Dìtɔ̀wáɖánámɛ̀ 9 - Ɓǎsɔ́ɔ̀ Báɓòɔ̀

Nyɔ ɓěɔ̀ jaɖa wuɖuún

¹ “Ɓě tò ɖùǔo Éézùɖùɛ̀-nyɔ̀ ɓě. Ɓě nì Jɔ́nì-nìɔ̀ péɖéɛń dyiɛń, ɓɛ́ ɓě ké ɓóɖó-dù vɛ̀nɛ̀ ɓě kɔ̃̀ kpé ɓúá dyí ɓɛ́ ɔ zi ɓě dyíɛɛ dyí ɖú. Ɓóɖó-dù ɓěɔ̀ ɓéɖé toún-pèɖèìn-hwɔ̀ɖɔ̀ vɛ̀nɛ̀-vɛ̀nɛ̀ ɓě, ké gmɔ ɓě nì hwɔɖɔ ɓěɔ̀ ɖeiɛɛ nyini ɖé dyɔún.

² Ɓóɖó-dù ɓěɔ̀ nyɔ ɓěɔ̀ mɔ̀ gàa-zà-nyɔ̀ ɓě ké wa tɔ̀mɔ̀ dya. Wa mɔ̀ Ánàkì-nyɔ̀ ɓě. Ɓě dyuò wa jè, ké ɓě ɖǎa wɔ̃́ kà ɓɛ́ nyɔ ɖò se wa dyúa dyi nyànàà ɓɛ́ìn nyɛ.

³ Kɛɛ ɓó kàǔn wɛ̃ɛ, ɓě muɛ dyéìn kà ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ mu ɓě dyúa nììn kà nyɛ-tò nìà kɛ. Ɓě dyi muɛń nìǐn, ɔ mu nyɔ ɓěɔ̀ toún ɖuùn, ɓɛ́ ɓě ké wa ɓóɖóɔ̀ kɔ̃in kúmú, ɓɛ́ ɓě ké wa mú gbɔɔ̀ wàɖà kà ɔ ɖǎà ɓě nyɛ́nɛ́ín ɖáìn nyuɛ.

⁴ “Ti ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ ɖǎ nyɔ ɓěɔ̀ ɓó ɓě dyúa dyi kúmúɛ hwɔɛɛ, ɓě ní cɛ̃ɛ, ɓɛ́ ɓě ké níiń, ‘Ɔ mɔ̀ à dyí sɛ́ɖɛ́ìn jè, Bounɓoɔ̀ dyàà à nɔ̄ ɓóɖóɛ̀ kɔ̃, ɓɛ́ ɔ kéà à kɔ̃̀ɔ̀-ɖɛ̀ jǔɛ̀.’ Gbào, ɔ se ná nìo. Bounɓoɔ̀ mu nyɔ ɓěɔ̀ ɓó ɓě dyúa dyi kúmúùn ɓó wa mìɔùn nììn hwòɖǒ-kɔ̃in-nyìnììn-kpèɖè ɓěɔ̀ jè.

⁵ Ɔ se ɓěɛ̀ dyí sɛ́ɖɛ́ìn jè, mɔɔ ɓěɛ̀ mú hwɛ̀ jè, ɓɛ́ ɓě kéà muɛń nì, ɓɛ́ ɓě kéà waà ɓóɖó ɓěɔ̀ dyí ɖú, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛ̀. Kɛɛ Bounɓo mɔ̀à ɓěɛ̀ Gèɖèpɔ́ɔ̀ kɛɛ nì ɓóɖó-dù ɓěɔ̀ ɓó ɓě dyúa dyi kúmúɛń ɓó waà hwòɖǒ-kɔ̃in-nyìnììn-kpèɖè ɓěɔ̀ kè ɖɛ ɔ ɖáìnǒ zɔ̃̌ɔ̀ kà ɓě ɓǎ nììn ɓǎ ɓě mɔ̀à Ééɓòɖòhɛ̃́ɛ̀ kè Áázè ɔ kè Jékɔ̀ nyɛ́nɛ́ín nyɛɛ nyu jè.

⁶ Ɓě mɛ dyuòɛ̀ dyí kà ɓɛ́ ɔ se ɓěɛ̀ dyí sɛ́ɖɛ́ìn jè, ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ kéà ɓě bãa-ɓòɖò nìà kɛ nyíɛń nì, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛ̀, sepóɛɖé ɓě mɔ̀ dú-kùmù-nyɔ̀ ɓě.

⁷ “Ɔ mɛ ɓɔ́ ɓě hwìɖǐi sɔ̀ɔ̀ kà ɓɛ́ ɓě po ma Bounɓo mɔ̀à ɓěɛ̀ Gèɖèpɔ́ɔ̀ kɛɛ dyoɖoún ɖé gbǎùn-fúɖúáɔ̀ kɔ̃ɛ. Wé kɔ̃̀ ɓaɖa ɓě sɔ̀ǒ zɔ̃̌ɔ̀ ɖé Íjè-ɓòɖòɔ̀ kɔ̃, ɓɛ́ ɓě kéà dà pá nìà kɛ mú nyiniɛɛ, ɓě po ma Bounɓoɔ̀ wuɖuɔ̀ kɛ́ɛ́ dyí.

⁸ Ɖé Hówèɖè-tòɖòɔ̀ gboɛɛ, ɓě po ma Bounɓo mɔ̀à ɓěɛ̀ Gèɖèpɔ́ɔ̀ kɛɛ dyoɖoún, ké ɔ kpáìn ma ɓě dyoɖoún mìɔ jèɛɛ, ɔ mɔ́ ɓɛ́ ɔ ké ma ɓě mú gbɔɔ̀.

⁹ Ɔ kpá ma ná ti ɓɛ́ ḿ muà ɖé toɖoɔ̀ dya, ɓɛ́ ḿ kéà sɔ́ɔ́-pĩ̀à ɓě kɔ̃̀ kɔ̃ ɓɛ́ dèè-wùɖù nìà ɓó ɓě kè Bounɓoɔ̀ pṹa kɛɛ céèà kɛɛ dyi kpɔ̃ɛ. Ḿ nyu ma ɖé toɖoɔ̀ dya dyóɖóaún-wè kpáɖá-nyɔ sɔ̃́ kè máaún-hwùɖù kpáɖá-nyɔ sɔ̃́. Ké ḿ se ma ɖii-ɖɛ̀ ɖò ɖi, mɔɔ ké ḿ se ma ní ɖò ná.

¹⁰ Ké Bounɓoɔ̀ nyí ma ḿ sɔ́ɔ́-pĩ̀à sɔ̃́ ɓě kɔ̃̀ kɔ̃ ɓɛ́ ɔ mìɔùn nììn jìì-dyùà céèà kɛ. Wuɖu séín ɓɛ́ Bounɓoɔ̀ cɛ̃ ma kà ɓě gbo sɔ̀ìn ɖé nyɛɔ̀ mú ti ɓɛ́ ɓě poìn ma kà ɓó toɖoɔ̀ xwíɖíi dyíɛɛ mɔ̀ wuɖu nìɛ̀ ma kɔ̃.

¹¹ Ɖé dyóɖóaún-wè kpáɖá-nyɔ sɔ̃́ɔ̀ kè máaún-hwùɖù kpáɖá-nyɔ sɔ̃́ɔ̀ mánáín nyɛɛ, Bounɓoɔ̀ nyí ma ḿ sɔ́ɔ́-pĩ̀à sɔ̃́ ɓě kɔ̃̀ kɔ̃ ɓɛ́ dèè-wùɖùɔ̀ nìà kɛ.

¹² “Hwɛ̀ ké Bounɓoɔ̀ cɛ̃ɛ ma ḿ gbo, ké ɔ ɖá, ‘Mu ɖé toɖoɔ̀ ɓíɖíi wàɖà, sepóɛɖé nì nyɔ ɓě ɓɛ́ m̀ zà ma kà ɖé Íjè-ɓòɖòɔ̀ kɔ̃ɛɛ ɖǎ wa mìɔùn dyíin nyìnììn. Ɔ se hwèɖèìn ké wa ɖǎ ɖɛ ɓě ḿ pòìn ma wa náún wɛ̃ɛ kɔ̃ín pòìn. Wa ɖǎ wa mìɔùn bìì kũùn-kpò ɖò mɛ.

¹³ Ḿ ɖǎ nyɔ ɓěɔ̀ dyé kà wa mɔ̀ dú-kùmù-nyɔ̀ ɓě kɛ.

¹⁴ Ɔ jèɛɛ, sɔ̀ìn ḿ hwìǐ, ɓɛ́ ḿ ké wa mú gbɔɔ̀, ɓɛ́ ḿ ké waà nyɛ́nɛ́ toɖo-kpàà kɔ̃in sámá. Ké ní mu m̀ ɓóɖó-dù vɛ̀nɛ̀ ɖò kɔ̃̀ kpé ɓúá dyí ɓɛ́ ɔ zi wa dyíɛɛ mú nyuùn.’

¹⁵ “Ɔ jèɛɛ, ḿ sɔ̀ ma dyí, ké ḿ dèɖě ma toɖoɔ̀ ti ɓɛ́ toɖoɔ̀ nì ma wãuń keɛ. Sɔ́ɔ́-pĩ̀à sɔ̃́ ɓě kɔ̃̀ kɔ̃ ɓɛ́ dèè-wùɖùɔ̀ nìà kɛɛ nì ma ní xwa sɔ̃́ɔ̀ mú.

¹⁶ Ké ḿ dyéɛ ma jɛ́ɛ́ kà ɓɛ́ ɓě ɖǎ Bounɓo mɔ̀à ɓěɛ̀ Gèɖèpɔ́ɔ̀ kɛɛ nàmàǔn bũ̌ nyuɛ. Ɔ se hwèɖèìn ké ɓě ɖǎ ɖɛ ɓě ɔ pòìn ma kà ɓě náún wɛ̃ɛ kɔ̃ín pòìn, ké ɓě ɖǎ ɓě mìɔùn bìì kũùn-kpò hwɔìn ɓìɖǐ-dyù ɖò kɛɛ mɛ.

¹⁷ Ɔ jèɛɛ, ḿ ɓaɖa ma sɔ́ɔ́-pĩ̀à sɔ̃́ ɓě nì ma kà ḿ xwaún wɛ̃ɛ ɓíɖíí, ké wa wɛ̀ìn ma dyi ɓó ɓě dyéɖé waí.

¹⁸ Ké ḿ jìɖǐ ma ɓó Bounɓoɔ̀ dyúa dyi, ké ḿ nyu ma ɓó dyóɖóaún-wè kpáɖá-nyɔ sɔ̃́ kè máaún-hwùɖù kpáɖá-nyɔ sɔ̃́ kà ḿ nyuɛ ma kà kĩ́ín nyɛ. Ḿ se ma ɖii-ɖɛ̀ ɖò ɖi, mɔɔ ké ḿ se ma ní ɖò ná. Ḿ nyuɛ ma náa, sepóɛɖé ɓě ɖǎ ma Bounɓoɔ̀ nàmàǔn bũ̌ nyu mìɔ, ké nàmàǔnɔ̀ ɖǎ ma ɔ dyoɖoún po jè.

¹⁹ Ké ḿ fɛ̃̀ìn ma Bounɓoɔ̀ dyoɖoɔ̀ dyi, sepóɛɖé ɔ dyoɖo-hwòɖòɔ̀ ku ma wɔ̃, ké ɔ mɔ́ ma ɓě mú gbɔɔ̀ dyi. Kɛɛ Bounɓoɔ̀ tò ma ní wuɖuɔ̀ ɖùǔ gbo ɖe ɓó tia ɓaɖa.

²⁰ Ké Bounɓoɔ̀ kpáìn ma Eɖóún mɔ̀ùn dyoɖoún mìɔ, ké ɔ mɔ́ ma Eɖóún mú gbɔɔ̀ dyi. Ɔ jèɛɛ, ḿ ɓaà ma Eɖóún bìì ɖekè.

²¹ Ké ḿ ɖú ma ɓěɛ̀ nàmàǔn-ɖɛ̀ mɔ̀à ɓìɖǐ-dyù ɓɛ́ ɓě mɛ ma kà kɛɛ dyí, ké ḿ poɛ ma dyéɖé, ké ḿ ɖèɛ̀n ma, ké ḿ nyuɛ ma pù-ɓóɖó nìɛ̀-nìɛ̀ mú, ké ḿ mɛ́nɛ́ìn ma ɔ pù-ɓóɖó nìɛ̀-nìɛ̀ɔ̀ ɓó ní-dyù ɓɛ́ ɔ sɔ̀ ma ɖé toɖoɔ̀ múɛɛ kɔ̃in.

²² “Ɓó kɔ̃in ɖeɛɛ, ɓě po ma Bounɓoɔ̀ dyoɖoún ti ɓɛ́ ɓě ɓɛ̀ɖɛ̀ìn ma ɖé pá ɓě mɔ̀à Tàbéwàɖà kè Másàà ɔ kè Kíwòɖò-Hàtáávà kɛɛ mú dyíɛ.

²³ Ti ɓɛ́ ɓě nì ma ɖé Káɖɛ̀-Bànéà-hwɔ̀ɖɔ̀ɔ̀ múɛɛ, ɔ nyí ma ɓě wuɖu, ɓɛ́ ɓě ké ɓóɖó ɔ nìà ɓě nyíɛń nyɛɛ kɔ̃ mu, ɓɛ́ ɓě kéɛ ma dyí ɖú, ɓɛ́ ɔ ké ɓěɛ̀ kɔ̃̀ɔ̀-ɖɛ̀ jǔ. Kɛɛ ɓě po ma ɔ wuɖuɔ̀ kɛ́ɛ́ dyí. Ɓě se ma ɔ hwìɖǐǐ taɓa, mɔɔ ké ɓě se ma ɔ wuɖuɔ̀ dyi kpɔ̃.

²⁴ Sɔ̀ìn ɓó ti ḿ ɖǎǒ zɔ̃̌ɔ̀ ɓě dyí dyuòɛɛ, ɓě mɔ̀ Bounɓoɔ̀ wuɖu-ɖùǔn-dyi-zàìn-nyɔ̀ kánáá pū.

²⁵ “Ɔ jèɛɛ, ti ɓɛ́ ɓě po ma kà Bounɓoɔ̀ dyoɖoún ɖé Hówèɖè-tòɖòɔ̀ gboɛɛ, ḿ jìɖǐ ma kà ɓó Bounɓoɔ̀ dyúa dyi ɓó dyóɖóaún-wè kpáɖá-nyɔ sɔ̃́ kè máaún-hwùɖù kpáɖá-nyɔ sɔ̃́ xwíníín nyɛ̀. Ḿ nyuɛ ma náa, sepóɛɖé Bounɓoɔ̀ ɖǎa ma cɛ̃ kà ɓɛ́ ɔ mu ma ɓě mú gbɔɔ̀ùn wɛ̃.

²⁶ Ké ḿ ɓaà ma Bounɓoɔ̀, ké ḿ ɖá, ‘Óó Bounɓo Ɖɛɓíɔ́, ɓɔ́ m̀ mìɔùn nììn nyɔ ɓě mɔ̀à nì kɔ̃̀ɔ̀-ɖɛ̀ kɛɛ mú gbɔɔ̀. Wa mɔ̀ nyɔ ɓě ɓɛ́ m̀ póìn ma kà, ké m̀ zà ma kà wa ɖé Íjè-ɓòɖòɔ̀ kɔ̃ dyììn ɖé nì kpé-sɔ̃̀ɔ̀ múɛ̀.

²⁷ Nì gbo-nì-nyɔ̀ ɓě mɔ̀à Ééɓòɖòhɛ̃́ɛ̀ kè Áázè ɔ kè Jékɔ̀ kɛɛ jè mɛ nì m̀ hwìɖǐi. Ké ɓɔ́ nì nyɔ ɓěɔ̀ dú-kùmù-kùmùɔ̀ mɔɔ waà hwòɖǒ-kɔ̃in-nyìnììn-nyìnììnɔ̀ mɔɔ waà nàmàǔnɔ̀ dya gmɔ̀ɔ̀.

²⁸ Ɔ dyi ná nìǐn, Íjè-ɓòɖò kɔ̃̀ kɔ̃ ɓɛ́ m̀ zà ma kà à kɛɛ nyɔ ɓěɔ̀ muɛ cɛ̃ìn kà ɓɛ́ m̀ se à mɔ̀à nì nyɔ ɓěɔ̀ kɛɛ ɖé ɓóɖó m̀ ɖǎà à nyɛ́nɛ́ín ɖáìn nyɛɛ kɔ̃ kpaa ɓɛ́ìn nyɛ. Wa muɛ cɛ̃ìn kà ɓɛ́ m̀ nyɛ́ à mú jèɛɛ, m̀ dyàà à nɔ̄ gbǎùn-fúɖúáɔ̀ kɔ̃, ɓɛ́ m̀ kéà ɖé à ɖáɓáìn nyɛ̀.

²⁹ Dyéɛ, wa mɔ̀ nì nyɔ ɓě mɔ̀à nì kɔ̃̀ɔ̀-ɖɛ̀ kɛ. Wa mɔ̀ nyɔ ɓě ɓɛ́ m̀ zà ma kà ɖé Íjè-ɓòɖòɔ̀ kɔ̃ dyììn ɖé nì kpé vɛ̀nɛ̀ɔ̀ kè nì gana-sɔ̃̀ɔ̀ múɛ̀.’