̀ mu ma ɖé waà géɖéè-gbǎ ɓěɔ̀ mú, ké wa kpã́ ma géɖéè, ké wa nyuɛ ma wã́ìn mú. Púɛɛ, wa ɖú ma hwɔ pa kpàǐ ɖé waà gèɖèpɔ́ɔ̀ gbǒɔ̀ mú. Ti wa nì ma ɖɛ ɖiɛń, ké wa nì ma náuń wɛ̃ɛ, wa nì ma Àbímɛ̀nɛ̀ vàɖǎuń.

²⁸ Ké Gáò mɔ̀à Ɛ́ɓɛ̀ɛ̀ dyú-gààɔ̀ kɛɛ ɖá, “Nyɛ́ mɔ̀ Àbímɛ̀nɛ̀-nyɔ̀ ɓɛ́ à mɔ̀ Sɛ́kɛ̃̀ìn-nyɔ̀ ɓěɛɛ kéà ɔ xwíɖíi nìɛ́? Má, Àbímɛ̀nɛ̀ mɔ̀ Jɛ́wùɖù-Béòɛ̀ dyú-gààe, ké Zɛ́ɓù mɔ̀ ɔ gɔ̌mànà-nyɔ̀ ɓěɔ̀ ɖòe? À mɛ nì Hámɔ̀ mɔ̀à Sɛ́kɛ̃̀ìn ɓǎ kɛɛ dyú-gàà ɓěɔ̀ xwíɖíi. Ɖɛ́ kɔ̃̀ jè à kéà Àbímɛ̀nɛ̀ xwíɖíi nì kɛ́?

²⁹ Nyɛ́ ɖá ḿ kɔ̃̀ɔ̌ má nyɔ ɓěɛ̀ wuɖuíɛ́? Ɔ dyiɔ́ ná nìǐn, nìí, ḿ ɖǎɔ̌ má Àbímɛ̀nɛ̀ ɓó hwìǐ zà. Ní muɔ́ má ɔ gbo cɛ̃ìn, ɓɛ́ ḿ ké níiń, ‘Poìn nì sójà séín ɓě m̀ ɓéɖéɛɛ dyí, ɓɛ́ m̀ ké ḿ to dyà.’ ”

³⁰ Ti ɓɛ́ Zɛ́ɓù mɔ̀à hwɔɖɔɔ̀ wuɖuí-kɔ̃̀-nyɔ̀ɔ̀ kɛɛ wɔ̃́ ma ɖɛ ɓɛ́ Gáò cɛ̃ ma kà kɛɛ, púɛɛ, ɔ kpá ma dyoɖoún mìɔ.

³¹ Ké ɔ ɖoɓo ma kíá vǐè-kà ɖé Àbímɛ̀nɛ̀ gbo, ké ɔ ɖá, “Gmɔ̀ nɔ̄, Gáò mɔ̀à Ɛ́ɓɛ̀ɛ̀ dyú-gààɔ̀ kɛ kè ɔ ɖíí-gàà ɓěɔ̀ ɖǎ nɔ̄ Sɛ́kɛ̃̀ìn-hwɔ̀ɖɔ̀ɛ̀ mú dyi, ké wa nì hwɔɖɔ gànáà vã kɔ̃ poɛń, ɓɛ́ wa ké m̀ gbo vɔ̃.

³² Ɔ jèɛɛ, m̀ kè nì gàa ɓěɔ̀ mɛ dyi ɓó máaún-kà, ɓɛ́ ɓě ké pìǐn kò nɔ̄ hwɔɖɔɛ̀ ɖeín, ɓɛ́ ɓě ké wa hwìè fò.

³³ Ɔ jǔ ké zɔ̃ dyi zɔ̃, ké dyóɖóɔ̀ ɖǎ xwáɖáún wóɖó nyɛ̀nɛ̀ɛ̀ ní, m̀ mɛ dyà hwɔɖɔɔ̀ to kɔ̃ wàɖà. Nìí, ɔ jǔ ké Gáò kè ɔ gàa ɓěɔ̀ dyi m̀ gbo vɔ̃uń dyi ní, m̀ mɛ nyu ɖɛ m̀ ɓɛ́ìn wa bũ̌ nyuɛ kɛɛ wa bũ̌.”

³⁴ Ɔ jèɛɛ, Àbímɛ̀nɛ̀ kè ɔ sójà séín ɓěɔ̀ mu ma ɓó máaún-kà, ké wa vǐè ma ɖé Sɛ́kɛ̃̀ìn-hwɔ̀ɖɔ̀ɔ̀ ɖeín. Ɔ ge ma ɔ sójà ɓěɔ̀ dú hĩinyɛ mú.

³⁵ Ɓó tia ɓaɖaa, Gáò mɔ̀à Ɛ́ɓɛ̀ɛ̀ dyú-gààɔ̀ kɛɛ sí ma píé, ké ɔ nyànà ma ɓó hwɔɖɔɔ̀ gmɔ-wɔ̃̀ɔ̀ gbo dyi ti déín ɓɛ́ Àbímɛ̀nɛ̀ kè ɔ sójà ɓěɔ̀ nì ma waà vǐè-naín ɓěɔ̀ sɔ̀ǔn wɛ̃.

³⁶ Ti ɓɛ́ Gáò dyé ma wa kɛɛ, ɔ cɛ̃ɛ ma Zɛ́ɓù gbo, ké ɔ ɖá, “Gmɔ̀ ɖéa. Nyɔ ɖíɛ́ ɓě nì ɖé toɖo ɓěɔ̀ dya sɔ̀ǔn, ké wa nì dyiɛń wà!” Ké Zɛ́ɓù jǔ ma ɔ gɔ̃̌, ké ɔ ɖá, “Ɔ se ná nì. Toɖo ɓěɔ̀ zùù mɔ̀ ɖɛ m̀ ɖáìn nyɔǔn ɓě kɛ̀.”

³⁷ Kɛɛ Gáò cɛ̃ɛ ma ɖe, ké ɔ ɖá, “Gmɔ̀ ɖéa. Nyɔ ɖíɛ́ ɓě nì ɖé toɖo ɓěɔ̀ pṹa dyi sɔ̀ǔn, ké wa nì dyiɛń. Ké nyɔ-dù ɖò sɔ̀ìn ɖé wáká hwɔà ɖé sɛ̀ɛ̀-po-nyɔ̀ ɓěɔ̀ óò-cùɔ̀ gbo dyíɛ.”

³⁸ Hwɛ̀ ké Zɛ́ɓù cɛ̃ɛ ma ɔ gbo, ké ɔ ɖá, “Dɛ̌ nì ɓɔ́ɖɔ́-ɓɔ́ɖɔ́ɔ̀ sè ɓó kàǔn wɛ̃́? Má, m̀ nìɛ̀ ma cɛ̃iń, ké m̀ ɖá, ‘Nyɛ́ mɔ̀ Àbímɛ̀nɛ̀-nyɔ̀ ɓɛ́ à kéà ɔ xwíɖíi nì kɛ́e?’ Má, gàa ɓě ɓɛ́ m̀ ɓaɖa ma kà dyɔ́ɛɛ nìà ɖé dyiɛń nyɛ̀e? Muá, ɓɛ́ m̀ kéá wa gbo vɔ̃ dɔ̃̌ùn.”

³⁹ Ɔ jèɛɛ, Gáò kè Sɛ́kɛ̃̀ìn-nyɔ̀ ɓěɔ̀ mu ma, ké wa vɔ̃ ma Àbímɛ̀nɛ̀ gbo.

⁴⁰ Ké Gáò gbǔ ma Àbímɛ̀nɛ̀ dyúa, ké Àbímɛ̀nɛ̀ kpá ma ɔ kíɖíí. Ké wa dyɛ̀ìn ma hwɔɖɔɔ̀ gmɔ-wɔ̃̀ɔ̀, ké Sɛ́kɛ̃̀ìn-nyɔ̀ ɓáún-ɓáún puà ma.

⁴¹ Ɔ nì ná kɛɛ, Àbímɛ̀nɛ̀ cĩ́ ma ɖé Àwúɖúmà-hwɔ̀ɖɔ̀ɔ̀ mú. Kɛɛ Zɛ́ɓù kúmú ma Gáò kè ɔ ɖíí-gàà ɓěɔ̀ Sɛ́kɛ̃̀ìn-hwɔ̀ɖɔ̀ɔ̀ mú dyi.

⁴² Wéɔ̀ nyɔ kɔ ma ɓó dyíɛɛ, Sɛ́kɛ̃̀ìn-nyɔ̀ ɓěɔ̀ mu ma ɖé waà geɖe ɓěɔ̀ gbo, ké wa cɛ̃ɛ ma Àbímɛ̀nɛ̀ gbo kà Sɛ́kɛ̃̀ìn-nyɔ̀ ɓěɔ̀ nì ma ɖé waà geɖe ɓěɔ̀ gboɛ.

⁴³ Ké Àbímɛ̀nɛ̀ ɖú ma ɔ gàa ɓěɔ̀ dyí, ké ɔ ge ma wa dú tã mú. Ké wa kò ma pìǐn ɖé geɖe ɓěɔ̀ gbo. Wéɔ̀ nyɔ kɔ ma ɓó dyíɛɛ, Àbímɛ̀nɛ̀ dyé ma nyɔ ɓěɔ̀ ɖé hwɔɖɔɔ̀ mú sɔ̀ɔ̀ ɖe. Púɛɛ, ɔ kè ɔ sójà ɓěɔ̀ sɔ̀ ma dyí, ké wa ɖú ma wa gbo vɔ̃ kpàǐ.

⁴⁴ Àbímɛ̀nɛ̀ kè ɔ sójà ɓě nì ma kà ɓó ɔ gboɛɛ fṹà, ké wa mu ma ɖé hwɔɖɔɔ̀ gmɔ-wɔ̃̀ɔ̀ gbo. Ké sójà-dù sɔ̃́ ɓě sèà ɓóɛɛ fṹà, ké wa po ma nyɔ ɓě nìà ɖé geɖe ɓěɔ̀ gboɛɛ to kɔ̃, ké wa ɖáɓá ma wa séín nyɛ̀nɛ̀ɛ̀.

⁴⁵ Àbímɛ̀nɛ̀ gã̀ ma hwɔɖɔɔ̀ gbo vɔ̃uń dyi ɓó wé gànáɔ̀ mú tee, ké ɔ kpɔ̃ ma hwɔɖɔɔ̀. Ké ɔ ɖáɓá ma nyɔ ɓě nì ma ɖé hwɔɖɔɔ̀ múɛ. Ké ɔ wáɖá ma hwɔɖɔɔ̀, ké ɔ mɛ́nɛ́ìn ma hwɔɖɔɔ̀ tɔ̃́ gboi.

⁴⁶ Ti ɓɛ́ nyɔ ɓě nì ma ɖé hwɔɖɔ-dyí-gmɔ̀ìn-gbò nì ma kà ɖé Sɛ́kɛ̃̀ìn-hwɔ̀ɖɔ̀ɔ̀ múɛɛ mú kɛɛ wɔ̃́ ma ɖɛa jè kɛɛ, púɛɛ, wa mu ma ɖé Béò-Bɛ́wìɖì mɔ̀à waà gèɖèpɔ́ɔ̀ kɛɛ gbǒɔ̀ to-pèɖèìn-naínɔ̀. To-pèɖèìn-naínɔ̀ nì ma ɖé hwɔɖɔ-dyí-gmɔ̀ìn-gbòɔ̀ wáká ɖò kɔ̃.

⁴⁷ Ti ɓɛ́ Àbímɛ̀nɛ̀ wɔ̃́ɔ ma kà wa ɖǎ ma ɖé dyí poìn nyɛɛ,

⁴⁸ púɛɛ, ɔ kè gàa séín ɓě nì ma ɓó ɔ gboɛɛ mu ma ɖé Záámɔ̀-tòɖòɔ̀ dya. Ké ɔ ɖú ma jùɛ̀ ɖò dyí, ké ɔ cɛ̃ ma cu-ɖɔ́ ɖíɛ́ ɓě, ké ɔ wáɖá ma wa kɔún. Hwɛ̀ ké ɔ cɛ̃ɛ ma ɔ gàa ɓěɔ̀ gbo, ké ɔ ɖá, “Ɓě fṹà, ɓɛ́ ɓě ké ɖɛ ɓě dyéà ḿ nyuɛ kɛɛ nyu ɖekè!”

⁴⁹ Ɔ jèɛɛ, gàa séín ɓěɔ̀ cɛ̃ ma cu-ɖɔ́, ké wa sí ma Àbímɛ̀nɛ̀ kíɖíí. Wa kpa ma cu-ɖɔ́ ɓěɔ̀, ké wa gbǒɛ̀n ma ɓóɛ to-pèɖèìn-naínɔ̀ wĩín. Ké wa daɓa ma nyɛ ɓó ɓí-dyù kɔ̃̀ mú nyɔ ɓěɔ̀ nì ma kà kɛɛ wĩín. Púɛɛ, gàa kè màa ɓě nì ma kà ɖé Sɛ́kɛ̃̀ìn-hwɔ̀ɖɔ̀ɔ̀ hwɔɖɔ-dyí-gmɔ̀ìn-gbòɔ̀ múɛɛ mɛ́ ma nyɛ̀nɛ̀ɛ̀. Wa ɓɛ́ìn ma nyɔ-kpò táázĩ̀ìn ɖò jǔɛ.

⁵⁰ Sɔ̀ìn ɓóɛ gboɛɛ, Àbímɛ̀nɛ̀ kè ɔ gàa ɓěɔ̀ mu ma ɖé Téɓè-hwɔ̀ɖɔ̀ɔ̀ mú, ké wa gbǎìn ma hwɔɖɔɔ̀ wɔ̃, ké wa ɖúɛ ma dyí.

⁵¹ Kɛɛ wɛ̃́ɛ́ kɛɛ, hwɔɖɔ-dyí-gmɔ̀ìn-gbò kui-kui ɖò nì ma ɖé hwɔɖɔɔ̀ mú. Ké gàa kè màa ɓě mɔ̀à hwɔɖɔɔ̀ nyɔ séín ɓěɔ̀ kɛɛ pèɖèìn ma ɖéɛ mú. Púɛɛ, wa gbǎìn ma wa mìɔùn gbǒɔ̀ dyíin, ké wa dyá ma ɖé gbǒɔ̀ dúún.

⁵² Ké Àbímɛ̀nɛ̀ dyi ma, ɓɛ́ ɔ ké ma nyɔ ɓě nì ma ɖé gbǒɔ̀ múɛɛ gbo vɔ̃. Kɛɛ ti ɓɛ́ ɔ nìǎ ma gbǒɔ̀ wĩín dyiɛń, ɓɛ́ ɔ kéɛ ma dyéɖé poɛɛ,

⁵³ púɛɛ, màa ɖò po ma ɔ ɖɛ-kɔ̃-sũ̀ìn-sɔ̀ɔ̌-kpò ɖò dú, ké ɔ wa ma ɔ dúɔ̀.

⁵⁴ Hwɛ̀ ké Àbímɛ̀nɛ̀ fṹà, ké ɔ ɖá ma ɔ toún-vɔ̃̀ìn-ɖɛ̀-ɓéɖé-nyɔ̀ɔ̀, ké ɔ cɛ̃ɛ ma ɔ gbo, ké ɔ ɖá, “Zà nì gàsíàɔ̀ kpaɖaún, ɓɛ́ m̀ ké ḿ ɖáɓá, wa ní kɔ̃̀ níiń ‘Màa ɖò mɔ̀ nyɔ ɖáɓá Àbímɛ̀nɛ̀o.’ ” Ɔ jèɛɛ, ɔ toún-vɔ̃̀ìn-ɖɛ̀-ɓéɖé-nyɔ̀ɔ̀ sṹ ma ɔ gàsíàɔ̀ mú, ké ɔ mɛ́ ma.

⁵⁵ Ti ɓɛ́ Éézùɖùɛ̀-sòjà ɓěɔ̀ dyéɛ kà Àbímɛ̀nɛ̀ ɖǎ ma mɛ́ɛ, púɛɛ, wa séín mu ma wa ɓíɖí-taún ɖe.

⁵⁶ Kǎà Gèɖèpɔ́ɔ̀ nyu ma ɖɛ gbà ɓɛ́ Àbímɛ̀nɛ̀ nyu ma kà ɔ ɓǎ bũ̌ dyììn ɖé ɔ dyú-gàà kpáɖá-nyɔ tã ɓaɖa-bùè ɓěɔ̀ ɖáɓá-ɖáɓá múɛɛ kpa zàà.

⁵⁷ Ké Gèɖèpɔ́ɔ̀ zàìn ma Sɛ́kɛ̃̀ìn-nyɔ̀ ɓěɔ̀ kpa kɔ̃in ɖekè ɓó hwòɖǒ-kɔ̃in-nyìnììn-ɖɛ̀ wa nyu ma kà kɛɛ jè. Hwòɛ̌-wùɖù ɓɛ́ Jótàùn mɔ̀à Jɛ́wùɖù-Béòɛ̀ dyú-gààɔ̀ ɓàɖàìn ma kà wa kɛɛ dyi ma wa kɔ̃.