Ìfísĩ̀ɔ̀ 4 - Ɓǎsɔ́ɔ̀ Báɓòɔ̀

À mɔ̀ nyɔ dyúáɖò ɖé Kɛ́ɖɛ́ì mú

¹ Ɔ jèɛɛ, mɔ̄ nìà kpɔɖɔ ɖeín ɓó Bounɓoɔ̀ jèɛɛ, ḿ ɓaà ɓě ní. Kà ɓɛ́ Gèɖèpɔ́ɔ̀ ɖǎ ɓě ɖáa, ɓě mɛ cĩ́, ɓɛ́ ɓě ké ɖɛ nɔ̀mɔ̀ dyíin kɔ̃̀ jè ɔ ɖáà ɓěɛɛ nyu.

² Ɓě mɛ dyà ɓě mìɔùn ɓíɖíi. Ɓě mɛ ɓéɖé hwòɖǒ ɓɛ̀ɖɛ̀ɛ̀-ɓɛ̀ɖɛ̀ɛ̀. Ɓě mɛ ku hwòɖǒ. Ɓě mɛ kùìn ɓě mǔè ɖòɛ̀ kpeɖe hwòɖǒ ɖé ɖɛ̀ɓɛ̀ǐn-ɖɛ̀ɓɛ̀ǐn mú.

³ Gbo-kpɔ̃ìn-kpɔ̃ìn ɓɛ́ Zùùɔ̀ nyu ké nyɔ ɓéɖéà kɛɛ, ɓě mɛ vɔ̃ ɓɛ́ ɓě kéɛ dyi kpɔ̃ ɖé gìɖìǐ ɓɛ́ ɔ kpɔ̃àìn ɓě gboɛɛ mú.

⁴ Kpóɖó-dyùà dyúáɖò kè Zùù dyúáɖò mɔ̀ nyɔ nì nyɛ̀nɛ̀ɛ̀, kà ɓɛ́ hwòɖǒ-kɔ̃-dè-ɖɛ̀ kɔ̃̀ jè ɓɛ́ Gèɖèpɔ́ɔ̀ ɖǎà ɓě ɖáa nìà dyúáɖò kɛ.

⁵ Bounɓoɔ̀ nì dyúáɖò. Hwìɖǐǐ-taɓa-taɓaɔ̀ dú nì dyúáɖò. Níɔ-kpá-kpáɔ̀ nì dyúáɖò.

⁶ Gèɖèpɔ́ɔ̀ nì dyúáɖò, ké ɔ mɔ̀ nyɔ séínɛ̀ Ɓǎ. Ɔ nì nyɔ séín kɔ̃in, ké ɔ nì nyɔ séín kũ̀à mú nyùɛ̌n, ké ɔ nì nyɔ séín mú.

⁷ Gèɖèpɔ́ɔ̀ nyí à jĩ́á-jè-ɖɛ̀ ɖò-ɖò, kà ɓɛ́ Kɛ́ɖɛ́ì ɖàɓàìn ɖɛ, ké ɔ nyíà nyɔ kɛ.

⁸ Ɔ jèɛɛ, Gèɖèpɔ́ɔ̀-cèè-ɖɛ̀ɔ̀ ɖá, “Ti ɓɛ́ ɔ mu ma ɖéé ɖé dyiíɛɛ, ɔ kpa ma nyɔ kúɖúú ɓě ɓɛ́ ɔ kpɔ̃ ma ɖé toɔ̀ gboɛ, ké ɔ nyí ma nyɔǔn nyíí-ɖɛ̀ ɓě.”

⁹ Ti ɔ cɛ̃ɛ ma, ké ɔ dyi ma kà níiń, ɔ mu ma dyiíɛɛ, ɖɛ́ mɔ̀ ɔ xwíníín nyɛ́? Ɔ xwíníín mɔ̀, ɔ dyi ma ɓíɖíi, ké ɔ mu ma ɖé ɓóɖó-kpàà wáká ɓě nìà ɖé hwuɖuɛɛ kɔ̃ kĩ́ín.

¹⁰ Nyɔ dyi ma kà ɓíɖíiɛɛ mɔ̀ nyɔ dyúáɖòɔ̀ mu ma kà dyiíɛ̀. Ké ɔ mɔ̀ nyɔ mu ma kà ɖéé ɖé dyɔɔ̀ séín ɓěɔ̀ kɔ̃in nyɛ̀, ɓɛ́ ɔ ké ɖɛ séín múin dyíìn.

¹¹ Ké ɔ nyíí-ɖɛ̀ ɓě ɓɛ́ ɔ nyí nyɔǔn wɛ̃ɛ, wa mɔ̀, ɓɛ́ ɖíɛ́ ɓě ké àpɔ́sò jǔ, ɓɛ́ ɖíɛ́ ɓě ké kpáá-ɖɛ̀-cɛ̃-nyɔ̀ jǔ, ɓɛ́ ɖíɛ́ ɓě ké bɔ̃̌ nɔ̀mɔ̀ dyíin kpa-nyɔ̀ jǔ, ɔ kè ɓɛ́ ɖíɛ́ ɓě ké pásɔ̀ɖɔ̀ kè nyɔ-ɖɛ-tɛ̀mɛ̀ìn-nyɔ̀ jǔ.

¹² Ɔ nyu ɖɛ ɓěa, ɓɛ́ ɔ kéɛ nyu ɓɛ́ ɔ nyɔ ɓěɔ̀ ké kpé ɓɛ́ìn, ɓɛ́ wa ké ɔ kũ̀à nyu, ɓɛ́ Kɛ́ɖɛ́ì kpóɖó-dyùàɔ̀ ké dyi ku.

¹³ Ké kǎà à séín mu kǎa gbo kpɔ̃ìn nyuùn. Ké à hwìɖǐǐ-taɓa-taɓa kè à Gèɖèpɔ́ɔ̀ Dyú-gààɔ̀ dyí-dyuò-dyuò mu dyúáɖò nììn. Ké wa dyi à kè Kɛ́ɖɛ́ì gbo ɖaɓaìn, ké wa dyi à gbɔ-hwɛ̀-hwɛ̀ɔ̀ kè Kɛ́ɖɛ́ì nììn gbɔ-hwɛ̀-hwɛ̀ɔ̀ gboi kpaìn ní, nìí, à mu ɖɛ hwɛ̀ìn.

¹⁴ Nìí, à se dyú-gbɔ́ɔ́ ɓě jǔɛ mu ɖe. À se ɖɛ ɓɛ́ nyɔ-cá-nyɔ̀ ɓěɔ̀ tɛ̀mɛ̀ìn nyɔǔn wɛ̃ɛ kíɖíí síɛ mu kà dyóó-kpɛ̀ kè pìɔ̌ kpaà ɖɛ ɖò kɛ. Nyɔ-cá-nyɔ̀ ɓěɔ̀ kpàìn nyɔǔn ɖɛ ɓě se jǎà kɛɛ gbo dyììn ɖé waà nyɔǔn-cáìn-ɖɛ̀ ɓěɔ̀ mú.

¹⁵ Kɛɛ à mɛ cɛ̃ jǎà ɖé ɖɛ̀ɓɛ̀ǐn-ɖɛ̀ɓɛ̀ǐn mú. Ké kǎà à mu kà kuɛ nyuùn ɖé ɖɛ séín mú, ɓɛ́ à kè Kɛ́ɖɛ́ì ɓɛ́ ɔ mɔ̀à kpóɖó-dyùàɔ̀ dúɔ̀ kɛɛ ké nyɔ dyúáɖò jǔ gàná.

¹⁶ Kpóɖó-dyùàɔ̀ wáká séín ɓěɔ̀ poìn gbo, ké wa nì ɔ xwíɖíi. Kpá-dyí-deìn-naín séín ɓě nì kpóɖó-dyùàɔ̀ múɛɛ mɔ̀ nyɔ nyuɛ ké kpóɖó-dyùà gànáɔ̀ nì. Ɔ jèɛɛ, kpóɖó-dyùàɔ̀ wáká séín ɓěɔ̀ dyi ɖɛ wa ɓéɖé wa kéɔ́ nyuɛɛ nyuín, nìí, kpóɖó-dyùà gànáɔ̀ ɓúá dyí, ké ɔ kùìn ɔ mìɔùn dyi ɖé ɖɛ̀ɓɛ̀ǐn-ɖɛ̀ɓɛ̀ǐn mú.

Fɛ̀ɛ̀ ɖìè ɖé Kɛ́ɖɛ́ì mú

¹⁷ Ɖé Bounɓoɔ̀ nyɛ́nɛ́ɔ̀ múɛɛ, ḿ nɛ́ìn ɖɛ nìà kɛ jìì kɔ̃, ké ḿ cɛ̃ɛ. Ɔ mɔ̀, ɓěǐn ɖá ɓɛ́ ɓě ké cĩ́ ɖe kà nyɔ ɓě seà Gèɖèpɔ́ɔ̀ dyí dyuòɛɛ cĩ́à kɛ. Waà hwìɖǐi-poìn-ɖɛ̀ ɓěɔ̀ mɔ̀ ɖɛ fóɖóún.

¹⁸ Waà fɔ̀nɔ̀-hwòɖǒ ɓěɔ̀ kpè kɔ̃in. Fɛ̀ɛ̀ ɓɛ́ Gèɖèpɔ́ɔ̀ nyíà nyɔǔn wɛ̃ɛ, wa se ɖò kɔ̃̀, sepóɛɖé wa séè ɖɛ cɛ̃́ ɖò, ké wa dú kùmù ní.

¹⁹ Dɛ̃ se wa nyu ɖe, ké wa zàìn wa mìɔùn kpeɖe-gbà-nyu-nyu xwáɖáún, ké cɛ-cɛ nyu wa, ɓɛ́ wa ké ɖɛ gbà nyìnììn kɔ̃in séín ɓě nyu.

²⁰ Ɓě se ma kǎa ná Kɛ́ɖɛ́ì jè cɛ̃́.

²¹ Ḿ dyuò ɓě wɔ̃́ ma ɔ jè, ké kà ɓě nìà ɔ múɛɛ, wa tɛ̀mɛ̀ìn ma ɓě jǎà ɓě nì ɖé Jízɛ̀ múɛ.

²² Ɔ jèɛɛ, ɓě táà nyɔ ɓě jǔ ma kà kĩ́ín nyɛɛ jè dyi. Ɔ mɔ̀ nyɔ nyuɛ ké ɓě nyu cĩ́-cĩ́ ɓě nyu ma kà kĩ́ín nyɛ, ké nyɔ-cáìn-ɖɛ̀ ɓě kɔ̃̀ tó nyu ma kà ɓěɛɛ nyuɛ ké ɓě nì ma dyíin nyìnìɛ̌n.

²³ Ɓěɛ̀ hwòɖǒ-dyùàɔ̀ kè ɓěɛ̀ hwìɖǐi-poìn-poìn mɛ mɔ̀ ɖɛ ɖìè.

²⁴ Ɓě mɛ kpɔ̃ nyɔ ɖìè ɓɛ́ ɓě ɖǎà jǔ, ɓɛ́ Gèɖèpɔ́ɔ̀ nyu ma ké ɓě nìà kà ɔ mìɔùn nìà kɛɛ gboi. Nyɔ ɖìè jǔ-jǔɔ̀ dyí-dyuò-dyuò mɔ̀, ɔ nyu dyí-sɛ́ɖɛ́ìn-ɖɛ̀, ké ɔ se kɛɛ ɖò ɓéɖé. Ɖɛ nìà kɛ mɔ̀ jǎà cĩ́-cĩ́ɔ̀.

²⁵ Ɔ jèɛɛ, ɓě táà se-tɔ́mɔ́-tɔ́mɔ́ dyi. Ɓě mɛ cɛ̃ìn cɛ̃̀ìn jǎà gbo, sepóɛɖé à séín mɔ̀ kpóɖó-dyùà dyúáɖòɛ̀ wáká ɓě.

²⁶ Ɓě dyi dyoɖoún kpáín, ɓě mɛ ma mú, ɓěǐn kɔ̃̀ ɖà nàmàǔn nyu. Ɔ ní ɖá ɓɛ́ ɔ ké ɓě mú dyi gã̀, ɓɛ́ dyóɖó ké zi.

²⁷ Ɓěǐn ɖá ɓɛ́ ɓě ké Nɔɔ́-nàmàǔn pá nyí.

²⁸ Nyɔ ɓɛ́ ɔ dyíɖí ma kĩ́ín nyɛɛ, ɔ ní ɖá ɔ ké dyíɖí ɖe. Ɔ mɛ ɖú kũ̀à nɔ̀mɔ̀ dyíin nyu kpàǐ, ɓɛ́ ɔ ké ɖɛ ɖò ɓéɖé, ɓɛ́ ɔ ké nyɔ ɓě kɔ̃̀ ɓɛ́ wa ké ɖò dyéɛɛ gbo kpá.

²⁹ Ɓě dyi wùɖùɛ̌n nìǐn, ɓěǐn ɖá ɓě ké ɖɛ gbà ɖò cɛ̃. Kɛɛ ɓě mɛ cɛ̃ nɔ̀mɔ̀ dyíin ɓó ti ɓě ɓéɖé ɓě kéɔ́ ɔ cɛ̃̀ìn nyɛ, ɓɛ́ ɔ ké nyɔǔn gbo kpá, ɓɛ́ ɖɛ ɓě muà cɛ̃ìn nyɛɛ ké mana-ɖɛ̀ jǔ ɖé nyɔ ɓě muà wa wɔ̃́ùn wɛ̃ɛ gbo.

³⁰ Ɓěǐn ɖá ɓɛ́ ɓě ké Gèɖèpɔ́ɔ̀ Zùù Hwɛ̀ǐn-hwɛ̀ǐnɔ̀ hwòɖǒ ɖé ɖei po. Zùùɔ̀ mɔ̀ dyí-dyuòìn-bɛ̃̀ ɓɛ́ Gèɖèpɔ́ɔ̀ ɖǎ ɓě kɔ̃ po hwɛ̀ ɓɛ́ nyɔǔn-gbǎà-wèɔ̀ ké dyiɛ.

³¹ Ɓěɛ̀ hwòɖǒ-dyùà ɓěɔ̀ mɛ ɓɔ́ nɛɛ̀ ɖe. Cɛ̃́ mɛ ɓɔ́ ɓě dyáa. Ɓě táà dyoɖo dyi. Dyoɖo mɛ ɓɔ́ɔ nyuɛ, ɓɛ́ ɓě ké mú páná. Ɓěǐn ɖá ɓě ké wuɖu gbà ɖò po. Ɓěǐn ɖá ɓɛ́ ɓě ké hwòɖǒ kɔ̃in nyìnììn ɖe.

³² Kɛɛ ɓě mɛ nɔ̀mɔ̀ kpeɖeín ɓó nyɔ tɔ̀ɔ̀ ɓě gbo. Ɓě mɛ ɓéɖé wìì-hwòɖò-dyùà. Ɓě mɛ zĩ̀ìn nyɔ tɔ̀ɔ̀ ɓěɛ̀ nyuu-ɖɛ̀ kɔ̃in, kà ɓě mɔ̀ nyɔ nìà ɖé Kɛ́ɖɛ́ì múɛɛ, Gèɖèpɔ́ɔ̀ ɖǎ ɓě nììn nyuu-ɖɛ̀ kɔ̃in zĩ̀ìn nyɛ.