Ɛsɔ́ɖɔ́ 7 - Ɓǎsɔ́ɔ̀ Báɓòɔ̀

¹ Ké kã́áɔ̀ kè Hémà mu, ɓɛ́ wa kè Ɛsɔ́ɖɔ́ ké ma ɖɛ ɖi.

² Ti wa nì ma ɖɛ ɖiɛń, ké wa nì ma wã́ìn náuń ɓó wéɔ̀ sɔ̃́ nììnɔ̀ ɓaɖaa, kã́áɔ̀ diè ma ɖɛi ɖe, ké ɔ ɖá, “Ɓɔ̌ɔ̀ ɓěɛ̀ gmàà, ɖɛ́ kpɔ̃ m̀ hwòɖǒ kɛ́? Cɛ̃ɛ ḿ gbo, ké ní muɛ m̀ nyíìn. Kɛbì ɔ mɛ mɔ̀ ní kã́á-ɓòɖòɛ̀ fáún-fáún wɛ̃ɛ, ní muɛ m̀ nyíìn.”

³ Hwɛ̀ ké Ɛsɔ́ɖɔ́ jǔ ma kã́áɔ̀ gɔ̃̌, ké ɔ ɖá, “Ɓɔ̌ɔ̀, ɔ jǔ ké nì hwòɖǒ dyi ḿ múin dèìn, ɓɛ́ m̀ ké ní zɔ̀ɔ̀-ɖɛ̀ɔ̀ ḿ nyí ní, ní muɛ zɔ̀ùn. Ní zɔ̀ɔ̀-ɖɛ̀ɔ̀ mɔ̀, ɓɛ́ m̀ ké ḿ póìn, ɔ kè ɓɛ́ m̀ ké ní nyɔ ɓěɔ̀ póìn ɖekè.

⁴ Sepóɛɖé wa ɖǎ ḿ kè ní nyɔ ɓěɔ̀ wíɖí mú dɔ̃, ɓɛ́ wa ké à ɖáɓá, ɓɛ́ à jè ké dyi zi. Wa dyiɔ́ má à peɖe, ɓɛ́ à kéɔ́ má gǐì-gàà kè gǐì-màà ɓě jǔ ɖòùn pū ní, ḿ seɔ́ má ɖɛ ɖò gbo wùɖùɛ̌ mu, sepóɛɖé nyɔ ɖò se ɓéɖé ɔ kéɔ́ má kã́áɔ̀ fũ̀à-fṹá nyùìn ɓó ɖɛ nì náa jè.”

⁵ Hwɛ̀ ké Kã́á Àhàzúwàɖà diè ma ɔ gmàà Ɛsɔ́ɖɔ́ dyi, ké ɔ ɖá, “Ɔ mɔ̀ nyɛ́ kɛ́? Gàaɔ̀ nyɛ́ mɔ́à ɖɛ nì kàà nyuɛ dyi kɛ́?”

⁶ Ké Ɛsɔ́ɖɔ́ ɖá, “À gbo-vɔ̃-nyɔ̀ kè à mú-nyɛ́-nyɔ̀ɔ̀ mɔ̀ Hémà mɔ̀à hwòɖǒ-kɔ̃in-nyìnììn-gàà nìà kɛ̀.” Púɛɛ, fã̀à nyu ma Hémà mìɔ ɓó kã́áɔ̀ kè ɔ gmààɔ̀ dyúa.

⁷ Ké kã́áɔ̀ kpá ma dyoɖoún mìɔ, ké ɔ táà ma wã́ìn ɔ nì ma kà náuń wɛ̃ɛ dyi. Ɔ sɔ̀ ma dyí, ké ɔ mu ɖé kã́á-gbòɔ̀ nììn ɓáá-ɖɛ̀-pàɔ̀ mú. Hémà dyuòɛ̀ ma dyí kà kã́áɔ̀ ɖǎa hwìɖǐi poìn ɓɛ́ ɔ ké ɔ ɖɛ gbà ɖò bũ̌ nyuɛ. Ɔ jèɛɛ, ɔ sè ma ɓó, ɓɛ́ ɔ ké ma Ɛsɔ́ɖɔ́ ɓaà, ɓɛ́ ɔ ké ɔ fɛ̀ɛ̀ɔ̀ póìn.

⁸ Hémà kpá ma ɓó ɖɛ hwɔìn gbɛ-dyù ɓɛ́ Ɛsɔ́ɖɔ́ nì ma kà kɔ̃ɛɛ kɔ̃ dyi, ké ɔ nì ma Ɛsɔ́ɖɔ́ ɓaàǔn, ɓɛ́ ɔ ké ɔ wìǐn dyé. Ti ɓɛ́ kã́áɔ̀ sɔ̀ ma ɖé ɓáá-ɖɛ̀-pàɔ̀ mú, ké ɔ dyá ma ɖé gbǒɔ̀ mú dɛ̀ wa nì ma kà hwɔɔ̀ pauń wɛ̃ɛ, ɔ dyɛ̀ìn ma Hémà ɓó ɖɛ hwɔìn gbɛ-dyù ɓɛ́ Ɛsɔ́ɖɔ́ nì ma kà kɔ̃ɛɛ kɔ̃ dyi. Ti ɓɛ́ kã́áɔ̀ dyé ma ɓó Hémà kɛɛ, ɔ páná ma mú, ké ɔ ɖá, “Ɔ mɔ́ ní gmààɔ̀ ganaún kpɔ̃̀ìn dyi ɖekè nɔ̄ ní gbǒɔ̀ mú ɓó ḿ dyéɖé waíì?” Ti ɓɛ́ kã́áɔ̀ cɛ̃ ma wuɖuɔ̀ nyɛ̀nɛ̀ɛ̀ kɛɛ, wa wáɖá ma Hémà ɖɔ dúi.

⁹ Hwɛ̀ ké Hàbónà ɓɛ́ ɔ mɔ̀ ma kã́áɔ̀ gbo-nì-nyɔ̀ ɓěɔ̀ ɖòɛɛ ɖá, “Gmɔ̀ nɔ̄, Hémà po ma nyɔ-beèìn-naín ɖò ɖé ɔ gbǒɔ̀ wáún. Ɔ dya-tɔ̀mɔ̀-tɔ̀mɔ̀ mɔ̀ ɓáɖáa ɓaɖa-bùè sè sɔ̃́ kè fá-kɛ́ín. Ɔ poɛ ma, ɓɛ́ ɔ ké Mɔ́ɖékáì mɔ̀ nyɔ póìn ma kà kã́áɔ̀ fɛ̀ɛ̀ kɛɛ ɓó beèìn.” Ké kã́áɔ̀ ɖá, “Ɓě beèìn ɓó ɔ.”

¹⁰ Ké wa beèìn ma Hémà ɓó nyɔ-beèìn-naín ɓɛ́ ɔ po ma kà ɓó Mɔ́ɖékáì bììɛɛ dya. Hwɛ̀ ké kã́áɔ̀ dyoɖo-hwòɖòɔ̀ wáɖá ma.