Ɛsɔ́ɖɔ́ 5 - Ɓǎsɔ́ɔ̀ Báɓòɔ̀

Ɛsɔ́ɖɔ́ ɖá kã́áɔ̀ kè Hémà ɖii-ɖɛ̀-hwɔ̀ vɛ̀nɛ̀ ɖò kɔ̃

¹ Ɓó waà wɔ̃-kɔ̃-hwèɖè-wèɔ̀ tã nììnɔ̀ ɓaɖaa, Ɛsɔ́ɖɔ́ po ma ɔ kã́á-gmàà mú-po-ɖɔ̀ɔ̀ mú, ké ɔ mu, ké ɔ nyànà ma ɓó kã́áɔ̀ gbǒɔ̀ wáká hwɔà ɓó kã́áɔ̀ zèèɔ̀ nì-naínɔ̀ dyúa dyíɛɛ mú dyi. Ɓó tia ɓaɖaa, kã́áɔ̀ nì ma ɓó ɔ zèèɔ̀ kɔ̃ ɖé gbǒɔ̀ mú, ké ɔ gmɔ̀ìn ma ɖé gbǒ-wɔ̃̀ɔ̀ gbo.

² Ti ɓɛ́ ɔ dyé ma ɔ gmàà Ɛsɔ́ɖɔ́ ɖé gbǒɔ̀ wáká hwɔà ɖé zèèɔ̀ nì-naínɔ̀ dyíɛɛ dyi nyànàà kɛɛ, ɔ hwòɖǒ dè ma dyi ɓó Ɛsɔ́ɖɔ́ dyé jè. Ké ɔ tò ma góò-kùì nì ma kà ɔ xwaa Ɛsɔ́ɖɔ́ dyí, ké Ɛsɔ́ɖɔ́ xwɛ̃́ìn ma ɓó dyi, ké ɔ tìnììn kùìɔ̀ mánáɔ̀ dyi.

³ Hwɛ̀ ké kã́áɔ̀ diè ma ɔ dyi, ké ɔ ɖá, “Ɓɔ̌ɔ̀ ɓěɛ̀ gmàà, ɖɛ́ kpá kɛ́? Ɖɛ́ kpɔ̃ m̀ hwòɖǒ kɛ́? Cɛ̃ɛ ḿ gbo. Kɛbì ɔ mɛ mɔ̀ ní kã́á-ɓòɖòɛ̀ fáún-fáún wɛ̃ɛ, ní muɛ m̀ nyíìn.”

⁴ Ké Ɛsɔ́ɖɔ́ ɖá, “Ɓɔ̌ɔ̀, nì hwòɖǒ dyi wɔ̃́ ní, ní mɔ́ ɓɛ́ m̀ kè Hémà ké hwɔ ɓɛ́ ḿ ɖǎà naɓaà ɓó m̀ bììɛɛ kɔ̃ dyi ɓó zɛ̃̌ɛ̀.”

⁵ Ké kã́áɔ̀ ɖá, “Ɓě mu Hémà ɖá wàɖà, ɓɛ́ ɔ ké dyi, ɓɛ́ à ké Ɛsɔ́ɖɔ́ɛ̀ ɖéè jǔ.” Ké kã́áɔ̀ kè Hémà mu ma hwɔ ɓɛ́ Ɛsɔ́ɖɔ́ ɖá ma kà kɛɛ kɔ̃.

⁶ Ti wa ɖǎ ma hwɔɔ̀ kɔ̃ nì, ké wa nìǎ ma wã́ìn náuń wɛ̃ɛ, kã́áɔ̀ diè ma Ɛsɔ́ɖɔ́ dyi ɖe, ké ɔ ɖá, “Noò, ɖɛ́ kpɔ̃ m̀ hwòɖǒ kɛ́? Cɛ̃ɛ ḿ gbo, ké ní muɛ m̀ nyíìn. Kɛbì ɔ mɛ mɔ̀ ní kã́á-ɓòɖòɛ̀ fáún-fáún wɛ̃ɛ, ní muɛ m̀ nyíìn.”

⁷ Ké Ɛsɔ́ɖɔ́ ɖá, “Ɓɔ̌ɔ̀, ní hwòɖǒ-kpɔ̃-ɖɛ̀ kè ní zɔ̀ɔ̀-ɖɛ̀ mɔ̀,

⁸ ɔ jǔ ké nì hwòɖǒ dyi ḿ múin dèìn jɛ́ɛ́ ní, ké m̀ dyi ní hwòɖǒ-kpɔ̃-ɖɛ̀ɔ̀ ḿ nyíɛ mu ní, nìí, m̀ kè Hémà mɛ dyi hwɔɔ̀ nyɔ ní muɔ̀ kà naɓaàùn ɓó ɓě bìì ɓó gàɖàà kɛɛ kɔ̃ ɖe. Nìí, ní mu ɖɛ kpɔ̃ ḿ hwòɖǒɛɛ m̀ gbo cɛ̃ìn ɓó tia ɓaɖa.”

Hémà sɔ́ Mɔ́ɖékáì ɓɛ́ ɔ ké ɔ ɖáɓá

⁹ Ti Hémà nì ma hwɔɔ̀ kɔ̃ sɔ̀ǔn wɛ̃ɛ, ɔ kpá ma múàǔn mìɔ, ké ɔ hwòɖǒ dè ma dyi. Kɛɛ ti ɓɛ́ ɔ dyé ma Mɔ́ɖékáì ɓó kã́áɔ̀ gmɔ-wɔ̃̀ɔ̀ gbo, ké ɔ dyéɛ kà Mɔ́ɖékáì se ɔ dyi fɛ̃̀ìn mɔɔ ké ɔ se dyí sɔ̀ dyɛ mɔ̀ùn wɛ̃ɛ, púɛɛ, ɔ kpáìn ma Mɔ́ɖékáì dyoɖoún mìɔ.

¹⁰ Kɛɛ wɛ̃́ɛ́ kɛɛ, Hémà kpɔ̃ ma ɔ mìɔùn dyí, ké ɔ mu ma taún. Ti ɔ nyini ma ɔ ɓíɖí-taún wɛ̃ɛ, ɔ ɖá ma ɔ gmàà kɔ̃̀ nyɛ́nɛ́ mɔ̀ Zɔ́wɛ̀ɖɛ̀ kɛ, ké ɔ poìn ma ɔ ɓǎto séín ɓěɔ̀ dyí.

¹¹ Ké ɔ nì ma ɓɔ́ɖɔ́uń ɓó wa dyúa, ɓó ɔ kɔ́mɔ́ vɛ̀nɛ̀ɔ̀ kè ɔ dyú-gàà kúɖúú ɓěɔ̀ kè dya-dè-dè séín ɓɛ́ kã́áɔ̀ ɖǎ ɔ nyíɛɛ jè, ké ɔ nì ma ɓɔ́ɖɔ́uń ɓó kũ̀à vɛ̀nɛ̀ ɓɛ́ kã́áɔ̀ ɖǎ ma ɔ nyí ɓó ɔ mǔè gɔ̌mànà-nyɔ̀ tɔ̀ɔ̀ ɓěɔ̀ kɔ̃in nyɛɛ jè ɖekè.

¹² Ké Hémà ɖá, “Ɔ seɛ ɖòùn, kɛɛ ḿ ɖòǔn mɔ̀ nyɔ Kã́á-gmàà Ɛsɔ́ɖɔ́ ɖá, ɓɛ́ ḿ kè kã́áɔ̀ ké hwɔ ɓɛ́ ɔ ɖáà kɛɛ kɔ̃ mu. Ké ɔ ɖǎ ḿ ɖá, ɓɛ́ ḿ kè kã́áɔ̀ ké hwɔɔ̀ ɖò kɔ̃ mu ɖe ɓó gàɖàà.

¹³ Kɛɛ ɖɛ séín ɓěɛ̀ ɖò se ní hwòɖǒ dyi dèɛ̀ ɓɛ́ìn kà ɓɛ́ Júù-gàà mɔ̀à Mɔ́ɖékáì kɛɛ kòà ɓó kã́áɔ̀ gmɔ-wɔ̃̀ɔ̀ gbo dyi keɛ.”

¹⁴ Ké ɔ gmàà Zɔ́wɛ̀ɖɛ̀ kè ɔ ɓǎto ɓěɔ̀ cɛ̃ɛ ma ɔ gbo, ké wa ɖá, “Po nyɔ-beèìn-naín ɖò. Ɔ dya-tɔ̀mɔ̀-tɔ̀mɔ̀ mɛ mɔ̀ ɓáɖáa ɓaɖa-bùè sè sɔ̃́ kè fá-kɛ́ín. Ké m̀ mɛ diè kã́áɔ̀ dyi ɓó gàɖàà gànà-kṹún, ɓɛ́ ɔ dyi wɔ̃́ ní, m̀ ké ɓó Mɔ́ɖékáì beè. Ɔ ɖǎ ná nìǐn, nìí, m̀ kè kã́áɔ̀ ɓɛ́àǐn hwɔɔ̀ kɔ̃ muɛ ɖé múà mú.” Wuɖuɔ̀ dè ma Hémà hwìɖǐi mìɔ, ké ɔ nyuɛ ké wa po ma nyɔ-beèìn-naínɔ̀.