Dìtɔ̀wáɖánámɛ̀ 33 - Ɓǎsɔ́ɔ̀ Báɓòɔ̀

Mózè po Éézùɖùɛ̀ xwéɖé-dù ɓěɔ̀ mana kɔ̃

¹ Mana ɓɛ́ Mózè mɔ̀à Gèɖèpɔ́ɔ̀-gààɔ̀ kɛɛ po ma Éézùɖùɛ̀-nyɔ̀ ɓěɔ̀ kɔ̃ hwɛ̀ ɓɛ́ ɔ dyi ma mɛ́ kɛɛ kɛà kɛ̀.

² Ɔ ɖá, “Bounɓoɔ̀ sɔ̀ ɖé Sányà-tòɖòɔ̀ dya, ké ɔ wóɖóìn ɔ nyɔ ɓěɔ̀ dyí ɖé Séì-tòɖòɔ̀ gbo kà dyóɖó wóɖóà xwáɖáún wɛ̃, ké ɔ fã̀ìn wa kɔ̃in sɔ̀ìn ɖé Páwàɖàùn-tòɖòɔ̀ gbo. Ínjà se zɛɖɛɛ ɓɛ́ìn nyɛɛ nì ɓó ɔ gbo, ké nyɛ-mìɔ̀ nì ɖé ɔ ɖiaùn-sɔ̃̀ɔ̀ kɔ̃.

³ Bounɓoɔ̀ ɖɛ̀ɓɛ̀ ɔ nyɔ ɓěɔ̀ mú, ké ɔ gmɔ̀ wa dyí. Ɔ jèɛɛ, wa taɓa dú hwuɖu ɓó ɔ ɓo zɔ̃̌, ké wa nyu ɔ wuɖu.

⁴ Éézùɖùɛ̀-nyɔ̀ ɓěɔ̀ kpɔ̃ gma ɓɛ́ mɔ̄ Mózè nyí ma kà wa kɛɛ dyi. Gmaɔ̀ mɔ̀ waà kɔ̃̀ɔ̀-ɖɛ̀.

⁵ Éézùɖùɛ̀-nyɔ̀ ɓěɔ̀ nyu ma Bounɓoɔ̀ waà kã́á mú, ti ɓɛ́ wa kè waà nàìn-nyɔ̀ ɓěɔ̀ poìn ma dyíɛ.”

⁶ Ɖɛ Mózè cɛ̃ ɓá Wuɖuɓíín nììn xwéɖé-dùɔ̀ jè dyíɛɛ kɛà kɛ̀. Ɔ ɖá, “Wuɖuɓíín nììn xwéɖé-dùɔ̀ mɛ cĩ́. Wa mɛ ɓɔ́ mɛ́ɛ, mɔɔ ké wa mɛ ɓɔ́ kɔ̃ sɔ̀ɔ̀.”

⁷ Ɖɛ ɔ cɛ̃ ɓá Júɖà nììn xwéɖé-dùɔ̀ jè dyíɛɛ kɛà kɛ̀. Ɔ ɖá, “Bounɓo, wɔ̃́ Júɖà nììn xwéɖé-dùɔ̀ wuɖu, ɓɛ́ m̀ ké wa ɖé wa mìɔùn nììn nyɔ ɓěɔ̀ gbo ɖe dyà. M̀ mɛ vɔ̃ wa bìì dyììn ɖé m̀ mìɔùn nììn sɔ̃-kpàɔ̀ mú, ɓɛ́ m̀ ké wa gbo kpá ɓá waà mú-nyɛ́-nyɔ̀ ɓěɔ̀ jè dyí.”

⁸ Ɖɛ ɔ cɛ̃ ɓá Ɖíìváà nììn xwéɖé-dùɔ̀ jè dyíɛɛ kɛà kɛ̀. Ɔ ɖá, “Bounɓo, zàìn nì mɔ́ɔ́-ɖɛ̀ Ɖíìváà nììn xwéɖé-dù ɓɛ́ wa taɓaà m̀ hwìɖǐǐ kóɖó-kóɖóɛɛ da dyììn ɖé gbo-ɖàɓàìn-ɖɛ̀ ɓě mɔ̀à Dyúwìɖììn kè Túmì kɛɛ mú. M̀ dɔ̃̌ ma wa mú ɖé Másàà-pàɔ̀ mú, ké m̀ po ma wa sɔ̃ kɔ̃ún dyi ɖé Mɛ̀wíɖíɓà-nìɔ̀ wĩín.

⁹ Wa se ma ɖé wa ɖe kè wa ɓǎ kè wa ɖíí ɓě ɔ kè waà xwíníín-zà-dyù ɓě jè gbo kɔ̃̀, kɛɛ dèè-wùɖù nìà ɓó m̀ kè wa pṹa kɛɛ dyi kpɔ̃ jè kpɔ̃ ma wa hwòɖǒ mìɔ.

¹⁰ Wa mu Éézùɖùɛ̀-nyɔ̀ ɓěɔ̀ nì gma ɓěɔ̀ tɛ̀mɛ̀ìn, ɓɛ́ wa kéɛ dyi kpɔ̃ kóɖó-kóɖó. Wa mu nyɔ́ún-nɔ̀mɔ̀-ɖɛ̀ ɓě m̀ gbo dyàùn, ké wa mu fɔ̃ɔ-sàǎ-zàìn-ɖɛ̀ ɓě ɓó nì gbààɔ̀ kɔ̃ tòìn.

¹¹ Bounɓo, po waà kũ̀à-sɔ̃̀ ɓěɔ̀ mana kɔ̃. Nì hwòɖǒ mɛ dèìn waà nyuu-ɖɛ̀ ɓěɔ̀ múin. Nyɔ ɓě vɔ̃ wa gboɛɛ, m̀ mɛ wàìn waà gbe-zèɖè ɓěɔ̀ dyi. Po waà mú-nyɛ́-nyɔ̀ ɓěɔ̀ ɖɛ gbo, ɓɛ́ wa ké se dyí sɔ̀ ɖe fɔɔ.”

¹² Ɖɛ ɔ cɛ̃ ɓá Bɛ̃́címà nììn xwéɖé-dùɔ̀ jè dyíɛɛ kɛà kɛ̀. Ɔ ɖá, “Bounɓoɔ̀ ɖɛ̀ɓɛ̀ Bɛ̃́címà nììn xwéɖé-dùɔ̀ mú, ké ɔ gmɔ̀ wa dyí. Ɔ nàìn wa wé séín xwíníín, ké ɔ cĩ́ ɖé wa hwìɛ̀.”

¹³ Ɖɛ ɔ cɛ̃ ɓá Jòsé nììn xwéɖé-dùɔ̀ jè dyíɛɛ kɛà kɛ̀. Ɔ ɖá, “Bounɓoɔ̀ mɛ po Jòsé nììn xwéɖé-dùɔ̀ mana kɔ̃, ɓɛ́ ní ké waà ɓóɖóɔ̀ kɔ̃ ɖaɓa, ɓɛ́ ní ké ɓóɖó-hwùɖù nì ɖekè.

¹⁴ Dyóɖóɔ̀ kè dɛ̀nɛ̀ɔ̀ mɛ fã̀ìn waà ɓóɖóɔ̀ kɔ̃in, ɓɛ́ waà ɓáá-ɖɛ̀ ɓěɔ̀ ké bã.

¹⁵ Waà hwèɖèìn-hwèɖèìn-tòɖò ɓěɔ̀ mɛ dyíìn cu-ɓò nɔ̀mɔ̀ kɔ̃in dyai.

¹⁶ Bounɓo mɔ̀ nyɔ nì ma kà ɖé cu-gbɔ̌ nì nyɛ kɔ̃ɔ̀ múɛɛ manaɔ̀ mɛ nyuɛ ɓɛ́ ɓóɖóɔ̀ ké bã mìɔ. Mana ɓěɛ̀ mɛ dyi Jòsé mɔ̀ nyɔ nì ma kà ɔ ɖíí-gàà ɓěɔ̀ kɔ̃in nyɛɛ xwéɖé-dùɔ̀ kɔ̃.

¹⁷ Jòséɛ̀ xwéɖé-dùɔ̀ ɓéɖé kpé kà ɓìɖǐ ɖòɛ̀ kĩ́ín-kĩ́ín-dyù ɓɛ́ ɔ mɔ̀ɔ̀ ɓíɔ́ kɛɛ nìà kɛ. Ɔ gmɛ̌ ɓěɔ̀ hwɔìn jũ̀ìn-gmɛ̌ ɓě. Ɔ mu ɓóɖó-dù ɓěɔ̀ ɖe cṹùn dyììn ɖé ɔ gmɛ̌ ɓěɔ̀ mú, ɓɛ́ ɔ ké wa ɓóɖó-kpàà sèìn-naín kpa. Kǎà Ífèɖèìn-nyɔ̀ táázĩ̀ìn ɓaɖa-bùè deìn kɔ̃in ɓěɔ̀ nyu nìɛ̀, ké kǎà Mànásì-nyɔ̀ táázĩ̀ìn deìn kɔ̃in ɓěɔ̀ nyu nìɛ̀ ɖekè.”

¹⁸ Ɖɛ ɔ cɛ̃ ɓá Zɛ́ɓíúɖɔ̀ùn nììn xwéɖé-dùɔ̀ kè Ɛ́sàkà nììn xwéɖé-dùɔ̀ jè dyíɛɛ kɛà kɛ̀. Ɔ ɖá, “Zɛ́ɓíúɖɔ̀ùn nììn xwéɖé-dùɔ̀ mɛ kpá múàǔn ɖé waà méè ɓěɔ̀ mú, ké Ɛ́sàkà nììn xwéɖé-dùɔ̀ mɛ kpá múàǔn ɖé wa ɓíɖí-taún.

¹⁹ Wa mu nyɔ ɓě dyí poìn ɖé toɖo gbo, ɓɛ́ wa ké sáa-zà-zà jɛ́ɛ́ɔ̀ nyu, sepóɛɖé wa mu kɔ́mɔ́-ɖɛ̀ ɓáún-ɓáún ɖé dyóóɔ̀ kɔ̃ kè ɖé ɔ wĩin zàùn.”

²⁰ Ɖɛ ɔ cɛ̃ ɓá Gáà nììn xwéɖé-dùɔ̀ jè dyíɛɛ kɛà kɛ̀. Ɔ ɖá, “Ɓàìn-ɓàìn mɛ nì Gèɖèpɔ́ɔ̀ mɔ̀ nyɔ nyuà ɓɛ́ Gáà nììn xwéɖé-dùɔ̀ ɓóɖóɔ̀ dyià dyí ɓúá kɛɛ kɔ̃. Wa nì kà ganìǎ nìà kɛ. Wa fá ɖɛ ɖò-ɖò séín wa kpɔ̃ɛɛ sɔ̃ gbɔi, ké wa zàà dúí.

²¹ Wa mɔ̀ nyɔ zà ɓó ɓóɖóɔ̀ dàǔn-dà. Ɓóɖóɔ̀ dɛ̀ ɓóɖó-nàìn-nyɔ̀ kéɔ́ kpaa, ɖéɛ̀ wa nyí wa. Wa nyu Bounɓoɔ̀ wuɖu, ké wa kpɔ̃ ma ɔ gma ɓěɔ̀ dyi, ti ɓɛ́ Éézùɖùɛ̀-nyɔ̀ ɓěɔ̀ nàìn-nyɔ̀ ɓěɔ̀ poìn ma dyíɛ.”

²² Ɖɛ ɔ cɛ̃ ɓá Dɛ̃́ìn nììn xwéɖé-dùɔ̀ jè dyíɛɛ kɛà kɛ̀. Ɔ ɖá, “Dɛ̃́ìn nììn xwéɖé-dùɔ̀ nì kà ganìǎ-dyù ɓɛ́ ɔ zà dyií dyi wãìn ɖé Básàùn-ɓòɖòɔ̀ kɔ̃ɛɛ nìà kɛ.”

²³ Ɖɛ ɔ cɛ̃ ɓá Náfátàɖì nììn xwéɖé-dùɔ̀ jè dyíɛɛ kɛà kɛ̀. Ɔ ɖá, “Bounɓoɔ̀ hwòɖǒ dèìn Náfátàɖì nììn xwéɖé-dùɔ̀ múin, ké ɔ mana nì wa kɔ̃. Wa mu ɓóɖóɔ̀ wuɖuí kɔ̃̀ùn sɔ̀ìn ɖé xwía, kéà ɖé Gáɖàɖíì Dòùnɓìǎ nìà ɖé ɓóɖóɔ̀ zɔ̃̌in nyɛɛ gbo nyiniɛ.”

²⁴ Ɖɛ ɔ cɛ̃ ɓá Ásè nììn xwéɖé-dùɔ̀ jè dyíɛɛ kɛà kɛ̀. Ɔ ɖá, “Mana mɛ nì Ásè nììn xwéɖé-dùɔ̀ kɔ̃ mìɔ ɖé wa ɖíí ɓěɔ̀ hwìɛ̀. Waà ɖíí-gàà mɛ ɖɛ̀ɓɛ̀ wa mú mìɔ ɖé wa séín hwìɛ̀. Wa mɛ nà ɔ́ɖè-cànà gboi.

²⁵ Waà hwɔɖɔ ɓěɔ̀ gmɔ-wɔ̃̀-gbǎìn-ɖɛ̀ ɓěɔ̀ mɛ mɔ̀ nɛɛ̀-kpà kè bàɖàsǐ. Ké kà wa mu cĩ́ìn nyɛɛ, kǎà wa mu kpé ɓéɖéìn kánáá pū.

²⁶ “Éézùɖùɛ̀-nyɔ̀ ɓě, nyɔ ɖò se nì kà ɓěɛ̀ Gèɖèpɔ́ɔ̀ nìà kɛ. Ɔ sɔ̀ ɖé dyɔún, ké ɔ dyi, ɓɛ́ ɔ ké ɓě gbo kpá. Ɔ dĩ́ín-dĩ̀ìnɔ̀ dyììn ɖé ní-kpòɔ̀ mú.

²⁷ Sè-ná-sèɛ̀ Gèɖèpɔ́ɔ̀ mɔ̀ nyɔ kɔ̃̀ ɖeín ɓě mɛ gbìɖǐ. Ɔ sè-ná-sèɛ̀ sɔ̃ɔ̀ nì ɖé ɓě xwíɖíi. Ɔ mu ɓěɛ̀ mú-nyɛ́-nyɔ̀ ɓěɔ̀ ɓó ɓě dyúa dyi kúmúùn, ɓɛ́ ɔ ké níiń, ‘Ɓě gbɔɔ̀ wa mú.’

²⁸ Ɔ ɖǎ ná nìǐn, ɓě mɔ̀à Jékɔ̀ɛ̀ xwíníín-dyù ɓěɛɛ mu gìɖìǐ mú cĩ́ìn. Ɓěɛ̀ hwòɖǒ mu dyi dèìn ɖé ɓóɖó kɔ̃̀ kɔ̃ ɓɛ́ ɖii-ɖɛ̀ kè wã́ìn dyíìn dyi, ɓɛ́ dunu sɔ̀à dyɔún, ɓɛ́ ɔ tèìn kà kɛ.

²⁹ Mana nì ɓě kɔ̃o, Éézùɖùɛ̀-nyɔ̀ ɓě. Nyɔ ɖò se nì kà ɓě nìà kɛ. Ɓě mɔ̀ ɓóɖó-dù ɓɛ́ Bounɓoɔ̀ ɖǎ póìn nyɛ. Bounɓoɔ̀ mìɔùn mɔ̀ ɓěɛ̀ dyí-zĩ̀ìn-ɖɛ̀ kè ɓěɛ̀ gbo-kpá-nyɔ̀. Ɔ mɔ̀ gàsíà ɓɛ́ ɔ nyí ɓě to-ɖu-ɖu kɛ. Ɓěɛ̀ mú-nyɛ́-nyɔ̀ ɓěɔ̀ mu ɓě ɓo zɔ̃̌ dyi jìɖǐìn, ké ɓě mu wa kɔ̃in síìn.”