Ɛsɔ́ɖɔ́ 2 - Ɓǎsɔ́ɔ̀ Báɓòɔ̀

Wa nyu Ɛsɔ́ɖɔ́ kã́áɔ̀ gmàà mú

¹ Ti ɓɛ́ Kã́á Àhàzúwàɖàà dyoɖo-hwòɖòɔ̀ ɖǎ ma wáɖáa, púɛɛ, ɔ ɖú ma ɖɛ Vásítà nyu ma kà kɛ kè gma ɔ ɖǎ ma kà po ɓá ɔ jè dyíɛɛ jè hwìɖǐi poìn kpàǐ ɖe.

² Hwɛ̀ ké kã́áɔ̀ gbo-nì-nyɔ̀ ɓěɔ̀ ɖíɛ́ ɓě cɛ̃ɛ ma ɔ gbo, ké wa ɖá, “Ɓɔ̌ɔ̀, m̀ mɛ wɔ̃́ ɓɛ́ wa ké màa-dyù gmɔ̀ nɔ̀mɔ̀ kɔ̃in ɓě ɓɛ́ wa se toɖo kɔ̃ jè dyuòɛɛ dyi mɔ́ ɓó m̀ bìì.

³ M̀ mɛ gã gàa ɓě ɖé nì ɓóɖóɔ̀ gbɛ̌ɛ̀ ɖò-ɖò séín mú, ɓɛ́ wa ké màa-dyù gmɔ̀ nɔ̀mɔ̀ kɔ̃in séín ɓěɔ̀ dyí poìn nɔ̄ nì gbǒɛ̀ wáká kɔ̃̀ mú nì màa ɓěɔ̀ cĩ́à kɛ, nɔ̄ dìɓà-hwɔ̀ɖɔ̀ mɔ̀à Súsà kɛɛ mú. Ké wa mɛ nyí wa Hégàì mɔ̀à nì màa ɓě gbo-gmɔ̀-nyɔ̀ɛɛ xwa, ɓɛ́ ɔ ké wa ɖɛ ɓě ɓá wa dyíin nɔ̀mɔ̀ìn jè dyíɛɛ nyí.

⁴ Ɔ ɖǎ ná nìǐn, nìí, ɓɛ́ màa-dyùɔ̀ nyɔ ɓɛ́ nì hwòɖǒ mu múin dèìn nyɛɛ ké nì gmàà jǔ ɓó Vásítà bɛ̃̌ǐn.” Wuɖu nìà kɛ dè ma kã́áɔ̀ hwìɖǐi, ké ɔ nyuɛ ma náa.

⁵ Ɓó tia ɓaɖaa, Júù-gàà ɖò kɔ̃̀ nyɛ́nɛ́ mɔ̀ Mɔ́ɖékáì kɛɛ nì ma ɓó. Ɔ sɔ̀ ɖé Bɛ̃́címàà xwéɖé-dùɔ̀ mú. Mɔ́ɖékáìɛ̀ ɓǎ ɓěɛ̀ gbǒ-xwíníínɔ̀ kɛà kɛ̀. Kísì wóɖóìn ma Símì, ké Símì wóɖóìn ma Jáwìɖì, ké Jáwìɖì wóɖóìn ma Mɔ́ɖékáì.

⁶ Gàa nìà kɛ nì ma Jɛ̀hódyàcĩ̀ìn mɔ̀ ma kà Júɖà-ɓòɖòɔ̀ kã́áɔ̀ kɛ kè toɛ̀-kpɔ̃-nyɔ̀ ɓě ɓɛ́ Kã́á Nɛ̀ɓùkànɛ́zà zà zɔ̃̌ɔ̀ kà ɖé Jùɖúsɛ̀ɖɛ̀ìn-hwɔ̀ɖɔ̀ nìà ɖé Júɖà-ɓòɖòɔ̀ kɔ̃ɛɛ mú, ɓɛ́ ɔ dyió zɔ̃̌ɔ̀ kà wa ɖé Báɓèɖɔ́ùn-ɓòɖòɔ̀ kɔ̃ kpaa hwìɛ̀.

⁷ Mɔ́ɖékáì gmɛ̀ìn ma ɔ ɖíí-gàà dyú-màà ɖò kɔ̃̀ nyɛ́nɛ́ mɔ̀ ma Hàdásà kɛ. Màa-dyùɔ̀ mɔ̀ ma xwíè-dyù. Ɔ ɖe kè ɔ ɓǎ se ma nì ɖe. Màa-dyùɔ̀ nyɛ́nɛ́ tɔ̀ɔ̀ mɔ̀ ma Ɛsɔ́ɖɔ́. Ɔ mɔ̀ ma dyíin-nɔ̀mɔ̀-màà ɖò cá, ké sɔ̀ìn ɓó ti ɔ ɖe kè ɔ ɓǎ ɖǎǒ mɛ́ɛ, Mɔ́ɖékáì kpɔ̃ ɔ kà nyɔ kpɔ̃à nyɔ mìɔùn nììn xwíníín-zà-dyùɛ.

⁸ Ti ɓɛ́ wa ɖǎ ma kã́áɔ̀ wuɖuɔ̀ dyi ɓeìn nyɛɛ, wa ɖú ma màa-dyù gmɔ̀ kúɖúú ɓě ɖé dìɓà-hwɔ̀ɖɔ̀ mɔ̀à Súsà kɛɛ mú kpa kpàǐ, ké wa nyí wa Hégàì xwa, ɓɛ́ ɔ ké wa gbo gmɔ̀. Wa kpa ma Ɛsɔ́ɖɔ́ ɖé kã́áɔ̀ gbǒɔ̀ dya ɖekè, ké wa nyí ma ɔ Hégàì mɔ̀ ma kà kã́áɔ̀ màa ɓěɔ̀ gbo-gmɔ̀-nyɔ̀ɔ̀ kɛɛ xwa.

⁹ Ti ɓɛ́ Hégàì dyéɛ ma kà Ɛsɔ́ɖɔ́ nɔ̀mɔ̀ ma dyíin mìɔ kɛɛ, ɔ hwòɖǒ dèìn ma ɔ múin. Wàɖà cá kɛɛ, Hégàì nyí ma Ɛsɔ́ɖɔ́ ɖɛ ɓě ɓá ɔ dyíin nɔ̀mɔ̀ìn jè dyíɛ, ké ɔ nyí ma ɔ ɖii-ɖɛ̀ kpa ɖɛ ɓě. Ké Hégàì po ma màa-dyù gmɔ̀ mɛ̀nɛ̌ìn-sɔ̃́ wáká, ɓɛ́ wa ké ma Ɛsɔ́ɖɔ́ gbo gmɔ̀. Wa mɔ̀ màa-dyù ɓě ɓɛ́ ɔ gã ma sɔ̀ìn ɖé kã́áɔ̀ gbǒɔ̀ dya kɛ. Ké ɔ jàɖàìn ma Ɛsɔ́ɖɔ́ kè ɔ gbo-nì-màà ɓěɔ̀, ké ɔ po wa ɖòùn pá kpa ɖɛ ɖò mú ɖé gbǒ kɔ̃̀ mú ɓɛ́ kã́áɔ̀ màa ɓěɔ̀ nì ma kà kɛɛ wáká ɖò mú.

¹⁰ Ɔ nì ná kɛɛ, Ɛsɔ́ɖɔ́ séè ɓóɖó kɔ̃̀ dyú ɔ jǔɛ mɔɔ ɔ gbǒ-xwíníín jè kɔ̃in zaìn ɖò, sepóɛɖé Mɔ́ɖékáì ɖá ɔ mɛ ɓɔ́ɔ náa nyuɛ.

¹¹ Wé séín nyɛɛ, Mɔ́ɖékáì té ma kɔ̃̀pã́ùnɔ̀ wĩin, dɛ̀ ɓɛ́ gbǒ kɔ̃̀ mú ɓɛ́ Ɛsɔ́ɖɔ́ nì ma kà kɛ, ɓɛ́ ɔ ké kà Ɛsɔ́ɖɔ́ nyu nìɛ̀ kɛ kè ɖɛ nì ɔ gbo kpáuń wɛ̃ɛ dyé.

¹² Hwɛ̀ ɓɛ́ màa-dyù gmɔ̀ ɖò nììn ti ké ɓó nyini, ɓɛ́ ɔ ké ɖé kã́áɔ̀ gbo pɛ̃́ɛ muɛɛ, wa ɓéɖé ɓɛ́ wa ké ɔ jè xwa nɔ̀mɔ̀ìn ɓó zɔ̃ gàná xwíníín. Wa ɓéɖé wa ké ɔ cáná nɔ̀mɔ̀ nyɔ́ún mɔ̀à mɛ́ɛ̀ kɛɛ fiè ɓó dɛ̀nɛ̀ mɛ̀nɛ̌ìn-ɖò xwíníín, ɓɛ́ wa ké ɔ nyɔ́ún-nɔ̀mɔ̀-cànà tɔ̀ɔ̀ ɓě fiè ɓó dɛ̀nɛ̀ mɛ̀nɛ̌ìn-ɖò tɔ̀ɔ̀ xwíníín.

¹³ Kà màa-dyùɔ̀ ké ɖé kã́áɔ̀ gbo muɛ nyuɛɛ, ɔ kɛà kɛ̀. Ɔ bɛ̃̀ìn ma kà ɔ hwòɖǒ mɔ́ bɛ̃̀ìn dyiɛ. Wa nyí ma ɔ bɛ̃̀ìn-ɖɛ̀ ɔ hwòɖǒ mɔ́ɛɛ sɔ̀ìn ɖé gbǒ kɔ̃̀ mú ɓɛ́ kã́áɔ̀ màa ɓěɔ̀ nì ma kà kɛ, ké ɔ bɛ̃̀ìn ma ɓó kã́áɔ̀ gbǒɔ̀ dya mu jè.

¹⁴ Hwìo dyi jǔǐn, ɔ mu ma ɖé kã́áɔ̀ gbǒɔ̀ dya. Ké gànà-kṹún ní, ɔ mu ɖé kã́áɔ̀ gbǒɔ̀ wáká tɔ̀ɔ̀ kɔ̃̀ mú ɓɛ́ Sáágà gmɔ̀ kã́áɔ̀ gmaɖe-nyɔ̀nɔ̀ ɓěɔ̀ jè gboɛ. Ɔ ɖǎ ná nìǐn, ɔ ní mu ɖé kã́áɔ̀ gbǒɔ̀ dya ɖe, ɔ sèìn ké kã́áɔ̀ hwòɖǒ dèìn ɔ múin, ké ɔ ɖoɓo dyɛ ɔ jè hwɛ̀.

¹⁵ Ti ɓɛ́ Ɛsɔ́ɖɔ́ ɓɛ́ Mɔ́ɖékáì gmɛ̀ìn ma kà kɛɛ nììn ti nyini ma ɓó, ɓɛ́ ɔ ké ma ɖé Kã́á Àhàzúwàɖà gbo muɛɛ, ɔ se ma bɛ̃̀ìn-ɖɛ̀ kà kò ɖò mɔ́, ɔ sèìn ɖɛ ɓɛ́ Hégàì ɖá nyɛ́nɛ́ kɛɛ ɖòùn. Ɛsɔ́ɖɔ́ mɔ̀ ma Áɓìháìɛ̀ dyú-màà. Nyɔ séín ɓě dyé ma Ɛsɔ́ɖɔ́ kɛɛ, waà hwòɖǒ dèìn ma ɔ múin.

¹⁶ Ké wa kpa ma Ɛsɔ́ɖɔ́ ɖé kã́áɔ̀ gbǒɔ̀ dya, ɖé kã́áɔ̀ ɓóɖó-wuɖuí-kɔ̃̀-zɔ̃̀ɔ̀ mɛ̀nɛ̌ìn-sɔ̃́ nììnɔ̀ dɛ̀nɛ̀ ɓaɖa-bùè nììn mɔ̀ Téɓè-dɛ̀nɛ̀ɔ̀ kɛɛ xwíníín.

¹⁷ Púɛɛ, kã́áɔ̀ hwòɖǒ dèìn ma Ɛsɔ́ɖɔ́ múin mìɔ ké ɔ zi màa-dyù gmɔ̀ tɔ̀ɔ̀ ɓěɔ̀ dyí. Ɔ hwòɖǒ ɖɛ̀ɓɛ̀ ma Ɛsɔ́ɖɔ́ mú mìɔ, ké ɔ hwòɖǒ wɔ̃́ìn ma Ɛsɔ́ɖɔ́ jè gbo ɖé màa-dyù gmɔ̀ tɔ̀ɔ̀ séín ɓěɔ̀ hwìɛ̀. Ɔ jèɛɛ, ɔ dèìn ma Ɛsɔ́ɖɔ́ kã́á-gbàǎɔ̀ dú, ké ɔ nyu ma ɔ kã́á-gmàà mú ɓó Vásítà bɛ̃̌ǐn.

¹⁸ Ké kã́áɔ̀ pa ma Ɛsɔ́ɖɔ́ bìì hwɔ vɛ̀nɛ̀ ɖò, ké ɔ ɖá ma ɓóɖóɔ̀ cu-kpà ɓěɔ̀ kè ɔ gɔ̌mànà-nyɔ̀ tɔ̀ɔ̀ ɓěɔ̀ hwɔɔ̀ kɔ̃. Ɔ po ma wuɖui ɖé ɔ ɓóɖóɔ̀ dà séín, ɓɛ́ wéɔ̀ ké hwèɖè-wè jǔ, ké ɔ geìn ma nyɔ ɓěɔ̀ jĩ́á-jè-ɖɛ̀ múin dyììn ɖé kà kã́á nyu nyɔ ɖɛ nyíɛ kɛɛ mú.

Mɔ́ɖékáì póìn kã́áɔ̀ fɛ̀ɛ̀

¹⁹ Ti kɔ̃̀ ɓaɖa wa poìn ma màa-dyù gmɔ̀ ɓěɔ̀ dyíɛɛ, kã́áɔ̀ ɖǎ ma Mɔ́ɖékáì ɔ gɔ̌mànà-nyɔ̀ ɓěɔ̀ ɖò mú nyu, ké ɔ kò ma ɓó kã́áɔ̀ gmɔ-wɔ̃̀ɔ̀ gbo dyi.

²⁰ Ɓó tia ɓaɖaa, Ɛsɔ́ɖɔ́ séè ma ɔ gbǒ-xwíníín jè mɔɔ ɓóɖó kɔ̃̀ dyú ɔ jǔɛɛ jè kɔ̃in zaìn ke, sepóɛɖé Mɔ́ɖékáì po ma ɔ náún kóɖó-kóɖó kà ɔ mɛ ɓɔ́ɔ náa nyuɛ kɛ. Ɛsɔ́ɖɔ́ nì ma Mɔ́ɖékáìɛ̀ ná-wùɖù dyi kpɔ̃uń ke kóɖó-kóɖó kà ɔ nyuɛ ma ti ɓɛ́ Mɔ́ɖékáì nì ma ɔ gmɛ̀ǐn nyɛ.

²¹ Ti ɓɛ́ Mɔ́ɖékáì nì ma kà kã́áɔ̀ gmɔ-wɔ̃̀ɔ̀ gboɛɛ, gàa sɔ̃́ ɓě kɔ̃̀ nyɛ́nɛ́ mɔ̀ Bífànà kè Téwɛ̀ɖɛ̀, ɓɛ́ wa mɔ̀ sójà ɓě mɔ̀ ma kã́áɔ̀ gbǒ-wɔ̃̀ɔ̀ dyí-gmɔ̀-nyɔ̀ ɓěɔ̀ ɖòɛɛ kpá ma dyoɖoún, ké wa sɔ́ ma Kã́á Àhàzúwàɖà, ɓɛ́ wa ké ma ɔ ɖáɓá.

²² Kɛɛ Mɔ́ɖékáì wɔ̃́ ma waà kã́áɔ̀ sɔ́-sɔ́ɔ̀ jè, ké ɔ cɛ̃ɛ ma Ɛsɔ́ɖɔ́ gbo, ké Ɛsɔ́ɖɔ́ mɔ̀ùn cɛ̃ɛ ma kã́áɔ̀ gbo. Ɔ cɛ̃ɛ ma kà Mɔ́ɖékáì mɔ̀ nyɔ dyà ɖɛ nìà kɛ píéɛ.

²³ Ti ɓɛ́ kã́áɔ̀ ɖe ma ɖɛ nìà kɛ múin, ké ɔ dyéɛ kà ɔ mɔ̀ jǎà kɛɛ, ɔ tò wuɖu ké wa beè ma gàa sɔ̃́ ɓěɔ̀. Ké wa céè ma ɖɛ séín ɓěɛ̀ ɖé ɓóɖóɔ̀ kpáá-ɖɛ̀-sùà-cèè-ɖɛ̀ɔ̀ mú ɓó kã́áɔ̀ dyéɖé waí.