Ɛsɔ́ɖɔ́ 3 - Ɓǎsɔ́ɔ̀ Báɓòɔ̀

Hémà sɔ́ Júù-nyɔ̀ ɓěɔ̀ ɓɛ́ ɔ ké wa mú gbɔɔ̀

¹ Sɔ̀ìn ɓó ɖɛ ɓěɛ̀ gboɛɛ, Kã́á Àhàzúwàɖà nyí ma gàa ɖò mɔ̀ Hémà kɛɛ kũ̀à vɛ̀nɛ̀ ɖò. Hémà mɔ̀ Hàmɛ́dàfà ɓɛ́ ɔ mɔ̀ Ágàà gbǒ-xwíníín-nyɔ̀ ɓěɔ̀ ɖòɛɛ dyú-gàà. Kã́áɔ̀ nyuɛ ké Hémà nì ma gɔ̌mànà-nyɔ̀ tɔ̀ɔ̀ ɓěɔ̀ kɔ̃in. Ɔ kɔ ma ɓó kã́áɔ̀ gbo dyí.

² Ɓó kɔ̃in ɖeɛɛ, kã́áɔ̀ cɛ̃ɛ ma kà gɔ̌mànà-nyɔ̀ séín ɓěɔ̀ dyi Hémà dyiɛ dyéín, wa mɛ taɓa kɔ́-dù hwuɖu ɓó ɔ dyúa ɖé ɔ kpéín-dyé-dyé múɛ. Ɔ jèɛɛ, gɔ̌mànà-nyɔ̀ séín ɓěɔ̀ dyi ma Hémà dyiɛ dyéín, wa taɓa ma kɔ́-dù hwuɖu. Kɛɛ Mɔ́ɖékáì mɔ̀ùn ní taɓa ma kɔ́-dù hwuɖu ɓó ɔ dyúa.

³ Hwɛ̀ ké gɔ̌mànà-nyɔ̀ ɓě nyu ma kũ̀à ɖé kã́áɔ̀ kɔ̃̀pã́ùnɔ̀ kɔ̃ɛɛ diè ma Mɔ́ɖékáì dyi, ké wa ɖá, “Ɖɛ́ kɔ̃̀ jè m̀ jaɖaà kã́áɔ̀ wuɖuɔ̀ múɛ́?”

⁴ Wa wùɖù ma Mɔ́ɖékáì gbo wé séín, kɛɛ ɔ se ma waà wuɖuɔ̀ nyu. Ɔ cɛ̃ɛ ma wa gbo, ké ɔ ɖá, “Ḿ mɔ̀ Júù-nyɔ̀, ké ḿ se Hémà dyúa kɔ́-dù hwuɖu taɓaa mɔ́.” Ɔ jèɛɛ, gɔ̌mànà-nyɔ̀ ɓěɔ̀ cɛ̃ɛ ma Hémà gbo, ɓɛ́ wa kéɛ dyé kɛbì ɔ mu Mɔ́ɖékáìɛ̀ kpeɖeɔ̀ hwìɖǐi kùìn ní.

⁵ Ti ɓɛ́ Hémà dyéɛ ma kà Mɔ́ɖékáì se ma ɓó ɔ dyúa kɔ́-dù hwuɖu taɓaa mɔ́ɛɛ, púɛɛ, ɔ kpá ma dyoɖoún mìɔ cá.

⁶ Ti ɓɛ́ Hémà wɔ̃́ɔ ma kà Mɔ́ɖékáì mɔ̀ Júù-nyɔ̀ɛɛ, ɔ hwòɖǒ poɛ gbɔ kà ɔ dyi Mɔ́ɖékáì ɖòùn ɖáɓá ní, ɔ mɔ̀ zuɖuu-ɖɛ̀ ké ɔ muɛ nyuùn wɛ̃. Ɔ jèɛɛ, Hémà hwòɖǒ poɛ ma gbɔ, ɓɛ́ ɔ ké Mɔ́ɖékáì kè ɔ nyɔ ɓě mɔ̀à Júù-nyɔ̀ séín ɓě nìà ɖé Àhàzúwàɖàà kã́á-ɓòɖò gànáɔ̀ múɛɛ mú gbɔɔ̀ nyɛ̀nɛ̀ɛ̀.

⁷ Ɖé Kã́á Àhàzúwàɖà nììn ɓóɖó-wuɖuí-kɔ̃̀-zɔ̃̀ɔ̀ ɓaɖa-bùè sè sɔ̃́ nììnɔ̀ dɛ̀nɛ̀ kĩ́ín-kĩ́ín kɔ̃̀ nyɛ́nɛ́ mɔ̀ Nísàùn kɛɛ xwíníín nyɛɛ, wa nyu ma “Púɔ̀” mɔ̀à à nììn gbo-ɖàɓàìn-ɖɛ̀ kɛɛ ɓó Hémà dyéɖé waí, ɓɛ́ wa ké dɛ̀nɛ̀ kè wé kɔ̃̀ xwíníín ɓɛ́ ɔ ké ɖɛ nìà kɛ nyuɛɛ gã. Ké ti wa gã ma kɛɛ mɔ̀ zɔ̃ɔ̀ dɛ̀nɛ̀ ɓaɖa-bùè sè sɔ̃́ nììn kɔ̃̀ nyɛ́nɛ́ mɔ̀ Ádà kɛɛ wé ɓaɖa-bùè sè tã nììnɔ̀ ɓaɖa.

⁸ Hwɛ̀ ké Hémà cɛ̃ɛ ma Kã́á Àhàzúwàɖà gbo, ké ɔ ɖá, “Nyɔ ɓě ɖò nì kã́á-ɓòɖòɛ̀ dà séín, ké wa nììn kpeɖe ɓěɔ̀ kè ɓóɖó-dù kà kò ɖò ɓěɛ̀ nyɔ ɓě nììn kpeɖe se hwɔìn. Ɓó kɔ̃in ɖeɛɛ, wa ní kpɔ̃ ɓóɖóɛ̀ nììn gma ɓěɔ̀ dyi. Ɓó nì kã́á-ɓòɖòɔ̀ jèɛɛ, à mɛ ɓɔ́ waà kpeɖeɔ̀ hwìɖǐi kùɛ̀n.

⁹ M̀ dyi wɔ̃́ ké m̀ dyi gma ɖò céè, ɓɛ́ wa ké nyɔ ɓěɛ̀ ɖáɓá ní, ní mu wíɖí mɔ̀ séɓàɖà ɓɛ́ ɔ xwa-ku-ku mɔ̀ pṹá-dyèɖè táázĩ̀ìn hɔ̃dɛ̀ɖɛ̀ mɛ̀nɛ̌ìn-sɔ̃́ kè táázĩ̀ìn kpáɖá-nyɔ sɔ̃́ ɓaɖa-bùè kɛɛ ɖé nì wíɖí-dyi-dèìn-naínɔ̀ poùn ɓó nyɔ ɓě ɓɛ́ wa mu kũ̀à nìà kɛ nyuùn wɛ̃ɛ bìì.”

¹⁰ Ké kã́áɔ̀ zà ma ɔ jìǐn-po-ɖɛ̀ ɓɛ́ ɔ ɖɛ-sɔ̃-bɛ̃̀-kɔ̃-pòìn-ɖɛ̀ɔ̀ nìà kɔ̃ɛɛ jìǐn, ké ɔ nyíɛ ma Hémà mɔ̀à Hàmɛ́dàfà ɓɛ́ ɔ mɔ̀à Ágàà gbǒ-xwíníín-nyɔ̀ ɓěɔ̀ ɖòɛɛ dyú-gààɔ̀ kɛɛ xwa. Hémà mɔ̀ ma Júù-nyɔ̀ ɓěɔ̀ mú-nyɛ́-nyɔ̀.

¹¹ Ké kã́áɔ̀ ɖá, “Hémà, ɓɔ́ wíɖí ɖò pɛ́ɛ̀. Mu, ɓɛ́ m̀ ké ɖɛ nì mɔ́ nyɔ ɓěɔ̀ bũ̌ nyuɛ dyiɛɛ bũ̌ nyu.”

¹² Ɔ jèɛɛ, Hémà poìn ma kã́áɔ̀ céè-ɖɛ̀ céè-nyɔ̀ ɓěɔ̀ dyí ɓó dɛ̀nɛ̀ kĩ́ín-kĩ́ínɔ̀ wé ɓaɖa-bùè sè tã nììnɔ̀ ɓaɖa. Ké wa céè ma wuɖu ɓě ɓɛ́ Hémà cɛ̃ ma wa gboɛ. Wa céè ma céè-ɖɛ̀ɔ̀ wuɖu-dù kò-kò séín nì ma ɖé ɓóɖóɔ̀ kɔ̃ɛɛ mú, ké wa tòɛ̀ ma kã́áɔ̀ sɔ̃-xwíɖíi-dè-nyɔ̀ ɓěɔ̀ kè ɓóɖóɔ̀ gbɛ̌ɛ̀ ɖò-ɖò ɓěɔ̀ wuɖuí-kɔ̃̀-nyɔ̀ ɓěɔ̀ ɔ kè ɓóɖóɔ̀ cu-kpà ɓěɔ̀ gbo. Wa céè ma céè-ɖɛ̀ɔ̀ ɖé Kã́á Àhàzúwàɖàà nyɛ́nɛ́ɔ̀ mú, ké wa po ma ɓó ɔ sɔ̃-bɛ̃̀ɔ̀ dyììn ɖé ɔ jìǐn-po-ɖɛ̀ɔ̀ mú.

¹³ Ké wa ɖoɓo ma kíá, ké kíá ɓěɔ̀ kpaìn ma céè-ɖɛ̀ɔ̀ kã́áɔ̀ ɓóɖóɔ̀ gbɛ̌ɛ̀ séín ɓěɔ̀ múin. Céè-ɖɛ̀ɔ̀ wuɖu mɔ̀, ɓɛ́ wa ké Júù-nyɔ̀ séín ɓěɔ̀ gàa kè màa kè dyú mɛ́nɛ́ɛ́ ɖáɓá, ɓɛ́ wa ké waà kɔ̃̀ɔ̀-ɖɛ̀ ɓěɔ̀ dyí ɖú ɓó wé dyúáɖòɔ̀ xwíníín. Wéɔ̀ mɔ̀ dɛ̀nɛ̀ ɓaɖa-bùè sè sɔ̃́ nììnɔ̀ wé ɓaɖa-bùè sè tã nììnɔ̀ ɓaɖa. Dɛ̀nɛ̀ɔ̀ mɔ̀ Ádà-dɛ̀nɛ̀ɔ̀.

¹⁴ Wa ɓéɖé wa ké ma céè-ɖɛ̀ nìà kɛ gma mú nyu ɖé ɓóɖóɔ̀ gbɛ̌ɛ̀ ɖò-ɖò séín mú, ɓó wuɖu-dù kò-kò séín po-nyɔ̀ ɓě bìì, nìí, ɓɛ́ wa ké ti dyé ɓó wéɔ̀ jè.

¹⁵ Ké kíá ɓěɔ̀ ɓeìn ma gma ɓɛ́ kã́áɔ̀ tò ma kà kɛɛ dyi wàɖà ɖé Súsà-hwɔ̀ɖɔ̀ mɔ̀à dìɓà-hwɔ̀ɖɔ̀ɔ̀ kɛɛ mú kà kã́áɔ̀ nyuɛ ma kà wa gbo cɛ̃ɛ kɛ. Ké kíá ɓěɔ̀ kpa ma wuɖuɔ̀ ɖé ɓóɖóɔ̀ gbɛ̌ɛ̀ séín ɓěɔ̀ mú. Ɓó tia ɓaɖaa, kã́áɔ̀ kè Hémà kò ma dyi, ké wa zaìn hwìɖǐi, ké wa nì ma náá-ɖɛ̀ náuń, kɛɛ fũ̀à-fṹá vɛ̀nɛ̀ nì ma ɖé Súsà-hwɔ̀ɖɔ̀ɔ̀ mú.