Ɛsɔ́ɖɔ́ 9 - Ɓǎsɔ́ɔ̀ Báɓòɔ̀

Júù-nyɔ̀ ɓěɔ̀ gbɔɔ̀ waà mú-nyɛ́-nyɔ̀ ɓěɔ̀ mú

¹ Ɓó Ádà-dɛ̀nɛ̀ mɔ̀à zɔ̃ɔ̀ dɛ̀nɛ̀ ɓaɖa-bùè sè sɔ̃́ nììnɔ̀ kɛɛ wé ɓaɖa-bùè sè tã nììnɔ̀ ɓaɖa mɔ̀ ti ɓɛ́ wa ké wuɖu ɓɛ́ kã́áɔ̀ ɖǎ ma kà dyi ɓeìn nyɛɛ nyu. Júù-nyɔ̀ ɓěɔ̀ mú-nyɛ́-nyɔ̀ ɓěɔ̀ hwòɖǒ ɖá wa mu ma Júù-nyɔ̀ ɓěɔ̀ toún ɖuùn ɓó wéa ɓaɖa. Kɛɛ ti wéa nyini ma ɓóɛɛ, ɖɛ zĩàìn ma gbo, ké Júù-nyɔ̀ ɓěɔ̀ sɔ̃ nì ma waà mú-nyɛ́-nyɔ̀ ɓěɔ̀ kɔ̃in.

² Ti ɓɛ́ tiɔ̀ nyini ma ɓóɛɛ, Júù-nyɔ̀ ɓěɔ̀ poìn ma dyí ɖé hwɔɖɔ ɖò-ɖò ɓě kɔ̃̀ mú wa cĩ́ ma kà ɖé Kã́á Àhàzúwàɖàà ɓóɖóɔ̀ gbɛ̌ɛ̀ ɖò-ɖò séín múɛ, ɓɛ́ wa ké nyɔ ɓě mɔ́ ma kà wa mú gbɔɔ̀ dyiɛɛ gbo vɔ̃. Nyɔ ɖò se ma Júù-nyɔ̀ ɓěɔ̀ dyúa dyi nyànàà ɓɛ́ìn, sepóɛɖé ɓóɖó-dù kà kò ɖò ɓěɛ̀ nyɔ ɓěɔ̀ fɛ̃̀ìn ma wa dyi.

³ Ɓó tia ɓaɖaa, ɓóɖóɔ̀ cu-kpà ɓěɔ̀ kè kã́áɔ̀ sɔ̃-xwíɖíi-dè-nyɔ̀ ɓěɔ̀ kè ɓóɖóɔ̀ gbɛ̌ɛ̀ ɖò-ɖò ɓěɔ̀ wuɖuí-kɔ̃̀-nyɔ̀ ɓěɔ̀ ɔ kè gɔ̌mànà-nyɔ̀ tɔ̀ɔ̀ ɓěɔ̀ kpá ma Júù-nyɔ̀ ɓěɔ̀ gbo, sepóɛɖé wa fɛ̃̀ìn ma Mɔ́ɖékáì dyi jè.

⁴ Mɔ́ɖékáì mɔ̀ ma nyɔ kpa ɖɛ ɖò cá ɖé kã́áɔ̀ gbǒɔ̀ dya. Ɔ bɔ̃̌ ɓeìn ma ɖé ɓóɖóɔ̀ gbɛ̌ɛ̀ séín múin, ké ɔ kpéɔ̀ nì ma kɔ̃ kpáuń kánáá pū.

⁵ Kǎà Júù-nyɔ̀ ɓěɔ̀ ɖu ma waà mú-nyɛ́-nyɔ̀ ɓěɔ̀ toún. Wa ɖáɓá ma wa gàsíà dyí. Wa nyu ma ɖɛ séín wa hwòɖǒ mɔ́ ma nyuɛ dyiɛɛ waà mú-nyɛ́-nyɔ̀ ɓěɔ̀ bũ̌.

⁶ Ɖé Súsà mɔ̀à dìɓà-hwɔ̀ɖɔ̀ɔ̀ kɛ múɛɛ, Júù-nyɔ̀ ɓěɔ̀ ɖáɓá ma ɖé gàa hɔ̃dɛ̀ɖɛ̀ hm̀m̌.

^7-10 Nyɔ ɓě ɓɛ́ wa ɖáɓá ma kà kɛɛ ɖíɛ́ ɓě mɔ̀ Hémà ɓɛ́ ɔ mɔ̀à Júù-nyɔ̀ ɓěɔ̀ mú-nyɛ́-nyɔ̀ɔ̀, ké ɔ mɔ̀à Hàmɛ́dàfàà dyú-gààɔ̀ kɛɛ nììn dyú-gàà ɓaɖa-bùè ɓě kɔ̃̀ nyɛ́nɛ́ mɔ̀à Pàsã̀dáfà kè Dáfɔ̃̀ùn kè Ápàfà kè Pówàɖàfà kè Àdàɖíà kè Àwíɖídàfà kè Pàmátà kè Àwíɖísàì kè Àwíɖídàì ɔ kè Váízàfà kɛ. Kɛɛ wa se ma waà kɔ̃̀ɔ̀-ɖɛ̀ ɓěɔ̀ ɖò dyí ɖú.

¹¹ Ɓó wéa ɓaɖaa, wa cɛ̃ ma nyɔ jĩ̀ kà ɓɛ́ wa ɖáɓá ma kà ɖé Súsà mɔ̀à dìɓà-hwɔ̀ɖɔ̀ɔ̀ kɛ múɛɛ jè kã́áɔ̀ gbo.

¹² Ké kã́áɔ̀ cɛ̃ɛ ma ɔ gmàà Ɛsɔ́ɖɔ́ gbo, ké ɔ ɖá, “Júù-nyɔ̀ ɓěɔ̀ ɖǎ gàa hɔ̃dɛ̀ɖɛ̀ hm̀m̌ ɖáɓá nɔ̄ Súsà-hwɔ̀ɖɔ̀ɛ̀ ɖòùn mú. Hémàà dyú-gàà ɓaɖa-bùè ɓěɔ̀ mɔ̀ wa ɖò ɖekè. Kà ɔ nìà náa, nì hwòɖǒ ɖá ɖɛ́ wa nyu ɖé kã́á-ɓòɖòɔ̀ gbɛ̌ɛ̀ tɔ̀ɔ̀ ɓěɔ̀ múɛ́? Ɓó kàǔn wɛ̃ɛ, ɖɛ́ kpɔ̃ m̀ hwòɖǒ ɖeɛ́, mɔɔ ɖɛ́ nì mɔ́ keɛ́? Cɛ̃ɛ ḿ gbo, ké ní muɛ m̀ nyíìn.”

¹³ Ké Ɛsɔ́ɖɔ́ ɖá, “Ɓɔ̌ɔ̀, ɔ jǔ ké nì hwòɖǒ dyi wɔ̃́ ní, zà Júù-nyɔ̀ ɓě nìà Súsà-hwɔ̀ɖɔ̀ɛ̀ múɛɛ wuɖu kɔ̃, ɓɛ́ wa ké ɖɛ dyúáɖò wa nyuà zɛ̃̌ɛ̀ kɛɛ nyu ɖe ɓó gàɖàà ɖekè, ɓɛ́ m̀ ké wuɖu tò, ɓɛ́ wa ké Hémàà dyú-gàà ɓaɖa-bùè ɓěɔ̀ xwɛ́ ɓěɔ̀ ɓó nyɔ-beèìn-naín ɓě dyi ɓá.”

¹⁴ Ké kã́áɔ̀ tò ma wuɖu, ɓɛ́ wa kéɛ náa nyu, ké wa ɓeìn ma wuɖuɔ̀ dyi ɖé Súsà-hwɔ̀ɖɔ̀ɔ̀ mú. Ké wa ɓá ma Hémàà dyú-gàà ɓaɖa-bùè ɓěɔ̀ xwɛ́ ɓěɔ̀ ɓó nyɔ-beèìn-naín ɓěɔ̀ dyi.

¹⁵ Ɓó Ádà-dɛ̀nɛ̀ɔ̀ wé ɓaɖa-bùè sè hĩinyɛ nììnɔ̀ ɓaɖaa, Júù-nyɔ̀ ɓě nì ma ɖé Súsà-hwɔ̀ɖɔ̀ɔ̀ múɛɛ poìn ma dyí, ké wa ɖáɓá ma gàa hɔ̃dɛ̀ɖɛ̀ tã ɖe. Kɛɛ wa se ma waà kɔ̃̀ɔ̀-ɖɛ̀ ɓěɔ̀ ɖò dyí ɖú.

¹⁶ Ɓó ti dyúáɖòɔ̀ múɛɛ, Júù-nyɔ̀ tɔ̀ɔ̀ ɓě ɓɛ́ wa nìà kã́á-ɓòɖò gànáɔ̀ gbɛ̌ɛ̀ tɔ̀ɔ̀ ɓěɔ̀ múin nyɛɛ mɔ̀ùn poìn ma dyí, ɓɛ́ wa ké ma wa mìɔùn bìì vɔ̃, ɓɛ́ wa ké waà mú-nyɛ́-nyɔ̀ ɓěɔ̀ xwaún pó. Ké wa ɖáɓá ma waà mú-nyɛ́-nyɔ̀ ɓěɔ̀ táázĩ̀ìn kpáɖá-nyɔ tã ɓaɖa-bùè sè hm̀m̌. Kɛɛ wa se ma waà kɔ̃̀ɔ̀-ɖɛ̀ ɓěɔ̀ ɖò dyí ɖú.

¹⁷ Ɖɛ nìà kɛ kpá ma ɓó Ádà-dɛ̀nɛ̀ɔ̀ wé ɓaɖa-bùè sè tã nììnɔ̀ ɓaɖa, ké wa fɔ̀ ma ɓó dɛ̀nɛ̀ɔ̀ wé ɓaɖa-bùè sè hĩinyɛ nììnɔ̀ ɓaɖa. Wa nyu ma wéɔ̀ múàǔn-kpá-wè kè hwɔ-pa-wè mú.

¹⁸ Kɛɛ Júù-nyɔ̀ ɓě nì ma kà ɖé Súsà-hwɔ̀ɖɔ̀ɔ̀ múɛɛ gã̀ ma waà mú-nyɛ́-nyɔ̀ ɓěɔ̀ ɖáɓáuń dyi tee ɓó wéɔ̀ ɓaɖa-bùè sè tã nììnɔ̀ kè wéɔ̀ ɓaɖa-bùè sè hĩinyɛ nììnɔ̀ ɓaɖa. Ké ɔ nyu ma wéɔ̀ ɓaɖa-bùè sè hm̀m̌ nììnɔ̀, hwɛ̀ ké wa fɔ̀ ma. Wa nyu ma wéɔ̀ múàǔn-kpá-wè kè hwɔ-pa-wè mú.

¹⁹ Ɔ jèɛɛ, Júù-nyɔ̀ ɓě ɓɛ́ wa se hwɔɖɔ vɛ̀nɛ̀ mú cĩ́, kɛɛ wa cĩ́ ɖé hwɔɖɔ-kpàǎ ɓě kɔ̃ɛɛ po Ádà-dɛ̀nɛ̀ɔ̀ wé ɓaɖa-bùè sè hĩinyɛ nììnɔ̀ wáká, ɓɛ́ ɔ ké waà múàǔn-kpá-wè kè hwɔ-pa-wè jǔ. Ɔ mɔ̀ wé kɔ̃̀ ɓaɖa ɓɛ́ wa toìn tòìn nyíí-ɖɛ̀ gbo kɛ.

Púɔ̀-hwɔ̀

²⁰ Sɔ̀ìn ɓóɛ gboɛɛ, Mɔ́ɖékáì céè ma ɖɛ ɓě kpá ma kà kɛɛ céè-ɖɛ̀ ɖò mú. Ké ɔ toìn ma céè-ɖɛ̀ɔ̀ Júù-nyɔ̀ séín ɓě nì ma Kã́á Àhàzúwàɖàà ɓóɖóɔ̀ gbɛ̌ɛ̀ séín múin nyɛɛ gboi. Ɔ tòɛ̀ nyɔ ɓě tɔ̀mɔ̀ ma gboɛ kè nyɔ ɓě xwɛ̃́ìn ma dyiɛɛ gbo,

²¹ ɓɛ́ wa ké hwɔ pa ɓó Ádà-dɛ̀nɛ̀ɔ̀ wé ɓaɖa-bùè sè hĩinyɛ kèɛ̀ ɓaɖa-bùè sè hm̀m̌ nììnɔ̀ ɓaɖa, ɖé zɔ̃ séín xwíníín.

²² Wé ɓěɛ̀ mɔ̀ wé kɔ̃̀ ɓaɖa Júù-nyɔ̀ ɓěɔ̀ pó ma waà mú-nyɛ́-nyɔ̀ ɓěɔ̀ xwaún wɛ̃. Dɛ̀nɛ̀ nìà kɛ se wìì kè hwòɖǒɛ̀-ɖé-ɖei-kpá-dɛ̀nɛ̀ ɖe, kɛɛ ɔ mɔ̀ǎ dɛ̀nɛ̀ ɓɛ́ ɔ dyà hwòɖǒ-dyi-dè-dè kè múà kɛ. Mɔ́ɖékáì cɛ̃ɛ ma wa gbo kà ɓɛ́ wé ɓěɛ̀ dyi ɓó nyini ní, wa ké ɖii-ɖɛ̀-hwɔ̀ pa, ɓɛ́ wa ké ɖii-ɖɛ̀ gbo toìn tòìn, ɓɛ́ wa ké gǎ-dyé-nyɔ̀ ɓě mɔ̀ùn ɖɛ ɖò gbo tò ɖekèɛ.

²³ Ɔ jèɛɛ, Júù-nyɔ̀ ɓěɔ̀ nyuɛ ma kà Mɔ́ɖékáì nyuɛ ma kà céèɛ̀ kɛ. Wa kpɔ̃ ma wé ɓěa dyi ɓó zɔ̃ séín xwíníín.

²⁴ Ɔ mɔ̀ ti kɔ̃̀ ɓaɖa ɓɛ́ Hémà mɔ̀à Hàmɛ́dàfà mɔ̀à Ágàà gbǒ-xwíníín-nyɔ̀ ɓěɔ̀ ɖòɛɛ dyú-gàà, ɓɛ́ ɔ mɔ̀à Júù-nyɔ̀ séín ɓěɔ̀ mú-nyɛ́-nyɔ̀ɔ̀ kɛɛ sɔ́ ma kà Júù-nyɔ̀ ɓěɔ̀, ɓɛ́ ɔ kéà wa séín ɖáɓá, ké ɔ nyu ma kà “Púɔ̀” mɔ̀à à nììn gbo-ɖàɓàìn-ɖɛ̀ kɛɛ ɓóɛ jè kɛ.

²⁵ Kɛɛ Ɛsɔ́ɖɔ́ mu, ké ɔ cɛ̃ɛ ma kã́áɔ̀ gbo, ké kã́áɔ̀ céè ma céè-ɖɛ̀ ɖò, ɓɛ́ céè-ɖɛ̀ɔ̀ kéɛ nyu ɓɛ́ ɖɛ gbà ɓɛ́ Hémà sɔ́ ma kà dyí ɓó Júù-nyɔ̀ ɓěɔ̀ bììɛ, ɓɛ́ Hémà mìɔùn kéɛ ma dyí dyé, ɓɛ́ wa ké ɔ kè ɔ dyú-gàà ɓěɔ̀ ɓó nyɔ-beèìn-naín ɓěɔ̀ dyi ɓá.

^26-27 Ɔ jèɛɛ, wa ɖáìn ma wé ɓěɔ̀ Púɔ̀-wè. Júù-nyɔ̀ ɓěɔ̀ nyuɛ ma gma mú ɓó wa mìɔùn kè waà xwíníín-dyù ɓě kè nyɔ kã̀ìn séín ɓɛ́ wa mu Júù-nyɔ̀ jè mú kpáùn wɛ̃ɛ bìì, ɓɛ́ tiɔ̀ dyi ɓó nyini zɔ̃ séín xwíníín ní, wa ké wé sɔ̃́ ɓěɔ̀ dyi kpɔ̃ kánáá pū kà Mɔ́ɖékáì nyuɛ ma kà céèɛ̀ kɛ. Wa nyuɛ ma náa ɓó Mɔ́ɖékáìɛ̀ céè-ɖɛ̀ɔ̀ kè ɓó ɖɛ séín kpá ma kà Júù-nyɔ̀ ɓěɔ̀ gboɛɛ jè.

²⁸ Wa ɖǎa ma gmaún po ɓá Júù-nyɔ̀ ɓěɔ̀ gbǒ-xwíníín séín kè waà xwíníín-dyù séín dyí, ɖé ɓóɖóɔ̀ gbɛ̌ɛ̀ séín kè hwɔɖɔ séín mú. Gmaɔ̀ mɔ̀ kà ɓɛ́ wa ké wé ɓě mɔ̀à Púɔ̀-wèɔ̀ kɛɛ dyi kpɔ̃ kánáá pū kɛ.

²⁹ Hwɛ̀ ké Kã́á-gmàà Ɛsɔ́ɖɔ́ mɔ̀à Áɓìháìɛ̀ dyú-mààɔ̀ kɛ kè Mɔ́ɖékáì mɔ̀à Júù-nyɔ̀ɔ̀ kɛɛ céè ma céè-ɖɛ̀ ɖò ɖe, ɓɛ́ ɔ ké céè-ɖɛ̀ kĩ́ín ɓáà Púɔ̀-wè ɓěɔ̀ jè dyíɛɛ dyi kùìn.

³⁰ Ké Mɔ́ɖékáì toìn ma Júù-nyɔ̀ ɓě nì ma ɖé Àhàzúwàɖàà kã́á-ɓòɖòɔ̀ gbɛ̌ɛ̀ hɔ̃dɛ̀ɖɛ̀ ɖò kè kpáɖá-nyɔ sè mɛ̀nɛ̌ìn-sɔ̃́ ɓěɔ̀ múɛɛ wuɖuún-wùɖù mɔ̀ nyɔ-kpéí-po-wùɖù kɛɛ gboi,

³¹ ɓɛ́ wa ké wé ɓě mɔ̀à Púɔ̀-wèɔ̀ kɛɛ dyi kpɔ̃ ɓó ti ɓɛ̀ɖɛ̀ìn dyíɔ̀ mú kà Mɔ́ɖékáì kè Kã́á-gmàà Ɛsɔ́ɖɔ́ nyuà gma mú poɛ ɓó wa mìɔùn kè waà xwíníín-dyù ɓě bììɛ, kà dyúáɖòɔ̀ kǎà wa nyu ma kà waà wɔ̃-kɔ̃-hwèɖè-tìɔ̀ kè vĩ̌-tìɔ̀ jè dyi kpɔ̃ kɛ.

³² Gma ɓɛ́ Ɛsɔ́ɖɔ́ po ma kà kɛɛ kùìn ma gma ɓá Púɔ̀-wè ɓěɔ̀ dyíɛɛ dyi, ké wa céèɛ̀ ma céè-ɖɛ̀-kpò ɖò mú.