Dìtɔ̀wáɖánámɛ̀ 8 - Ɓǎsɔ́ɔ̀ Báɓòɔ̀

Ɓóɖó nɔ̀mɔ̀ dyíinɔ̀ dyí-ɖú-ɖú

¹ “Gma séín ɓě ɓɛ́ ḿ nìà zɛ̃̌ɛ̀ ɓě gbo cɛ̃iń nyɛɛ, ɓě mɛ kpɔ̃ wa dyi kóɖó-kóɖó. Ké ɔ muɛ nyuùn ɓɛ́ ɓě ké cĩ́, ɓɛ́ ɓě ké dúún zaìn. Ké ɓě mu ɓóɖó ɓɛ́ Bounɓoɔ̀ ɖǎà ɓě ɓǎ nììn ɓǎ ɓěɔ̀ nyɛ́nɛ́ín ɖáìn nyɛɛ kɔ̃ muùn, ɓɛ́ ɓě kéɛ dyí ɖú, ɓɛ́ ɔ ké ɓěɛ̀ kɔ̃̀ɔ̀-ɖɛ̀ jǔ.

² Ɔ mɛ nì ɓě hwìɖǐi kà Bounɓo mɔ̀à ɓěɛ̀ Gèɖèpɔ́ɔ̀ kɛɛ nàìn ɓě ɖé gbǎùn-fúɖúáɔ̀ kɔ̃ ɓó zɔ̃ kpáɖá-nyɔ sɔ̃́ ɓěa xwíníín nyɛ. Ɔ tò ma ɓě gǎ kɔ̃, ɓɛ́ ɔ ké ɓě mú dɔ̃̌, ɓɛ́ ɔ kéɛ dyí dyuò kɛbì ɓě mu ɔ gma ɓěɔ̀ dyi kpɔ̃ùn ní mɔɔ ɓě se wa dyi kpɔ̃ɔ́ mu ní.

³ Ɔ dyéìn ma ɓě gǎ dyììn ɖé mɔ́ mú, hwɛ̀ ké ɔ nyí ma ɓě ɖii-ɖɛ̀ mɔ̀à mánà ɓɛ́ ɓě kè ɓě ɓǎ nììn ɓǎ ɓěɔ̀ séè ma ɖi ɖòɛ, ɓɛ́ ɔ kéɛ nyu ɓɛ́ ɓě kéɛ dyí dyuò kà nyɔ se cĩ́ dyììn ɖé ɖii-ɖɛ̀ ɖòùn múɛ, kɛɛ nyɔ cĩ́ dyììn ɖé wuɖu séín sɔ̀ìn ɖé Bounɓoɔ̀ wĩín nyɛɛ múɛ.

⁴ Ɓó zɔ̃ kpáɖá-nyɔ sɔ̃́ ɓěa xwíníín nyɛɛ, ɓěɛ̀ mú-po-ɖɔ̀ ɖò se ma ɓě múin zɔ̃̌, mɔɔ ké ɓěɛ̀ ɓo ɖò se ma bũ̌.

⁵ Ɓěɛ̀ hwòɖǒ mɛ dyuòɛ̀ kà gàa ɖò zàà ɔ dyú kpeɖeɛɛ, kǎà Bounɓo mɔ̀à ɓěɛ̀ Gèɖèpɔ́ɔ̀ kɛɛ zà ɓě kpeɖe.

⁶ Ɔ jèɛɛ, ɓě mɛ kpɔ̃ Bounɓo mɔ̀à ɓěɛ̀ Gèɖèpɔ́ɔ̀ kɛɛ gma ɓěɔ̀ dyi, ɓɛ́ ɓě ké ɔ kpeɖe ɓěɔ̀ kíɖíí sí, ɓɛ́ ɓěɛ̀ hwòɖǒ ké ɔ dyi fɛ̃̀ìn.

⁷ Sepóɛɖé Bounɓo mɔ̀à ɓěɛ̀ Gèɖèpɔ́ɔ̀ kɛɛ nì ɓě bãa-ɓòɖò ɖò mú kpauń. Ɔ mɔ̀ ɓóɖó ɓéɖé ní-dù ɓě ɓɛ́ ní sɔ̀ mú, ɓɛ́ ɔ dyi bɔɔ-kpà ɓěɔ̀ kè toɖo ɓěɔ̀ gboi ziɛ.

⁸ Ɔ mɔ̀ ɓóɖó ɓɛ́ hwítì kè báɖè kè géɖéè kè féè-cù ɓě kè pɔ́mɛ́gàɖànɛ̀-cù ɓě kè ɔ́ɖè-cù ɓě ɔ kè ɖo bã múɛ.

⁹ Ɔ mɔ̀ ɓóɖó kɔ̃̀ mú mɔ́ se ɓě nyuɛ́ mu, mɔɔ ké ɓě se ɖɛ ɖò kpéɖéɛ muɛ. Ɓóɖóɔ̀ sɔ́ɔ́ ɓěɔ̀ ɓéɖé nɛɛ̀-kpà ɖé wa mú, ké ɖé ɔ toɖo ɓěɔ̀ gboɛɛ, ɓě mu ɖé jɛ̃̀ ɓúɖúùn.

¹⁰ Ɓě mu ɖɛ ɖiìn, ɓɛ́ ɓě ké ɖoɓo, ké ɓě mu Bounɓo mɔ̀à ɓěɛ̀ Gèɖèpɔ́ɔ̀ kɛɛ zùo poùn ɓó ɓě ɓóɖó bã-bãɔ̀ nyí jè.

Mózè po nyɔ ɓěɔ̀ náún Bounɓoɔ̀ jè ní kɔ̃̀ ɖà wa hwìɖǐi sɔ̀

¹¹ “Ɓě mɛ ma mú, ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ jè ní kɔ̃̀ ɖà ɓě hwìɖǐi sɔ̀ dyììn ɖé ɔ gma ɓě ɓɛ́ ḿ nìà zɛ̃̌ɛ̀ ɓě gbo cɛ̃iń nyɛɛ wáɖá-wáɖá mú.

¹² Ɔ jǔ ké ɓě se ɔ gma ɓěɔ̀ dyi kpɔ̃ ní, nìí, ti ɓě ɖǎ ɖɛ ɖi, ké ɓě ɖǎ ɖoɓo, ké ɓě ɖǎ gbǒ nɔ̀mɔ̀ kɔ̃in ɓě po, ké ɓě nìǎ wa mú cĩ́ɛń,

¹³ ké ɓěɛ̀ ɓìɖǐ ɓěɔ̀ kè ɓáɖáá ɓěɔ̀ kè wiɖi ɓěɔ̀ ɖǎ mú zaìn, ké ɓěɛ̀ séɓàɖà kè góò ɓěɔ̀ ɖǎ dyí vò, ké ɓěɛ̀ kɔ̃̀ɔ̀-ɖɛ̀ tɔ̀ɔ̀ séín ɓě ɓéɖéɛɛ ɖǎ mú zaìn nyɛɛ ní,

¹⁴ nìí, ɓě mu ɓě mìɔùn dyí ɓúáìn, ɓɛ́ Bounɓo mɔ̀à ɓěɛ̀ Gèɖèpɔ́ɔ̀, ɓɛ́ ɔ zà ma kà ɓě ɖé Íjè-ɓòɖò kɔ̃̀ kɔ̃ ɓě mɔ̀ ma kà gǐì kɛɛ jè ké ɓě hwìɖǐi sɔ̀.

¹⁵ Bounɓoɔ̀ nàìn ma ɓě ɖé gbǎùn-fúɖúá vɛ̀nɛ̀ nyìnììn gboiɔ̀ kɔ̃. Ɔ mɔ̀ dɛ̀ ɓɛ́ cɛ̃́-sɛ̀ ɓě kè gĩ́á ɓě nì ma kɛ. Ɔ mɔ̀ gbǎùn-fúɖúá dyɛ kɔ̃in ɓɛ́ ní ɖò se ɖé nìɛ, ké ɔ nyuɛ ké ní sɔ̀ ma sɔ́ɔ́-kpòɔ̀ mú ɓó ɓě bìì.

¹⁶ Ké ɔ nyí ma ɓě mánà ɓɛ́ ɓě kéɛ ma ɖi ɖé gbǎùn-fúɖúáɔ̀ kɔ̃. Ɔ mɔ̀ ɖii-ɖɛ̀ ɓɛ́ ɓě ɓǎ nììn ɓǎ ɓěɔ̀ séè ma ɖi ɖòɛ. Ɔ tò ma ɓě gǎ-dù kò-kò ɓě kɔ̃, ɓɛ́ ɔ ké ma ɓě mú dɔ̃̌, ɓɛ́ ɖé ɖɛ séínɔ̀ mánáín ní, ɔ ké ɓě mana kɔ̃ po.

¹⁷ Ɔ jèɛɛ, ɓě ní poɛ̀n hwìɖǐi kà ɓě mìɔùn nììn kpé kè gana mɔ̀ nyɔ nyuɛ ké ɓě bã kɛ.

¹⁸ Kɛɛ ɔ mɛ nì ɓě hwìɖǐi kà Bounɓo mɔ̀à ɓěɛ̀ Gèɖèpɔ́ɔ̀ kɛɛ mɔ̀ nyɔ nyíà ɓě kpé ɓɛ́ ɓě kéà bã-nyɔ̀ jǔɛ. Ɔ nyuɛ náa, sepóɛɖé ɔ mɔ́ ɓɛ́ ɔ ké dèè-wùɖù nìǒ zɔ̃̌ɔ̀ kà ɓó ɔ kè ɓě ɓǎ nììn ɓǎ ɓěɔ̀ pṹa kɛɛ kɔ̃in kpɔ̃uń nì ke ɓó zɛ̃̌ɛ̀.

¹⁹ Ḿ nì ɓě náún poɛń ɓó zɛ̃̌ɛ̀, kà ɔ jǔ ké Bounɓo mɔ̀à ɓěɛ̀ Gèɖèpɔ́ɔ̀ kɛɛ jè dyi ɓě hwìɖǐi sɔ̀, ké ɓě dyi gèɖèpɔ́ɔ̀ kà kò ɖò ɓě kíɖíí sí, ké ɓě dyi wa ɓiè ní, nìí, jǎà cá, ɓě mu mú gbɔɔ̀ùn.

²⁰ Ɔ jǔ ké ɓě se Bounɓoɔ̀ wuɖuɔ̀ nyu ní, nìí, ɓě mu mú gbɔɔ̀ùn kà ɔ nyuà ɓóɖó ɓě nì ma ɓó ɓě dyúa kɛɛ nyɔ ɓěɔ̀ mú gbɔɔ̀ kɛ.