Dìtɔ̀wáɖánámɛ̀ 4 - Ɓǎsɔ́ɔ̀ Báɓòɔ̀

Mózè cɛ̃ɛ Éézùɖùɛ̀-nyɔ̀ ɓěɔ̀ gbo ɓɛ́ wa ké gma ɓěɔ̀ dyi kpɔ̃ kóɖó-kóɖó

¹ “Éézùɖùɛ̀-nyɔ̀ ɓěo, ɓó kàǔn wɛ̃ɛ, ɓě mɛ kpɔ̃ gma séín ɓě ḿ nìà ɓě tɛ̀mɛ̀ǐn nyɛɛ dyi. Ɓě dyiɛ náa nyu ní, nìí, ɓě mu cĩ́ìn, ɓɛ́ ɓě ké ɓóɖó ɓɛ́ Bounɓo mɔ̀à ɓě ɓǎ nììn ɓǎ ɓěɛ̀ Gèɖèpɔ́ɔ̀ kɛɛ nìà ɓě nyíɛń nyɛɛ mú mu, ɓɛ́ ɔ ké ɓěɛ̀ kɔ̃̀ɔ̀-ɖɛ̀ jǔ.

² Ɓě ní po wuɖu ɓɛ́ ḿ cɛ̃à ɓě gboɛɛ kɔ̃, mɔɔ ké ɓě ní zà wuɖuɔ̀ kɔ̃. Ɓě mɛ kpɔ̃ Bounɓo mɔ̀à ɓěɛ̀ Gèɖèpɔ́ɔ̀ kɛɛ gma ɓě ɓɛ́ ḿ cɛ̃à ɓě gboɛɛ dyi.

³ Ɓěɛ̀ dyéɖé dyé ɖɛ Bounɓoɔ̀ nyu ma ɓá Béò mɔ̀à Píò-tòɖòɔ̀ gèɖèpɔ́ɔ̀ kɛɛ ɓiè jè dyíɛ. Bounɓo mɔ̀à ɓěɛ̀ Gèɖèpɔ́ɔ̀ kɛɛ gbɔɔ̀ ma nyɔ séín nì ma ɓě hwìɛ̀, ɓɛ́ wa ɓiè ma Béò kɛɛ mú,

⁴ kɛɛ ɓěɛ̀ nyɔ ɓě kpɔ̃ ma ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ jè gbo dyi kóɖó-kóɖóɛɛ nì cĩ́ɛń zɛ̃̌ɛ̀ ke.

⁵ “Ɓě dyéɛ, ḿ ɖǎ ɓě gma-dù kò-kò ɓěɔ̀ tɛ̀mɛ̀ìn kà Bounɓo mɔ̀à ní Gèɖèpɔ́ɔ̀ kɛɛ nyuɛ ḿ gbo cɛ̃ɛ kɛ, nìí ɓɛ́ ɓě ké wa dyi kpɔ̃ ɖé ɓóɖó ɓɛ́ ɓě nìà mú muɛń, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ mú.

⁶ Ɓě mɛ kpɔ̃ gma ɓěɔ̀ dyi, sepóɛɖé wa mu ɓěɛ̀ fɔ̀nɔ̀-hwòɖǒ kè ɓěɛ̀ ɖɛ-múin-wɔ̃́-wɔ̃́ jǔùn ɖé ɓóɖó-dù tɔ̀ɔ̀ ɓěɔ̀ nyɔ ɓěɔ̀ dyéɖéín. Ti wa muà gma séín ɓěɛ̀ wɔ̃́ùn wɛ̃ɛ, wa muɛ cɛ̃ìn, ɓɛ́ wa ké níiń, ‘Jǎà jɛ́ɛ́, ɓóɖó vɛ̀nɛ̀ nìà kɛ nyɔ ɓěɔ̀ fɔ̀nɔ̀ hwòɖǒ, ké wa wɔ̃́ ɖɛ múin.’

⁷ Sepóɛɖé ɓóɖó-dù vɛ̀nɛ̀ ɖò se nì, ɓɛ́ ɔ ké gèɖèpɔ́ɔ̀ xwɛ̃́ìn ɔ nyɔ ɓěɔ̀ bũ̌in nyɛɛ ɓéɖé kà Bounɓo mɔ̀à à Gèɖèpɔ́ɔ̀ kɛɛ nìà kɛ. Ti séín à ɖá ɔ kɛɛ, ɔ wɔ̃́ìn à ɖá-wùɖùɔ̀ gbo.

⁸ Ké ɓóɖó-dù vɛ̀nɛ̀ ɖò se nì, ɓɛ́ ɔ ké gma-dù kò-kò sɛ́ɖɛ́ìn dyí ɓě ɓéɖé ɓɛ́ ɔ ké gma séín ɓě ɓɛ́ ḿ nìà ɓě dyí dèɛ̌n ɓó zɛ̃̌ɛ̀ kɛɛ dyí zi.

⁹ “Ɔ jèɛɛ, ɓě mɛ nì ɓɛ́ɖɛ́ kɔ̃, ké ɓě mɛ màìn ɓě mìɔùn mú, ɓɛ́ ɖɛ ɓě ɓɛ́ ɓě ɖǎà dyéɛɛ ní kɔ̃̀ ɖǎ ɓě hwìɖǐi sɔ̀ ɖé ɓěɛ̀ fɛ̀ɛ̀-wè séín mú. Ké ɓě mɛ cɛ̃ ɖɛ ɓě ɓɛ́ ɓě ɖǎà dyéɛɛ ɓěɛ̀ dyú ɓěɔ̀ kè ɓěɛ̀ nyúà-dyú ɓěɔ̀ gbo.

¹⁰ Wé kɔ̃̀ ɓaɖa ɓɛ́ ɓě nyànàǒ kà ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ dyúa dyi ɖé Hówèɖè-tòɖòɔ̀ gboɛɛ jè mɛ nì ɓě hwìɖǐi. Ɓó tia ɓaɖaa, Bounɓoɔ̀ cɛ̃ɛ ma ḿ gbo, ké ɔ ɖá, ‘Poìn nyɔ ɓěɔ̀ ɓó ḿ dyúa dyí, ké ní muɛ nyuùn ɓɛ́ wa ké ní wuɖu wɔ̃́, ɓɛ́ ɔ kéɛ nyu ɓɛ́ wa ké ḿ dyi fɛ̃̀ìn ti séín wa mu ɓóɖó-kpàà kɔ̃ cĩ́ìn nyɛ, ɔ kè ɓɛ́ wa ké ní wuɖuɔ̀ waà dyú ɓěɔ̀ tɛ̀mɛ̀ìn.’

¹¹ Ɔ jèɛɛ, ɓě xwɛ̃́ìn ma toɖoɔ̀ bũ̌in, ké ɓě nyànà ma ɓó ɔ ɓo zɔ̃̌ dyi, ké ɓě dyé ma toɖoɔ̀ ɓúɛ, ké nyànà-sò kpìǐ kpɛ̃̀ ɓáìn ma toɖoɔ̀ kɔ̃in, ké nyɛ-mìɔ̀ nì ma ɔ mú sɔ̀ǔn.

¹² Ké Bounɓoɔ̀ wùɖù ma ɓě gbo sɔ̀ìn ɖé nyɛ-mìɔ̀ɔ̀ mú, ké ɓě wɔ̃́ ma ɔ wuɖuɔ̀, kɛɛ ɓě se ma ɔ dyé fɔɔ cá.

¹³ Ɔ cɛ̃ ma ɖɛ ɓě ké nyu ɓɛ́ ɓě ké dèè-wùɖù nìà ɓó ɓě kè ɔ pṹa kɛɛ dyi kpɔ̃ɛɛ ɓě gbo. Ɔ cɛ̃ ma ɓě gma ɓaɖa-bùèɔ̀ gbo, ké ɔ céè ma wa sɔ́ɔ́-pĩ̀à sɔ̃́ ɓě kɔ̃.

¹⁴ Ké ɓó tia ɓaɖaa, Bounɓoɔ̀ cɛ̃ɛ ma ḿ gbo, ɓɛ́ ḿ ké ɓě gma séín ɓěɔ̀ tɛ̀mɛ̀ìn, ɓɛ́ ɓě ké wa dyi kpɔ̃ ɖé ɓóɖó kɔ̃̀ jè ɓɛ́ ɓě nìà Jɔ́nì-nìɔ̀ péɖéɛń, ɓɛ́ ɓě kéà dyí ɖú, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ kɔ̃.

Ná-wùɖù ɓá kũùn-kpò ɓiè jè dyíɛ

¹⁵ “Ti ɓɛ́ Bounɓoɔ̀ wùɖù ma kà ɓě gbo sɔ̀ìn ɖé nyɛ-mìɔ̀ɔ̀ mú ɖé Hówèɖè-tòɖòɔ̀ dyaa, ɓě se ma ɔ dyé. Ɔ jèɛɛ, ɓě mɛ ma mú,

¹⁶ ɓɛ́ ɓě ní kɔ̃̀ ɖà nàmàǔn nyu dyììn ɖé kũùn-kpò kè ɖɛ ɖò hwɔìn nyɛɛ nyu-nyu mú, kɛbì ɔ mɛ hwɔìn gàa mɔɔ màa

¹⁷ mɔɔ nimii mɔɔ naà

¹⁸ mɔɔ ɓíɖíi-dyi-nà-ɖɛ̀ mɔɔ zimii nyɛ.

¹⁹ Ké ɓě dyi ɖé dyɔɔ̀ dyí gmɔ̀, ké ɓě dyi ɖɛ ɓě nìà ɖéɛɛ dyé ní, ɓě mɛ ma mú, ɓɛ́ ɓě ní kɔ̃̀ ɖà Bounɓoɔ̀ kɔ̃ín pòìn, ɓɛ́ ɓě ní kɔ̃̀ ɖà wa ɓiè. Wa mɔ̀ dyóɖóɔ̀ kè dɛ̀nɛ̀ɔ̀ ɔ kè dɛ̀nɛ̀ mɛ́nɛ́ɛ́ ɓěɔ̀. Bounɓoɔ̀ nyí ɖɛ ɓě nìà kɛ nyɔǔn séín nì dyóɖó-ɓòɛ̀ xwíɖíiɛ.

²⁰ Bounɓoɔ̀ zà ma ɓě ɖé Íjè-ɓòɖò ɓɛ́ ɔ hwɔìn ma kà nyɛ-gbà-wɔ̃̀ kɛɛ mú, ɓɛ́ ɓě ké ɔ mìɔùn nììn nyɔ ɓě jǔ kà ɓě nìà ɓó zɛ̃̌ɛ̀ kɛ.

²¹ Kɛɛ ɓó ɓě jèɛɛ, Bounɓoɔ̀ kpáìn ma ḿ dyoɖoún, ké ɔ gboò kà ḿ se Jɔ́nì-nìɔ̀ péɖéɛ mu, ɓɛ́ ḿ ké bãa-ɓòɖò ɓɛ́ ɔ nìà ɓě nyíɛń, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ mú muɛ.

²² Ɔ dyi ḿ jè jǔǐn, ní mu ɓóɖó nìà kɛ mú mɛ́ìn. Ḿ se Jɔ́nì-nìɔ̀ péɖéɛ mu. Kɛɛ ɓě mu Jɔ́nì-nìɔ̀ péɖéìn, ɓɛ́ ɓě ké bãa-ɓòɖòɔ̀ dyí ɖú, ɓɛ́ ɔ ké ɓěɛ̀ kɔ̃̀ɔ̀-ɖɛ̀ jǔ.

²³ Ɓě mɛ ma mú, ɓɛ́ dèè-wùɖù nìà ɓó ɓě kè Bounɓo mɔ̀à ɓěɛ̀ Gèɖèpɔ́ɔ̀ kɛɛ pṹa kɛɛ ní kɔ̃̀ ɖà ɓě hwìɖǐi sɔ̀, ɓɛ́ ɓě ní kɔ̃̀ ɖà kũùn-kpò ɖò kè ɖɛ ɖò hwɔìn, ɓɛ́ Bounɓoɔ̀ ɖá ɓě mɛ ɓɔ́à nyuɛ kɛɛ nyu.

²⁴ Sepóɛɖé Bounɓo mɔ̀à ɓěɛ̀ Gèɖèpɔ́ɔ̀ kɛɛ hwɔìn nyɛ-tò. Ɔ mɔ̀ hwɛ̀nɛ̌ Gèɖèpɔ́ɔ̀.

²⁵ “Ɔ jǔ ké ɓě ɖǎ ɓóɖóɔ̀ mú hwèɖèìn, ké ɓě ɖǎ dyú ɓě kè nyúà-dyú ɓě ɓéɖé, ké ɓě ɖǎ ɓóɖóɔ̀ kɔ̃ nyɛ̀ìn, ké ɓě dyi Bounɓo mɔ̀à ɓěɛ̀ Gèɖèpɔ́ɔ̀ kɛɛ nàmàǔn bũ̌ nyu dyììn ɖé kũùn-kpò kè ɖɛ ɖò hwɔìn nyɛɛ nyu-nyu mú, ké ɓěɛ̀ nàmàǔnɔ̀ dyiɛ nyu ké ɔ dyi dyoɖoún kpá ní,

²⁶ nìí, ɓě mu ɓóɖó kɔ̃̀ jè ɓɛ́ ɓě nìà Jɔ́nì-nìɔ̀ péɖéɛń, ɓɛ́ ɓě kéà dyí ɖú, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ kɔ̃in mɛ́ɛ hwɛ̀ìn wàɖà. Ɓě se ɓóɖóɔ̀ kɔ̃ hwèɖèɛ̌n mu, ké ɓě mu mú gbɔɔ̀ hwɛ̀ìn. Dyɔɔ̀ kè ɓóɖó-kpàà mɔ̀ ḿ kè ɓěɛ̀ zàse ɓá ɖɛ nìà kɛ jè dyíɛ.

²⁷ Ké Bounɓoɔ̀ mu ɓě ɓóɖó-dù kà kò ɖò ɓěɛ̀ nyɔ ɓě múin ɓeìn, ké ɓěɛ̀ xwéɖé wè mɔ̀ nyɔ mu ɓóɖó-dù ɓě kɔ̃̀ kɔ̃ ɓɛ́ Bounɓoɔ̀ muà ɓě dyi gbɛ̀ìn nyɛɛ nyɔ ɓěɔ̀ múin nììn.

²⁸ Ɖé ɓóɖó ɓěɔ̀ kɔ̃ɛɛ, ɓě mu gèɖèpɔ́ɔ̀ ɓě mɔ̀ cu kè sɔ́ɔ́-kpò ɓɛ́ wa mɔ̀ nyɔǔn-dyùɛ̀ sɔ̃ɔ̀ mɛɛ-ɖɛ̀, ɓɛ́ wa ní dyé dyi, mɔɔ ɓɛ́ wa ní wɔ̃́ dyi, mɔɔ ɓɛ́ wa ní ɖi ɖɛ, mɔɔ ɓɛ́ wa máná ní wɔ̃́ ɖɛ ɖòɛ̀ nyɔ́ɛɛ ɓièìn.

²⁹ Kɛɛ ɓě dyi Bounɓo mɔ̀à ɓěɛ̀ Gèɖèpɔ́ɔ̀ kɛɛ gbo ɖe dyi, ké ɓě dyi ɔ dyi mɔ́ hwòɖǒɛ̀-ɖé-hwɛ̀-kà ní, nìí, ɓě mu ɔ da dyéìn.

³⁰ Ti ɓɛ́ fũ̀à-fṹá-ɖɛ̀ kè ɖɛ gbà séín ɓěɛ̀ ɖǎ ɓě gbo kpá ɖé dyúa kɛɛ ní, nìí, ɓě mu Bounɓoɔ̀ gbo ɖe kɔ́ìn, ɓɛ́ ɓě ké ɔ wuɖu nyu.

³¹ Sepóɛɖé Bounɓo mɔ̀à ɓěɛ̀ Gèɖèpɔ́ɔ̀ kɛɛ mɔ̀ wìì Gèɖèpɔ́ɔ̀. Ɔ se ɓě dyi táǎ mu, mɔɔ ké ɔ se ɓě mú gbɔɔ̌ mu, mɔɔ ké dèè-wùɖù nìà ɓó ɔ kè ɓě ɓǎ nììn ɓǎ ɓěɔ̀ pṹa kɛɛ jè se ɔ hwìɖǐi sɔ̀ɔ̌ mu.

^32-34 “Nyɔ ɓě ɖò ɖǎ gèɖèpɔ́ɔ̀ ɖò wuɖu wɔ̃́ ɖò, ɓɛ́ ɔ ké wùɖùɛ̌n nì sɔ̀ìn ɖé nyɛ-mìɔ̀ hwòɖǒǔn, ɓɛ́ wa ké cĩ́ɛń nì ke kà ɓě nìà cĩ́ɛń keɛɛ̀? Gèɖèpɔ́ɔ̀ ɖò ɖǎa gbɔ po ɖò, ɓɛ́ ɔ ké ɓóɖó-dù ɖò kɔ̃ mu, ɓɛ́ ɔ ké ɖé ɖíà ɓě ɖé zà, ɓɛ́ wa ké ɔ mìɔùn nììn nyɔ ɓě jǔ kà Bounɓo mɔ̀à ɓěɛ̀ Gèɖèpɔ́ɔ̀ nyuà ɓě ɖé Íjè-ɓòɖòɔ̀ kɔ̃ zàà kɛɛ̀? Bounɓoɔ̀ nyùìn ma ɔ kpé-sɔ̃̀ɔ̀ kũ̀à mú ɓó ɓě dyéɖé waí, ké ɔ dyà ma nyɔ-gǎ-dyéìn-ɖɛ̀ ɓě kè to wa kɔ̃. Ɔ nyu ma zɛ̃̀ìn-ɖɛ̀ ɓě kè ɖɛ dĩ́ín-dĩ̀ìn ɓě ɔ kè nyɔ-díɖí-tàɓàìn-ɖɛ̀ ɓě. Sɔ̀ìn ti ɓɛ́ Gèɖèpɔ́ɔ̀ ɖǎǒ zɔ̃̌ɔ̀ nyɔǔn-dyù mɛ dà ɓóɖó-kpàà kɔ̃ɛɛ, ɓě diè ɖɛ ɓě ɖǎ kpáa jè dyi. Ɓě kpa ɖɛ dyi dièɛ̀ ɖé ɓóɖóɔ̀ wáká ɖò kɔ̃, ɓɛ́ ɔ ké wáká tɔ̀ɔ̀ kɔ̃ nyini, kɛbì ɖɛ vɛ̀nɛ̀ ɓɛ́ kà dyíɛɛ ɖǎ kpá ɖò, mɔɔ ké nyɔ ɖò ɖǎ ɖɛ ɓɛ́ kà dyí nìà kɛ wɔ̃́ ɖò ní.

³⁵ Bounɓoɔ̀ tɛ̀mɛ̀ìn ɓě ɖɛ nìà kɛ dyí, ɓɛ́ ɔ kéɛ nyu ɓɛ́ ɓě kéɛ dyuò kà ɔ ɖòǔn mɔ̀ Gèɖèpɔ́ɔ̀ ké gèɖèpɔ́ɔ̀ kà kò ɖò se ɓó ɔ wáún nì ɖeɛ.

³⁶ Sɔ̀ìn ɖé dyɔún wɛ̃ɛ, Gèɖèpɔ́ɔ̀ nyuɛ ké ɓě wɔ̃́ ma ɔ wuɖu, ɓɛ́ ɔ ké ɓě ɖɛ tɛ̀mɛ̀ìn, ké nɔ̄ ɓóɖó-kpàà kɔ̃ɛɛ, ɔ nyuɛ ké ɓě dyé ma ɔ nyɛ-ɓɔ́ɔ́ vɛ̀nɛ̀ɔ̀, ké ɔ wùɖù ma ɓě gbo sɔ̀ìn ɖé nyɛɔ̀ mú.

³⁷ Sepóɛɖé Gèɖèpɔ́ɔ̀ ɖɛ̀ɓɛ̀ ma ɓě ɓǎ nììn ɓǎ ɓěɔ̀ mú jèɛɛ, ɔ gã ma ɓě mɔ̀à waà xwíníín-dyù ɓěɛ, ké ɔ mìɔùn zà ma ɓě ɖé Íjè-ɓòɖòɔ̀ kɔ̃ dyììn ɖé ɔ kpé vɛ̀nɛ̀ɔ̀ mú.

³⁸ Ké Gèɖèpɔ́ɔ̀ kúmú ma ɓóɖó-dù vɛ̀nɛ̀ ɓě kɔ̃̀ kpé ɓúá dyí ɓɛ́ ɔ zi ɓě dyíɛɛ ɓó ɓě dyúa. Ké ɔ nyí ɓě waà ɓóɖóɔ̀, ɓɛ́ ɔ ké ɓěɛ̀ kɔ̃̀ɔ̀-ɖɛ̀ jǔ kà ɔ nìà ɓó zɛ̃̌ɛ̀ kɛ.

³⁹ Ɔ jèɛɛ, ɔ mɛ nì ɓě hwìɖǐi ɓó zɛ̃̌ɛ̀, ké ɔ mɛ ɓɔ́ ɓě hwìɖǐi sɔ̀ɔ̀ kà Bounɓoɔ̀ mɔ̀ Gèɖèpɔ́ɔ̀ ɖé dyɔún kè nɔ̄ ɓóɖó-kpàà kɔ̃, ké gèɖèpɔ́ɔ̀ kà kò ɖò se ɓó nì ɖeɛ.

⁴⁰ Ké ɓě mɛ kpɔ̃ Bounɓoɔ̀ gma séín ɓě ɓɛ́ ḿ nìà ɓě gbo cɛ̃iń ɓó zɛ̃̌ɛ̀ kɛɛ dyi, ɓɛ́ mana ké ɓě kè ɓěɛ̀ xwíníín-dyù ɓěɔ̀ kɔ̃ nì, ɓɛ́ ɓě ké ɓóɖó ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ nìà ɓě nyíɛń, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔ kánáá pūɛɛ kɔ̃ hwèɖèìn.”

Mú-vǐè-hwɔ̀ɖɔ̀ ɓě nì ɖé Jɔ́nì-nìɔ̀ dyóɖó-xwáɖáún-wóɖóìn-naín nyɛ

⁴¹ Ɓó tia ɓaɖaa, Mózè gã ma hwɔɖɔ tã hwɔ ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ dyí.

⁴² Wa mɔ̀ hwɔɖɔ ɓě kɔ̃̀ mú nyɔ ɖò ké pèɖèìn ɓɛ́ ɔ fɛ̀ɛ̀ ké pó jè, ɔ jǔ ké ɔ dyi ɔ mǔè ɖò se ɔ mú-nyɛ́-nyɔ̀ kɛɛ ɖáɓá ɓó seó-ɖei-dyé-kà ní.

⁴³ Bɛ́zɔ̀-hwɔ̀ɖɔ̀ ɓɛ́ ɔ nì ɖé gbǎùn-fúɖúáɔ̀ kɔ̃ɛɛ, ɖéɛ Wuɖuɓíín nììn xwéɖé-dùɔ̀ ké pèɖèìn. Ké Wáɖámɔ̀-hwɔ̀ɖɔ̀ ɓɛ́ ɔ nì ɖé Gíɖèà-ɓòɖòɔ̀ kɔ̃ɛɛ, ɖéɛ Gáà nììn xwéɖé-dùɔ̀ ké pèɖèìn. Ké Góɖàùn-hwɔ̀ɖɔ̀ ɓɛ́ ɔ nì ɖé Básàùn-ɓòɖòɔ̀ kɔ̃ɛɛ, ɖéɛ Mànásì nììn xwéɖé-dùɔ̀ ké pèɖèìn.

Gèɖèpɔ́ɔ̀ gmaɔ̀ tò-tòɔ̀ da-zà-zà

⁴⁴ Sɔ̀ìn ɓóɛ gboɛɛ, Mózè zaìn ma Gèɖèpɔ́ɔ̀ gma-dù kò-kò ɓěɔ̀ Éézùɖùɛ̀-nyɔ̀ ɓěɔ̀ gbo kɔ̃in.

^45-46 Ɔ mɔ̀ ti ɓɛ́ wa ɖǎ ma kà ɖé Íjè-ɓòɖòɔ̀ kɔ̃ sɔ̀, ɓɛ́ wa ɓɛ̀ɖɛ̀ìn ma kà ɖé bɔɔ-kpà hwɔà ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ dyí, ɓɛ́ ɔ nìà ɓó Bɛ̀-Píò-hwɔ̀ɖɔ̀ɔ̀ wáún wɛ̃ɛ kɔ̃ɛ. Ké ɓóɛ ɔ kpaìn ma kà gma ɓěɔ̀ kɔ̃in ɖeɛ̀. Wa nì ma ɖé ɓóɖó ɓɛ́ Ámɔ̀-nyɔ̀ ɓěɔ̀ kã́á mɔ̀à Síhɔ̃̀, ɓɛ́ ɔ cĩ́ ma kà ɖé Hɛ́ɓɔ̀ùn-hwɔ̀ɖɔ̀ɔ̀ múɛɛ kɔ̃̀à wuɖuíɛɛ kɔ̃. Mózè kè Éézùɖùɛ̀-nyɔ̀ ɓěɔ̀ ɖu ma ɔ toún ti ɓɛ́ wa sɔ̀ ma kà ɖé Íjè-ɓòɖòɔ̀ kɔ̃ɛ.

⁴⁷ Ké wa ɖú ma Kã́á Síhɔ̃̀ kè Kã́á Ógì ɓɛ́ ɔ mɔ̀ ma kà Básàùn-ɓòɖòɔ̀ kã́áɔ̀ kɛɛ nììn ɓóɖó ɓěɔ̀ dyí. Kã́á sɔ̃́ ɓěɛ̀ mɔ̀ Ámɔ̀-nyɔ̀ ɓěɔ̀ kã́á ɓě ɓɛ́ wa cĩ́ ma ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ kɛ.

⁴⁸ Ɓóɖó ɓě nìà kɛ síìn ma ɖé Àwóɖóè-hwɔ̀ɖɔ̀ nìà ɖé Áánɔ̀-nìɔ̀ wĩín nyɛɛ gbo, ké wa nyini ɖé Síwìɖìɔ̀ùn-tòɖò mɔ̀à Hɛ́mɔ̀-tòɖòɔ̀ kɛɛ gbo.

⁴⁹ Ɔ mɔ̀ gbɛ̌ɛ̀ gàná nìà ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀, muà tee kéà ɖé Tɔ̃́ Dòùnɓìǎ ɓɛ́ ɔ nìà ɖé Pígà-tòɖòɔ̀ xwíɖíiɛɛ dyɛ̀ìn nyɛ.