Tɔ̀ɔ̀-ɓìɔ̀ 2 - Ɓǎsɔ́ɔ̀ Báɓòɔ̀

Bounɓoɔ̀ zɛ̃̀ìn ínjà ɖò mú ɖé Bókììn-pàɔ̀ mú

¹ Wé ɖòɛ̀ ɓaɖaa, Bounɓoɔ̀ zɛ̃̀ìn ma ínjà ɖò mú, ké ɔ sɔ̀ ma ɖé Gíógàò-hwɔ̀ɖɔ̀ɔ̀ mú, ké ɔ mu ma ɖé Bókììn-pàɔ̀ mú, ké ɔ cɛ̃ɛ ma Éézùɖùɛ̀-nyɔ̀ ɓěɔ̀ gbo, ké ɔ ɖá, “Ḿ zà ma ɓě ɖé Íjè-ɓòɖòɔ̀ kɔ̃, ké ḿ dyà ma ɓě ɓóɖó ɓɛ́ ḿ ɖáìn zɔ̃̌ɔ̀ ɓě ɓǎ nììn ɓǎ ɓěɔ̀ nyɛ́nɛ́ín nyɛɛ kɔ̃. Ḿ cɛ̃ɛ zɔ̃̌ɔ̀ kà ḿ se dèè-wùɖù nìà ɓó ḿ kè ɓě pṹa kɛɛ kɔ̃ péɖéɛ muɛ,

² ɔ kè kà ɓě kè nyɔ ɓě nìà ɓóɖóɛ̀ múɛɛ mɛ ɓɔ́ wuɖu ɖò ɓíín poɛ kɛ, kɛɛ ɓě mɛ wáɖá waà sáa-kɔ̃-zàìn-gbàà ɓěɔ̀ kɛ. Kɛɛ wɛ̃́ɛ́ kɛɛ, ɓě ɖǎ ní wuɖuɔ̀ mú jaɖa. Ɖɛ́ kɔ̃̀ jè ɓě nyuà náa kɛ́?

³ Ɔ jèɛɛ, ɓó kàǔn wɛ̃ɛ, ḿ se wa kúmúɛ mu. Wa mu nììn kà wí nìà nyɔ fɔ́ múɛɛ ɓó ɓě bìì, ké waà gèɖèpɔ́ɔ̀ ɓěɔ̀ mu nììn kà xwáɖá-gbǎ-mú nìà kɛɛ ɓó ɓě bìì.”

⁴ Ti ɓɛ́ ínjàɔ̀ ɖǎ ma ɖɛ ɓěɛ̀ Éézùɖùɛ̀-nyɔ̀ séín ɓěɔ̀ gbo cɛ̃ɛ hwɔɛɛ, púɛɛ, nyɔ séín ɓěɔ̀ ɖú ma kpé-po-wùɖùǐ.

⁵ Ɔ jèɛɛ, wa jǔìn ma páɔ̀ Bókììn-nyɛ̀nɛ̀ kɔ̃̀ xwíníín mɔ̀à vĩ̌-nyɔ̀ ɓě kɛ. Ké wa zàìn ma ɓó sáa ɖé Bounɓoɔ̀ gbo.

Jasúéɛ̀ mɛ́ jè

⁶ Ti ɓɛ́ Jasúé ɖǎ ma kà Éézùɖùɛ̀-nyɔ̀ ɓěɔ̀ wa ɓíɖí-taún ɖe ɖoɓoɛɛ, wa mu ma, ɓɛ́ wa ké ma páɔ̀ wuɖuí kɔ̃̀. Wa ɖò-ɖò séín mu ma wa nììn kɔ̃̀ɔ̀-ɖɛ̀ɔ̀ wuɖuí kɔ̃̀ùn.

⁷ Ké nyɔ ɓěɔ̀ ɓiè ma Bounɓoɔ̀ ɖé Jasúé nììn fɛ̀ɛ̀-wè séínɔ̀ kè Éézùɖùɛ̀-nyɔ̀ vɛ̀nɛ̀ ɓě ɓɛ́ wa hwèɖèìn ma ké wa zi ma Jasúé dyíɛɛ nììn fɛ̀ɛ̀-wè séín ɓěɔ̀ mú. Wa mɔ̀ nyɔ ɓě ɖǎ ma ɖɛ vɛ̀nɛ̀-vɛ̀nɛ̀ séín ɓě ɓɛ́ Bounɓoɔ̀ ɖǎ ma Éézùɖùɛ̀-nyɔ̀ ɓěɔ̀ bìì nyuɛɛ dyéɛ.

⁸ Ké Jasúé mɔ̀à Núùnɛ̀ dyú-gàà, ɓɛ́ ɔ mɔ̀à Bounɓoɔ̀ gbo-nì-nyɔ̀ɔ̀ kɛɛ mɛ́ ma. Ɔ nyu ma zɔ̃ hɔ̃dɛ̀ɖɛ̀ ɖò kè ɓaɖa-bùè.

⁹ Ké wa zàìn ma ɔ dyóɖóún ɖé ɔ mìɔùn nììn páɔ̀ mú. Wa zàìn ma ɔ dyóɖóún ɖé Tímínɔ̀-Hɛ́wɛ̀ɖɛ̀-hwɔ̀ɖɔ̀ nìà ɖé Ífèɖèìn Toɖo-ɓòɖòɔ̀ kɔ̃, ké ɔ hwɔà ɖé Gáásì-tòɖòɔ̀ xwía dyíɛɛ mú.

Éézùɖùɛ̀-nyɔ̀ ɓěɔ̀ táà Bounɓoɔ̀ ɓiè jè dyi

¹⁰ Ti ɓɛ́ Éézùɖùɛ̀ɛ̀ xwéɖé-dù séín ɓěa ɖǎ ma mɛ́ɛ hwɛ̀ɛ, púɛɛ, xwéɖé-dù ɖìè ɓě wóɖó ma ɓóɖóún. Wa mɔ̀ùn se ma Bounɓoɔ̀ mɔɔ ɖɛ vɛ̀nɛ̀-vɛ̀nɛ̀ ɓě ɔ ɖǎ zɔ̃̌ɔ̀ kà Éézùɖùɛ̀-nyɔ̀ ɓěɔ̀ bìì nyuɛɛ jè dyí dyuò.

¹¹ Púɛɛ, Éézùɖùɛ̀-nyɔ̀ ɓěɔ̀ dèǎ ma Bounɓoɔ̀ nàmàǔn bũ̌ nyuɛ gbɔ, ké wa nìǎ ma kũùn-kpò-gèɖèpɔ́ɔ̀ mɔ̀à Béò kɛɛ ɓièɛ̌n.

¹² Ké wa táà ma Bounɓo mɔ̀à wa ɓǎ ɓěɛ̀ Gèɖèpɔ́ɔ̀ mɔ̀ nyɔ zà zɔ̃̌ɔ̀ kà wa ɖé Íjè-ɓòɖòɔ̀ kɔ̃ɛɛ dyi. Ké wa sí ma nyɔ ɓě nì ma wa ɖeiɛɛ nììn gèɖèpɔ́ɔ̀-dù kò-kò ɓěɔ̀ kíɖíí, ké wa ɓiè wa. Ɔ nyuɛ ké Bounɓoɔ̀ kpá ma dyoɖoún.

¹³ Ɔ kpá ma dyoɖoún, sepóɛɖé wa ɖǎ ɔ dyi táà, ké wa nìǎ ma kũùn-kpò-gèɖèpɔ́ɔ̀ ɓě mɔ̀à Béò kè Àtáwòɖò kɛɛ ɓièɛ̌n.

¹⁴ Bounɓoɔ̀ kpáìn ma Éézùɖùɛ̀-nyɔ̀ ɓěɔ̀ dyoɖoún mìɔ jèɛɛ, ɔ zàìn ma wa nyɔ-hwu-nyɔ̀ ɓě xwáɖáún, ké wa hwu ma wa. Ké ɔ zàìn ma wa waà mú-nyɛ́-nyɔ̀ ɓěɔ̀ xwáɖáún ɖekè ɓó wa ɖei dà séín. Púɛɛ, wa se ma kpé ɓɛ́ìn ɓɛ́ wa ké ma waà mú-nyɛ́-nyɔ̀ ɓěɔ̀ dyúa dyi nyànà.

¹⁵ Ti séín Éézùɖùɛ̀-nyɔ̀ ɓěɔ̀ mu to gbo muùn wɛ̃ɛ, Bounɓoɔ̀ nyuɛ ké toɔ̀ ɖu wa. Ɔ kpá ma ná kà Bounɓoɔ̀ nyuɛ ma kà wa gbo cɛ̃ɛ kĩ́ín nyɛ. Púɛɛ, wa nìǎ ma fũ̀à-fṹá vɛ̀nɛ̀ mú cá.

¹⁶ Ɔ ɖǎ ná nìǐn, Bounɓoɔ̀ gã ma nàìn-nyɔ̀ ɓě, ké wa mɔ̀ tɔ̀ɔ̀-ɓìɔ̀ ɓě, ké wa póìn Éézùɖùɛ̀-nyɔ̀ ɓěɔ̀ sɔ̀ìn ɖé nyɔ-hwu-nyɔ̀ ɓěɔ̀ xwaún.

¹⁷ Kɛɛ wɛ̃́ɛ́ kɛɛ, wa se ma tɔ̀ɔ̀-ɓìɔ̀ ɓěɔ̀ wuɖu ɖùǔ gbo tò. Ké wa táà ma Gèɖèpɔ́ɔ̀ dyi, ké wa ɓiè ma gèɖèpɔ́ɔ̀ kà kò ɖò ɓě. Wa seɛ ma nyu kà wa ɓǎ ɓě nyuɛ ma kà kɛ. Wa mɔ̀ùn fṹà ma hwìè wa ɓǎ ɓě nà ma kà xwíníín nyɛɛ xwíníín sɔ̀ǔn. Ɔ xwíníín mɔ̀ wa se ma Bounɓoɔ̀ wuɖuɔ̀ nyu.

¹⁸ Ti séín ɓɛ́ Bounɓoɔ̀ mu tɔ̀ɔ̀-ɓìɔ̀ ɖò gãùn wɛ̃ɛ, ɔ nì ɓó tɔ̀ɔ̀-ɓìɔ̀ɔ̀ gbo, ké ɔ póìn ma Éézùɖùɛ̀-nyɔ̀ ɓěɔ̀ sɔ̀ìn ɖé waà mú-nyɛ́-nyɔ̀ ɓěɔ̀ xwaún ɖé nàìn-nyɔ̀ɔ̀ nììn tiín. Ɔ nì ma ná, sepóɛɖé ti séín waà mú-nyɛ́-nyɔ̀ ɓěɔ̀ pĩ́à ma wa dyiɛɛ, wa po ma kpé, ké Bounɓoɔ̀ wɔ̃́ ma waà kpé-po-wùɖùɔ̀, ké ɔ dyé ma wa wìǐn.

¹⁹ Kɛɛ ti ɓɛ́ tɔ̀ɔ̀-ɓìɔ̀ dyɛ mɔ̀ɔ̀ mu mɛ́ìn nyɛ̀nɛ̀ɛ̀ kɛɛ ní, nìí, nyɔ ɓěɔ̀ nyu ɖɛ ɓě nyìnììn kɔ̃in, ké wa zi nyɔ ɓě wa ɓǎ ɓě nyu ma kà kĩ́ín nyɛɛ dyíɛ, sepóɛɖé wa sí ma gèɖèpɔ́ɔ̀ kà kò ɖò ɓě kíɖíí, ké wa ɓiè ma wa. Wa nɔ́ɔ̀ ɓɛ́ wa ké ɖɛ gbà ɓě wa nì ma nyuɛń nyɛ kè waà wuɖuún-jaɖa-jaɖa ɓěɔ̀ dyi táà.

²⁰ Ɔ ɖǎ ná nìǐn, Bounɓoɔ̀ kpáìn ma Éézùɖùɛ̀-nyɔ̀ ɓěɔ̀ dyoɖoún mìɔ, ké ɔ ɖá, “Kà ɓɛ́ ɓóɖó-dù gànáà ɖǎà wuɖu ɓɛ́ ḿ kè wa ɓǎ ɓě dè ma kɛɛ mú jaɖa, ké wa seà ḿ ɖùǔ gbo tòɛɛ,

²¹ ḿ se ɓóɖó-dù ɓě ɓɛ́ Jasúé sè ma kà ɖé wa hwìɛ̀, ɓɛ́ ɔ dyià mɛ́ɛ ɖé dyi kúmúɛ mu.

²² Kɛɛ ní mu ɓóɖó-dù ɓěɔ̀ nyɔ ɓěɔ̀ Éézùɖùɛ̀-dyù ɓěɔ̀ mú dɔ̃̌ìn, ɓɛ́ ḿ kéɛ dyé kɛbì wa mu ní gmaɔ̀ dyi kpɔ̃ùn, ɓɛ́ wa ké ní hwìèɔ̀ xwíníín nà kà wa ɓǎ nììn ɓǎ ɓěɔ̀ nyuɛ zɔ̃̌ɔ̀ kà kɛɛ ní.”

²³ Ɔ jèɛɛ, Bounɓoɔ̀ táà ma ɓóɖó-dù ɓěɛ̀ dyi, ké wa sè ma ɖé. Ɔ se ma wa Jasúé xwaún dyi po, ɓɛ́ ɔ ké ma wa ɖé dyi kúmú wàɖà.