Ɛ́séɖɔ̀ 27 - Ɓǎsɔ́ɔ̀ Báɓòɔ̀

Sáa-kɔ̃-zàìn-gbààɔ̀

¹ “Ɔ ɖǎ ná nìǐn, wa mɛ po sáa-kɔ̃-zàìn-gbàà ɖò. Wa mɛ pòɛ̀n àkésìà-cù. Gbààɔ̀ wáká hĩinyɛɔ̀ mɛ ɓɛ́ìn wɔ̃. Wáká ɖò-ɖòɛ̀ tɔ̀mɔ̀-tɔ̀mɔ̀ mɛ mɔ̀ ɓáɖáa dyúáɖò kè jìì-ɓàɖàǎ sɔ̃́, ké ɔ dya-tɔ̀mɔ̀-tɔ̀mɔ̀ mɛ mɔ̀ jìì-ɓàɖàǎ mɛ̀nɛ̌ìn-ɖò.

² Wa mɛ nyuɛ ɓɛ́ ɖɛ hwɔìn nimii-gmɛ̌ ɓě kéɛ gã hĩinyɛɔ̀ kɔ̃ nì. Gmɛ̌ ɓěɔ̀ kè gbààɔ̀ mɛ mɔ̀ ɖɛ dyúáɖò. Ké wa mɛ po gbàà gànáɔ̀ bàɖàsǐ bũ̌in.

³ Ɔ ɖǎ ná nìǐn, wa mɛ nyu kũ̀à-mú-nyùìn-ɖɛ̀ ɓá gbààɔ̀ dyíɛ. Wa mɛ mɔ̀ páni ɓě ɓɛ́ ɓě ké tĩ́ɔ mú kùɖùìn nyɛ kè síɔ́ɓò ɓě kè gbòɖòò ɓě kè tó-tàɓàìn-ɖɛ̀ ɓě ɔ kè nyɛ-kɛ̀nɛ̀-mú-ɓéɖéìn-jìà ɓě. Ɖɛ séín ɓěa mɛ mɔ̀ bàɖàsǐ.

⁴ Ɔ ɖǎ ná nìǐn, wa mɛ nyu tɔ̀ɔ̌ ɖò ɓó gbààɔ̀ jè. Ɔ mɛ mɔ̀ bàɖàsǐ, ké wa mɛ nyu bàɖàsǐ-gbɛ̌ɛ̀ ɓě ɖé tɔ̀ɔ̌ɔ̀ gã hĩinyɛ ɓěɔ̀ kɔ̃.

⁵ Ké wa mɛ po tɔ̀ɔ̌ɔ̀ ɖé gbààɔ̀ xwíníín, ɓɛ́ ɔ ké ɓó gbààɔ̀ hwìɛ̀ dyi sèìn.

⁶ Ɔ ɖǎ ná nìǐn, wa mɛ nyu àkésìà-cù-kpóɖó ɓě, ɓɛ́ wa ké wa bàɖàsǐ bũ̌in po, ɓɛ́ wa ké gbààɔ̀ ɓéɖéìn-ɖɛ̀ jǔ.

⁷ Ti ɓɛ́ wa mu gbààɔ̀ daí zàìn mɔ́ùn wɛ̃ɛ ní, wa mɛ sṹ cu-kpóɖó ɓěɔ̀ ɖé gbɛ̌ɛ̀ ɓěɔ̀ mú, ɓɛ́ cu-kpóɖó ɓěɔ̀ ké gbààɔ̀ wáká sɔ̃́ɔ̀ kɔ̃ nì, ɓɛ́ wa kéɛ ɓéɖéìn.

⁸ Wa mɛ kɔ̀ìn gbààɔ̀ cu-pĩ̀à ɓě, ké gbààɔ̀ mɛ nì ɓí hwòɖǒǔn. Wa mɛ nyuɛ kà ḿ nyuà m̀ gbo cɛ̃ɛ nɔ̄ toɖoɛ̀ dya kɛ.

Kà Bounɓoɔ̀ jàɖàìn-gbòɔ̀ ɖei ké nìɛ̀ nyuɛ

⁹ “Ɔ ɖǎ ná nìǐn, wa mɛ cɛ̃ gba-gba ɖò ní jàɖàìn-gbòɔ̀ ɖei. Gba-gbaɔ̀ mɛ mɔ̀ faà-ɖɔ̀ ɓɛ́ ɔ mɔ̀ ɖénì-ɖɔ̀ nɔ̀mɔ̀ dyíin nyɛ. Gba-gbaɔ̀ zɔ̃̌in-wàkáɔ̀ tɔ̀mɔ̀-tɔ̀mɔ̀ mɛ mɔ̀ ɓáɖáa kpáɖá-nyɔ sè hm̀m̌.

¹⁰ Ké wa mɛ nyu cúè-ɓò kpáɖá-nyɔ ɖò ɓó faà-ɖɔ̀ ɓě hwɔà ɖé zɔ̃̌in-wàkáɔ̀ kɔ̃ dyíɛɛ jè. Cúè-ɓò ɓěɔ̀ mɛ ɓéɖé kɔ̃-dè-ɖɛ̀ kpáɖá-nyɔ ɖò ɓɛ́ wa mɔ̀ bàɖàsǐ kɛ kè waà kɔ̃-cɛ̃̀ìn-ɖɛ̀ ɓě ɓɛ́ wa mɔ̀ séɓàɖà kɛ ɔ kè séɓàɖà-gbǎ ɓě.

¹¹ Gba-gbaɔ̀ xwía-wàkáɔ̀ tɔ̀mɔ̀-tɔ̀mɔ̀ mɛ mɔ̀ ɓáɖáa kpáɖá-nyɔ sè hm̀m̌ ɖekè. Ké ɔ mɛ ɓéɖé cúè-ɓò kpáɖá-nyɔ ɖò kè wa kɔ̃-dè-ɖɛ̀ kpáɖá-nyɔ ɖò ɓɛ́ wa mɔ̀ bàɖàsǐ kɛ kè waà kɔ̃-cɛ̃̀ìn-ɖɛ̀ ɓě ɓɛ́ wa mɔ̀ séɓàɖà kɛ ɔ kè waà séɓàɖà-gbǎ ɓě.

¹² Gba-gbaɔ̀ wáká hwɔà ɖé dyóɖó-dyi-kpáìn-naínɔ̀ dyíɛɛ tɔ̀mɔ̀-tɔ̀mɔ̀ mɛ mɔ̀ ɓáɖáa ɓaɖa-bùè sè sɔ̃́ kè fá-kɛ́ín, ké ɔ mɛ ɓéɖé cúè-ɓò ɓaɖa-bùè kè wa kɔ̃-dè-ɖɛ̀ ɓaɖa-bùè.

¹³ Gba-gbaɔ̀ wáká hwɔà ɖé dyóɖó-xwáɖáún-wóɖóìn-naínɔ̀ dyíɛɛ nììn tɔ̀mɔ̀-tɔ̀mɔ̀ mɛ mɔ̀ ɓáɖáa ɓaɖa-bùè sè sɔ̃́ kè fá-kɛ́ín. Ké ɔ mɛ ɓéɖé mú-dyáìn-naín.

¹⁴ Gba-gbaɔ̀ wáká ɓɛ́ ɔ nì ɖé ɔ mú-dyáìn-naínɔ̀ wáká ɖò kɔ̃ɛɛ tɔ̀mɔ̀-tɔ̀mɔ̀ mɛ mɔ̀ ɓáɖáa tã kè jìì-ɓàɖàǎ mɛ̀nɛ̌ìn-ɖò. Ké ɔ mɛ ɓéɖé cúè-ɓò tã kè wa kɔ̃-dè-ɖɛ̀ tã.

¹⁵ Gba-gbaɔ̀ wáká ɓɛ́ ɔ nì ɖé ɔ mú-dyáìn-naínɔ̀ wáká tɔ̀ɔ̀ kɔ̃ɛɛ nììn tɔ̀mɔ̀-tɔ̀mɔ̀ mɛ mɔ̀ ɓáɖáa tã kè jìì-ɓàɖàǎ mɛ̀nɛ̌ìn-ɖò ɖekè. Ké ɔ mɛ ɓéɖé cúè-ɓò tã kè wa kɔ̃-dè-ɖɛ̀ tã ɖekè.

¹⁶ Ɔ ɖǎ ná nìǐn, wa mɛ nyu faà-ɖɔ̀ ɖò ɓó gba-gba-wɔ̃̀ɔ̀ jè. Ɔ tɔ̀mɔ̀-tɔ̀mɔ̀ mɛ mɔ̀ ɓáɖáa hm̀m̌, ké ɔ mɛ mɔ̀ ɖénì-ɖɔ̀ nɔ̀mɔ̀ dyíin kɔ̃̀ kɔ̃ ɓɛ́ wa ɖaɓa ɖɛ nɔ̀mɔ̀ kɔ̃in ɓěɛ. Wa mɛ ɖàɓàìn ɖɛ nɔ̀mɔ̀ kɔ̃in ɓěɔ̀ dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã. Faà-ɖɔ̀ɔ̀ mɛ ɓéɖé cúè-ɓò hĩinyɛ kè wa kɔ̃-dè-ɖɛ̀ hĩinyɛ.

¹⁷ Gba-gbaɔ̀ cúè-ɓò séín mɛ ɓéɖé kɔ̃-dè-ɖɛ̀ ɓě ɓɛ́ wa mɔ̀ bàɖàsǐ kɛ kè waà kɔ̃-cɛ̃̀ìn-ɖɛ̀ ɓě ɓɛ́ wa mɔ̀ séɓàɖà kɛ ɔ kè waà séɓàɖà-gbǎ ɓě.

¹⁸ Kà gba-gba gànáɔ̀ xwíníín dyi mɛ nyu ɓɛ́ɛ kɛɛ kɛà kɛ̀. Ɔ tɔ̀mɔ̀-tɔ̀mɔ̀ɔ̀ mɛ mɔ̀ ɓáɖáa kpáɖá-nyɔ sè hm̀m̌, ké ɔ xwíɖí-kùɔ̀ mɛ mɔ̀ ɓáɖáa ɓaɖa-bùè sè sɔ̃́ kè fá-kɛ́ín, ké ɔ dya-tɔ̀mɔ̀-tɔ̀mɔ̀ɔ̀ mɛ mɔ̀ ɓáɖáa dyúáɖò kè jìì-ɓàɖàǎ sɔ̃́. Gba-gbaɔ̀ faà-ɖɔ̀ɔ̀ mɛ mɔ̀ ɖénì-ɖɔ̀ nɔ̀mɔ̀ dyíin nyɛ, ké ɔ cúè-ɓò ɓěɔ̀ kɔ̃-dè-ɖɛ̀ ɓěɔ̀ mɛ mɔ̀ bàɖàsǐ.

¹⁹ Kũ̀à-mú-nyùìn-ɖɛ̀ séín ɓá jàɖàìn-gbòɔ̀ dyíɛ kè ɓóɖóún-kɔ-cù ɓě kéà jàɖàìn-gbòɔ̀ kè gba-gbaɔ̀ ɓóɖóún dyi kpɔ̃ɛɛ séín mɛ mɔ̀ bàɖàsǐ.”

Ɖáùnpò ɓěɔ̀ jè gbo-gmɔ̀-gmɔ̀

^20-21 Ké Bounɓoɔ̀ cɛ̃ɛ ma Mózè gbo ɖe, ké ɔ ɖá, “Cɛ̃ gma ɓě nìà kɛ jè Éézùɖùɛ̀-dyù ɓěɔ̀ gbo. Gma ɓěɔ̀ mɔ̀, Éézùɖùɛ̀-dyù ɓěɔ̀ mɛ dyà cáná nɔ̀mɔ̀ dyíin ɓɛ́ wa zà ɔ́ɖè-ɓò mú ɖieɛɛ ɓó ɖáùnpò ɓě ɓɛ́ wa nìà jàɖàìn-gbòɔ̀ múɛɛ bìì, ɓɛ́ ɖáùnpò ɓěɔ̀ ké wãuń nì kánáá pū ɓó máaún. Ɖáùnpò ɓěɔ̀ nì ɓó Pá Hwɛ̀ǐn-hwɛ̀ǐnɔ̀ mú, ké faà-ɖɔ̀ɔ̀ ɓá ɓó wa kè gma-gbɔ̀ɖɔ̀ɔ̀ pṹa dyií. Eɖóún kè ɔ dyú-gàà ɓěɔ̀ mɛ gmɔ̀ ɖáùnpò ɓěɔ̀ jè gbo, ɓɛ́ ɖáùnpò ɓěɔ̀ ké wãuń nì kánáá pū ɓó ḿ dyúa, sɔ̀ìn hwìo gbo dyɛ̀ìn gànà-kṹún wɛ̃. Ɖɛ nìà kɛ mɛ mɔ̀ gma kánáá pū ɓó Éézùɖùɛ̀-dyù ɓěɔ̀ kè waà xwíníín-dyù ɓě bìì.”