Ɛsɔ́ɖɔ́ 4 - Ɓǎsɔ́ɔ̀ Báɓòɔ̀

Mɔ́ɖékáì diè Ɛsɔ́ɖɔ́ dyi ɓɛ́ ɔ ké ɔ nyɔ ɓěɔ̀ gbo kpá

¹ Ti ɓɛ́ Mɔ́ɖékáì wɔ̃́ ma ɖɛ séín ɓě ɓɛ́ wa ɖǎ ma dyí sɔ́ɛ jèɛɛ, ɔ fáìn ma ɔ mìɔùn ɖɔún dyi. Ké ɔ po ma ɖɔ-zɔ̃̀ mú, ké ɔ po ma tĩ́ɔ dúi. Ɔ nì ma hwɔɖɔɔ̀ gbo dyi téɛń, ké ɔ nì kpé poɛ kpauń ɖé wuɖu zoo mú ɓó ɖɛ-hwòɖǒ-kpɔ̃-kà.

² Kɛɛ ɔ kpé-po-poɔ̀ sèìn ma ɓó kã́áɔ̀ gmɔ-wɔ̃̀ɔ̀ gbo, sepóɛɖé nyɔ ɖò ní po ɖɔ-zɔ̃̀ mú, ké ɔ ní dyá ɖé kã́áɔ̀ gmɔɔ̀ xwíníín.

³ Dɛ̀ kã̀ìn séín ɓɛ́ wuɖu ɓɛ́ kã́áɔ̀ po ma kà dyiɛɛ nyini ma kɛɛ, Júù-nyɔ̀ séín nì ma ɖéɛɛ po ma kpé ɖé wuɖu zoo mú. Wa hwèɖè ma wɔ̃ kɔ̃, ké wa po ma ɖɔ-zɔ̃̀ mú, ké wa kò ma tĩ́ɔ-pɛ̀ɛ̀ múin.

⁴ Ké Ɛsɔ́ɖɔ́ɛ̀ gbo-nì-màà ɓěɔ̀ kè ɔ gbo-gmɔ̀-gàà ɓěɔ̀ dyi ma, ké wa cɛ̃ ma ɖɛ ɓɛ́ Mɔ́ɖékáì nì ma nyuɛń nyɛɛ ɔ gbo. Púɛɛ, ɔ hwòɖǒ kpá ma ɖé ɖei mìɔ. Ké ɔ ɖoɓo ma Mɔ́ɖékáì ɖɔ gbo, ɓɛ́ ɔ kéɛ ma mú po, ɓɛ́ ɔ ké ɖɔ-zɔ̃̀ɔ̀ dyi pɛ̃́ìn, kɛɛ Mɔ́ɖékáì se ma ɖɔɔ̀ mɔ́.

⁵ Hwɛ̀ ké Ɛsɔ́ɖɔ́ ɖá ma Háfà ɓɛ́ ɔ mɔ̀ ma kã́áɔ̀ gbo-nì-nyɔ̀ ɓěɔ̀ ɖò, ɓɛ́ kã́áɔ̀ gã ma ɓɛ́ ɔ ké ma Ɛsɔ́ɖɔ́ gbo-gmɔ̀-nyɔ̀ ɓěɔ̀ ɖò jǔɛ. Ké Ɛsɔ́ɖɔ́ ɖoɓo ma ɔ ɖé Mɔ́ɖékáì gbo, ɓɛ́ ɔ ké ɖɛ kpá ma kɛ kè ɖɛ kɔ̃̀ jè ɖɛɔ̀ kpáà kɛɛ múin wɔ̃́.

⁶ Ɔ jèɛɛ, Háfà mu ma ɖé Mɔ́ɖékáì gbo ɖé hwɔɖɔɔ̀ píé hwòɖǒǔn, hwɔ ɖé kã́áɔ̀ gmɔ-wɔ̃̀ɔ̀ gbo dyí.

⁷ Ké Mɔ́ɖékáì zaìn ma ɖɛ séín kpá ma kà ɔ gboɛɛ Háfà gbo kɔ̃in, ké ɔ cɛ̃ ma wíɖí jĩ̀ kà ɓɛ́ Hémà ɖǎ ɖé kã́áɔ̀ wíɖí-dyi-dèìn-naínɔ̀ poɛ mɔ́ ɔ jǔ ké wa dyi Júù-nyɔ̀ séín ɓěɔ̀ ɖáɓáín nyɛɛ jè.

⁸ Ké Mɔ́ɖékáì nyí ma Háfà céè-ɖɛ̀ kɔ̃̀ mú ɓɛ́ wuɖu wa ɓeìn ma kà dyi ɖé Súsà-hwɔ̀ɖɔ̀ɔ̀ mú ɓá Júù-nyɔ̀ ɓěɔ̀ ɖáɓá jè dyíɛɛ nì ma kà kɛɛ ɖò. Mɔ́ɖékáì cɛ̃ɛ ma ɔ gbo, ɓɛ́ ɔ ké mu, ɓɛ́ ɔ kéɛ Ɛsɔ́ɖɔ́ gbo kɔ̃in zaìn, ɓɛ́ Ɛsɔ́ɖɔ́ ké ɖé kã́áɔ̀ gbo mu, ɓɛ́ ɔ ké kã́áɔ̀ ɓaà ɓó ɔ nyɔ ɓěɔ̀ jè, ɓɛ́ kã́áɔ̀ ké wa wìì kɔ̃ ɓéɖé.

⁹ Ké Háfà mu ma ɖe, ké ɔ zaìn ɖɛ Mɔ́ɖékáì cɛ̃ ma kà kɛɛ Ɛsɔ́ɖɔ́ gbo kɔ̃in.

¹⁰ Hwɛ̀ ké Ɛsɔ́ɖɔ́ cuò ma Háfà, ɓɛ́ ɔ kéɛ Mɔ́ɖékáì gbo cɛ̃, ɓɛ́ ɔ ké níiń,

¹¹ “Ɛsɔ́ɖɔ́ ɖá, ‘Ɔ nyuá wé kpáɖá-nyɔ ɓaɖa-bùè ké kã́áɔ̀ séè ḿ ɖá, ɓɛ́ ḿ ké ɖé ɔ gbo mu. Kã́áɔ̀ gɔ̌mànà-nyɔ̀ séín ɓěɔ̀ kè nyɔ tɔ̀ɔ̀ ɓě nì ɔ ɓóɖóɔ̀ gbɛ̌ɛ̀ ɖò-ɖò séín múin nyɛɛ dyuòɛ̀ kà ɔ jǔ ké kã́áɔ̀ se nyɔ ɖò ɖá, ké nyɔɔ̀ dyi ɖé kã́áɔ̀ gbǒɔ̀ mú dyá, ké ɔ dyi ɓó kã́áɔ̀ dyúa mu ní, kã́áɔ̀ ɓéɖé gma dyúáɖò ɓá nyɔɔ̀ dyí kɛ. Gmaɔ̀ mɔ̀, kɛbì ɔ mɛ mɔ̀ gàa mɔɔ màa kɛɛ, ɔ ɓéɖé ɔ ké mɛ́. Ɖɛ dyúáɖò ɓɛ́ìn nyɔɔ̀ póɛ̀n nyɛɛ mɔ̀ kã́áɔ̀ pɛ́ɛ̀ sɔ̃ ké ɔ tò ɔ góò-kùìɔ̀ nyɔɔ̀ dyí hwɛ̀.’ ”

¹² Ti ɓɛ́ Háfà kpa ma Ɛsɔ́ɖɔ́ɛ̀ wuɖuɔ̀ Mɔ́ɖékáì gboɛɛ,

¹³ Mɔ́ɖékáì ɖoɓo ma Ɛsɔ́ɖɔ́ gbo wuɖu ɖe, ké ɔ ɖá, “M̀ mɛ ɓɔ́ɔ hwìɖǐi poɛ̀n kà m̀ nì ɖé kã́áɔ̀ gbǒɔ̀ mú jèɛɛ, mɔ̀ùn mu ɖɛ nìà kɛ xwaún póùn ɖé Júù-nyɔ̀ ɓěɔ̀ hwìɛ̀ kɛ.

¹⁴ M̀ dyi gìɖìǐ nì ɓó tiɛ̀ mú ní, gbo-kpá-kpá mu dà ɖò sɔ̀ùn, ké Júù-nyɔ̀ ɓěɔ̀ mu póùn ɖé hwìè kà kò ɖò mú, kɛɛ nìí, m̀ kè nì ɓǎà gbǒ-xwíníín-nyɔ̀ ɓěɔ̀ mu mú gbɔɔ̀ùn. Ké nyɛ́ dyuòɛ̀ kɛbì m̀ ɖǎ kã́áɔ̀ gmàà jǔ ɓó ti nì kàà kɛɛ jè níɛ́?”

¹⁵ Ké Ɛsɔ́ɖɔ́ tò ma gɔ̃̌-jǔ-wùɖù nìà kɛ Mɔ́ɖékáì gbo, ké ɔ ɖá,

¹⁶ “Mu, ɓɛ́ m̀ ké Júù-nyɔ̀ séín nì Súsà-hwɔ̀ɖɔ̀ɔ̀ múɛɛ dyí poìn, ɓɛ́ ɓě ké wɔ̃ kɔ̃ hwèɖè ɓó ḿ bìì. Ɓě mɛ ɓɔ́ ɖɛ ɖò ɖiɛ, ké ɓě mɛ ɓɔ́ ní ɖò náa ɓó dyóɖóaún kè máaún ɓó wé tã xwíníín. Ḿ kè ní gbo-nì-màà ɓěɔ̀ mu ɖɛ dyúáɖòɔ̀ nyuùn ɖekè. Sɔ̀ìn ɓóɛ gboɛɛ, nìí, ní mu ɖé kã́áɔ̀ gbo muùn, kɛbì ɔ mɛ mɔ̀ gmaɔ̀ wáɖá-wáɖá kɛ. Ké ɔ jǔ ké ḿ dyi mɛ́ìn ní, ḿ mɛ mɛ́ pū.”

¹⁷ Ɔ jèɛɛ, Mɔ́ɖékáì mu ma, ké ɔ nyu ɖɛ séín ɓɛ́ Ɛsɔ́ɖɔ́ cɛ̃ ma kà ɔ gboɛ.