Dìtɔ̀wáɖánámɛ̀ 7 - Ɓǎsɔ́ɔ̀ Báɓòɔ̀

Bounɓoɔ̀ mìɔùn nììn nyɔ ɓěɔ̀

¹ “Ti ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ mu ɓě ɓóɖó ɓɛ́ ɓě nìà mú muɛń, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ kɔ̃ kpaùn wɛ̃ɛ, ɔ mu nyɔ-dù vɛ̀nɛ̀ mɛ̀nɛ̌ìn-sɔ̃́ ɓě kɔ̃̀ kpé ɓúá dyí ɓɛ́ ɔ zi ɓěɛ̀ kpé dyíɛɛ ɖé ɓóɖóɔ̀ kɔ̃ dyi kúmúùn. Nyɔ-dù ɓěɔ̀ mɔ̀ Hítì-nyɔ̀ ɓěɔ̀ kè Gígà-nyɔ̀ ɓěɔ̀ kè Ámɔ̀-nyɔ̀ ɓěɔ̀ kè Kénà-nyɔ̀ ɓěɔ̀ kè Pɛ́wìɖì-nyɔ̀ ɓěɔ̀ kè Hívì-nyɔ̀ ɓěɔ̀ ɔ kè Jɛ́ɓù-nyɔ̀ ɓěɔ̀.

² Ti ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ mu nyɔ ɓěɔ̀ ɓě xwaún dyi poùn, ɓɛ́ ɓě ké wa toún ɖuɛɛ ní, nìí, ɓě mɛ gbɔɔ̀ wa mú nyɛ̀nɛ̀ɛ̀. Ɓě kè wa mɛ ɓɔ́ wuɖu ɖò dèɛ̀, ké ɓě mɛ ɓɔ́ wa wìǐn dyéɛ.

³ Ké ɓě kè wa mɛ ɓɔ́ dyi kpɔ̃ìn. Ɓěǐn nyí ɓěɛ̀ dyú-màà ɓěɔ̀ waà dyú-gàà ɓěɔ̀, ɓɛ́ wa ké waà gmàà jǔ, mɔɔ ké ɓěɛ̀ dyú-gàà ɓěɔ̀ ní kpɔ̃ waà dyú-màà ɓěɔ̀ dyi,

⁴ sepóɛɖé wa mu ɓěɛ̀ dyú ɓěɔ̀ hwìǐ zàìn, ɓɛ́ wa ké se Bounɓoɔ̀ kíɖíí sí, ɓɛ́ wa ké gèɖèpɔ́ɔ̀ kà kò ɖò ɓě ɓiè, ké Bounɓoɔ̀ dyoɖoɔ̀ mu ɓě kɔ̃ dyiìn, ɓɛ́ ɔ ké ɓě mú gbɔɔ̀ wàɖà.

⁵ Kɛɛ kǎà ɓě mɛ nyu kà wa nyuɛ. Ɓě mɛ wáɖá waà sáa-kɔ̃-zàìn-gbàà ɓěɔ̀, ké ɓě mɛ wàìn ɓiè-sɔ̀ɔ̌-kpò ɓě ɓɛ́ wa nyànàìn dyiɛɛ dyi, ké ɓě mɛ ɖaɓa cu-kpóɖó ɓě mɔ̀à waà gèɖèpɔ́ɔ̀-màà kɔ̃̀ nyɛ́nɛ́ mɔ̀à Àséwàɖà kɛɛ hwɔìn-ɖɛ̀ ɓě ɓɛ́ wa nyànàìn dyiɛ, ké ɓě mɛ fɔ̃ waà kũùn-kpò tɔ̀ɔ̀ ɓěɔ̀.

⁶ Sepóɛɖé ɓě kpá wáká ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ bìì. Ɔ gã ɓě sɔ̀ìn ɖé nyɔǔn séín nìà ɓóɖó-kpàà kɔ̃ɛɛ hwìɛ̀, ɓɛ́ ɓě ké ɔ mìɔùn nììn kɔ̃̀ɔ̀-ɖɛ̀ jǔ.

⁷ “Bounɓoɔ̀ ɖɛ̀ɓɛ̀ ɓě mú, ké ɔ gã ɓě, ɔ se ɖɛ ɓɛ́ ɓě ké ma dyí vò, ɓɛ́ ɓě ké ma ɓóɖó-dù tɔ̀ɔ̀ ɓěɛ̀ nyɔ ɓě dyí ziɛ. Ɓě mɔ̀ ma ɓóɖó-dù tííwè nì ma ɖé ɓóɖó-dù tɔ̀ɔ̀ ɓěɔ̀ hwìɛ̀ kɛ.

⁸ Kɛɛ Bounɓoɔ̀ ɖɛ̀ɓɛ̀ ɓě mú, ké ɔ mɔ́ ɓɛ́ ɔ ké ɖɛ ɔ ɖáìn zɔ̃̌ɔ̀ kà ɓě ɓǎ nììn ɓǎ ɓěɔ̀ nyɛ́nɛ́ín nyɛɛ nyu jèɛ̀, ɔ zà ma ɓě gǐì-kũ̀à mú sɔ̀ìn ɖé Íjè-kã̀ǎɔ̀ xwaún, dyììn ɖé ɔ gana-sɔ̃̀ɔ̀ mú.

⁹ Ɔ jèɛɛ, ɔ mɛ nì ɓě hwìɖǐi kà Bounɓo mɔ̀à ɓěɛ̀ Gèɖèpɔ́ɔ̀ kɛɛ ɖòùn mɔ̀ Gèɖèpɔ́ɔ̀ kɛ. Ɔ mɔ̀ jǎà Gèɖèpɔ́ɔ̀, ké ɔ kpɔ̃ ɓó ɔ dèè-wùɖùɔ̀ kè ɔ ɖɛ̀ɓɛ̀ǐn-ɖɛ̀ɓɛ̀ǐnɔ̀ gboi ɓó xwéɖé-dù deìn dúún táázĩ̀ìn ɓě ɓɛ́ wa ɖɛ̀ɓɛ̀ ɔ mú, ké wa kpɔ̃ ɔ gma ɓěɔ̀ dyiɛɛ bììɛ.

¹⁰ Kɛɛ ɔ tò nyɔ ɓě nyɛ́ ɔ múɛɛ gǎ kɔ̃ dyììn ɖé wa mú-gbɔɔ̀-gbɔɔ̀ mú. Ɔ tò wa gǎ kɔ̃ wàɖà.

¹¹ Ɔ jèɛɛ, ɓě mɛ ma mú, ɓɛ́ ɓě ké gma-dù kò-kò ɓě kɔ̃̀ jè ḿ nìà ɓě gbo cɛ̃iń ɓó zɛ̃̌ɛ̀ kɛɛ dyi kpɔ̃ kóɖó-kóɖó.

Mana ɓě nì wuɖu-nyu-nyu múɛ

¹² “Ɔ jǔ ké ɓě dyi gma ɓěɔ̀ ɖùǔ gbo tò, ké ɓě dyi wa dyi kpɔ̃ jǎà-kà ní, nìí, Bounɓo mɔ̀à ɓěɛ̀ Gèɖèpɔ́ɔ̀ kɛɛ mu dèè-wùɖù nìà ɓó ɓě kè ɔ pṹa kɛɛ gboi kpɔ̃ùn, ké ɔ mu ɓě nɔ̀mɔ̀ dyíin dyí nyuùn tee kà ɔ ɖǎà zɔ̃̌ɔ̀ kà ɓě ɓǎ nììn ɓǎ ɓěɔ̀ nyɛ́nɛ́ín ɖáìn nyɛ.

¹³ Ɔ mu ɓě mú ɖɛ̀ɓɛ̀ìn, ké ɔ mu ɓě mana kɔ̃ poùn. Ɔ ɖǎ ná nìǐn, nìí, ɓě mu dyú ɓáún-ɓáún wóɖóìn, ɓɛ́ ɓě ké dyí vò. Ké ɔ mu ɓěɛ̀ geɖe ɓěɔ̀ mana kɔ̃ poùn, ɓɛ́ wa ké bã, ké ɓě mu ɖii-ɖɛ̀ kè wã́ìn ɔ kè ɔ́ɖè-cànà ɓéɖéìn. Ké ɔ mu ɓě mana kɔ̃ poùn, ɓɛ́ ɓě ké ɓìɖǐ kè ɓáɖáá ɓě bã̀ìn. Ɔ mu ɓě mana séín ɓěɛ̀ nyíìn ɖé ɓóɖó ɓɛ́ ɔ ɖǎà ɓě ɓǎ nììn ɓǎ ɓěɔ̀ nyɛ́nɛ́ín ɖáìn, ɓɛ́ ɔ kéà ɓě nyíɛɛ kɔ̃.

¹⁴ Ké ɓěɛ̀ mana ɓěɔ̀ mu nyɔ tɔ̀ɔ̀ séín ɓěɛ̀ mana kɔ̃ ziìn. Gàa ɖò mɔɔ màa ɖò se ɓě hwìɛ̀ nìɛ̌ mu, ɓɛ́ ɔ ké ɖààǔn sè, ké ɓěɛ̀ nyúà-ɖɛ̀ ɓěɔ̀ ɖò se ɖààǔn sèɛ̌ mu ɖekè.

¹⁵ Ké Bounɓoɔ̀ mu ɓě wɛ́ séín ɖei zàùn. Wɛ́ gbà séín ɓɛ́ ɓě dyuò kà dyí ɖé Íjè-ɓòɖòɔ̀ kɔ̃ɛɛ ɖò se ɓě kɔ̃ dyiɛ́ mu, kɛɛ ɔ mu wɛ́ ɓěɔ̀ nyɔ séín ɓě ɓɛ́ wa nyɛ́ ɓě múɛɛ kɔ̃ tòùn.

¹⁶ Ké ɓě mɛ gbɔɔ̀ nyɔ séín ɓě ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ mu ɓě xwaún dyi poùn wɛ̃ɛ mú. Ɓě mɛ ɓɔ́ wa wìì kɔ̃ ɓéɖéɛ, ké ɓě mɛ ɓɔ́ waà gèɖèpɔ́ɔ̀ ɓěɔ̀ ɓièɛ̀. Ɔ se ná nìǐn, nìí, waà gèɖèpɔ́ɔ̀ ɓěɔ̀ mu xwáɖá-gbǎ-mú jǔùn ɓó ɓě bìì.

¹⁷ “Ti ɖòɛ̀ ɓaɖaín, ɓě muɛ ɖéɛ ɓě hwòɖǒ bũ̌ cɛ̃ìn, ɓɛ́ ɓě ké níiń, ‘Ɓóɖó-dù ɓěɔ̀ ɓúá dyí ké wa zi à dyí. Xwɛ̌ à ɓɛ́ìn waà ɓóɖóɔ̀ dyí ɖúɛ kɛ́?’

¹⁸ Kɛɛ ɓě mɛ ɓɔ́ wa dyi fɛ̃̀ìn. Ké ɖɛ Bounɓo mɔ̀à ɓěɛ̀ Gèɖèpɔ́ɔ̀ kɛɛ nyuà Íjè-kã̀ǎɔ̀ kè ɔ nyɔ séín ɓěɔ̀ bũ̌ɛɛ mɛ nì ɓě hwìɖǐi kóɖó-kóɖó.

¹⁹ Nyɔ-gǎ-dyéìn-ɖɛ̀ ku wɔ̃ ɓě ɓɛ́ Bounɓoɔ̀ dyà ma kà Íjè-nyɔ̀ ɓěɔ̀ kɔ̃ ɓó ɓě dyéɖé waíɛ kè zɛ̃̀ìn-ɖɛ̀ ɓě kè ɖɛ dĩ́ín-dĩ̀ìn ɓě ɓɛ́ ɔ nyu ma kà kɛ ɔ kè kpé-sɔ̃̀ ɓɛ́ ɔ nyùìn kà kũ̀à mú, ɓɛ́ ɔ dyià ɓě ɖé Íjè-ɓòɖòɔ̀ kɔ̃ zà kɛɛ jè mɛ nì ɓě hwìɖǐi. Kà ɔ nyu ma kà Íjè-nyɔ̀ ɓěɔ̀ nyuɛ kɛɛ, kǎà ɔ mu nyɔ séín ɓě ɓɛ́ ɓě fɛ̃̀ìn kà dyiɛɛ nyuùn ɖekè.

²⁰ Ɓó kɔ̃in ɖeɛɛ, Bounɓo mɔ̀à ɓěɛ̀ Gèɖèpɔ́ɔ̀ kɛɛ mu ɖɛ hwɔìn ɓaà kɛɛ ɖé wa hwìɛ̀ tòùn, ké ɔ mu ɖé dyi gã̀ùn tee ɓɛ́ nyɔ ɓě sèà ɓíɖíi, ɓɛ́ wa vǐè kà wa mìɔùn ɓě dyíɛɛ ké mú gbɔɔ̀ hwɔ hwɛ̀.

²¹ Ɓě mɛ ɓɔ́ wa dyi fɛ̃̀ìn, sepóɛɖé Bounɓo mɔ̀à ɓěɛ̀ Gèɖèpɔ́ɔ̀ kɛɛ nì ɖé ɓě hwìɛ̀. Ɔ gã̌, ké ɔ ɓéɖé kpé.

²² Bounɓo mɔ̀à ɓěɛ̀ Gèɖèpɔ́ɔ̀ kɛɛ mu ɓóɖó-dù ɓěɔ̀ nyɔ ɓěɔ̀ ɓó ɓě dyúa dyi kúmúùn mɛ́nɛ́-mɛ́nɛ́. Ɓě se nyɔ ɓěɔ̀ ɖé ɓóɖóɔ̀ kɔ̃in kúmúɛ ɓɛ́ǐn mu wàɖà. Ɔ dyi ná nìǐn, xwáɖá-xwíɖíi-nìmìì ɓěɔ̀ mu dyí vòùn ɓó ɓě bìì.

²³ Kɛɛ Bounɓo mɔ̀à ɓěɛ̀ Gèɖèpɔ́ɔ̀ kɛɛ mu nyɔ ɓěɔ̀ ɓě xwaún dyi poùn, ké ɔ mu wa hwòɖǒ-kɔ̃in-cá-cá vɛ̀nɛ̀ ɖò mú poùn tee ɓɛ́ wa ké mú gbɔɔ̀ hwɔ hwɛ̀.

²⁴ Ké ɔ mu waà kã́á ɓěɔ̀ ɓě xwaún dyi poùn, ɓɛ́ ɔ kéɛ nyu ɓɛ́ waà nyɛ́nɛ́ ké ɓóɖó-kpàà kɔ̃in hwɛ̀. Nyɔ ɖò se ɓě dyúa dyi nyànàà ɓɛ́ǐn mu. Ɓě mu wa mú gbɔɔ̀ hwɔùn.

²⁵ Ké ɓě mɛ fɔ̃ waà gèɖèpɔ́ɔ̀ ɓěɔ̀ hwɔìn-ɖɛ̀ ɓě. Ké séɓàɖà kè góò ɓě nìà wa bũ̌in nyɛɛ tó ní nyu ɓě, mɔɔ ké ɓě ní ɖú ɖò dyí, ɓɛ́ ɔ ké ɓěɛ̀ kɔ̃̀ɔ̀-ɖɛ̀ jǔ, ɓɛ́ ɔ ní kɔ̃̀ ɖà ɓě bìì xwáɖá-gbǎ-mú jǔ, sepóɛɖé wa mɔ̀ Bounɓoɔ̀ dyi-nyàìn-ɖɛ̀.

²⁶ Ɓě ní dyà waà gèɖèpɔ́ɔ̀ ɓěɔ̀ hwɔìn-ɖɛ̀ ɖò ɖé ɓěɛ̀ taà ɓěɔ̀ mú. Ɓě dyiɛ náa nyuín, nìí, hwòɛ̌-wùɖù dyúáɖò nìà kũùn-kpò ɓěɔ̀ kɔ̃ɛɛ mu ɓě kɔ̃ dyiìn. Ɓě mɛ nyɛ́ waà kũùn-kpò ɓěɔ̀ mú, ɓɛ́ wa jè ké ɓě dyi nyàìn, sepóɛɖé Bounɓoɔ̀ hwòɛ̌-wùɖù nì wa kɔ̃.