Fèɖópĩ̀à 3 - Ɓǎsɔ́ɔ̀ Báɓòɔ̀

Jǎà dyí-sɛ́ɖɛ́ìn-sɛ́ɖɛ́ìn

¹ Ḿ ɖíí ɓě, ɖɛ hwɛ̀ìn-gbɔɔ̀ mɔ̀, ɓě mɛ kpá múàǔn ɖé Bounɓoɔ̀ mú. Ɔ se ḿ fũ̀à-fṹá nyùìn, ɓɛ́ ḿ ké ɓě ɖɛ dyúáɖòɔ̀ gbo céè ɖe. Ɔ mu ɓě gbo kpáùn, ɓɛ́ ɔ ké ɓě dyí gmɔ̀.

² Ɓě màìn gbe ɓě ɓɛ́ wa mɔ̀ nyɔ ɓě nyuà ɖɛ gbà kɛɛ mú. Ɓě màìn nyɔ ɓě ɖaɓaìn nyɔǔn dyiɛɛ mú.

³ Sepóɛɖé nyɔ ɓě ɓɛ́ wa ɓéɖé sàà-mɛ́-mɛ́ nyɔ mɔ̀à jǎà kɛɛ mɔ̀ à mɔ̀, kɛɛ ɔ se wa mɔ̀ùn. Sepóɛɖé à ɓiè Gèɖèpɔ́ɔ̀ dyììn ɖé ɔ Zùùɔ̀ mú. Ké ɖɛ kɔ̃̀ jè à ɓɔ́ɖɔ́ kɛɛ mɔ̀ Kɛ́ɖɛ́ì Jízɛ̀ jè. À se ku-kɔ̃in-ɖɛ̀ ɓěɔ̀ hwòɖǒ kɔ̃ taɓa.

⁴ Ḿ ɓɛ́ìn dyɛ̀ ɖɛ ɓě nì kà kɛɛ hwòɖǒ kɔ̃ taɓaa. Nyɔ ɖò dyiɛ hwìɖǐi poìn kà ɓɛ́ ɔ ɓéɖé ɖɛ kɔ̃̀ jè ɔ ké ku-kɔ̃in-ɖɛ̀ nì kà kɛɛ hwòɖǒ kɔ̃ taɓaa ní, nìí, mɔ́ún ɓéɖé ɖɛ kɔ̃̀ jè ḿ ké ná hwìɖǐi poìn nyɛɛ pàɖǎ.

⁵ Wa ɖáɓá ma ḿ sàà ti ɓɛ́ ḿ nyu ma wé mɛ̀nɛ̌ìn-tã kɛ. Ḿ mɔ̀ Éézùɖùɛ̀-nyɔ̀ ɓěɔ̀ ɖò. Ḿ sɔ̀ Bɛ̃́címàà xwéɖé-dùɔ̀ mú. Híìbúɖúù-nyɔ̀ mɔ̀ nyɔ wóɖóìn ma ḿ. Ɓá gmaɔ̀ dyi kpɔ̃ jè dyíɛɛ, ḿ mɔ̀ Fáɖòsíì-nyɔ̀.

⁶ Ní hwòɖǒɔ̀ fṹà ma, ké ḿ dyéìn ma cɔ́cì-nyɔ̀ ɓěɔ̀ gǎ. Ɓá dyí-sɛ́ɖɛ́ìn-sɛ́ɖɛ́ìn ɓɛ́ gmaɔ̀ dyi-kpɔ̃-kpɔ̃ɔ̀ nyuɛ ké nyɔ ɓéɖéɛɛ jè dyíɛɛ, ḿ se ma kɛɛ ɖò ɓéɖé.

⁷ Ɖɛ ɓě nìàǒ wɛɛ mɔ̀ ma ɖɛ ɓě kɔ̃̀ mú ḿ dyéìn ma ɖɛɛ, kɛɛ ḿ ɖáìn wa ɖɛ se ɖɛ kpa ɓě kàǔn ɓó Kɛ́ɖɛ́ì jè.

⁸ Ɔ se ɖɛ ɓěa ɖòùn, kɛɛ ḿ ɖáìn ɖɛ séín ɖɛ se ɖɛ kpa pū ɓó ɖɛ ɓɛ́ ɔ kpa ɖɛ ké ɔ zi ɖɛ ɓě nìàǒ wɛɛ dyí vɛ̃in nyɛɛ jè. Ɔ mɔ̀ Kɛ́ɖɛ́ì Jízɛ̀ mɔ̀à ní Bounɓoɔ̀ kɛɛ dyí-dyuò-dyuò. Ɓó ɔ jè, ḿ ɖǎ ɖɛ séín xwáɖáún sè. Ḿ ɖáìn wa séín sĩ̀ɔ̌, ɓɛ́ ḿ ké Kɛ́ɖɛ́ì ɓéɖé,

⁹ ɓɛ́ ḿ kèɔ̀ kè ké nyɔ dyúáɖò jǔ. Ḿ se ḿ mìɔùn nììn dyí-sɛ́ɖɛ́ìn-sɛ́ɖɛ́ìn mɔ̀ nyɔ ɓɛ́ gmaɔ̀ dyi-kpɔ̃-kpɔ̃ɔ̀ nyíà ḿ wɛ̃ɛ ɖò ɓéɖé ɖe. Ɖɛ ḿ ɓéɖéà kàǔn wɛ̃ɛ, ɔ mɔ̀ dyí-sɛ́ɖɛ́ìn-sɛ́ɖɛ́ìn ɓɛ́ ɔ dyììn ɖé Kɛ́ɖɛ́ì hwìɖǐǐ-taɓa-taɓa múɛ. Ɔ mɔ̀ dyí-sɛ́ɖɛ́ìn-sɛ́ɖɛ́ìn ɓɛ́ ɔ sɔ̀àìn ɖé Gèɖèpɔ́ɔ̀ gbo, ké ɔ ɓá hwìɖǐǐ taɓa jè dyíɛ.

¹⁰ Kɛɛ ɖɛ séín ḿ mɔ́ɛɛ, ɔ mɔ̀ ɓɛ́ ḿ ké Kɛ́ɖɛ́ì dyí dyuò, ɔ kè ɓɛ́ ḿ ké ɔ kpé ɓɛ́ ɔ ɓéɖé ma, ké ɔ wóɖó ma gĩɔ kɛɛ dyí dyuò. Ḿ mɔ́ ɓɛ́ ḿ kèɔ̀ kè ké ɔ gǎ-dyé-dyé ɓěɔ̀ mú peɖeìn, ɓɛ́ kà ɔ nì ma ɓɛ́ ɔ dyià mɛ́ɛ, mɔ́ún ké ná nì,

¹¹ ɓɛ́ ɔ dyi ná nìɛ̀ ɓɛ́ìn ní, ḿ ké gĩɔ wóɖó.

À mɔ́ ɓɛ́ à ké ɖɛ kɔ̃̀ jè à vɔ̃à kɛɛ dyé

¹² Ḿ séèɛ̀ cɛ̃ɛ ɓɛ́ìn kà ɓɛ́ ḿ ɖǎ ɖɛ ɓě nìà kɛ mú mùɛ̀n hwɔ kɛ, ɔ kè kà ɓɛ́ ḿ ɖǎ dyí sɛ́ɖɛ́ìn hwɔɛ. Kɛɛ ḿ nì vɔ̃uń ke, ɓɛ́ ḿ ké ɖɛ kɔ̃̀ jè Kɛ́ɖɛ́ì kpɔ̃ ma kà ḿ dyiɛɛ dyi kpɔ̃.

¹³ Ḿ ɖíí ɓě, ḿ seɛ hwìɖǐi poìn kà ɓɛ́ ḿ ɖǎa dyi kpɔ̃ nɔ̀ɔ̀ kɛ. Kɛɛ ɖɛ dyúáɖò ɓɛ́ ḿ nyuɛɛ, ɔ kɛ̀. Ɔ mɔ̀, ɖɛ ɓě ɓɛ́ ḿ ɖǎà dyíin zi, ké wa nìà ɖé ḿ ɖeín nyɛɛ jè sɔ̀ ḿ hwìɖǐi, ké ḿ vɔ̃ ɓɛ́ ḿ ké ɖɛ nì ɖé dyúa kɛɛ gbo nyini.

¹⁴ Ḿ nì ɖɛ kɔ̃̀ jè ḿ nìà vɔ̃uń wɛ̃ɛ kíɖíí nɛ́iń, ɓɛ́ ḿ ké ɖɛ kɔ̃̀ jè ḿ nìà vɔ̃uń wɛ̃ɛ dyé. Ɔ mɔ̀ ɖáa ɓɛ́ Gèɖèpɔ́ɔ̀ ɖáà à nììn, ɓɛ́ dyììn ɖé Kɛ́ɖɛ́ì Jízɛ̀ múɛɛ, à ké fɛ̀ɛ̀ nìà ɖé dyɔún wɛ̃ɛ ɓéɖéɛ.

¹⁵ À séín-sèǐn ɓɛ́ à ɖǎà ɖɛ hwɛ̀ ɖé Gèɖèpɔ́ɔ̀-ɖɛ̀ ɓěɔ̀ múɛɛ mɛ ɓéɖé hwìɖǐi-poìn-poìn nì kàǒ wɛ. Ɔ jǔ ké ɓě ɖíɛ́ ɓě dyi hwìɖǐi-poìn-poìn kò-kò ɓě ɓéɖéín, nìí, Gèɖèpɔ́ɔ̀ mu ɖɛ nìà kɛ ɓě dyí tɛ̀mɛ̀ìn.

¹⁶ Kɛɛ ɖɛ ɓě ɓɛ́ à ɖǎ dyi kpɔ̃ kĩ́ín nyɛɛ, à mɛ kpɔ̃ wa dyi kánáá pū.

¹⁷ Ḿ ɖíí ɓě, ɓě séín mɛ dyéìn ḿ, ɓɛ́ ɓě ké ɖò nyu. À ɖǎ dyí-tɛ̀mɛ̀ìn-ɖɛ̀ jǔ ɖé ɓě gbo. Ɔ jèɛɛ, ɓě mɛ dè nyɔ ɓě nyu ɖò kɛɛ dyéɖé gbo.

¹⁸ Ḿ ɖǎ ma ɓě ɖɛ nìà kɛ gbo cɛ̃ mìɔ ɖé ti kĩ́ín mú, ké ḿ nì vĩ̌ɛń, ké ḿ nìɛ̀ ɓě gbo cɛ̃iń ɖe. Ɔ mɔ̀, nyɔ ɓáún-ɓáún nì, ké waà cĩ́-cĩ́ɔ̀ nyuɛ ké wa mɔ̀ Kɛ́ɖɛ́ì kè ɔ kɔ́ɖɔ́sìɔ̀ mú-nyɛ́-nyɔ̀ ɓě.

¹⁹ Ɖé mánáín nyɛɛ, wa mu mú gbɔɔ̀ùn. Wa xwíɖíɔ̀ mɔ̀ waà gèɖèpɔ́ɔ̀. Ɖɛ ɓě kɔ̃̀ jè wa ɓɔ́ɖɔ́à kɛɛ mɔ̀ ɖɛ kɔ̃̀ jè dɛ̃ ɓéɖé ɓɛ́ ɔ kéɔ́ wa nyuɛ. Wa poìn ɓóɖó-kpàà ɖɛ ɓě jè hwìɖǐi ɖòùn.

²⁰ À nììn ɓíɖí nì ɖé dyɔún, ké à nì hwìǐ gmɔ̀ǔn, ɓɛ́ à Póìn-nyɔ̀ mɔ̀à Bounɓo Jízɛ̀ Kɛ́ɖɛ́ì kɛɛ ké ɖé sɔ̀, ɓɛ́ ɔ ké nɔ̄ à gbo dyi.

²¹ Ɔ mu à kpóɖó-dyùà se ɖɛ kpa ɓěɔ̀ gbo zĩàìn, ɓɛ́ wa ké nì kà ɔ mìɔùn nììn kpóɖó-dyùà zi dyíin nɔ̀mɔ̀ǔnɔ̀ nìà kɛ. Ɔ mu kpé ɓɛ́ ɔ ɓéɖéà, ké ɔ nyuà ké ɖɛ séín nìà ɔ xwíɖíiɛɛ dyí ɖúùn, ɓɛ́ ɔ kéɛ nyùìn.