Ìfísĩ̀ɔ̀ 2 - Ɓǎsɔ́ɔ̀ Báɓòɔ̀

À sɔ̀ gĩɔ mú ké à mu fɛ̀ɛ̀ mú

¹ Ɖé ti kĩ́ín-kĩ́ín múɛɛ, ɓě se ma fɛ̀ɛ̀ ɓéɖé ɓó ɓěɛ̀ ɖɛ gbà ɓěɔ̀ kè ɓěɛ̀ nàmàǔn ɓěɔ̀ jè.

² Ɓó tia ɓaɖaa, ɓě kpa ma ɓóɖó-kpàà kpeɖe-gbà-nyu-hwìèɔ̀. Ɓě nyu ma zùù gbà ɓě nìà à ɖeiɛɛ wuɖuí-kɔ̃̀-nyɔ̀ɔ̀ mɔ́ɔ́-ɖɛ̀. Ɔ mɔ̀ zùù gbà ɓɛ́ ɔ nyuà kũ̀à ɖé nyɔ ɓě seà Gèɖèpɔ́ɔ̀ wuɖu nyuɛɛ múɛ̀.

³ À mɔ̀ùn mɔ̀ ma wa ɖò ɖekè. À cĩ́, ké à nyu à mìɔùn nììn mɔ́ɔ́-ɖɛ̀. À nyu ma ɖɛ ɓě kɔ̃̀ tó nyu ma kà à kɛ. À nì ma kà nyɔ tɔ̀ɔ̀ séín ɓě ɓɛ́ Gèɖèpɔ́ɔ̀ dyoɖoɔ̀ muà kɔ̃ dyiìn nyɛɛ nìà kɛ.

⁴ Kɛɛ Gèɖèpɔ́ɔ̀ wììɔ̀ zi dyí ɓúáuń mìɔ, ké ɖɛ̀ɓɛ̀ǐn-ɖɛ̀ɓɛ̀ǐn ɓɛ́ ɔ ɓéɖé à bììɛɛ zi dyí vòɛ̌n jèɛɛ,

⁵ ti ɓɛ́ à se ma fɛ̀ɛ̀ ɖò ɓéɖé ɖé à ɖɛ gbà ɓěɔ̀ múɛɛ, ɔ zà ma à kè Kɛ́ɖɛ́ì gĩɔ. Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ mɔ̀ nyɔ nyuà ké ɓě póà kɛ̀.

⁶ Ɔ sɔ̀ìn ma à kè Kɛ́ɖɛ́ì Jízɛ̀ dyí, ké ɔ ɖǎa nyu ké à kè ɔ ɖǎ wuɖuí-kɔ̃̀-nyɔ̀ jǔ ɖé dyɔún-pà ɓěɔ̀ mú.

⁷ Ɔ nyu ma ɖɛa, ɓɛ́ ɔ kéɛ nyɔǔn dyí tɛ̀mɛ̀ìn ɖé ti ɓě muà dyiìn nyɛɛ mú, kà ɓɛ́ ɔ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ zi kpé wɔ̃ ɓúáuń mìɔ, ké ɔ se kɔ̃in zaìn ɓɛ́ìn nyɛ, dyììn ɖé ɔ hwòɖǒ-kɔ̃in-nɔ̀mɔ̀-nɔ̀mɔ̀ ɓɛ́ ɔ ɓéɖéà à bìì ɖé Kɛ́ɖɛ́ì Jízɛ̀ múɛɛ mú.

⁸ Sepóɛɖé Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ nyuà ké ɓě póà dyììn ɖé hwìɖǐǐ-taɓa-taɓa múɛ̀. Ɔ se ɓě mìɔùn nììn nyuu-ɖɛ̀, kɛɛ ɔ mɔ̀ Gèɖèpɔ́ɔ̀ jĩ́á-jè-ɖɛ̀.

⁹ Ɔ se kũ̀à ɓě ɖǎ nyuɛɛ pɛ́ɛ̀-ɖɛ̀, ɓɛ́ nyɔ ɖò ní kɔ̃̀ ɖà ɓɔ́ɖɔ́.

¹⁰ À mɔ̀ Gèɖèpɔ́ɔ̀ sɔ̃ɔ̀ mɛɛ-ɖɛ̀ ɓě. Ɔ mɛ à ɖé Kɛ́ɖɛ́ì Jízɛ̀ mú, ɓɛ́ à ké kũ̀à nɔ̀mɔ̀ dyíin nyu tee. Gèɖèpɔ́ɔ̀ dyéìn ma kũ̀à ɓěɔ̀ ti hwɛ̀ ké ɓóɖó-kpàà dè ma gbɔ, ɓɛ́ à ké cĩ́, ɓɛ́ à ké wa nyu.

À mɔ̀ nyɔ dyúáɖò ɖé Kɛ́ɖɛ́ì mú

¹¹ Ɓě mɔ̀ ɓóɖó-dù kà kò ɖò ɓěɛ̀ nyɔ ɓěɛɛ, Júù-nyɔ̀ ɓěɔ̀ ɖáìn ɓě nyɔ ɓě se sàà mɛ́ɛ. Ɖɛ nìà kɛ mɔ̀ ɖɛ ɓě ɓɛ́ nyɔǔn nyùìn ku kɔ̃in nyɛɛ bìì ɖòùn pū. Ɓě mɔ̀ ɓóɖó-dù kà kò ɖò ɓěɛ̀ nyɔ ɓěɛɛ, kà ɓě nyu ma nìɛ̀ kĩ́ín nyɛɛ, ɔ mɛ nì ɓě hwìɖǐi.

¹² Ɓó tia ɓaɖaa, ɓě kè Kɛ́ɖɛ́ì se ma nyɔ dyúáɖò. Ɓě se ma Éézùɖùɛ̀-nyɔ̀ ɓěɔ̀ ɖò. Ɓě mɔ̀ ma ɖíà. Ɓě se ma dèè-wùɖù ɓě ɓɛ́ Gèɖèpɔ́ɔ̀ nyɛ́nɛ́ín-ɖáìn-ɖɛ̀ ɓěɔ̀ nì ma kà múɛɛ gbo kpé ɖò ɓéɖé. Ɓě cĩ́ ma dà ɓóɖó-kpàà kɔ̃, ké ɓě se ma ɖɛ ɓě ké ma hwòɖǒ kɔ̃ dèɛɛ ɖò ɓéɖé. Ɓě se ma Gèɖèpɔ́ɔ̀ dyí dyuò.

¹³ Kɛɛ kàǔn wɛ̃ɛ, kà ɓě nìà ɖé Kɛ́ɖɛ́ì Jízɛ̀ múɛɛ, ɓě mɔ̀ nyɔ tɔmɔìn ma kà Kɛ́ɖɛ́ì bũ̌in nyɛɛ, ɔ nyɔmɔɔ̀ ɖǎa nyu ké ɓě ɖǎ dyi xwɛ̃́ìn,

¹⁴ sepóɛɖé Kɛ́ɖɛ́ì mìɔùn dyà à gìɖìǐ. Ɔ ɖǎa nyu ké Júù-nyɔ̀ ɓěɔ̀ kè ɓóɖó-dù kà kò ɖò ɓěɛ̀ nyɔ ɓěɔ̀ mɔ̀ǎ nyɔ dyúáɖò. Ɔ mìɔùn nììn kpóɖó-dyùàɔ̀ nyuɛ ké mú-nyɛ́ìn-nyɛ́ìn ɓɛ́ ɔ nì ma kà gmɔ nìà kɛɛ, ɓɛ́ ɔ nyuɛ ké wa zaìn ma kà gboɛɛ nyìnììn ma dyíin.

¹⁵ Ɔ ɖǎ gma ɓɛ́ ɔ cɛ̃ ɖɛ ɓě ɓɛ́ nyɔǔn ké dyi kpɔ̃ɛɛ jè dyi zĩ̀ìn, ɓɛ́ sɔ̀ìn nyɔ-dù sɔ̃́ ɓěɛ̀ múɛɛ, ɔ ké wa nyɔ-dù dyúáɖò mú nyu ɖé ɔ mìɔùn mú. Kà ɔ mu kǎà gìɖìǐ nyuùn.

¹⁶ Dyììn ɖé Kɛ́ɖɛ́ì kɔ́ɖɔ́sìɔ̀ kɔ̃ mɛ́ìn-mɛ́ìn múɛɛ, ɔ zĩ̀ìn ma mú-nyɛ́ìn-nyɛ́ìnɔ̀ dyi. Dyììn ɖé kɔ́ɖɔ́sìɔ̀ múɛɛ, ɔ nyuɛ ké nyɔ-dù sɔ̃́ ɓěɔ̀ mɔ̀ ma nyɔ dyúáɖò, ké ɔ zà ma bĩ̀ǎ ɓɛ́ ɔ nì ma kà wa kè Gèɖèpɔ́ɔ̀ pṹa kɛ.

¹⁷ Ké Kɛ́ɖɛ́ì dyi ma, ké ɔ cɛ̃ ma bɔ̃̌ nɔ̀mɔ̀ dyíin ɓá gìɖìǐ jè dyíɛɛ ɓě mɔ̀ nyɔ ɓě tɔ̀mɔ̀ ma gboɛ kè nyɔ ɓě xwɛ̃́ìn ma dyiɛɛ gbo.

¹⁸ Ɖé Kɛ́ɖɛ́ì múɛɛ, ɓěà nyɔ-dù sɔ̃́ɔ̀ ɖǎ kpé ɓɛ́ìn ɓɛ́ ɓěà ké ɖé Ɓǎɔ̀ dyúa dyi ɖé Zùù dyúáɖòɔ̀ mú.

¹⁹ Ɔ jèɛɛ, ɓě se ɖíà ɖò ɖé ɓóɖó kà kò ɖò kɔ̃ ɖe. Ɓě mɔ̀ Gèɖèpɔ́ɔ̀-nyɔ̀ ɓěɔ̀ mǔè ɓóɖó-dyù ɓě. Ɓě mɔ̀ Gèɖèpɔ́ɔ̀ nyɔ ɓěɔ̀ ɖò.

²⁰ Ɔ nì kà ɓɛ́ wa ɖǎà ɓě hìɖì-kpà ɓɛ́ àpɔ́sò ɓěɔ̀ kè kpáá-ɖɛ̀-cɛ̃-nyɔ̀ ɓěɔ̀ ɖǎ ma kà dèɛɛ kɔ̃ poɛ. Kɛ́ɖɛ́ì Jízɛ̀ mìɔùn mɔ̀ gbǒɔ̀ gãún-sɔ̀ɔ̌-kpò.

²¹ Ɔ mɔ̀ nyɔ deàìn à dyíɛ̀. Ké ɔ nìɛ̀ nyuɛń ɓɛ́ gbǒɔ̀ po-poɔ̀ ké dyi ku, ɓɛ́ ɔ ké gbǒ hwɛ̀ǐn-hwɛ̀ǐn jǔ ɖé Bounɓoɔ̀ mú.

²² Kà ɓě nìà ɔ múɛɛ, ɔ nì kà wa nì ɓě kè nyɔ tɔ̀ɔ̀ ɓěɔ̀ poɛń, ɓɛ́ ɓě kéɔ́ kà gbǒ ɓɛ́ Gèɖèpɔ́ɔ̀ cĩ́ mú dyììn ɖé ɔ Zùùɔ̀ múɛɛ jǔɛ.