Ɛsɔ́ɖɔ́ 8 - Ɓǎsɔ́ɔ̀ Báɓòɔ̀

Wa nyí Júù-nyɔ̀ ɓěɔ̀ kpé ɓɛ́ wa ké wa mìɔùn bìì vɔ̃

¹ Ɓó wé dyúáɖòɔ̀ ɓaɖaa, Kã́á Àhàzúwàɖà nyí ma Hémà mɔ̀ ma kà Júù-nyɔ̀ ɓěɔ̀ mú-nyɛ́-nyɔ̀ɔ̀ kɛɛ nììn kɔ̃̀ɔ̀-ɖɛ̀ séín ɓěɔ̀ Ɛsɔ́ɖɔ́. Ké Ɛsɔ́ɖɔ́ cɛ̃ɛ ma kã́áɔ̀ gbo kà Mɔ́ɖékáì mɔ̀ ma ɔ gmɛ̀ìn-ɓǎ kɛ. Ɔ jèɛɛ, sɔ̀ìn ɓó wéa gboɛɛ, wa nyí ma Mɔ́ɖékáì kpé, ɓɛ́ ɔ ké ma ɓó kã́áɔ̀ dyúa dyi.

² Ké kã́áɔ̀ ɖú ma ɔ jìǐn-po-ɖɛ̀ ɓɛ́ ɔ ɖɛ-sɔ̃-bɛ̃̀-kɔ̃-pòìn-ɖɛ̀ɔ̀ nìà kɔ̃, ɓɛ́ ɔ zà ma kà Hémà xwaa dyí, ké ɔ nyíɛ ma Mɔ́ɖékáì. Ké Ɛsɔ́ɖɔ́ nyu ma Mɔ́ɖékáì Hémàà kɔ̃̀ɔ̀-ɖɛ̀ ɓěɔ̀ wuɖuí-kɔ̃̀-nyɔ̀ mú.

³ Sɔ̀ìn ɓóɛ gboɛɛ, Ɛsɔ́ɖɔ́ kpá ma ɓó kã́áɔ̀ ɓo zɔ̃̌in, ké ɔ nì ma vĩ̌ɛń, ké ɔ nì ma ɔ ɓaàǔn ɖe. Ɔ ɓaà ma kã́áɔ̀, ɓɛ́ ɔ ké ɖɛ gbà ɓɛ́ Hémà mɔ̀à Ágàà gbǒ-xwíníín-nyɔ̀ɔ̀ kɛɛ ɖǎ ma kà gbɔ po ɓá Júù-nyɔ̀ ɓěɔ̀ dyíɛɛ jè dyi zĩ̀ìn.

⁴ Ké kã́áɔ̀ tò ma ɔ góò-kùìɔ̀ Ɛsɔ́ɖɔ́ dyí. Ké Ɛsɔ́ɖɔ́ sɔ̀ ma ɓó ɓíɖíiɔ̀ dyí, ké ɔ nyànà ma ɓó kã́áɔ̀ dyúa dyi.

⁵ Ké Ɛsɔ́ɖɔ́ ɖá, “Ɓɔ̌ɔ̀, nì hwòɖǒ dyi ḿ múin dèìn ní, ké m̀ dyi ɖé ḿ jè gbo kɔ̃̀ǐn, ké ɖɛ nìà kɛ dyi m̀ hwìɖǐi dèǐn, ní ɓaà m̀ ní, m̀ mɛ ɓeìn wuɖu dyi, ɓɛ́ ɔ ké wuɖu ɓɛ́ Hémà ɖǎ ma kà dyi ɓeìn kĩ́ín nyɛɛ ɓɔ́í po. Ɔ mɔ̀ wuɖu ɓɛ́ Hémà mɔ̀à Hàmɛ́dàfà mɔ̀à Ágàà gbǒ-xwíníín-nyɔ̀ɔ̀ kɛɛ dyú-gààɔ̀ kɛɛ ɖǎ ma kà dyi ɓeìn, ɓɛ́ wa kéà Júù-nyɔ̀ séín nìà nì ɓóɖóɛ̀ kɔ̃ɛɛ ɖáɓá kɛ.

⁶ Ɔ jǔ ké mú-gbɔɔ̀-gbɔɔ̀ dyi ní nyɔ ɓěɔ̀ kɔ̃ dyi, ké wa dyi ḿ mìɔùn nììn gbǒ-xwíníín-nyɔ̀ ɓěɔ̀ ɖáɓá ní, xwɛ̌ ḿ ɓɛ́ìn ɖɛ nì kàà hwìɖǐi kùɛ̀n nyɛ́?”

⁷ Hwɛ̀ ké Kã́á Àhàzúwàɖà cɛ̃ɛ ma ɔ gmàà Ɛsɔ́ɖɔ́ kè Mɔ́ɖékáì mɔ̀à Júù-nyɔ̀ ɓěɔ̀ kɛɛ gbo, ké ɔ ɖá, “Ɓě dyéɛ kà ḿ ɖǎ Hémà beè ɓó ɖɛ gbà ɓɛ́ ɔ ɖǎ dyí sɔ́ ɓá Júù-nyɔ̀ ɓěɔ̀ dyíɛɛ jèɛ. Ké ḿ ɖǎ ɔ kɔ̃̀ɔ̀-ɖɛ̀ ɓěɔ̀ Ɛsɔ́ɖɔ́ nyí.

⁸ Kɛɛ gma ɓɛ́ wa ɖǎ céè ɖé ní nyɛ́nɛ́ mú, ké wa ɖǎa sɔ̃-bɛ̃̀ kɔ̃ po dyììn ɖé kã́á-sɔ̃-bɛ̃̀-kɔ̃-pòìn-ɖɛ̀ɔ̀ múɛɛ, nyɔ ɖò seɛ dyí zàìn ɓɛ́ìn. Kɛɛ wɛ̃́ɛ́ kɛɛ, ɓě mɛ céè ɖɛ ɓěɛ̀ hwòɖǒ mɔ́ céèɛ̀ dyiɛɛ ɓó Júù-nyɔ̀ ɓěɔ̀ bìì. Ɓě mɛ céèɛ̀ ɖé ní nyɛ́nɛ́ mú, ɓɛ́ ɓě kéɛ kã́á-sɔ̃-bɛ̃̀-kɔ̃-pòìn-ɖɛ̀ɔ̀ sɔ̃-bɛ̃̀ kɔ̃ pòìn.”

⁹ Ɔ jèɛɛ, ɓó dɛ̀nɛ̀ mɔ̀ Sívã̀ùn mɔ̀ zɔ̃ɔ̀ dɛ̀nɛ̀ tã nììnɔ̀ kɛɛ wé kpáɖá-nyɔ sè tã nììnɔ̀ ɓaɖaa, Mɔ́ɖékáì poìn ma kã́áɔ̀ céè-ɖɛ̀ céè-nyɔ̀ ɓěɔ̀ dyí wàɖà. Ké wa céè ma wuɖu séín ɓɛ́ Mɔ́ɖékáì nì ma Júù-nyɔ̀ ɓěɔ̀ kè kã́áɔ̀ sɔ̃-xwíɖíi-dè-nyɔ̀ ɓěɔ̀ kè ɓóɖóɔ̀ gbɛ̌ɛ̀ ɖò-ɖò ɓěɔ̀ wuɖuí-kɔ̃̀-nyɔ̀ ɓěɔ̀ ɔ kè ɓóɖóɔ̀ cu-kpà ɓěɔ̀ gbo tòɛ̌n nyɛ. Gɔ̌mànà-nyɔ̀ ɓěɛ̀ kɔ̃̀ ma ɓóɖóɔ̀ gbɛ̌ɛ̀ hɔ̃dɛ̀ɖɛ̀ ɖò kè kpáɖá-nyɔ sè mɛ̀nɛ̌ìn-sɔ̃́ ɓěɔ̀ wuɖuí. Ɔ xwíníín mɔ̀ sɔ̀ìn ɖé Índìà-ɓòɖòɔ̀ kɔ̃, nyinià ɖé Kúsì-ɓòɖòɔ̀ kɔ̃ɛ. Wa céè ma céè-ɖɛ̀ɔ̀ ɖé Júù-nyɔ̀ ɓěɔ̀ mìɔùn nììn wuɖuɔ̀ kè wuɖu-dù kò-kò séín nì ma ɖé gbɛ̌ɛ̀ ɖò-ɖò ɓěɔ̀ múɛɛ mú ɖekè.

¹⁰ Mɔ́ɖékáì céè ma céè-ɖɛ̀ ɓěɔ̀ ɖé Kã́á Àhàzúwàɖàà nyɛ́nɛ́ mú, ké ɔ po wa kã́áɔ̀ sɔ̃-bɛ̃̀ kɔ̃. Ké ɔ dèìn ma céè-ɖɛ̀ ɓěɔ̀ nyɔ ɓě xwa. Nyɔ ɓěɔ̀ kpá ma kã́áɔ̀ sǒɔ̀ nyɔ ɓě ɓɛ́ wa fɛ̃́ìn ɓó xwaiɛɛ kɔ̃ún, ké wa mu ma.

¹¹ Kã́áɔ̀ wuɖu nìà ɖé céè-ɖɛ̀ɔ̀ múɛɛ nyí Júù-nyɔ̀ ɓě nì hwɔɖɔ ɖò-ɖò séín múɛɛ kpé, ɓɛ́ wa ké dà dyúáɖò dyí poìn, ɓɛ́ wa ké wa mìɔùn bìì vɔ̃. Céè-ɖɛ̀ɔ̀ wuɖu ɖá, “Ɔ jǔ ké nyɔ ɓě dyi vɔ̃̀ìn-ɖɛ̀ ɓéɖé, ké wa dyi ɓóɖóɛ̀ gbɛ̌ɛ̀ ɖò mú sɔ̀, ké wa dyi ɓě gbo vɔ̃uń dyi ní, nìí, ɓě mɛ vɔ̃ wa mɔ̀ùn gbo, ɓɛ́ ɓě ké wa kè waà gmàà ɓě kè waà dyú ɓě ɖáɓá, ɓɛ́ wa jè ké dyi zi. Waà nyɔ ɖò mɛ ɓɔ́ ɓíɖíi sèɛ̀, ɓɛ́ ɓě ké waà kɔ̃̀ɔ̀-ɖɛ̀ ɓěɔ̀ dyí ɖú.”

¹² Wé ɓɛ́ ɔ ɖǎ ma kà dyi dè, ɓɛ́ Júù-nyɔ̀ ɓěɔ̀ ké ma kà ɖɛ nìà kɛ nyu ɖé Kã́á Àhàzúwàɖàà ɓóɖóɔ̀ gbɛ̌ɛ̀ ɖò-ɖò séín múɛɛ mɔ̀ Ádà-dɛ̀nɛ̀ mɔ̀à zɔ̃ɔ̀ dɛ̀nɛ̀ɔ̀ ɓaɖa-bùè sè sɔ̃́ nììnɔ̀ kɛɛ wé ɓaɖa-bùè sè tã nììnɔ̀ ɓaɖa.

¹³ Ɖɛ céèà ɖé céè-ɖɛ̀ɔ̀ múɛɛ mɛ mɔ̀ gma ɖé ɓóɖóɔ̀ gbɛ̌ɛ̀ ɖò-ɖò séín mú, ɓɛ́ Júù-nyɔ̀ ɓěɔ̀ ké ɓɛ́ɖɛ́ kɔ̃ nì ɓó wéa ɓaɖa, ɓɛ́ wa ké wa mìɔùn bìì vɔ̃ ɓá waà mú-nyɛ́-nyɔ̀ ɓěɔ̀ jè dyí.

¹⁴ Ti ɓɛ́ Mɔ́ɖékáì ɖǎ céè-ɖɛ̀ ɓěɔ̀ céèɛ̀ hwɔɛɛ, kã́áɔ̀ tò ma wuɖu, ké kíá ɓěɔ̀ kpá ma kã́áɔ̀ sǒ ɓěɔ̀ kɔ̃ún wàɖà, ké wa kpa ma peɖeɛ. Wa ɓeìn ma wuɖuɔ̀ dyi ɖé Súsà-hwɔ̀ɖɔ̀ mɔ̀à dìɓà-hwɔ̀ɖɔ̀ɔ̀ kɛɛ mú ɖekè.

¹⁵ Ti ɓɛ́ Mɔ́ɖékáì sɔ̀ ma ɖé kã́áɔ̀ gbǒɔ̀ dyaa, ɖɔ mɔ̀ kã́á-mú-po-ɖɔ̀ɛɛ nì ma ɔ mú. Ɔ mɔ̀ ɖɔ ɓéɖé ɓùɖǔù-dyèɖè kɛ kè dyéɖé púú. Ké ɔ dèìn ma góò-gbàǎ vɛ̀nɛ̀ ɖò dú, ké ɔ po ma ɖénì-ɖɔ̀ nɔ̀mɔ̀ dyíinɛ̀ gã́ùn ɓɛ́ ɔ ɓéɖé dyéɖé ɖàɓàìn kpèɛ̀ kɛɛ ɖò ɓóɛ kɔ̃in ɖekè. Ké Súsà-hwɔ̀ɖɔ̀ gànáɔ̀ nì ma múà nyuɛń.

¹⁶ Ɔ mɔ̀ ma hwòɖǒ-dyi-dè-tì kè múà-tì ɔ kè to-ɖu-ɖu ɓó Júù-nyɔ̀ ɓěɔ̀ bìì.

¹⁷ Ɖé ɓóɖóɔ̀ gbɛ̌ɛ̀ séín kè hwɔɖɔ séín kɔ̃̀ mú ɓɛ́ kã́áɔ̀ wuɖuɔ̀ mu ma kɛɛ, múà ɓáún-ɓáún nì ma ɖé Júù-nyɔ̀ ɓěɔ̀ hwìɛ̀. Ɔ mɔ̀ ma hwèɖè-wè, ké wa nì ma hwɔ pauń, ké wa nì ma ɖɛ ɖiɛń. Ké ɓóɖó-dù kà kò ɖò ɓěɛ̀ nyɔ ɓáún-ɓáún zɛ̃̀ìn ma Júù-nyɔ̀ mú, sepóɛɖé wa fɛ̃̀ìn ma Júù-nyɔ̀ ɓěɔ̀ dyi mìɔ jè.